ئه‌ڤرۆ نيوز:
ژ ئه‌نجامێ ئێكگرتنا هه‌ردو فشارێن نزمێن ده‌ريا ناڤه‌راست و ده‌ريا سۆر بۆ سه‌ر هه‌رێما كوردستانێ ل هنده‌ك ده‌ڤه‌رێن جودا يێن كوردستانێ رێژێن جودا يێن باران بارينێ هاتينه تۆماركرن و ل دهۆكێ ژى رێژا باران بارينێ هه‌تا ئه‌ڤرۆ گه‌هشتيه 427.4 پلان.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى دێ هنده‌ك ئه‌ور ل ئه‌سمانى هه‌بن و ل هنده‌ك جهان ژى دێ ب تمامى بيته ئه‌ور و باران ژى ب ره‌نگه‌كێ كێم ل هنده‌ك ده‌ڤه‌ران باريت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ ئێكگرتنا هه‌ردو فشارێن نزمێن ده‌ريا ناڤه‌راست و ده‌ريا سۆر بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رێكه‌فتى 2015.2.18 سوبه‌هى دێ هنده‌ك ئه‌ور ل ئه‌سمانى هه‌بن و ل هنده‌ك جهان ژى دێ ب تمامى بيته ئه‌ور و باران ژى ب ره‌نگه‌كێ كێم ل هنده‌ك ده‌ڤه‌ران باريت.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ دێ نێزيكى رۆژێن به‌رى نوكه بيت وه‌كو هه‌ڤبه‌ركى ل گه‌ل رۆژێن بۆرى ب ره‌نگه‌كى د ناڤبه‌را 10 بۆ 5 دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باكوورێ رۆژهه‌لات بيت ب ره‌نگه‌كى دێ يێ ل سه‌رخوه بيت د ناڤبه‌را 5 بۆ 20 كلم د ده‌مژمێره‌كێ دا و ماوێ ديتنێ ژى دێ د ناڤبه‌را 8 بۆ 10 كلم دا بيت.
ئه‌ڤرۆ:
ژنەکا خودان زارۆ د ھەیڤەکێ دا پەیوەندییەکا ئەڤینیێ ل گەل زەلامەکێ خودان نەە زارۆ گرێدەت و ژڤانی دەنە ھەڤدو، زەلام دھێتە مالا وێ و دچنە د ژوورا وێ یا نڤستنێ ڤە، لێ د وی دەمی دا جیرانێ وێ ب سەر ھلدبیت و ناگەھن کریارا زنایێ ب تەمامی ئەنجام بدەن، ئەڤێ ژنێ خیانەت ل زەلامێ خوەکر، زەلامێ وێ ژی نەڤیا و ژێ جودا بوو، پشتی کێشە گەھشتیە دادگەھێ ھەر ئێک ژ زەلامی و ژنێ ب سزایێ دو سال و نیڤا ھاتنە حوکمکرن.
پارێزەر سیپەل حەبیب ل دادگەھا دھۆکێ بۆ رۆژناما ئەڤرۆ دیارکر کو ژنەکا ٣٤ سالی یا خودان زارۆ ئاکنجیا دھۆکێ شکایەت لێ ھاتەکرن و گۆت: ب تومەتا کرنا زنایێ پشتی کو گەلەک جیرانێن وێ چاڤدێرییا وی َکری کو بەری نوکە دزانی یا باش نینە و گەلەک جارا گۆتبوو ھەڤژینێ وێ ژی، دیار بو ئەڤێ ژنێ ئەڤە ھەیڤەکە پەیوەندییا ل گەل زەلامەکێ ب ژن ھەی کو بابێ نەە زارۆیانە، گۆتژی ھەردوییان ژڤان دابوو ھەڤدو دەمێ زەلامێ وێ دچیتە ئەرکێ خوە یێ لەشکەری، ئەو ژن ژڤانی دەتە وی زەلامی و دھێتە مالا وێ و دچنە د ژوورا وێ یا نڤستنێ ڤە، جیرانێ وێ رادبیت چاڤدێرییا وێ دکەت و ھێدی ھێدی دچیتە د خانیێ وێ ڤە و دچیتە د ژوورا وێ یا نڤستنێ ڤە، دبینیت زەلامی یا خوە د دولابێ دا ڤەشارتی، کریارا زنایێ ب تمامی نە چێ ببوو، ناڤھاتیێ دیارکر ژی کو پشتی دادگەھێ ھەموو گرۆڤەیێن ڤێ کێشێ کومکرین ئەڤ ژنە و زەلامە ھاتنە حوکمکرن ھەر ئێک ژ وان ب حوکمێ دو سال و نیڤا ھاتنە دادگەھکرن، پاشان زەلامێ ڤێ ژنا خیانەت لێ کری داخوازا بەردانێ ژێ کر و بەردان ب دەست زەلامی ڤە ھات.
