ئه‌ڤرو نیوز:
ئه‌ڤرۆ ل كانتونا كوبانێ، په‌یمانگه‌ها پێگه‌هاندنا موستایان هاته ڤه‌كرن، ل دووڤ ده‌نگوباسه‌كێ ئاژانسا هاوار نیوز، پشتى ب دووماهى هاتنا به‌رهه‌ڤیان بۆ ڤه‌كرنا په‌یمانگه‌ها پێگه‌هاندنا ماموستایان ژ ئالیێ ده‌سته‌یا په‌روه‌ردا كانتونا كوبانى، ئه‌ڤرۆ ئه‌ڤ په‌یمانگه‌هه ب فه‌رمى هاته ڤه‌كرن.
ئەنوەر موسیلم هه‌ڤه‌سه‌رۆكێ كانتونا كوبانێ ڤه‌كرنا ڤێ په‌یمانگه‌ها ب پێنگاڤه‌كا دیرۆكى هژمارت و دیاركر كو گرنگه ئه‌و خوه ل زمانێ خوه بكه‌نه خودان.
ئەڤرۆ نیوز،زنار تۆڤى:
ژ ئه‌نجامێ هاتنا هروبایه‌كێ بهێز ل روژا دوشه‌مبى 1/6/2015 ل ده‌ڤه‌را به‌روارى بالا زیانێ دگه‌هینیته داروبارى و ل گه‌له‌ك جهان به‌رهه‌مێ داروبارى دادقوتیت و هه‌روه‌سا تایێن وان دشكێنیت و جوتیارێن ڤێ ده‌ڤه‌رێ وه‌سا دیاردكه‌ن كو ئه‌ڤه ئێكه‌مین جاره بایێ ب ڤى ره‌نگى ل ڤێ ده‌ڤه‌رێ دهێت و ئه‌ڤ ساله زیان ب به‌رهه‌مێ داروبارێ وان كه‌فت. محه‌مه‌د سالح ئه‌حمه‌د جوتیاره‌كێ ڤێ ده‌ڤه‌رێ یه بۆ ئه‌ڤرو نیوز دبێژیت:ل روژا دوشه‌مبى 1/6/2015 هروبایه‌كێ زورێ بهێز ل ده‌ڤه‌را به‌روراى بالا هات و ژ ئاقارێ چه‌ند گونده‌كان گرت و د ئه‌نجام دا هه‌ر تشتێ كه‌فتیه به‌ر وى بایى داقوتا و هه‌روه‌سا تایێن داروبارى قراندن و ل هنده‌ك جهان داروبارێ وه‌كى دارێ سپیندارێ ژبنى قراندیه.
ڤى جوتیارى گوت ژى:ڤى بایى پتر زیان گه‌هاندیه دارێن سێڤ و حلیك و باهیڤ و مێوێن ترى و گه‌له‌ك ژ به‌رهه‌مێ وان داقوتایه و خرابكریه و هه‌روه‌سا ئه‌ڤ ساله‌ژى ژ ئه‌گه‌رێ ڤى هروبایێ بهێز زیان گه‌هاندیه به‌رهه‌مێ وان و جوتیارێن ڤێ ده‌ڤه‌رێ دێ زیان به‌خش بن.
ئه‌ڤرۆ نیوز:
په‌رله‌مانتاره‌كێ كورد ل په‌رله‌مانێ عیراقێ به‌رڤسا گوتنێن عه‌بادى دده‌ت و دوێ باوه‌رێ دایه ژبه‌ر فشارا شه‌قامێ شیعى ، عه‌بادى فشارێ ل سه‌ر هه‌رێما كوردستانێ دروست دكه‌ت.
حه‌یده‌ر عه‌بادى سه‌رۆك وه‌زیرێن عیراقێ د دیداره‌كێ دا ل گه‌ل كه‌نالێ ئه‌لعراقیه گۆتبوو: به‌غدا ل هه‌یڤا 11 وه‌ره ب نه‌قدى مووچێ فه‌رمانبه‌رێن هه‌رێما كوردستانێ یێ هنارتى، بۆچى هه‌رێم مووچێ فه‌رمانبه‌رێن خوه ناده‌ت.
