ئه‌ڤرۆ:
ئاژانسا ئەلمانیا د راپۆرتەکێ دا دیار دکەت کو پشتی مەسعود بارزانی سەرۆکێ ھەرێما کوردستانێ سەرەدانا ئەمریکا و ھندەک وەلاتێن ئوروپی کری، پشتەڤانیەکا باش بۆ راگەھاندنا دەولەتا کوردی بدەستڤە ئینایە و بارزانی دێ دەولەتا کوردی راگەھینیت و وەلاتێن زلھێز ژی دژبەریا راگەھاندنا دەولەتا کوردی ناکەن.
ئاژانسا دویتشە فیلە یا ئەلمانیا د راپۆرتەکێ دا بەحسێ رەوشا دووماھیێ یا رۆژھەلاتا ناڤین، عیراق و کوردستانێ دکەت و د راپۆرتێ دا ھاتیە دیار کرن کو ئەڤرۆکە ل رۆژھەلاتا ناڤین دو دەولەت پارچە بووینە و ئەو ژی عیراق و سووریانە، داعشێ پشکەک گەلەک مەزن ژ ئاخا ھەر دو وەلاتان داگیر کریە و نھا بەرێ خوە ددەتە بەغدا و دیمەشقێ و ل عیراق و سووریا ئێدی دەولەتەکا ئێکگرتی نەمایە و رەوشا وەلاتان ژی گەلەک خرابە و حوکمەتێن ناڤەندی یێن ھەر دو وەلاتان ژی نەشێن ئێمناھیێ بۆ خەلکێ خوە دابین بکەن و رۆژانە رێکخستنا تیرۆرستی یا داعشێ ب دەھان وەلاتیێن بێ تاوان دکوژیت و لەشکرێ وان وەلاتان ژی نەشیایە سنۆرەکێ بۆ زێدەگاڤیێن داعشێ دانێت.
د بەردەوامیا راپۆرتێ دا ھاتیە دیار کرن کو ھەرێما کوردستانێ ب سیاسەتا سەرۆکێ وێ ھەرێمێ مەسعود بارزانی شیایە ئاخا خوە ژ تیرۆرستێن داعشێ پاقژ بکەت و نھا کورد ئیدارا کەرکووکێ دکەن و دخوازن ب ریفراندومەکێ وی باژارێ مەزن و گرنگ ڤەگەریننە سەر ھەرێما کوردستانێ و نھا کار بۆ وێ یەکێ دھێتە کرن و ب ڤەگەراندنا کەرکووکێ دێ بارزانی دەولەتا کوردی راگەھینیت.
ئاژانسا ئەلمانی ئاماژە ب ڤێ یەکێ کریە کو د سەرەدانا خوە یا ڤێ دووماھیێ دا بۆ ئەمریکا سەرۆک و جێگرێ سەرۆکێ ئەمریکا پشتەڤانیا خوە بۆ بارزانی دیار کرینە و وان ژی ئێدی نەڤێت کو کورد ببنە پشکەک ژ ئالۆزیێن ناڤخوەیی ل عیراقێ، چونکو بۆ ئەمریکا و وەلاتێن رۆژئاڤا ھەبوونا ھەرێم یان ژی دەولەتەکا کوردی ل عیراقێ گەلەک گرنگە، کورد نھا باشتر ژ ھەر کەسەکێ بەرژەوەندیێن رۆژئاڤا دپارێزن و ب ھزاران نەتەوە و کێم نەتەوێن دی یێن کو ژ دەستێ داعشێ رەڤینە نھا ل ھەرێما کوردستانێ دانە و کورد وان دپارێزن و ئەوە ژی خالەکا گەلەک گرنگە کو دبیتە ئەگەر وەلاتێن رۆژئاڤا پشتەڤانیێ ل دەولەتا کوردی بکەن.
د دووماھیا راپۆرتا ئاژانسا دویتشە یا ئەلمانیا دا ئەو یەک ژی ھاتیە دیار کرن کو کورد ل ھەرێما کوردستانێ و پارچێن دی یێن کوردستانێ نھا پتر ژ ھەر دەمەکێ پشتەڤانیێ ل راگەھاندنا دەولەتا کوردی دکەن و گەلەک وەلاتێن کو بەری نھا دژبەریا کوردان دکرن ژی پشتی شەرێ داعشێ بۆ وان دیار بوو کو ھەبوونا دەولەتەکا کوردی چو زیانا خوە بۆ وان نینە، بەلکو بەرۆڤاژی وێ یەکێ کورد دشێن ببنە جیران و ھەڤپەیمانێن باش بۆ وان، ئێک ژ وان وەلاتێن کو نھا ل ھەمبەر دەولەتا کوردی وەک بەرێ توند نینە ژی تورکیایە و بێگومان تورکیا دەمێ دیت ئەمریکا و ئوروپا پشتەڤانیێ ل کوردان دکەن ئێدی ناخوازیت پەیوەندیێن خوە یێن ب ھێز کو ل گەل کوردان ھەنە تێک بدەت و ئەو ھەموو خالە ژی دبنە ئەگەر کو بارزانی رژد بیت د دەمەکێ نێزیک دا دەولەتا کوردی راگەھینیت.

ئەڤرۆ:
سکرتێرێ مەکتەبا سیاسی یا پارتی دیموکراتی کوردستان راگەھاند، چو دەمەکی وەکو نوکە بارودۆخ یێ گونجای نەبوو بۆ راگەھاندنا دەولەتا کوردستانێ، عیراق و سووریا وەکو وەلات نەماینە و تورکیا و ئیرانێ ژی کیێشێن خوە یێن ھەین”.