ڤەکولەرێ جڤاکی عەبدولجەبار عەبدولرەحمان خویا دکەت کو ئەڤ بابەتە گەلەک چەقان ب خوەڤە دگریت ئەگەر ئەم دەستپێکی ھەردوو چەقێن سەرەکی وەرگرین، ئێک بەری ھەڤژینیێ دەستپێدکەت ئەوە دەمێ ھەڤژینی نە ل سەر بنیاتێ رازیبوونا ھەردوو لایەنان بیت چ خورتی ژ لایێ خێزانا زەلامی چ یا ژنێ یان مایتێکرن ژ ھەر لایەکی ڤە کو دبیت ئەگەر ئاریشە ھەبن، نموونە جوداھیا ژی و ئاستێ خواندنی بیر وبوچوونان ھتد.
ناڤھاتی گۆتژی چەقێ دووێ ئەوە دەمی پشتی ژیانا ھەڤژینی دەست پێدکەت ئەڤە ژی گەلەک لایەنان بخوەڤە دگریت ھەردوو جوین توش دبن یین ھەڤژینی برێکا ئەڤینی ورازیبوونا ھەردوو لایەنان ویێن ھەڤژینینا وان بێ حەزا وان ورازیبوونا وان ھاتی کرن.
زێدەتر گۆت: ھندەک ئەگەر ھەنە وەک نەمانا ڤیانێ دناڤبەرا واندا، زەلام دەمێن درێژ ل مال نەبن یان نەھێت مال یان چاڤێ وی ل دەرڤە بیت، ئەڤ ژ لایێ زەلامی ڤە، ژلایێ ژنێ ڤە ئەگەر دزڤرن ھوکارێن تەکنولوژی وەک ھەبوونا موبایل وئەنترنیت وسەتلایت ودەمێن خوە دگەل بورینت.
ڤەکولەرێ جڤاکی ئاشکراکر ژی کو د رەوشێن سروشتی دا گەلەک جارا ساربوون دکەڤیتە پەیوەندیێن ژن ومێرا ب شێوەکێ گشتی دڤێت مرۆڤ ڤان پەیوەندییان گەرم کەت ب رێکا پێکڤە دەرکەفتن، دیاریان بو ئێک بکریت، گوھۆرینا ژوورا نڤستنێ و ھتد.
ئه‌ڤرۆ:
ئاژانسا مێھر یا ئیرانێ د راپۆرتەکێ دا دیار کر کو محەمەد رزا رەحیمی جێگرێ سەرۆک کۆمارێ بەرێ یێ ئیرانێ ب تۆمەتا گەندەلیێ ژ ئالیێ دادگەھا بلندا ئیرانێ ڤە ھاتە ب پێنج سال سزایێ زیندانێ ھاتە گرتن و رەوانەی زیندنا ئێڤین ل تەھرانێ ھاتە کرن. ل ئالیێ دی پرانیا دەزگەھێن راگەھاندنا ئیرانێ دیار دکەن کو گەلەک کەسێن دی ژی ھەنە کو دڤێت بھێنە گرتن و گرتنا رەحیمی پێنگاڤەکا باشە بۆ نەھێلانا گەندەلیێ.
ئه‌ڤرۆ:
پشتی (حوسیان) کودەتایەک ل یەمەنی کری و حوکمەت و سەرۆکێ وی وەلاتی لاداین و دەستھەلات وەرگرتی، ئەو وەلاتە بەر ب پاشەرۆژەکا نەدیار ڤە دچیت، سەرکردەکێ حوسیێن یەمەنێ ژی دبێژیت دێ بارودۆخێ ئاسایی کەین و مە حەزا گەلێ یەمەنێ بجھئینا د لادانا سەرۆکی و حوکمەتێ دا و دێ دەولەتەکا مەدەنی دامەزرینین.
