ئه‌ڤرۆ نيوز:
چه‌كدارێن داعش د حه‌فتيا بۆرى دا، ل باژێرێ رومادى ناڤه‌ندا پارێزگه‌ها ئه‌نبار كۆنترۆل كر و نوكه نێزيكى فرۆكخانا حه‌بانيێ ل رۆژهه‌لاتێ به‌غدا دبيت كو ل وێ ده‌ڤه‌رێ چه‌كدارێن شيعى د به‌ربه‌لاڤن.
ب گۆره‌يى ئاژانسا ده‌نگوباسێن رويته‌رز داعش دوهى رۆژا ئه‌ينى رێكه‌فتى 23ى گۆلانا 2015ێ، شيان ده‌ست ب سه‌ر ده‌ڤه‌را “حه‌سيه” دا بگه‌هينن ل نێزێك باژێرێ خالديه كو يێ ل نێزێكى فرۆكخانا حه‌بانيه كو ئێك ژ گرنگترين فرۆكخانێن عيراقێ يه”.
ب گۆره‌يى ژێده‌رى، چه‌كدارێ، داعش به‌ر ب رۆژئاڤايێ فه‌لۆجه ڤه د پێشڤه‌چوونێ دانه ب مه‌ره‌ما كۆنترۆلكرنا پشكه‌كا دى يا پارێزگه‌ها ئه‌نبار.
جێگرێ سه‌رۆك وه‌زيرێن عيراقێ راگه‌هاند كو مه‌ترسيا رێكخراوا تيرۆرستى يا داعش گه‌هشته به‌ر ده‌رگه‌هێ به‌غدا يا پايته‌خت، داخواز ژى كر كو هه‌موو ل دۆر سۆپايى كۆم ببن دا كو پێش بێخن.
د. رۆژ نورى شاويس، جێگرێ سه‌رۆك وه‌زيرێن عيراقێ، د چارچۆڤێ كۆنگرێ داڤۆس دا كو ل ئوردن ب رێڤه دچيت گۆت: “مه‌ترسيا رێكخراوا تيرۆرستى يا داعش گه‌هشتيه به‌غدا يا پايته‌خت و پێدڤيه هه‌موو روويى ل پێشڤه‌برنا سۆپايى دا بكه‌ن”.
ته‌كست ژى ل سه‌ر وێ چه‌ندێ كر كو پێدڤيه چه‌كدارێن حه‌شه‌د شه‌عبى د چارچۆڤێ له‌شكرێ عيراقێ دا بهێنه كۆمكرن و گۆت: “پێدڤيه سۆپايێ عيراقێ به‌رپرساتيا به‌ربه‌ستێن ئه‌منى يێن روو ب روو عيراقێ دبيت بێخيته ستوويێ خوه و ئه‌ڤه ژى بێى سۆپا ناهێته ديتن”.
ئه‌ڤرۆ نيوز:
ل ده‌ڤه‌رێن كێله‌شين يا ل سه‌ر سنورێ ناڤبه‌را باشوور و رۆژهه‌لاتێ كوردستانێ، گه‌ريلايێن پارتا كرێكارێن كوردستانێ “په‌كه‌كه” ژماره‌كا پێشمه‌رگێن حزبا ديموكراتا كوردستانا ئيرانێ ئابلوقه دان و ئاخفتنكه‌رێ ب ناڤێ پارتا كرێكارێن كوردستانێ ژى راگه‌هاند كو ئه‌و دێ بزاڤێن چاره‌كرنا كێشێ كه‌ن.
ماوێ دو رۆژايه ژماره‌كا پێشمه‌رگێن حزبا ديموكراتا كوردستانێ ل ئيرانێ، ب مه‌ره‌ما ئه‌نجامدانا چه‌ند بزاڤێن سياسى و له‌شكرى چووينه ده‌ڤه‌را كێله‌شين، ئه‌وا دكه‌ڤيته سه‌ر سنورێ باشوور و رۆژهه‌لاتێ كوردستانێ و نێزكى باژێرێ شنۆ يێ سه‌ر ب پارێزگه‌ها ورمێ ڤه‌يه، ل وێرێ ژى ژ لايێ چه‌ند گه‌ريلايێن په‌كه‌كێ ڤه رێگرى لێ هاتيه كرن و ئابلۆقه داينه.
