ئەڤرۆ نیوز:

چارەسەرکارەکێ کیمیاوی راگەھاند، ھەکە ئاڤا ڤەخوارنێ ب شێوەیەکێ نە ساخلەم بگەھیتە وەلاتیان، دێ نەخۆشی ژێ پەیدابن و ھەتا ١٠٠ نەخۆشیان ھەنە ژ ڤێ چەندێ پەیدادبن و گۆت: دانانا قەستەلان د ناڤ مالان دا و دبن ئەردی ڤە کارەساتە و ئێک ژ ئەگەرانە بۆ پیسیبوونا ئاڤا ڤەخوارنێ و ئاڤ ژێر ئەرد.
عیماد سەلاحەدین، چارەسەرکارێ کیمیاوی و بەرپرسێ تاقیگەھا رێڤەبەریا ئاڤا دەوروبەرێن دھۆکێ بۆ ئەڤرۆ دیار کر، ل ڤان رۆژان وان دەست ب دانا ھەشت سمیناران ل قەزا و ناحیێن دھۆکێ کریە بۆ ھندێ پێزانینان ل سەر ئاڤا پاقژ بدەنە وەلاتیان و گۆت: د ڤان سمیناران دا ئەم بەحسێ بکارئینانا کلۆرکرنا ئاڤێ دکەین کا حوکمەت چەند پارا دمەزێخیت ھەتا دشێت ئاڤا پاقژ دگەھینیتە وەلاتیان و بەحسێ وان نەخشیان دکەین یێن ب رێیا ئاڤا پیس بۆ وەلاتیان دھێنە ڤەگوھاستن.
ناڤبری دیار کر، ھەکە کەسەک ئاڤا ڤەخوارنێ یا پیس ڤەخۆت یان ژی یا ساخلەم نەبیت، رەنگە تووشی نەخۆشیان بیت و نێزیکی ١٠٠ نەخۆشیان ژ ڤێ چەندێ پەیدادبن و ژ وان نەخۆشیان ژی وەکو کۆلێرا، تیفۆ، کیسکێن ئاڤێ، ڤایرۆسێ مێلاکێ، زەرک، زکچوونا زارۆیان و گەلەک نەخۆشیێن دیتر.
دەربارەی ئەگەرێن پیسبوونا ئاڤێ چارەسەرکارێ کیمیاوی خویا کر، حوکمەت ھەردەم ئاڤا پاقژ بۆ وەلاتیان دابین دکەت، بەلێ گەلەک ئەگەر ھەنە کو ئاڤ پیس بگەھیتە وەلاتیان و ژ وان ژی دەمێ زێدەگاڤی ل سەر ژێدەرێن ئاڤێ دھێتە کرن، ھەروەسا دانانا گۆڤێن پەزی و چێکرنا بیستانان ل نێزیک ژێدەرێن ئاڤێ و ل نێزیک بیرێن ئیرتیوازی یێن ئاڤێ، ھەروەسا ھاڤێتن و سۆتنا گلێشی وەکو کۆمەلگەھا کواشێ، دیسا شکەستنا بۆریێن ئاڤێ ژی ئەگەرە بۆ پیسبوونێ، ھەروەسا تێکەھلبوونا ئاڤێ ل گەل ئاڤا جوکان ژی ئەگەرێ سەرەکیە بۆ پیسبوونا ئاڤا ڤەخوارنێ.
عیماد سەلاحەدین ئەو یەک ژی نەڤەشارت کو ھەبوونا قەستەلان د ناڤ مالان دا کو ھەر مالەکێ قەستەلەک د بن خانیێ خوە دا ھەبیت کارەساتەکا مەزنە، چونکو گەلەک جاران حالەت پەیدادبن ئەو ئاڤا قەستەلا دچیتە د ناڤ ژێدەرێن ئاڤێ دا و کارتێکرن ل سەر ئاڤێ دکەت و گۆت ژی: چارەسەریا سەرەکی ئەوە کو پرۆژێن سۆلینان بۆ ئاڤا قەستەلان بھێنە دانان و نابیت ھەر خانیەکی قەستەلا خوە ھەبیت، بەلێ پرۆژەک ھەبیت ب بۆریەکێ ئاڤا قەستەلان و ئاڤا جوکا پێکڤە بچنە جھەکی.
زێدەتر گۆت ژی: نھا ئەڤ پرۆژە ل بەغدا ھەیە کو ئاڤا قەستەلان و ئاڤا جوکان ب رێیا پرۆژەکی ب بۆریان ژ ناڤ باژێری دەردکەڤیت، ھەروەسا ل باژێرەکێ وەکو قاھیرە خوە ل سالێن سیھان دا ئەو جۆرە پرۆژە ھەبوویە.
