ئه‌ڤرۆ نيوز:
رۆژناما “ئندى پندێنت”يا بريتانى ژ چه‌ند ژێده‌رێن نه‌ته‌وێ”ئيگۆر” يێن ب ئاين مۆسلمان و وه‌لاتيێن چينى راگه‌هاند: ل هنده‌ك ده‌ڤه‌رێن وى وه‌لاتى و كه‌رتێ “چنگيانگ” يێ رۆژئاڤا رۆژيێن ره‌مه‌زانێ يێن ئه‌ڤ ساله لێ هاتينه قه‌ده‌غه‌كرن.
رۆژنامێ نڤيسى يه: “ده‌سته‌لاداران داخواز ژ وه‌لاتيێن ده‌ڤه‌رێ كريه كو ب رۆژى نه‌بن، فه‌رمان ژى لێ هاتيه كرن د رۆژانێن ره‌مه‌زانێ دا به‌رده‌وام بن ل سه‌ر ڤه‌كرنا خوارنگه‌هێن خوه”.
“ديلسكات راسكيت” رابه‌رێ ئيگۆرێن موسلمانه ب رۆژنامێ گۆت: “حوكمه‌تا چينى ب وێ رێ دڤێت كونترۆلا بيروباوه‌رێن موسلمانان بكه‌ت”، هوشدارى ژى دا كو ئه‌و ره‌فتارێن وان دبنه ئه‌گه‌رێ وێ چه‌ندێ كو موسلمان زێده‌تر به‌رسينگێ ده‌سته‌لاتێ بگرن.
راسكيت بۆ راديۆيا “ئاسيايا ئازاد” راگه‌هاند: ده‌سته‌لاتدارێن چنى بابێن ئيگۆر نه‌چار كرينه سۆزێ بده‌ن كو رێ نه‌ده‌ن زارۆيێن وان ب رۆژى بن”.
حوكمه‌تا چينى به‌رده‌وام خه‌لكێ نه‌ته‌وه ئيگۆر و ئاين موسلمان كو خه‌لكه‌كێ كێم يێ وى وه‌لاتى نه ب وێ چه‌ندێ تۆمه‌تبار دكه‌ت كو هنده‌ك كارێن تيرۆرى ئه‌نجام داينه و هێرش كريه سه‌ر دامه‌زراوێن مه‌ده‌نى و حكۆمى، به‌لێ ئه‌و وان تۆمه‌تان ره‌ت دكه‌ن.
نيشاندان