ئەڤرۆ نیۆز، سالار دۆسکی:
ئەندامەکێ جڤاتا نوونه‌رێن عیراقێ بۆ مالپەرێ ئەڤرۆ نیۆز دیارکر کو گڤاشتن یێ دھێنەکرن کو قانوونا دادگەھا ئتيحادی بھێتە پەژراندن و کوردان تێبینی ل سەر ھەنە.
حاکم سەرحان سلێڤانەی ئەو چەندە ژی گۆت: “ب ھەموو رەنگان قەبوول ناکەین چونکو ئەڤە تشتەکێ نەيێ دستووری یە و ناھێتە قەبوولکرن و ئەڤە دژی دەستوری یە”.
ھەڤدەم حاکم سەرحان سلێڤانەی ئاشکرا کر کو دادگەھا ئتيحادی ژ ١٣ کەسان پێک دھێن و کوردان دێ رۆلەکێ سەرەکی ھەبیت چونکو وەکو نەتەوەیێ دوویێ پشتی عەرەبان دھێتە ھەژمارتن”.
ئه‌ڤرۆ:
ژ گرنگترین ساخلەتێن کچ بۆ قارەمانێن خەونێن خوە یێن چاڤەرێکری ددانیت ئەوە کو بەژنەکا بلند ھەبیت، ھەڤ چەند ھەر بچووکاتی ل سەر مێشکێ کچێ زال دبیت، زێدەباری ھندەک ساخلەتێن دی، کچ دێ ئاڤۆریێن ھەڤپشکێ ژیانا خوە د سەرێ خوەدا وێنە کەت و بەژنا بلند دێ ژ ھەمی ھۆکارێن دی بھێزتر بیت کو سەرنجا وێ راکێشیت، ژن حەز ژ وی زەلامی دکەن یێ ژ وان بلندتر بیت، و کەسێ بزاڤ نەکریە ڤێ نھێنیێ بزانیت.
ئەنجامێن ڤەکۆلینەکا پۆلەندی یا نوو دوپاتکر کو پرانیا ژنان حەز دکەن بگەھنە زەلامەکێ ژ وان درێژتر، ئەڤە ژی بۆ چەندێ دزڤریت کو بەژنا بلند نیشانا ساخلەمیەکا باشە و ئەڤە کونترۆلا مێشکێ ژ ناڤ دا یێ ژنێ دکەت.
ھەروەسا بەژنا بلند یا زەلامی د مێشکێ ژنێ دا ساخلەتەکا مێرانیێ یە کو ژن لێدگەریت و حەز دکەت ل نک وی زەلامی ھەبیت یا ئەو دگەھیتێ، ژ گرنگترین ڤان ساخلەتان ژی زیرەکی و بەرگریکرن و پاراستنا وێ.
سەبارەت زەلامی ژی پتر حەز ژ ژنا بەژن کورت دکەت، ئەڤە ل دووڤ ڤەکۆلینەکا ئەمریکی یا نوو ژ بەر ھەبوونا ھندەک ساخلەتان یێن ژنێن بەژن کورت ھەین ئەو ژی بزاڤ و زیندیبوون، بەژنا کورت ژی ل نک ژنێ نیشانا ھەڤبەندیەکا سەرکەفتیە.
بلنداھیا گونجای یا ژنێ بۆ زەلامی ١٧٣سم، بەلێ ژن حەز دکەت شوو ب زەلامەکی بکەت کو بلنداھیا وی ژ ١٨٨سم زێدەتر نەبیت.
ئەڤرۆ:
چو ھەڤبەندیێن دلینی د ناڤبەرا ژن و زەلامان دا د بێ دوبەرەکی نینن، ئەو ژ بەر رێیا ھزرکرنا ھەر لایەکی و رێیا دەربرینی. ھندەک کاروباران زەلام سروشتی دبینیتبەلێ وەدکەن کو ژن ژ کەربان سەرێ وێ بپەقیت، ئەو ژی ئەڤ دەە رەفتارەنە.
ھندی زەلام بزاڤێ بکەت د ژنێ بگەھیت دێ ھەر ھندەک خالێن دوبەرەکیێ مینن، خو ل سەر ھندەک کاروبارێن سڤک ژی د چاڤێن زەلامی دا بەلێ ژنێ تۆرە دکەت و کەربێن وێ ڤەدکەت.