ئه‌ندامه‌كێ كۆميتا ناڤه‌ندى يا حزبا ديموكرات كو وه‌كو وى گۆتى “دا كێشه مه‌زنتر نه‌بيت”، ناڤێ خوه ئاشكه‌را نه‌كر بۆ باسنيوز راگه‌هاند: “به‌لێ ئه‌و پێشمه‌رگه هاتينه ئابلۆقه دان، نوكه بزاڤێن وێ چه‌ندێ دكه‌ن كو ئه‌و و په‌كه‌كه بگه‌نه چاره‌كێ بۆ وێ كێشێ”.
ده‌رباره‌يى هه‌لويستێ حوكمه‌تا هه‌رێما كوردستانێ بۆ ناڤگريێ د ناڤبه‌را وان و په‌كه‌كێ دا گۆت: “هه‌تا نوكه حوكمه‌تا هه‌رێما كوردستانێ نه‌بووينه ناڤگر بۆ چاره‌كرنا ڤێ كێشێ و گۆت: “مه نه‌ڤێت كێشه ئالوز ببيت، ژ به‌ر هندێ داخۆيانيان بۆ ده‌زگه‌هێن راگه‌هاندنێ ناديه‌ن”.
ده‌مهات عه‌گيد، ئاخفتنكه‌ر و به‌رپرسێ په‌يوه‌نديێن ده‌رڤه يێن كۆما جڤاكێن كوردستانێ “كه‌جه‌كه” د داخۆيانيه‌كێ دا بۆ باسنيوز گۆت: “ژماره‌كا پێشمه‌رگێن حزبا ديموكراتا كوردستانێ ل ئيرانێ هاتينه ده‌ڤه‌رێ، ئه‌و ده‌ڤه‌ر ژى ماوه‌كێ زۆره ل بن ده‌ستێ مه، پێشمه‌رگێم حزبا ديموكرات بزاڤ كريه خاله‌كا گۆمركى ل وێ ده‌ڤه‌رێ بدانن، مه ژى داخواز كريه كو وێ ده‌ڤه‌رێ چول بكه‌ن، به‌لێ چول نه‌كرينه، هه‌ر ل وێرێ ماينه، نوكه ژى بزاڤێن چاره‌كرنا كێشێ دكه‌ين و مه نه‌ڤێت كێشته ئالۆزتر لێ بهێت”.
ده‌مهات عه‌گيد ته‌كست ل سه‌ر وێ چه‌ندێ كر كو ئه‌و بزاڤ بۆ رێگرتن و تێكدانا كارێن وايه ل وێ ده‌ڤه‌رێ و گۆت: “پێدڤيه ئه‌و كێشه زوو چاره ببيت و ب دانوستاندنێ د ناڤبه‌را مه و وان دووماهيێ ب ڤێ كێشێ بينين”.
ئەڤرۆ:
بریارە ئه‌ڤرۆ تیما تەپا پێ یا یانا دھۆک یاریا خوە یا دویێ ژ کوما دویێ یا قوناغا بژارە یا خولا عیراقێ یا تەپا پێ بۆ یانێن پلا نایاب بەرامبەر یانا نەفت جنوب بکەت ل دەمژمێر چار و نیڤی ئێڤاری ل یاریگەھا بەسرا یا نێڤدەولەتی.
د ڤێ کومێ دا یانا دھۆک ل رێزا دویێ دھێت ب خالەکێ ئەوا یانا جەویە سەرکێشیا وێ دکەت ب سێ خالان و ڤێ یاریێ ھەتا رادەیەکێ مەزن گرنگیا خوە بۆ یانا دھۆک ھەیە ژبەرکو پێدڤی سەرکەفتنێ یە، ھەکە بڤێت بەردەوامیێ بدەتە ھەڤرکیا خولێ.
