ئەڤرۆ:
بەرپرسەکێ پارتی دیموکراتی کوردستان ل قەزا خورماتوو ئاشکراکر، شەڕێ شیعە و سونان ل خورماتوو دەستپێکریە و رۆژانە حەشد شەعبی ل بەرچاڤێن خەلکی سونان دکوژن و ئێکەتی ژی بەرپرسە ژئینانا میلیشیێن شیعی بۆ دەڤەرێ، چونکی ل بەردەرگەھێ مەلبەندێ ئێکەتیێ خەلکی دکوژن و بارەگایێ سەرەکیێ وان نێزیک بارەگایەکێ ئێکەتیێ یە ل دەڤەرێن کوردستانی.
تاھر قادر، رێڤەبەرێ ئاسایشا پارتی دیموکراتی کوردستان ل قەزا خورماتوو بۆ رۆژناما ئەڤرۆ گۆت” میلیشیێن شیعی ب رێککەفتن ل گەل ئێکەتیێ ھاتینە دەڤەرێ و دەسپێکێ ل ئامرلی ھاتینە پێش و بڕیاربوو نەھێنە ناڤا باژێڕێ خورماتوو، بەلێ پشتی ھنگی ب ناڤێن ھێزا (سەلام) و (عەسائیب ئەھل ئەلحەق) و ناڤێن جودا کەفتنە ناڤا قەزا خورماتوو، نوکە ژی کار گەھشتیە وێ چەندێ شەڕێ سونە و شیعان دەستپێکریە و ھەتا ل بەر دەرگەھێ مەلبەندێ ئێکەتیێ خەلکی دکوژن، ژبلی کو بارەگایێن حەشد شەعبی دناڤ خورماتوو دا یێن ھەین، ھەتا نێزیکی کەرکووکێ ژی یێن ھاتین و ڕیێەک بەر ب (قادر کەرەم) دچیت ئەو یێن گەھشتینە وێ ڕێ ژی و بەری چەند رۆژان ل سەر ڕێیا سەرەکیا بەغدا خورماتوو چار زێرەڤانێن سەرۆک کۆمارێ عێراقێ رەڤاندینە و نوکە ژی چارەنڤیسێ وان یێ دیارنینە، ئاریشە ئەوە حەشد شەعبی گەھشتیە وان دەڤەرێن بەری داعش بھێت و بارەگایێن خوە ل ناڤا سنۆرێ پێشمەرگەی ڤەکرینە و ھەموو جۆرە چەکەک ژی دگەلدایە”.
رێڤەبەرێ ئاسایشا پارتی گۆت ژی” ل قەزا خورماتوو ئێکەتی نیشتیمانی کوردستان دەستھەلاتدارە و مە وەکی پارتی ھێزا لەشکری ل دەڤەرێ نینە، تنێ مە بارەگایێ لیژنا ناوچە و ئاسایشێ ھەیە، پێشبینیێ دکەین ل دووماھیێ شەڕێ میلیشیێن شیعە و کوردان دێ دەستپێکەت، ژبەرکو مە سەبر نەمایە و رۆژەک و دو نینە، رەوش گەلەک یا خراپە و قایمقامێ خورماتوو تنێ ل تەلەفزیۆنێ ئاخڤتنێن خوەش دکەت و ل گەل حەشد شەعبی دایە و ھەموو شەڤان سەرەدانا بارەگایێن وان دکەت، ددەمێ ھاتنا (ھادی عامری) سەرپەرشتێ حەشد شەعبی بۆ خورماتوو ١٦ دەفتەرێن دۆلاری داینە قایمقامێ خورماتوو، ھەموو ئاسانکاریەک بۆ میلیشیێن شیعی کرینە و ددەمێ ھاتنا وان ژی دا ، مەفرەزەیەکا ئێکەتیێ ل پێش حەشد شەعبی کەفتبوو ھەتا گەھشتینە ناڤا ئامرلی، ئەڤە ژی بوویە جھێ دلگرانیا مە و ھەکە رەوش یا ھوسابیت، چاڤەڕێی پاشەرۆژەکا خراپ دکەین بۆ رەوشا دەڤەرێ و نوکە رەوش ب تەمامی تێکچوویە و دبن کۆنتڕۆلا کوردان دا نەمایە”.

ئەڤرۆ:
پرۆژەکێ تایبەت بۆ ڤەگەریانا کەرکوووکێ و دەڤەرێن دی یێن کوردستانی یێن ژ دەرڤەی ئیدارا ھەرێمێ بۆ سەر ھەرێمێ ڤە دوھی ١٨-٥-٢٠١٥ بۆ سەرۆک بارزانی ھاتە پێشکێشکرن.
شاندەکێ بزاڤا گۆڕان کو ب ئارمانجا پشکداریێ د کۆمبوونا ھێزێن کوردستانی دا سەرەدانا پیرمام کر بوو و پرۆژێ ڤەگەراندنا کەرکووکێ و دەڤەرێن دی یێن کوردستانی کو ژ سێ ھنگاڤان پێک دھێت رادەستی سەرۆک بارزانی کر.
ل دووڤ ڤی پرۆژەی ڤەگەریانا کەرکووکێ و دەڤەرێن دی دێ ب سێ ھنگاڤان بیت، ل پێشیێ دێ پارێزگەە و جڤاتا پارێزگەھێ و جڤاتێن باژێرڤانیان ل دەڤەرێن دابڕی داخوازەکێ پێشکێشی سەرۆکاتیا ھەرێمێ کەن کو ڤەگەرنە سەر ب ھەرێمێ ڤە و پشتی رازیبوونا ھەرسێ سەرۆکاتیێن ھەرێمێ (سەرۆکاتیا ھەرێمی، پەرلەمان و حکومەت) دێ راپرسی ل ڤان دەڤەران ھێتە کرن و ب ئەنجامێ بەلێ دێ ئەڤ دەڤەرە ڤەگەرنە سەر ب ھەرێما کوردستانێ ڤە.