سایتێ “گوفیمنین” یێ ئەمانی ئەڤ دەە رەفتارە بەلاڤکرینە کو یا باشە زەلام ژێ دوور بکەڤیت ھەکە بڤێت سینگ لێکدانان ل گەل ھەڤژینا خوە کێم بکەت:
گوھارتنا کەنالێ تەلەڤزیۆنێ: ژن یا ل سەر قەنەپێ روونشتیە و یا خوە بەرھەڤ دکەت دا بەرێخوە بدەتە زنجیرا درامایێ یا خۆشتڤی ل بەر دلێ وێ، و ژ نشکەکێ ڤە زەلام دێ ھێت و دێ کەنالی گوھۆریت دا بەرێخوە بدەتە یاریا تەپاپێ، ئەڤ وێنە ل گەلەک مالان دوبارە دبیت و دبیت زەلام ب تشتەکی سروشتی دبینیت، بەلێ ئەو ژ ھەمی تشتان پتر کەربێن ژنێ ڤەدکەت.
تەرەکسوتێ وەرزشی: گەلەک کەس خەونان دبینن کو پشتی رۆژەکا تژی وەستیان بگەھنە مال دا تەرەکسوتێ وەرزشی یێ بێھنفرەە بکەتە بەرخوە و ئەڤێ چەندێ ژن تێدگەھیت، بەلێ ئەڤە رامانا وێ یی کو کەربێن وێ ڤەنابن دەمێ ھەرو زەلامێ خوە ب جلکێن ناڤمالێ دبینیت، ژنێ ژی دڤێت زەلام پویتەی ب سەروبەرێ خوە بکەت ل ناڤ مالێ.
مانا وێ ب تنێ د ناڤ خێزانا تەدا: ھەلکەفتێن خێزانی وەکو شەھیان جەژنەبوون دەلیڤەنە کو کەس و کار و ھەڤال بگەھنە ئێک کو کاودانێن رۆژانە دەلیڤێ نادەن مرۆڤ وان ببینیت، بەلێ ئەڤە ناگەھیتە وێ چەندێ کو تو ھەڤژینا خوە بھێلی دەمێ دچیە ناڤ ئاھەنگێ و ل گەل کەس و کارێن خوە سحبەتان بکەی و پویتەی ب وێ نەکەی.
نە رێزگرتن ل رێجیێ: دبیت زەلام نۆرمال دبینیت دەمێ دیکلەکی دئینیتە مال و دکەڤیتە سەر و بۆ خوە زەوقی ژێ چێکەت، ئەڤە وێ ھەستێ بۆ ژنێ پەیدا دکەت کو زەلام رێزێ لێ ناگریت ب تایبەت دەمێ ژن رێجیمێ بکەت.
بەرێخوەدانا ژنێن جوان: بەلکو ژن ل سەر بەرێخوەدانەکا سەرپێ رازی بیت، بەلێ ئەو زەلامێ چاڤێن وی ژ ژنێن جوان ڤەنەبن دەمێ ل گەل دئاخڤیت، ژنێ دگەھینیتە پلا سەرپەقینێ ژ کەربان دا.
نەبوونا پاقژیێ و سیستەمی: گوورێن وی یێ ل ھەمی جھان، تژی وێرێ ئامانێن پیسن بۆ شویشتنێ، ئەڤە گازندا ھەرۆژە یا ژنان بتایبەت ئەوێن شوو ب وان زەلامن کری یێن ھزر دکەن کو پێدڤیە ژن وێ ھنگامێ راکەن یا ئەو چێدکەن.
داخوازکرنا خوارنێ بۆ وێ: ھندەک جاران زەلامی دڤێت ھەڤژینا خوە نازدار بکەت و ل خوارنگەھێ خوارنێ بۆ داخواز بکەت، سەرەرای کو ئەڤە رەفتارەکا جوانە بەلێ ھەستەکی بۆ ژنێ چێدکەت کو ئەو ھێشتا زارۆیە نەشێت ل گەل سفرەچی باخڤیت و ئەو بخوە خوارنێ بۆ خوە داخواز بکەت.