پشتی (حوسیان) کودەتایەک ل یەمەنی کری و حوکمەت و سەرۆکێ وی وەلاتی لاداین و دەستھەلات وەرگرتی، ئەو وەلاتە بەر ب پاشەرۆژەکا نەدیار ڤە دچیت، سەرکردەکێ حوسیێن یەمەنێ ژی د داخۆیانیەکێ دا بۆ ئەڤرۆ دبێژیت دێ بارودۆخێ ئاسایی کەین و مە حەزا گەلێ یەمەنێ بجھئینا د لادانا سەرۆکی و حوکمەتێ دا و دێ دەولەتەکا مەدەنی دامەزرینین.
حەزام ئەلئەسەد سەرکردەکێ بزاڤا حوسیێن یەمەنێ، د بەرسڤا پرسیارەکا ئەڤرۆ دا، ھوون حوسی کینە، گوت: (ناڤێ مە نە (حوسی) نە، بەلکو ئەڤ ناڤە یێ ھاتیە دانان ل سەر مە وەکو کێمکرنەک بۆمە، یان ژی وەکو ئاماژەک بۆ دامەزرێنەرێ بزاڤا مە ئەوژی (حسێن حوسی) یە، ناڤێ مە یی دروست بزاڤا (انێار اللە) کو ل دەستپێکێ ل باکوورێ یەمەنێ ھەبوو و پاشی ل ھەموو پارێزگەھان خوە سەلماند و ئەز ئەندامێ جڤاتا سیاسی یا ڤێ بزاڤێ مە، مە دەنگێ ئازادیێ یێ بلندکری و ھەموو شێوێن کوتکرنێ دژی مە یێن ھاتینە بکارئینان ھەر ژ سالا ٢٠٠٤ وەرە و وەکو ھەموو گەلێ یەمەنێ، مە ژی پشکداری د شۆرەشا فبرایەرا ٢٠١١ دا کر).
ل دۆر کودەتایا وان ئەنجام دای دژی سەرۆک و حوکمەتا یەمەنێ و وەرگرتنا دەستھەلاتێ ل وی وەلاتی، حەزامی گوت: ( مە ب تنێ شۆرەشا ٢١ سبتەمبەرا ٢٠١٤ نەکریە، بەلکو گەلەک پێکھاتێن یەمەنێ پشکداری ل گەل مە یا تێدا کری و ئەم دخوازین دەولەتەکا مەدەنی و ھەڤپشکیا نیشتمانی بھێتە پێکئینان).
سەبارەت وێ چەندێ کو بزاڤا حوسیان شیعێن یەمەنێ (زەیدیان) ب خوەڤە دگریت و پاشبەندیا بزاڤا وان ب ئیرانێ ڤە ، گوت: ( مە چو ھزرێن مەزھەبی نینن وەکو ل سەر مە دھێتە بەلاڤکرن، بەلکو دناڤ مەدا زەیدی (شیعی) و چەندین ھزرێن دی یێن ھەین، ئانکو ئەم پێکھاتەکین ژ جڤاکێ یەمەنی و ژ چارچۆڤی سیاسیێ یەمەنی و ل پتریا پارێزگەھێن کومارا یەمەنێ مە ھەبوونا خوە یا ھەی، پاشبەندیا مە ب ئیرانێ ڤە ب تنێ تۆمەت بوون ژ لایێ ئەمریکا و ھندەک وەلاتێن کەنداڤی ڤە و مەرەم ژێ ھەلکرنا ھەستیاریێ بوو ل گەل وەلاتێ سعوودیێ، ئەم دخوازین مە پەیوەندی ل گەل ئیرانێ و ھەموو وەلاتێن عەرەبی ھەبیت ل سەر بنەمایێ رێزگرتنێ و نە مایتێکرنێ).
ل دۆر پەیوەندیێن وان ل گەل ئەمریکا، دبێژیت: مە چو پەیوەندی ل گەل (ئیستیکبارا جیھانی) و وەلاتێن وێ ڤە نینە.
خۆیاکر ژی کو ئەو یێ بزاڤێ دکەن بۆ نەھێلانا ڤالاتیا سیاسی ل یەمەنێ و گوت” دێ جڤاتەکا سەرۆکایەتیێ ژ پێنج ئەندامان و جڤاتەکا نیشتمانی ژ ٥٥١ ئەندامان ھێنە پێکئینان”.