بەری ڤێ یاریێ یاریکەرێ تیما تەپا پێ یا یانا دھۆک کامیران خالد د داخویانیەکێ دا بۆ رۆژناما ئەڤرۆ دیارکر د ڤی دەمی دا گڤاشتنەکا زور ل سەر تیمێ ھەیە ژ بەرکو دوھی یاریا دووماھیا خولا ھەرێما کوردستانێ ھاتیە کرن و دووڤ دا بەر ب بەسرا چین و رۆژا شەمبی یاریا خوە ل گەل یانا نەفت جنوب کەن و یاریکەر حەتا رادەکی تووشی وەستیانێ بوینە، لێ بۆ ڤێ یاریێ دێ ھەمی شیانێن ھێنە مەزاختن ھەر چ نەبیت تووشی خوسارەتیێ نەبین و زێدەتر مفای ژ وان یاریا وەرگرین یێن ل یاریگەھا مە دھێنەکرن و ھەمی یاریکەر د بەرھەڤن بۆ ڤێ یاریێ سەرەرای وێ چەندێ کو یانا نەفت جنوب خودان ھژمارەکا زور یا یاریکەرێن خودان شیانە ل سەر ئاستێ عیراقێ.
بەرامبەر عودەی تالب گۆلچیێ یانا نەفت ئەلجنوب بۆ رۆژناما ئەڤرۆ گۆت: د یاریا بوری دا تیما مە بۆ قوربانا بریارێن دادڤانی یێن خەلەت، لێ بۆ ڤێ یاریێ دێ قەرەبویا خوسارەیتا یاریا بەرامبەر جەویە کەین و یانا دھۆک نوکە ھژمارەکا یاریکەرێن گەنج پشکداریێ دکەن و ڤان یاریکەران و ئاستێ وان د خولا عیراقێ دا باشتر ژ خولا ھەرێمێ ژ بەر کو ڤان یاریکەرا حەزا وێ چەندێ ھەیە ھەبونا خوە دیار بکەن ل سەر ئاستێ عیراقێ، لەورا ب یاریەکا ب ساناھی نابیت و پێدڤیە ب ھشیاری سەرەدەریێ ل گەل یانا دھۆک بکەین.
ئه‌ڤرۆ نيوز، قه‌يس ئيسماعيل:
بریارە ئەڤرۆ دەمژمێر ٢:٣٠ یانا سێمێل میھڤانداریا یانا سیروانی نوێ بکەت د چارچوڤێ یاریێن گەرا شەشێ ژ قووناغا ئێکێ یا خولا پلا ئێک یا کوردستانێ، یانا سێمێلی دێ ھەول دەت مفا ژ شیانێن یاریکەرێن خوە و پشتەڤانیا جەماوەرێ خوە بۆ تومارکرنا سەرکەفتنی ل سەر یانا سیروانی نوێ وەرگریت و چاڤێ وێ ل یاریا سەرکێشا خولێ سولاڤ د گەل ھەلۆ بیت ئەگەر خوسارەت بوو دبیت بجیتە رێزا ئێکێ ب ھەڤرا د گەل یانا گارە ئەگەر وێ یانێ ژی سەرکەفتن تومارکر ل سەر یانا ئالا ل یاریگەھا وێ.
ل دۆر ڤێ یاریێ بەھزاد جاڤشین راھێنەرێ تیمێ دبێژێت: ھەر ژ دەستیکی مە دزانی ئاریشا دارایی یا ھەیی، بەلێ مە کرنگێ پێ نەدا و مە کار ل سەر پێشکێشکرنا ئاستەکێ جوان و سەرکەفتنێ کر و ئەڤرۆدێ بۆ سێ خالێن یاریێ کەین و تیما مە یاری بۆ یاریێ ئاستێ وێ بلندتر لێ دھێت و ئەڤی تشتی بۆ خەمخوریا یاریکەرێن خوە دزڤرینم کو خەمخورێن وەرزشا سێمێلێ نە و ب وریەکا بلند دێ ڤێ یارێ کەن و یا کرنگ ل دەف مە سەرکەفتنە و کەیفخوشیا جەماورەێ یانا سێمێلێ.