پەیڤێن داخباربوونێ ب ژنێن دی: کومێنتێن ژ جۆرێ “پرچ یان بەژنا وێ ژنا ھە چەندا جوانە” دبیت زەلام بێژیت دەمێ ژنەکا جوان د بەرا دبۆریت و ئەو یێ ل گەل ھەڤینا خوە روینشتیە، ئەڤە کەربەکا مەزن بۆ ژنێ پەیدا دکەت بتایبەت ھەکە ئاڤرۆیەکا درێژ لێ نێری.
پشتگوە ھاڤێتنا ھەڤالا وێ یا نێزیک: دەمێ زەلام ب ژنەکێ داخبار دبیت، بەردەوام بزاڤێ دکەت خوە ل نک خۆشتڤی بکەت و ئەڤە کارەکێ نۆرمالە، بەلێ ھشیار زەلامێ خۆشتڤی دەمێ تو داخواز دکەیە قەھوەکێ یان ھەر تشتەکێ دی و ئەو ل نک ھەڤالا خوە بیت و تو ھەڤالا وێ داخواز نەکەی ل گەل وێ.
پووتەدانا زێدە ب تەلەفۆنێ: ھەکە زەلام ئەو بیت یێ حەز دکەت ژنێ داخواز کەتە خوارنا شیڤێ، گەلەک نەیا جوانە ئەو گەلەک دەمی خوە ب تەلەفۆنێ ڤە مژوول بکەت، ئەو وێ ھەستێ بۆ ژنێ پەیدا دکەت کو تەلەفۆن گەلەک ژ وێ گرنگترە.
ئەڤرۆ:
سترانبێژا ژنوو دگەھیت (پەروازحسێن) راگەھاند ئەو دێ ل گەل ھونەرمەندا ناڤدارا ئیماراتی (ئەحلامێ) پشکداریێ د بەرنامەکی تەلەفزیۆنێ دا کەت و زێدەباری گۆتنا چەند سترانان ب ھەردو زمانێن کوردی و عەرەبی ئەو دێ سۆپرایزەکێ بۆ حەزژێکەرێن دەنگێ خوە دیارکەت.
ناڤھاتیێ گۆت: پەیوەندیێن من ل گەل ئەحلامی زێدە دباشن و بەردەوام مە ئاگەە ژھەڤدۆ ھەیە، لەورا ل دووف داخوازێ وێ دێ پشکداریێ د بەرنامەکێ ھونەری دا کەم، کو ل دۆر سترانێ یە، و ھەر نوکە من یا خوە بەرھەڤکری کو چەندین سترانان ب کوردی و عەرەبی دوی بەرنامەی دا بێژم و حەزژێکەرێن دەنگێ خوە پشت راست دکەم من سۆپرایزەکا باشا بۆ وان بەرھەڤکری و دێ دوی بەرنامەی دا دیارکەم.
دلایەکێ دی گۆت: ب ھەڤکاریا ھەڤژینێ خوە (گۆران سالح) و چەند ھەلبەستڤان و مۆزیکژەنان مژوولی چێکرنا چەند ستراناینە و ب راستی ژی مەنەڤێت لەزێ بکەین دا بەرھەمەکێ باش ژێ چێبیت.
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ په‌يامه‌ك ل دۆر هێرشا په‌كه‌كێ بۆ سه‌ر حزبا ديموكرات به‌لاڤ كر و تێدا گه‌له‌ك ب دژوارى هێرش كره سه‌ر وێ ئالۆزيا دروست بووى، ئاماژێ ب وێ چه‌ندێ ژى دكه‌ت كو كه‌س د شه‌رێ خوكوژيێ دا سه‌رناكه‌ڤيت و پێدڤيه بهێته ته‌حريم كرن.
سه‌رۆكێ هه‌رێما كوردستانێ د په‌ياما خوه دا دبێژيت: “گه‌له‌ك ب دژوارى ئيدانا وێ ئالۆزيێ دكه‌م ئه‌وا ل رۆژا 24ى گۆلانا 2015ێ د ناڤبه‌را پارتيا كرێكارێن كوردستانێ و حزبا ديموكراتا كوردستانا ئيرانێ دا ل ده‌ڤه‌رێن سنورى يێن هه‌رێما كوردستانێ و ئيرانێ دا روودايى. داخوازێ ژى هه‌ردو ا دكه‌ت بشێنه خوه و كێشێ خرابتر لێ نه‌كه‌ن و نه‌بنه ئه‌گه‌رێ پێشڤه‌چوونا ئالۆزيان و ب رێيا دانوستاندن و لێكتێگه‌هشتنێ بگه‌هنه چاره‌سه‌ريان.