ڤی سەرکردێ حوسی دیارکر کو ئەو بەردەوام د شەری دانە دژی چەکدارێن تیرۆرست یێن داعش و قاعیدە کو ناڤێ وان ل یەمەنێ (انێار الشریعە) یە و مە سەرکەفتن یا ئینای و بەری دو رۆژان لەشکرێ یەمەنی پارێزگەھا (بەیزا) ژ وان پاقژکر و تنێ چەند دەڤەرەکێن کێم د بن کونترۆلا داعش و قاعیدە دا ل پارێزگەھا (مەئرب) یێن ماین.
حەزام ئەلئەسەد ئاشکرا ژی کر کو ل یەمەنێ و وەلاتێن کەنداڤی ئایدلۆژیا ھزری یا کو ھزرا تەکفیری و توندوتیژیا دوژمنکاری ژێ ھاتی، گەلەک یا جودا نینە ژ ھزرا قاعیدە و داعشێ و ھزرا ئیخوانا یا سەلەفی یا وەھابی کو تێکەلیەکە ژ ھزرا مەوجودی و بەنا و بن باز و محەمەد کورێ عەبدولوەھابی و ھەتا ھزرا کورێ تەیمیە کو سوتنێ و پەقاندنێ ب رەوا دبینیت، دیسان ل مسرێ مە دیت گەلەک ژ ھزرا ئیخوانان بەر ب ھزرا جیھادی ڤە چوون وەکو زەواھری و عەبدوللا عەزام و گەلەکێن دی.
ناڤبری ئەو یەک ژی دیار کر بالێ سیاسی یێ ئیخوان موسلمین ل یەمەنێ ناڤێ وی (کوربەندی یەمەنی بۆ چاکسازیێ) یە کو ھەڤرکەکێ توندێ بزاڤا مەیە، بالێ لەشکری و تەکفیری ژی یێ ھەی ئەوژی قاعیدە و داعشە و ئەو دێ چارچوڤەکێ سیاسی و راگەھاندنێ ددەتە وی بالێ لەشکری ھەر ئیخوان موسلمینن ئانکو (کوربەندێ یەمەنی بۆ چاکسازیێ) ب خوەیە.
ناڤھاتی دیار ژی کر گرۆپەکا لەشکری کو ھەلگرا ھزرا ئیخوان موسلمین و (عەلی موحسن ئەلئەحمەر) سەرکێشیا وێ دکر، ھەلگرێن ھزرا داعشێ و قاعیدە بوون و وی چارچۆڤەکی سیاسی دابوو وان، لێ پشتی سەرکەفتنا شۆرەشا مە ل مەھا ئیلۆنا بۆری، ئەو چارچۆڤە ئاشکرا بوو و دەست ب لێدانا سەرباز وەلاتیێن مەدەنی یێن بێگونەە کر و لەشکر و میلیشیاتێن مللی یێن ب سەر مەڤە دەست ب ھەوەکێ دژی وان کر و سەرکەفتن ل سەر تۆمارکر.
ل دۆر بوچوونا بزاڤا حوسیان ل سەر ھەرێما کوردستانێ و کێشا کوردی، دبێژیت”مە ئاگەە ژ وێ ستەما رژێما سەدامی و کوشتارێن ب کۆم یێن دژی کوردان دکر ھەبوو، بارێ ھوون کورد نوکە تێدا د ھەبوونا ھەرێما کوردستانێ دا گەلەک یێ باشە د ڤێ قۆناغێ دا کو ھوون خودان ھەرێمەکا فیدرالی نە”.
سەبارەت دامەزراندنا دەولەتا کوردی ل عیراقێ، گوت: (ئەم یێن ل گەل بریارێن مللەتان، ھەر چ بریارەکێ بدەن).