دلوڤان تیجر گولجیێ یانا سێمێلێ گۆت: یاریەکا گرنگە د ناڤبەرا تیما مە و سیروانی نوێ دا، ب تایبەت سەرکێشا خۆلێ ب جوداھیا خالەکێ ژ مە پێشکەفتیترە و چاڤەرێ پشتەڤانیا جەماوەرێ خوینە د یاریا ئەڤرۆ دا و یاری دەرگەھەکە بۆ سەرکێشیا خولێ.
ل دووماھیێ کاپتنێ یانێ غەریب حەسەن دبینیت یاریا وان یا ب ساھانی نینە و سێ خالێن یاریێ دێ تیمێ بەرەف پلێن پێشیێ بەن و دێ ھەمی شیانێن خوە مەزێخن بۆ سەرکەفتنێ ب مفا وەرگرتن ژ یاریگەھا خوە و جەماورەێ خوە سەرەرایی وێ ئاریشا دارایی کو ھەتا نوکە یاریکەرێن یانا سێمێلێ چ مووچە و گرێبەست وەرنەگرتینە.
ئه‌ڤرۆ نيوز:
شاهێ ئوردن د ديداره‌كێ دا رگه‌هاتد كو ده‌ما ئه‌و ل باكوور و رۆژهه‌لاتان ته‌ماشه دكه‌ن داعش دوژمنێ ژماره ئێكه و ئه‌وان چو هه‌ستێن مرۆڤاتيێ و ئاينى و ژيانێ نينن.
شاهێ ئوردن، عه‌بدولايێ دويێ د ديداره‌كا تايبه‌ت دا بۆ CNN دياركر كو ده‌ما ئه‌و ل باكوور و رۆژهه‌لاتان ته‌ماشه دكه‌ن داعش دوژمنێ ژماره ئێكه
گۆتژى: “مه مليۆنه‌ك و 400 هزار ئاوارێن سورى ل ئوردن يێن هه‌ين، ئه‌ڤه ژى بارگرانيه‌كا مه‌زنه ل سه‌ر وه‌لاتێ مه، هنده‌ك ئاوارێن سورى ل ره‌خێن دى ژى يێن سه‌ر سنورى مه يێن هه‌ين، ئه‌و هه‌تا راده‌كى ده‌ڤه‌ره‌كا ئارام و سه‌قامگيره، دبينم ل سه‌ر هه‌موويان پێدڤيه كار ژ بوو هندێ بكه‌ن ئه‌ڤێ ده‌ڤه‌را باشوورێ سوريا باشتر لێ بكه‌ن كو ژيان لێ هه‌بيت”.
ده‌رباره‌يى وێ چه‌ندێ كو داعش گه‌له‌ك ئاڤاهى و شارستانى ژناڤبرينه، عه‌بدولايێ دويێ گۆت: “ب راستى جهێ دلگرانيێ يه”.
ده‌رباره‌يى ژناڤبرنا جهێن گه‌شتيارى ژى شاهێ ئوردن گۆت: “ده‌رباره‌يى من، ئه‌ز چو ژيواران نابينم كا ئه‌ڤه چاوان هزر دكه‌ن، ئه‌وان چو هه‌ستێن مرۆڤاتيێ و ئاينى و ژيانێ نينن، ئه‌ڤه هوشداريه‌كه بۆ مه هه‌موويان ژى، دا ب رژدى رووى ب رووى ڤێ گه‌فێ ببين”.