مه‌سعود بارزانى دايه زانين ژى كو شه‌رێ خوگۆژى زيانێ دگه‌هينيته هه‌موو لايه‌كى و كه‌س ژى د ڤى شه‌رى دا يێ سه‌ركه‌فتى نابيت، دده‌ته زانين ژى كو ل سه‌ر ئاستێ حزبى و نه‌ته‌وى ژى چو به‌رژه‌وه‌نديه‌ك تێدا نينه. دبێژيت ژى: “پێشتر ژى مه راگه‌هانديه كو پێدڤيه ب هه‌موو ره‌نگه‌كى شه‌رێ براكوژيێ بهێته ته‌حريم كرن و نوكه ب هه‌مان ره‌نگ دووباره دكه‌م و نابيت شه‌رێ خوكوژيێ هه‌بيت و خوينا كوردان ب ده‌ستێ وان بهێته رێتن، پێدڤيه لايه‌ن ل ئاستێ به‌رپرساتيا نشتيمانى بن. هه‌ر ره‌نگه‌كێ شه‌ر و پێكدادانێ د ناڤبه‌را لايه‌نێن كوردى دا، دێ زيانێ ب پێگه‌هـ و ناڤوده‌نگێن گه‌له‌كێ كوردستانێ گه‌هينيت و دێ هيڤيێن خه‌لكێ كوردستانێ تێك ده‌ت.
سه‌رۆكێ هه‌رێما كوردستانێ د به‌رده‌واميا ناما خوه دا دبێژيت: “بۆ هه‌موو لايان رادگه‌هينين كو رێ ناده‌ين، گۆره‌پانا سياسى ببيته جهێ ژێكڤاڤارتنا حساباتێن سياسى و لايه‌نان ل گه‌ل ئێكدو. پێدڤيه حوكمه‌تا هه‌رێما كوردستانێ بزاڤێن خوه بێخيته كار بۆ كۆنترۆلكرنا ڤێ ره‌وشێ و رێگرتنێ ل پێشڤه‌چوونا ڤێ ئالۆزيێ د ناڤبه‌را هه‌ردو لايان دا.
ئەڤرۆ:
پشتی گوھۆرینا سیستەمێ وەرگرتنا ئابوونان ژ لایێ سەندیکاا ماموستایێن کوردستانێ ڤە بۆ ٢٥ ھزار دیناران بۆ دو سالان ل سەر ئێک، رێژەکا ماموستایان خوە ژ سەندیکایێ ڤەکێشایە، ئەگەر ژی بۆ تێکچوونا رەوشا ئابووری یا نھا ڤەدگەرن، د سەر ھندێ را بەری نھا ئابوونە پتر دھاتنە وەرگرتن و ھەیڤانە سێ ھزار دینار بوون و نھا ھزار دینارن. رێڤەبەرێ قوتابخانەکێ دیارکر کو ل قوتابخانا وان نیڤا ماموستایان بووینە ئەندام و نیڤا مایی ھوسا دبینن کو سەندیکا بۆ وان چو ناکەت و باوەری ب سەندیکایێ نینن، چونکو سۆزا ئاڤاکرنا یەکێن ئاکنجیبوونێ و ئینانا ترۆمبێلێن قست بجھنەئیناینە.
ماموستایەکی بۆ رۆژناما ئەڤرۆ دیار کر، ئەڤە پتر بوو ژ سێ سالان وی وەکو ئەندامێ سەندیکایێ خوە تۆمارکربوو، ل سالێن دەستپێکێ وی ھەیڤانە ھزار دینار ددان، پشتی ھینگی سەندیکایێ ھەیڤانە سێ ھزار دینار ژ ھەر ماموستایەکی وەرگرتن، بۆ ھندی خزمەتا ماموستایان بھێتە کرن و گۆت: وەکو من زانی ب وان ئابوونا ھەر ماموستایەکێ چووبایە د ھێلینا زێرین دا، یان ژی خانیەک ئاڤاکربا، یان ژی ببایە خودان زارۆ کوژمەکێ پارەی وەکو پاداشت ددایێ، ھەروەسا د ھندەک بیاڤان دا خزمەتا ماموستیان دکر، لەو من ژی خوە تومارکر.