ئەڤرۆ:
بەلاڤبوونا دەنگوباسێ بەلاڤکرنا ھێزا (حەشد ئەلشەعبی) ل پارێزگەھا کەرکوکێ بوویە جھێ دلگرانیا بەرپرس و فەرماندەیێن لەشکری یێن ھەرێما کوردستانێ و سەرکردێ لەشکرێ بەدر ھادی ئەلعامری کو سەرپەرشتیا حەشد ئەلشەعبی دکەت گەفێن وێ چەندێ دکەت کو دێ ل دەمەکێ نێزیک ھێزەکا مەزن بەر ب پارێزگەھا کەرکوکێ ب رێ ئێخیت،ل دۆر ئەڤێ چەندێ فەرماندەکێ لەشکری یێ میحوەرێ کەرکوکێ دبێژیت، ئەڤ چەندە ژ کەسێ ناھێتە قەبوولکرن و ئەم چاڤەریێ ھەلویستەکێ فەرمی یێ کوردستانێ نە.
محەمەد حاجی مەحمود سکرتێرێ گشتی یێ پارتا سۆشیالستا کوردستانێ و دھەمان دەم دا ئێک ژ فەرماندەیێن لەشکری ل میحوەرێ پارێزگەھا کەرکوکێ دیارکر کو حەشد ئەلشەعبی پێگھورێ لەشکرێ عیراقێ یە و بۆ ئەڤرۆ گوت” پشتی لاوازبوون و نەمانا لەشکرێ عیراقێ، حەشد ئەلشەعبی ب ھێز ھاتە دناڤ مەیدانێ دا ل عیراقێ ، ئەڤ ھێزە دەمەکێ درێژە ھەی، لێ نە ب ڤێ ھژمارا مەزن بوو”.
محەمەد حاجی مەحمود ئاماژە ب وێ چەندێ کر کو بەرفرەھبوونا ئەرکێن حەشد ئەلشەعبی پارچەکرنا عیراقێ یە و گوت” حەشد ئەلشەعبی یا شیعانە و زێرەڤانێن نشتیمانی یا سوننەیانە و پێشمەرگە ژی ھێزەکا کوردستانی نە، ئەڤە ئاماژەکێ ب ھێزە بۆ پارچەبوونا عیراقێ بو سێ پارچان و ھەر مەزھەب و نەتەوەک خوە ب رێڤە ببەت، چونکی بتنێ لەشکرێ عیراقێ دەربرین ژ ھەموو نەتەوەو و مەزھەبان دکر، لێ ئەوژی نەما “.
ناڤبری ئەو چەندە ژی دیارکر کو ھەتا نوکە چو بریارێن فەرمی نینن بۆ حەشد ئەلشەعبی و گوت” ھەتا نوکە ب فەرمی چو بەرپرس یان فەرماندەیێن ڤێ ھێزێ ھەلویستێ خوە بەرامبەر ھاتنا وان بۆ پارێزگەھا کەرکوکێ دیار نەکریە، لێ ھەکە ھاتن دێ مەژی وەکو ھەرێما کوردستانێ بەرسڤا خوە ھەبیت”.
ب دیتنا ڤێ فەرماندێ لەشکریێ کوردستانی، ب چو شێوەکێ رێ بۆ کەسی ناھێتە دان و گوت” نە ب تنێ حەشد ئەلشەعبی، بەلکو بۆ چو ھێزەکێ رێ ناھێتە دان بھێتـە دناڤ پارێزگەھا کەرکوکێ دا، چونکو ئەڤە چەندین سالە پێشمەرگەێن کوردستانێ و ئاسایشا کوردستانێ بێ جوداھی خەلکێ وێ د پارێزیت.
محەمەد حاجی مەحمود دیار دکەت کو ھەتا دووماھی چرکە دێ بەرگریێ ژ کەرکوکێ کەین و گوت” چەوا پێش وەخت بەرگری ژ کەرکوکێ ھاتیە کرن، ل داھاتی ژی دا و ب ھێزتر دێ بەرگری ژ ھەبوونا کەرکوکێ کەین، چونکو کەرکوک کوردستانی یە”.
ل دووماھیێ فەرماندێ لەشکری یێ میحوەرێ کەرکوکێ ئەو چەندە راگەھاند” ھەبوونا ھێزێن ب گەلەک ناڤان جھێ مەترسیێ نە، لێ ئەم وەکو ھێزا پێشمەرگێ کوردستانێ دێ شەرێ خوە دژی داعش ب رێ و تەکتیکێن نوو کەین و دێ سەرکەفتنێن مەزن ھەبن”.