فازل میرانی سکرتێرێ مەکتەبا سیاسی یا پارتی د بیرھاتنا ساخکرنا شۆرشا گولانێ دا د رێ و رەسمێن پێشوازیکرنێ دا ل ھزار و ٩ گەنجێن ژنوو ھاتینە دناڤ رێزێن پارتی دا، گوتارەک پێشکێشکر و گوت”داعش وەکو دیاردەکا ژ نشکەکێڤە دەمێ پەیدابووی، کێشە نەبوو، بەلێ ئەڤ مەزنبوون و بەرفرەھبوونا داعشێ ژ رێکخراوەکێ بۆ دەولەتەکێ و بوویە جیرانا مە، پرسیارێ دئینیتە پێش، ئایا داعش کی یە؟ ئەم دژی کوشتن و پاشڤەچوونێ نە، بەلێ پرسیار ئەوە کی یە ڤێ چەندێ دکەت؟ ئەوێ ل موزەخانا مووسلێ پەیکەران دشکینیت، یا گوتیێ ڤێ چەندێ بکە، ژبۆ چ؟ دەمێ وەلاتەکێ وەکو عیراقێ موزەخانێ ژدەست ددەت، یان سووریا پارێزگەھەکێ ژ دەست بدەت، ئەو وەکو وەلات دێ مینن، بەلێ ئەم ب بەرخودان و ھیمەتا پێشمەرگێن قارەمان و مللەتێ خودان ھەلویست و سیاسەتا سەرۆک بارزانی ب سەرفەرازی دژین، دناڤ مللەتێ مەدا مەترسیا داعشێ ب ئاشکرایی ھەست پێ ھاتە کرن، لەوما پێدڤیە مە ئەو ئیرادە ھەبیت کو بمینین، چونکی ھەکە بمینین، دەستکەفتێن مەزن ل جھێن خوەنە”.
ل دۆر بارودۆخێ عیراقێ، میرانی گوت” خرابیا ئیدارەکرنا دەولەتا عیراقێ ئەڤ بارودۆخە دروستکر، چونکی ھەموو خەلکی وەسان زانی پشتی ٢٠٠٣ رژێمەکا دیموکراتی یا ھاتی، د گۆتارێن خوەدا وەسا نیشاددا کو عیراق وەلاتەکێ سەقامگیرە، بەلێ راستە دەمێ ھاتیە گوتن، ئەوێ دوور بیت ژ حوکمرانیێ، حەز ل دیموکراتیەتێ یە، بەلێ ھەکە حوکمرانی بکەڤیتە ددەستدا، دێ دژی دیموکراتیەتێ راوەستیت، ئەو رژێما پشتی سەدام ھاتی یا تائیفیە و عیراق بەر ب پارچەبوونێ ڤە بر”.
سکرتێرێ مەکتەبا سیاسی یا پارتی زێدەتر دبێژیت” کورد ئەگەرێن وێ چەندێ نینن کو عیراق کەفتیە د ڤێ قۆناغێ دا، بەلکو خرابیا ئیدارەکرنا دەستھەلاتێ بوو ئەگەر کو عیراق بگەھیتە ڤێ قۆناغێ، لەوما مافێ ھەر مللەتەکی یە ھزر د چارەنڤیسێ خوەدا بکەت، مافێ چارەنڤیس ژی ئێکە ژ ماقێن مرۆڤی، ئەم بەحسێ مافێ چارەنڤیسی دکەین، مە نەگوتیە دێ جودابین، بەلکو دێ بریارەکێ دەین، دەمێ بەحسێ ریفراندۆمێ دکەین، مە نەگوتیە دەولەت، ل ڤێرێ پرسیارەک دروست دبیت، د چ دەقەکێ قانوونی د جیھانێ دا ھەیە ھەموو پێکھاتان مافێ سەرخەبوونێ ھەبیت، بەلێ سەربەخوە نەبن؟ بەحرێن ھندی ھەولێرێ نینە، لێ دەولەتە، قەتەر دەولەتە و ٣٠٠ ھزار کەسە، بۆچی بۆ وان ئاساییە و بۆ مللەتەکێ وەکو مە نابیت؟”.
میرانی دیسا گوت” چو دەمەک وەکو نوکە بارودۆخ بۆ راگەھاندنا دەولەتا کوردستانێ یێ گونجای نینە، بۆ نموونە سوریا و عیراق وەکو دەولەت نەماینە و تورکیا و ئیرانێ کێشێن خوە یێن ھەین، ھەکە بارودۆخێ ناڤخوەیی یێ ئامادەبیت، بۆ وێنە بژارەک د دەستێ مەدا بیت کا ئایا مللەتێ مە یێ رازی یە بچین داخوازا دەولەتبوونێ بکەین کو ئەوژی ئەنجامدانا ریفراندۆمێ یە؟، دەمێ ریفراندۆمێ ژی دکەی، رامانا وێ ئەو نینە دێ سوباھی دەولەت ھێتە راگەھاندن، ئەڤ چەندە دێ ب دانوستاندنێ ھێتە کرن، ل دەمێ راگەھاندنا دەولەتێ پتریا وەلاتێن دەڤەرێ شەڕی ل گەل مە ناکەن، چونکی مە بەرژەوەندیێن پێکڤە یێن ھەین، لەوما د بەرھەڤ نینن دژی ڤێ پرسێ راوەستن”.