وی ماموستای کو نەڤیا ناڤێ خوە دیاربکەت گۆت: ل سالا بۆری ئەز چوومە د ھێلینا زێرین دا و من فۆرما خوە و گرێبەسا ھەڤژینیێ پێشکێشی سەندیکایێ کر، بۆ ھندێ پاداشتەکی وەکو خەلات بدەنە من کو ٢٠٠ ھزار دیناربوون، بەلێ ھەتا نوکە من ئەو پارە وەرنەگرتیە و د سەر ھندێ را من سێ سالانە ئابوونە یێن داینە ماموستایان و زێدەتر بۆ ئەڤرۆ گۆت: ما ھەکە ھوسا بیت، دێ چاوا بمە ئەندامێ سەندیکایێ.
زێدەتر گۆت: رێڤەبەرا مە گەلەک ھیڤی و رجا ژ مە کرن کو ببینە ئەندامێن سەندیکایێ و ھەتا گەلەک جارا فشار ل مە دکر کو ببینە ئەندام و گەھشتبوو وی رادەی دگۆت شەرمە و عەیبە بۆ ھەوە بۆ ٢٥ ھزار دیناران خوە ناکەنە ئەندامێن سەندیکایێ.
قەیس عیسا، رێڤەبەرێ ئامادەیا زانستی یا کۆران بۆ ئەڤرۆ دیار کر، نھا وان ٥٥ ماموستا ھەنە و ژ ڤی سەرجەمی ٢٨ ماموستا ئەندامێن سەندیکایێ نە و ٢٧ ب چو رەنگەکی نەبووینە ئەندام و گۆت ژی: رێژا ئەندامبوونێ ھەر وەکو خوە مایە و چو گوھۆرین ب سەردا نەھاتینە، چونکو بەری نھا ژی دەمێ ئابوونە ھەیڤانە سێ ھزار دینار و نھا دەمێ ٢٥ ھزار دینار بۆ دو سالان ژی دھێنە وەرگرتن، ھەر ٢٨ ماموستا ئەندامن و کەسێ خوە نەڤەکێشایە.
ل دور ئەگەرێ ھندێ کا ئەو ٢٧ ماموستایێن ھەتا نھا نەبووینە ئەندام چیە؟ رێڤەبەرێ ئامادەیا زانستی یا کۆران دیار کر، ئەو ھوسا دبینن کو وان باوەری ب سەندیکا ماموستایان نینە، چونکو ھوسا دبینن سەندیکایێ بۆ وان چو نەکریە و ئەو سۆزێن سەندیکایێ داین کو یەکێن ئاکنجیبوونێ بۆ وان ئاڤابکەت و ترۆمبێلێن قست بینیت بجھنەئینان و گۆت ژی: ماموستایێن مە حەز ژ سەندیکایا خوە ناکەن.
رێڤەبەرێ قوتابخانەکا پارێزگەھا دھۆکێ بۆ ئەڤرۆ راگەھاند، نھا وان ٣٠ ماموستا ل قوتابخانێ ھەنە و ژ ڤی سەرجەمی ب تنێ چار مامۆستا بووینە ئەندامێن سەندیکایێ و فۆرمێن خوە پرکرینە و ئابوونە داینە، ئەڤە ژی ژ بەر نەھاتنا مۆووچان و تێکچوونا رەوشا ئابووری یا ماموستایان ڤەدگەریت و گۆت: بەری نھا پتریا مامۆستایێن مە د سەندیکایێ دا ئەندامبوون، بەلێ پشتی ڤێ رەوشێ و وەرگرتنا ئابوونێن دو سالان ل دووڤ ئێک کو ٢٥ ھزار دینار بوون، پتریا ماموستایێن مە خوە ژ سەندیکایێ ڤەکێشان.