ئه‌ڤرۆ نيوز:
رێڤەبەریا گشتیا کەشناسیێ ل ھەرێما کوردستانێ راگەھاند کو سوبه‌هى ئه‌سمان دێ د ناڤبه‌را ئه‌و و ساهياتيێ دا بيت.
پشکا پێشبینیان ل رێڤەبەریا گشتیا کەشنایا ھەرێمێ راگەھاند کو ژ ئه‌نجامێ فشارێن بلندێن وه‌لاتێ توركيا و ڤه‌كێشانا فشارێن نزمێن گزيرتا عه‌ره‌بى بۆ سەر ھەرێما کوردستانێ ئەو پێشبینی دکەن کو سوبه‌هى رێكه‌فتى 24ى گۆلانا 2015ێ ئه‌سمان دێ د ناڤبه‌را ئه‌و و ساهياتيێ دا بيت.
رێڤەبەریا گشتیا کەشناسیێ ل ھەرێما کوردستانێ ئاشکەرا ژی کریە کو پلا گەرماتیێ يا بلند دێ هێته خوار وه‌كو هه‌ڤبه‌ركى ل گه‌ل رۆژێن به‌رى نوكه ب رەنگەکی د ناڤبەرا 17 بۆ 30 دا.
ل دۆر پێشبینیا رێژا ھەوایی و مەودایێ دیتنێ ژی دایە زانین کو دێ ئاراستەیێ وی دێ باشوورێ رۆژهه‌لات بیت ب رەنگەکی دێ ل سه‌ر خوه و ناڤه‌ندى بیت د ناڤبەرا 10 بۆ 20 کلم د دەمژمێرەکێ دا، ماوێ دیتنێ ژی دێ 10 کلم بیت.
ئه‌ڤرۆ نيوز:
ئاخفتنكه‌رێ ب ناڤێ كوچكا سپى جۆس ئيرنست خواست ئيران رێزێ ل سه‌روه‌ريا عيراقێ بگريت، ته‌كست ژى كر ئه‌مريكا ته‌نسيقێ ل گه‌ل وان ناكه‌ت بۆ ژناڤبرنا داعش.
ئيرنست گۆت: “بابه‌تێ رێزگرتنا ئيرانێ بۆ سه‌روه‌ريا هه‌ڤسۆيێن وێ ل عيراقێ ئيدارا ئه‌مريكا دێ پال ده‌ت پێنگاڤه‌كا باشتر به‌ر ب په‌يوه‌نديێن خوه ب هاڤێژيت ژ پێخه‌مه‌ت ئاڤاكرن و پشته‌ڤانيكرنا حوكمه‌تا ناڤه‌ندى يا عيراقى ئه‌وا حه‌يده‌ر عه‌باى سه‌ركێشيا وێ دكه‌ت و ب گه‌له‌ك تايفان ڤه يا گرێدايى.
ئاخفتنكه‌رێ ب ناڤێ كوچكا سپى ئاماژه ب وێ چه‌ندێ ژى كر كو ئه‌و ژ لايێ له‌شكرى ڤه هه‌ڤكاريێ ل گه‌ل ئيرانێ ناكه‌ن و ئه‌و دێ هاريكاريا هێزێن هه‌موو تايفان كه‌ن دا كو داعش ژ ناڤ ببه‌ن ل ژێر ده‌سته‌لاتا سه‌ركرداتيا ناڤه‌ندى ل حوكمه‌تا عيراقێ.
وه‌زيرێ ژ ده‌رڤه يێ ئه‌مريكا ژى د داخۆيانيه‌كێ دا ل به‌رى نوكه راگه‌هاند بوو كو واشنتۆن به‌رژه‌وه‌نديێن هه‌ڤپشك يێن ل گه‌ل ئيرانێ هه‌ين بێى كو بگه‌هيته قووناغا هه‌ماهه‌نگيێ.
كيرى ته‌كست كر كو ئيرانيان هنده‌ك كارێن كارين هاريكاريا ئه‌مريكيان يا كرى وه‌كو شه‌رێ داعش، به‌لێ ل به‌رامبه‌ر ته‌كست ل سه‌ر نه‌بوونا چو ته‌نسيقان كر د ناڤبه‌را وان دا.