بەرپرسێ تاقیگەھا رێڤەبەریا ئاڤا دەوروبەرێن دھۆکێ دا زانین کو پێدڤیە ھەر کارگەھەکا کار ب ئاڤێ بکەت پرۆژێ خوە یێ چارەسەرکرنا ئاڤێ یێ تایبەت ھەبیت و نە ئاڤا وێ عەشوائی بچیتە بن ئەردی و کارتێکرنێ ل ئاڤا ژێر ئەرد بکەت و گۆت: ھندەک پرۆژێن یەکێن ئاکنجیبوونێ ھەنە ھەتا نوکە کەس نزانیت ئاڤا وان یا پیس کیڤە دچیت و چاوا دچیتە د بن ئەردی ڤە.

ئەڤرۆ نیوز:
عەلی عەونی ئەندامێ سەرکردایەتیا پارتی دیموکراتی کوردستان و بەرپرسێ لقا ٢٠ یا شێخان بو روژناما ئەڤرۆ دیار کر کو ئەو ئامادەکاریێن حکومەت و لەشکەرێ عیراقێ بۆ رزگارکرنا موسل دکەن روژ ب روژ ھیڤیا ئازاد کرنا مووسل ب رێکا عیراقێ دویر لاواز دکەت بەلێ ئەگەر ھەموو حکومەتێن بنیات دیموکرات ل سەر ئاستێ نێڤدەولەتی ب ھێزەکا مەزن ھاری مە بکەن دێ شێین مووسل رزگارکەین ل دەستێن داعش.
ل دووڤ گۆتنێن عەلی عەونی ب زەحمەتە مافێن خەلکێ سنی یێ مووسل و دەڤەرێن سنی نشین ب رێکا حکومەتا عیراقێ بھێنە پاراستن و ئەو چەند ھیڤیەکا ڤالایە لەوما ژی دەولەتەکا وەکی ئەمریکا و ئوروپا ھاری مە بکەن ئەم بشێین رزگارکەین چونکو ھەبونا داعش ل مووسل دێ بیتە مەترسیەکا دژوار ل سەر ئیمناھیا کوردستانێ.
ناڤبری دیار کر کو سەروک بارزانی بویە جھێ باوەریا سەرکردەیێن جیھانێ و ژ ئالیێن سیاسی ڤە راستی پەیوەندی کرن ب ھەمی سەروکێن دەولەتان ڤە ئەم یێن وان فێری ھندێ دکەین کو ئەم جھێ مەترسیێ نینین ل سەر بەرژەوەندیا عەرەبا بەلکو ئەم پێکھاتەیەکین ل دنیایێ حەقێ مە ژیانە ئەم کارین بەژدار بین د سەقامگیریا ئێمناھیا دنیایێ دا و بەرژوەندیێن گەلێن جیھانێ دا چونکو بەرژەوەندیێن مە ھەمیا ب ھەڤرا گرێداینە ئەڤە دشێت پەیوەندیێن مە یێن سیاسی دگەل وەلاتان دروست کەت وەکو مێر وەلاتەکێ گرنگ مەرکەزێ بریارا وەلاتێن عەرەبایە بێ کو ئەم بشێن دوست و ھەڤالا بخو دیار کەین نە بتنێ د مەجالێ ئابوری دا مەجالێ سیاسی دا.
ناڤبری دیار کر کو عیراقێ لەشکەر نینە لەشکەرێ وان لەشکەرەکێ تایفی یە ئەو جھێ دەڤەرێن سنیا وان بخو باوەری پێ نینە کو ئەڤە دەڤەرێن وانە خو ل سەرا بدەن کوشتن چونکو بنیاتێ ئاڤاکرنا لەشکەرێ عیراقێ ل سەر وی بنیاتی ھاتیە دامەزراندن کو ئەڤە لەشکەرێ عیراقێ بیت بەس ھێدی ھێدی پشتی ٢٠٠٣ ھێڤە وەکو چاوا ێدام کرە لەشکەرێ بەعسیا ئەڤانا کرە لەشکەرەکێ شیعی وەختێ ڤی دەمی ئەژی بچمە جھێ شیعی یا شەری بکەم من باوەری ب شەرعیەت رامالیا شەرێ خو نابیت، ل کوردستانێ من باوەری یا بخو ھەی ئاخا منە و وەلاتێ منە ژ بنیات ئەڤ تشتە ل عیراقێ نەبویە ھەموو ئاماژە و نیشان وێ ھندێ دەردئێخن کو بەرخودان نەھاتیە کرن نە ل مووسل و نە رومادی ژلایێ لەشکرێ عیراقێ ڤە بەلکو وەکی جینیرال جیمسی گوتی پتر رەنگێ تەکتیکەکێ دەت بو چولکرنێ و ئەز بێ ھیڤی مە کو ئەو بشێن لێکولینێ ل سەر کەفتنا مووسل بکەن و نەشێن لێکولینێ ل سەر کەفتنا رومادی ژی بکەن .