ئەڤرۆ:

عارف عەلی بەرپرسەکێ پایەبلندێ لیبیا بۆ ئاژانسا رویترز دیار کریە کو داعش ل لیبیا رۆژ ب رۆژێ ب ھێز دکەڤیت و پشتی وێ رێکخراوا تیرۆرستی ل باکورێ لیبیا چەند ناڤەندێن سەربازی بۆ خوە ئاڤاکری نھا گەلەک بیرێن پەترۆلێ کەڤتنە دەستێ داعشێ و ئەو وێ پەترۆلێ دفرۆشن و حوکمەتا لیبیا ژی یا لاوازە و نەشیایە چ بکەت و گۆت: (یەک ژ ئەگەرێن کو داعش شیایە خوە ل لیبیا ب ھێز بکەت پارتێن ئیسلامی یێن لیبایێ نە، چونکو ئەو نە تنێ دژبەریا داعشێ ناکەن بەلکو گەلەک ژ سەرکردێن وان پارتیان پەیوەندیێن باش ل گەل داعشێ ژی ھەنە و ژ بەر ڤێ یەکێ پشتی عیراق و سووریا نھا لیبیا بوویە مەیدانەکا دی یا خەباتا داعشێ).
عارف عەلی ھەروەسا دیار دکەت کو نھا سێ ھەرێمێن گرنگ ل لیبیا ل ژێر دەستێ داعشێ دانە و ئەو جارێ ل دەزگەھێن راگەھاندنێ دا زێدە بەحسێ چالاکیێن خوە ل لیبیا ناکەن و دیارە وان بەرنامەکا دارێتی بۆ لیبیا ھەیە و ژ بەر ڤێ یەکێ ژی نھا ئەو سێ ھەرێمێن کو ل ژێر دەستێ داعشێ دانە دشێن ببنە مەترسیەکا گەلەک مەزن بۆ ئورۆپا.
ل ئالیێ دی سەرۆکێ بەرێ یێ فرەنسا نیکۆلای سارکۆزی د پرێس کۆنفرانسەکێ دا دیار کر کو ھەکە داعش ل لیبیا ب ھێز کەڤیت دێ چالاکیێن خوە ڤەگوھێزیتە فرەنسا و ھەموو وەلاتێن ئورۆپا و ژ بەر ڤێ یەکێ دڤێت بەری کو ئەو ل لیبیا ب ھێز کەڤن وەلاتێن ئورۆپا دەستێوەردانێ ل لبیبا بکەن و فەرە ھەموو گرۆپێن ھشکباوەر ل لیبیا ژناڤ بچن و گۆت: (یەک ژ ئەگەرێن ب ھێزبوونا داعشێ ژی خەمساریا جڤاکێ نێڤدوەلەتی بوو، چونکو د دەمێ خوە دا پێرابوونێن پێدڤی ل دژی وێ رێکخراوا تیرۆرستی نەھاتنە وەرگرتن و وان شیا مفایێ ژ ئالۆزیێن ل دەڤەرا رۆژھەلاتا ناڤین وەربگرن و خوە ب ھێز بکەن و دڤێت ئێدی ئەم نھا دەلیڤێ نەدەینە داعشێ لیبیا ژی وەک عیراق و سووریێ لێ بکەت).