حاكم سه‌رحان ئه‌ندامێ په‌رله‌مانێ عیراقێ دبێژیت: لایه‌نێن شیعى فشارێ ل سه‌ر عه‌بادى دكه‌ن بۆ وێ یه‌كێ فشارێ ل سه‌ر هه‌رێمێ دروست بكه‌ن، هه‌كه‌ر نه هه‌یڤا 11 ، به‌لكو ل چه‌ند هه‌یڤێن بوورى ژى حكومه‌تا عه‌بادى ئه‌و پاره نه‌هنارتیه كو به‌رامبه‌رى وێ نه‌فتێ ژى بیت یا هه‌رێما كوردستانێ ب رێیا سومو هنارتى.
هه‌ولێر، قائید میرۆ
پۆلیسێن پارێزگه‌ها سلێمانیێ یێ دوڤچوونێ بۆ وێنه‌یه‌كی دكه‌ن، كو ل تۆڕێن كۆمه‌لایه‌تی ده‌نگڤه‌دایه و په‌یڤدارێن پۆلیسێن سلێمانیێ ژی دبێژیت، ئه‌ڤه كه‌سه‌كێ فێلبازه و كارێ پێشمه‌رگه‌ی نینه.
سه‌ركه‌فت ئه‌حمه‌د، په‌یڤدارێ پۆلیسێن پارێزگه‌ها سلێمانیێ بۆ ئه‌ڤرۆ نیۆز گۆت” وێنه‌یه‌ك ل تۆڕێن كۆمه‌لایه‌تی به‌لاڤبوویه و تێدا كه‌سه‌ك بب جلكێن پێشمه‌رگه ل پێش مزگه‌فتێ خوازوكیێ دكه‌ت، به‌لێ هێشتا ئه‌م پشتڕاست نینه ل كیش مزگه‌فتێ یه و هێزێن پۆلیسا ده‌ست ب ڤه‌كۆلینێ كریه”.
سه‌ركه‌فتی گۆتژی” ئه‌م پشتڕاستین ئه‌ڤه پێشمه‌رگه نیه، چونكو نه‌فسیه‌تا پێشمه‌رگه زۆرا بلنده و باوه‌رناكه‌ی چو پێمشه‌رگه‌یه‌ك ئه‌ڤی كاری بكه‌ت، پێشبینی دكه‌ین كه‌سه‌كێ فێلبازبیت و هه‌رده‌مێ ئاشكرابوو كی یه دێ هێته ده‌سته‌سه‌ركرن و گوره‌ی قانوونێ دێ هێته سزادان.
ئه‌ڤرۆ نیوز:
ل باژێرێ سامسون یێ توركى ژ ئالیێ چه‌ند توركێن نه‌ته‌وه‌په‌رست هێرش ل سه‌ر ئاهه‌نگا جه‌ماوه‌رى یا هه‌ده‌پێ دهێته كرن و د ئه‌نجامدا 11 كه‌س بریندار دبن.
ئیبراهیم شاهین، پارێزگارێ باژێرێ سامسون یێ توركیا د به‌یاننامه‌كێ دا دیاركر: ل ده‌مێ برێڤه‌چوونا ئاهه‌نگا جه‌ماوه‌رى یا هه‌ده‌پێ دا بۆ بانگه‌شه‌یا هه‌لبژارتنێن 7 خزیرانێ، چه‌ند كه‌سان هێرش كره سه‌ر لایه‌نگرێن هه‌ده‌پێ و ل وى ده‌مى پولیسان بزاڤا دوورخستنا وان كه‌سێن تێكده‌ر ددا، شه‌ر و پێكدادان چێبوو و 11 كه‌س كو 7 وه‌لاتى بوون و 4 پولیس بوون بریندار دبن و 37 كه‌س ل سه‌ر وێ هێرشێ هاتنه گرتن.
ئەڤرۆ نیۆز، هۆشەنگ تاجر:
سەرۆک وەزیرێن تورکیا ئەحمەد داوود ئوگلۆ پشکداری د بەرنامێ تەلەفزیونا خەبەر تورک کر و راگەهاند کو قۆناغا وەسا برێڤە ناچیت. چونکو هەتا نها ل گەل سێ ئالیان ئەم هەڤدیتنان دکەین کو ئەو ژی ئیمرالی، قەندیل و هەدەپە، نە. پشتی هەلبژارتنان ئەم دێ ڤێ یەکێ ل بەر چاڤان دەرباز کەین، چونکو ئەو سێ ئالی ژی د ناڤا خوە دا زەلال نینن و ئاریشێن خوە هەنە و ئەو یەک ژی کاریگەریا خوە ل سەر چاوانیا برێڤەچوونا پرۆسا ئاشتیێ دکەت.