وەھبی یونس، سەرۆکێ لقێ دھۆک یێ سەندیکا ماموستایێن کوردستانێ بۆ ئەڤرۆ دیار کر، د دووماھی کۆمبوون دا بریارھاتبوو دان کو ئابوونە ببنە ھەیڤانە ھزار دینار و یێ دو سالان پێکڤە بھێنە وەرگرتن، ئەڤ ٢٥ ھزار دینارە بۆ سالا ٢٠١٥ و ٢٠١٦ نە، ل گەل ھندێ ژی وەکو ھاریکاری بۆ ماموستایێن دھۆکێ، ئەم چار ھەیڤان لێ بۆرینە و ئابوونێن چار ھەیڤان ژ ماموستایان وەرناگرین.
ل دور کێمبوونا ئەندامێن سەندیکایێ وەھبی یونس رەتکر کو ئەندام کێم ببن و ماموستایان خوە ڤەکێشابیت و گۆت: بەری ڤێ بریارێ مە نێزیکی ھەشت ھزار ئەندامان ھەبوون، بەلێ نھا رێژا ئەندامێن سەندیکایێ بۆ ١٠ ھزاران بەرزبوویە.
سەبارەت وێ چەندێ بەری نھا سەندیکایێ ھندەک جۆرێن پاداشتان ددانە ئەندامێن خوە، ژ نھو وێڤە دێ چاوابیت؟ سەرۆکێ لقێ دھۆک یێ سەندیکا ماموستایێن کوردستانێ دبێژیت: د ماوێ سێ سالێن بۆری دا مە ٥٠٠ ملیون دینار داینە ماموستایان وەکو پاداشت، بەلێ پشتی ئابوونە بووینە ھەیڤانە ھزار دینار، باوەرناکەم ئێدی ئەو جۆرێن پاداشتان بھێنە دان.
ل دور بجھنەئینانا سۆزا ئاڤاکرنا یەکێن ئاکنجیبوونێ وەھبی دیار کر کو ئاڤاکرنا وان ب تنێ ل سەر مۆلەتێ مایە، ھەکە ئەرد یێ دروستە و مۆلەتا وەزارەتا باژێرڤانیان و دەستەیا وەبەرھێنانێ رازەمەندیا خوە دیارکریە، ب تنێ یا مای پارێزگارێ دھۆکێ بۆچوونا خوە دیاربکەت و گۆت: وەبەرھێنەر ژی یێ بەرھەڤە دەست ب ئاڤاکرنێ بکەت.
ئەڤرۆ:
د زوربەیا یاریێن تیما تەپا پێ یا یانا دھۆک د خولا عیراقێ دا ترس و کێم شاارەزییا یاریکەران دبیتە ئەگەرێ ژدەست دانا خالان و د گەلەک ھەلکەفتان دا ھەکە سەرەدەریکرنا وان ل گەل کاودانێن یاریێ باشتر با ئەنجام دا باشتربن و دبیت نوکە ل رێزبەندەکا دی ھاتبا دیتن، بو زانینا ئەگەرێن ڤێ ترسێ و رێکێن چارەسەریێ چەندین بوچوون ھاتنە وەرگرتن.
ل دەستپێکێ د.ئەحمەد قاسم بۆ رۆژناما ئەڤرۆ گوت: ھەمی دزڤیت بو لایەنێ دەرونی یێ یاریکەران کو بەری نوکە بەرھەڤی بو ڤێ بارێ گران نەھاتبوکرن، لێ کاودانا ھەمی نەچارکرن ڤی بارێ گرن ھلگرن و ئەڤ چەندە نەبتنێ سەر یاریکەران دھێتە سەپاندن، بەلکو راھێنەر و کارگێری و جەماوەری ژی دگریت و ھەروەسا باوەریا یاریکەران بخو نە یا بھێزە لێ ئەوا بدەستڤە ئینایی ھەتا نوکە نە یا کێمە و جھێ سەربلندیێ یە.