ئه‌ڤرۆ نیوز:
حه‌یده‌ر عه‌بادى سه‌رۆك وه‌زیرێن عیراقێ د په‌یجێ خوه یێ تایبه‌ت یێ تورا جڤاكى یا فێسبووكێ به‌لاڤكریه كو وى رۆژا ئێكشه‌مبى پێشوازى ل شاندێ هه‌رێما كوردستانێ كریه ب سه‌رۆكاتیا نێچیرڤان بارزانى و نڤێسیه” مه گوته شاندێ كوردى كو چاره‌كرنا كێشێن د ناڤبه‌را به‌غدا و هه‌رێمێ د به‌رنامێ حكومه‌تا عیراقێ دایه، ل دووڤ قانوون و دستوورى و مه رژدى ل سه‌ر گرنگیا پابه‌ندبوونا هه‌رێم و به‌غدا ل سه‌ر وان خالێن هه‌ردو ئالى رێككه‌ڤتین كریه”
ئه‌ڤرۆ نیوز:
د.عه‌لى سندى وه‌زیرێ پلاندانا حكومه‌تا هه‌رێما كوردستانێ بۆ رووداو دیاركر كو عیراقێ دو ره‌سید یێن هه‌ین، ئێك سندوقه‌كه ب ناڤێ DFI كو یێ ل نیویورك و یا دى بانكا ناوه‌ندیا عیراقێ یه، ئه‌و سندوقا مووچه و پاره پێ دهێته دان، سندوقا DFI هه‌تا دووماهیا سالا 2013 نێزیكى 18 ملیار دولار ره‌سید تێدابوون، به‌لێ وه‌ختێ حه‌یده‌ر عه‌بادى بوویه سه‌رۆك وه‌زیرێن عیراقێ، ئه‌و سندوق به‌تال بوو، نێزیكى ملیاره‌كێ تێدا مایه، حوكمه‌تا عیراقێ ژى ب ژڤانه دووڤچوونا ڤى پاره‌ى بكه‌ت.
ئه‌ڤرۆ نیوز، ڤه‌ده‌ر سوبحى:
حزبوالله یا لبنانی هه‌بوونا ملیشیاێین حزبولله ل ئیراقێ د شه‌رێ دژى داعش دا راگه‌هاند.
بۆ ئێكه‌م جار حه‌سه‌ن نه‌سروالله سه‌رۆكێ حزبوالله یا لوبنانی ئاشكراكر كو گرۆپه‌كێ ملیشیاییێن حزبا وى نوكه یێ ل ئیراقێ و پشكدارن د شه‌رێ دژی داعش دا.
نه‌سرۆالله گۆت: مه به‌ریا نها به‌حس نه‌كریه لێ ژبلی سوریا مه هه‌بوونا خوه یاده‌ستنیشانكری ل ئیراقێ ژی هه‌یه .
تێ زانین حزبوالله پتر ژ هزار ميلیشیاێین خوه برینه سوریا ب تایبه‌ت ناوچا گۆلان و پشته‌ڤانیا رژیما ئه‌سه‌د دكه‌ت.
ئه‌ڤرۆ نیۆز، قائید میرۆ
فڕۆكه‌یێن هه‌ڤپه‌یمانان، ئاڤاهیێ رێڤه‌به‌رایه‌تیا گشتیا چاندنا مووسل بوردومان كرن و د ئه‌نجامدا شه‌ش چه‌كدارێن داعش هاتنه كوشتن و ئاڤاهی ب ته‌مامی هاته تێكدان.
ژێده‌ره‌كێ به‌رپرس بو مالپه‌ڕێ ئه‌ڤرۆ نیۆز راگه‌هاند” ئه‌ڤرۆ فڕۆكه‌یێن شه‌ڕكه‌رێن هه‌ڤپه‌یمانان ل باژێڕێ مووسل رێڤه‌به‌رایه‌تیا چاندنا مووسل بوردۆمانكر، كو باره‌گایه‌كێ سه‌ربازیێ تیرۆرستێن داعش بوو و هاته تێكدان.
ئه‌ڤی ژێده‌ری گۆت ژی” ب ئه‌گه‌رێ ئه‌ڤێ بوردۆمانێ شه‌ش چه‌كدارێن داعش دناڤا ئه‌ڤی باره‌گایێ سه‌ربازی دا هاتنه كوشتن و چوارێن دیژی برینداربوون.
نيشاندان