ئه‌ڤرۆ نیوز:
د دیروکا کوردستانێ دا ئامێدیێ موما زانین و ره‌وشه‌نبیرییێ ل درێژاهیا ژییێ خویێ به‌رده‌وام رابویه ل سه‌ر هنارتنا روناهیێ داکو باژێرڤانی به‌ره‌ف پێش بچیت و ژیانا مروڤانیێ خوش بیت.
ئێک ژڤان موما کو زانینگەها (قوبەهان)ـــە، ئه‌ڤ زانینگه‌ها ب ناڤ و ده‌نگ دکه‌ڤیته روبارێ ئامێدیێ یێ ژووری ناڤبه‌را هاڤینگه‌ها سویلاڤێ و که‌لها ئامێدیێ ل رۆژ ئاڤا ژووری یا که‌لها ئامێدیێ . ئێک بو ژ مه‌زن ترین زانینگه‌هێن سه‌رانسه‌ری میرگه‌ها به‌هدینان , و نۆکە کەتیە د مەترسیێ دا .
ل سه‌ر ده‌مێ سولتان حسێن وه‌لی هاتیه نویژه‌ن کرن ، سالا ( 940 ) مشه‌ختی هه‌ڤبه‌ری سالا ( 1534 ) زایینی تا سالا ( 981 ) مشه‌ختی هه‌ڤبه‌ری سالا 1575 زایینی حکم کری، ل سالا ١٩٦١ ژلایێ حکومەتا عیراقێ ڤە بزاڤکربون بهێتە نوژەنکرن، لێ ب چیمەنتو هاتبو نیژەنکرن دیسا ژکار کەتبوو، تا سالا ٢٠٠٦ ێ حکومەتا هەرێما کوردستانێ دابوف کومپانیەکا ئیرانێ کو ئەوان ژی چوون کار تێدا نەکر و چوون، لێ ل سالا ٢٠١٣ێ بریار هاتیە دان ژلایێ حکومەتا هەرێما کوردستانێ ڤە دیسا بهێتە نیژەنکرن، لێ ژبەر راوەستاندنا سولفا تا نۆکە هاتیە پشت گوهڤە هاڤێتن .
زانینگەها قوبەهان شینوارەکێ گەلەکێ دێرینە و ئاڤاکرنا ڤێ زانینگه‌هێ گه‌له‌ک یا که‌ڤنه هنده‌ک که‌س دبێژن ( 800 ) هه‌شت سه‌د سالا خویندن لێ هاتیه خاندن ، ئەڤجار داخوازێ ژ وەزارەتا ( شارەوانی و گەشت و گوزاری ) ل هەرێما کوردستانێ دکەین کو راپۆرتا ڤی شینواری یا ل بەر دەستێ وان رەزامەندیێ لسەر بکەن دا بزیترین دەم بهێتە نیژەنکرن ئەگەر نە دێ ڤی شینواری ژدەست دەین و نها د مەترسیەک مەزندا یە .