ل دور رێکێن چارەسەریێ ناڤبری گوت: پێدڤیە جەماوەر خوە ل ڤێ تیمێ بکەتە خودان و چاڤێ وان بتنێ ل سەرکەفتنا نەبیت و بارێ یاریکەران زێدەتر گران نەکەت و زێدەتر باوەریێ بدەنێ و ھەروەسا پێدڤیە ھیڤیێن وان ھندی قەبارێ ھێزا وان بیت نابیت زێدەتری ھێزا خوە پێنگاڤا پاڤێژن و یا ژ ھەموویان گرنگتر راگەھاندن دشێت ڤان یاریکەران باش ئاڤاکەت و دشێت بێ ئومێد بکەت، لەورا پێدڤیە باشتر رولێ خوە ببینن و کار ل سەر ڤی لایەنی ب باشی بکەن.
ژلایەکێ دووڤە شرۆڤەکارێ وەرزشی وەحید رەشید گوت: خولا عیراقێ نە یا ب ساناھیە و ئەزموونا تیمێن بەرامبەر و ھەتا راھێنەرێن بەرامبەر مەزنترە ژ ئەزموونا تیما دھۆکێ، چونکو ھەکە شارەزای ھەبا دبیت د گەلەک یاریان دا ئەنجام باشتربان و ھەروەسا تیما دھۆکێ بتنێ ھزرا خوسارەتیێ دکەن و ھزرا سەرکەفتنێ د سەرێ یاریکەران دا نینە، لەورا دڤێت گیانێ سەرکەفتنێ لنک یاریکەان پەیداکەن سەرەرایی ھەمی کاودانا.
ل دور چارەسەریان ناڤبری گوت: پێدڤیە ھزرا ستافێ راھێنەریێ مەزنتر بیت ژ یانوکە و بدیتنا من ل وەرزێ بھێت دێ باشتر بن ئەڤ یاریکەرە، لێ پیدڤی ب راھێنەرەکێ خودان ھزرەکا بەرفرەھن کو بشێت سەرەدەریەکا باش بکەت ل گەل کادوانا بکەت چنکو یێ نوکە دبینیت ئەوا گەھشتیێ مەزنترین دەستکەفتە.
ھەروەسا راھێنەرێ پێشمەرگا ھەولێر سەمیر بابو گوت: گەلەک دەما دەمێ یاریکەر ھزرەکا مەزن دکەت بو تیما بەرامبەر دێ بیتە ترس ل سەر ڤان یاریکەرا و ئەڤ چەندە نورمالە، چنکو زوربەیا یاریکەران گەنجن و ئەگەرەکێ دی یاریکەرێن دھوکێ ھزر دکەن خولا عیراقێ ژ شیانێن وان مەزنترە و زوربەیا یاریکەران ھەست ب کێماسیێ دکەن د یاریان دا و قەبارەکێ مەزن دایە خولا عیراقێ کو نە ژ ھەژی ھندێ یە.
زێدەتر ل دور چارەسەریێ گوت: پێدڤیە راھێنەر رولێ خوە ببینیت و رۆژانە وانا ل سەر ڤێ چەندێ بدەتە یاریکەران و بو وان دیارکەت کو شیانێن وان وەکی ھەر تیمەکا دی نە، چونکو ل گەلەک یاریان ھەکە ترس و شەرم لنک یاریکەان نەبا دا د سەرکەفتیبن و دیارکر کو راگەھاندنا پارێزگەھا دھۆکێ ژی ئەگەرێ ڤێ ترسێ یە کو گەھشتنا دھۆکێ بو ڤێ قوناغێ ب دەستکەفت دانایە و بدیتنا من دھۆک شیانێن مەزنتر ھەنە و دشێت دیرتر بچیت ب مەرجەکی راگەھاندن رولێ خوە یێ دروست بگێریت.
لدووماھیێ یاریکەرێ بەرێ یێ ھەلبژاتیێ عیراقێ عەباس عوبێد گوت: یاریکەرێن دھۆکێ ئاستێن باش نیشان د دەن لێ شارەزایی نینە بشێن بەرھەمەکێ ئاستێ خوە بکەنە سەرکەفتن و دبینم ئەڤ چەندە ل وەرزێ بھێت نامینیت، لێ پێدڤیە یاریکەر باوەریێ بدەنە خوە و خوە ژ کەسێ کێمتر نەبینن و ل سەر راھێنەرێ پێدڤیە کەش و ھەوایەکێ خوش بو یاریکەران دروست بکەت و نەھیلیت یاریکەر بکەڤنە بن فشارێ.
نيشاندان