سەرۆک وەزیرێن تورکیا ئەو یەک ژی دیار کر کو دێ پارتیا وی دیسان ببیتە پارتا یەکێ ل تورکیا و دێ شێت ب تنێ حوکمەتێ پێک بینیت.
ئه‌ڤرۆ نيوز:
ب هه‌ماهه‌نگيا فه‌رمه‌نده‌يا پێشمه‌رگێ زێره‌ڤانى ده‌مژمێرێ 4:00ى ئێڤاريا ئه‌ڤرۆ رۆژا دوشه‌مبى رێكه‌فتى 1ى خزيرانا 2015ێ فرۆكێن شه‌ركه‌رێن هه‌ڤپه‌يمانان دو جاران بنگه‌هێن تيرۆرستێن داعش ل بلنداهيێن بادوش بۆردومان كرن و ژماره‌كا تيرۆرستان كوشتن.
ب گۆره‌يى راگه‌هاندنه‌كێ كو دانه‌ك بۆ ئه‌ڤرۆ نيوز ره‌وانه كريه هاتيه: “ب گۆره‌يى پێزانينێن فه‌رمانده‌يێن مه‌يدانى يێن فه‌رمانده‌يا پێشمه‌رگێ زێره‌ڤانى، ئێڤاريا ئه‌ڤرۆ فرۆكێن شه‌ركه‌رێن هه‌ڤپه‌يمانان بلنداهيێن ده‌وروبه‌رێن ناحيا بادوش كو ب بلنداهيێن بادوش د به‌رنياسن و دكه‌ڤنه ميحوه‌رێ رۆژئاڤا ديجله بۆردومانكرن”.
زێده‌تر هاتيه: “د ئه‌نجاما ڤێ بۆردومانێ دا، سه‌ره‌رايى وه‌شاندنا گورزێن كارا و كوشتن و برينداركرنا ژماره‌كا تيرۆرستان، باره‌گايێن داعش ب ته‌مامى هاتينه خرابكرن و دو جاران هه‌مان جهـ بۆردومان كرن، پتريا ئه‌و تيرۆرستێن ل وێرێ ژى هه‌ين كوشتن”.
بلنداهيێن بادوش ل 10ى خزيرانا 2014ێ ڤه ژ لايێ چه‌كدارێن تيرۆرستێن داعش ڤه هاتنه داگيركرن و بادوش ژى ناحيه‌يه و سه‌ر ب قه‌زا ناڤه‌ندى يا مووسل ڤه‌يه.
ئەڤرۆ نیوز، ئەیاد بەرواری:
رێڤەبەرێ ھەلبژارتیێ عیراقێ یێ تەپا پێی ئاشکراکر کو دەستەیا راھێنانا ھەلبژارتیێ عیراقێ بریارا دوورخستنا یاریکەر (عەلی عەدنان) ژ ھەلبژارتیێ عیراقێ دایە ژبەر نەھاتنا وی دناڤ شاندێ ھەلبژارتیێ عیراقێ ل پارێزگەھا دھۆکێ.
باسل گورگیس د داخۆیانیەکێ دا بۆ سومەریە نیۆز گوت” سەرەرای وێ چەندێ یاریکەر عەلی عەدنان نوکە یێ ل بەغدا، بەلێ ل گەل شاندێ ھەلبژارتیێ عیراقێ نەھات، لەوما دەستەیا راھێنەریێ بریارا دوورخستنا وی دەرکر ژبەر نەھاتنا وی”.
گوت ژی” پشتی وی یاریکەری ھەڤبەستا خوە ل گەل یانا ئودینیزی یا ئیتالی ئیمزاکری، پێدڤی بوو ل گەل شاندێ ھەلبژارتیێ عیراقێ با”.
دھێتە زانین عەلی عەدنان ب شێوەکێ فەرمی ژ یانا (تشایکور ریزا سپۆر) یا تورکی چوویە دناڤ رێزێن یانا (ئودینیزی) یا ئیتالی دا ئەوا ل خۆلا پلا ئێک یاریێ دکەت و ب ڤێ چەندێ دبیتە ئێکەمین یاریکەرێ عیراقی یاریێ ل خۆلا ئیتالی بکەت.
ھەلبژارتیێ عیراقێ نوکە یێ پارێزگەھا دھۆکێ و بریارە ل رۆژا ٤ ڤێ مەھێ یاریەکێ ل گەل یانا زاخۆ بکەت ب ھەلکەفتا ڤەکرنا یاریگەھا زاخۆ یا نێڤدەولەتی.
نيشاندان