دماوێ ( 800 ) سالا ژیێ ڤێ زانینگه‌هێ نێزیکی هزاران کوڕێن کوردستانێ و ده‌رڤه‌ی کوردستانێ و ب سه‌دان زانا و ره‌وشه‌نبیر و هزرڤان و هوشمه‌ند ل ڤێزانینگه‌هێ ده‌رکه‌فتینه ژ وانا : (( ئه‌بو سعود العمادی خودانێ ته‌فسیرا ئه‌بو سعود – ره‌سول سورجی – مه‌لا مه‌حمودی بو هوسی محمود به‌هدینی – مه‌لا خه‌لیل سێرتی – مه‌لا یه‌حیا مزوری – مه‌لا شکری ئه‌فه‌ندی – شێخ غیاپ الدین نه‌قشه‌به‌ندی – مه‌لا ئه‌نوه‌رێ مایی – شێخ عبدالسلام بارزنی – مه‌لا قاسمێ کوره – شێخ تاهایێ مایی – عبدلله ئامێدی – شێخ محمد مه‌غربی و حسن نوحی قه‌مه‌ری)) و گه‌له‌کێن دی کو هه‌می بونه ماموستا و زانا و شه‌هره‌زا هه‌ر ئێکێ جهه‌کێ بلند گرد ل ده‌ڤه‌رێن کوردستانێ کار کر ژ بو خزمه‌ت تێگه‌هاندنا مروڤی کورد و کارێ وان ساشوارا و ماندی بونا وان شارستانیه‌ت ل ڤێ ده‌ڤه‌رێ په‌یدابو و ته‌مام بو پاشی خێر و بێرا گه‌هشته هه‌می کوردستانێ و ده‌وله‌تێن جیران له‌ورا ئه‌ڤرو ئه‌م ب دروستی دبینین ئه‌م شانازیێ بڤان که‌سا بکه‌ین و خو سه‌ر بلند بینین به‌رامبه‌ر وان کو ئه‌ڤرو ناسناما وان به‌روی بکه‌ین و ره‌وشه‌نبیری و ره‌سه‌نیا ملله‌تێ خو بده‌ینه نیاسین ژ بو خه‌لکێ خو .
هەردیسان چه‌ندین هوزانڤان و توره‌ڤانا و هوزان و په‌خشان پێ ڤه‌هاندینە کو ئه‌ڤە ئێک ژوانا یه یا کو ماموستا ( گاهر روژدی ئامێدی ) پێ ڤه‌هاندی یه و دبێژیت : –
چ تشته‌کێ عه‌جێبه —– ئاڤاهیێ ڤێ مه‌دره‌سێ
هوستایه‌کێ ( لەبیب )ـه —– خودانێ ڤێ هه‌نده‌سێ
خوینکاره‌کی موهیبه —– مه‌زن ژێ نه‌که پرسێ
ئه‌ڤانا وه‌ک خونینن —– ب جمله کو بوینه سێ
وه‌رن ئاڤاهی ببینن —– دابزانن راستیێ قه‌وسێ
ئه‌و هوستایێ داهی —– به‌رێت بڕین ب مشاری
مه‌خصوص بو ڤی ئاڤاهی —– هه‌ر بو رزا خویندکاری
بەرهەڤکرن : هەڤال ئامێدی
ئه‌ڤرو نیوز،بارزان مزوورى
سه‌ربه‌ست تروانشى ، به‌رپرسێ میحوه‌رێ ناوه‌ران بو مالپه‌رێ ئه‌ڤرو نیوز ئاشكرا كر كو ئه‌ڤرو ده‌مژمێر 6:30 خوله‌ك 22 گولانا 2015 پێشمه‌رگه‌یێن میحوه‌رێ ناوه‌ران ب چه‌كێ گران مه‌زنترین باره‌گایێ داعش یێ سه‌ره‌كى دناڤا گوندێ خورسه‌بات بوردومان كر و ئاگره‌كێ مه‌زن ب باره‌گا و چه‌كێ وان و ترومبێلێن وان كه‌فتینه و حه‌تا نها ده‌مژمێر 11 شه‌ڤ ژى ئاگرێ به‌رده‌وامه و چه‌كدارێن داعش دناڤ ئاگرى دا هاتینه دورپێچ كرن و ب ده‌نگه‌گێ مه‌زن هه‌وار دكه ن كو هێزا وان ل مووسل بگه‌هیته وان ژبو رزگاركرنا وان ئه‌وێن ساخ و ته‌رمێن كوشتیان ببه‌ن و ئه‌و هێزا ل مووسل ژى گه‌هشتیه وێرێ نه‌شێن وان قورتال كه‌ن و به‌رده‌وام پێشمه‌رگه بوردومانا وى باره‌گایى دكه‌ت .
نيشاندان