ئەڤرۆ:
پشتی خونیشادانێن ل باژارێ مھابادێ و باژارێن دی یێن رۆژھەلاتێ کوردستانێ دوھی ھێزێن ئێمناھیێ یێن ئیرانێ ل چەندین باژارێن رۆژھەلاتێ کوردستانێ دەست ب ئۆپەراسیۆنێن جودا جودا کرن و ھەتا نھا ب دەھان لاوێن کورد ب ئەگەرێ کو پشکداری د خوەنیشادانان دا کرینە ھاتینە گرتن و چارەنڤیسێ وان ھەتا نھا ژی دیار نینە و رەوشەکا گەلەک خراب ل رۆژھەلاتێ کوردستانێ ھەیە.
حەمید حسێنی چاڤدێرێ سیاسی ل رۆژھەلاتێ کوردستانێ بۆ رۆژناما ئەڤرۆ دیار کر کو دوھی ھێزێن ئێمناھیێ یێن ئیرانێ ل باژارێن، مھاباد، سنە، ئورمیە، سەقز و گەلەک باژارێن دی یێن رۆژھەلاتێ کوردستانێ دەست ب ئۆپراسیۆنەکا مەزن کرن و د ئەنجاما وێ ئۆپەراسیۆنێ دا ھەتا نھا ب دەھان لاوێن کورد ھاتینە دەستەسەرکرن و کەس نزانیت کا نھا ئەو ل کیڤەنە و ھێزێن ئیرانێ ژی دەلیڤێ نادەنە مالباتان دا سەرەدانا لاوێن خوە بکەن و گۆت: (د خوەنیشادانێن ل مھابادێ و باژارێن دی یێن رۆژھەلاتێ کوردستانێ دا ب دەھان خوەنیشادەر بریندار ببوون و مالباتێ وان ئەو کەس نەبربوونە نەخوشخانان دا کو نەھێلن گرتن و پرانیا وان کەسان ل مالان دا دھاتنە دەرمان کرن و ئێک ژ مەرەمێ ڤێ ئۆپەراسیۆنێ ژی گرتنا وان بریندارانە).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو مانگرتن و نەچوونا سەر کاری ژ ئالیێ کارمەندێن کورد ل باژارێن جودا جودا یێن رۆژھەلاتێ کوردستانێ بەردەوامە و خەلکێ کورد دخوازن ب ڤی رەنگی نەرازیبوونا خوە ل ھەمبەر ھەلویستێ ئیرانێ نیشا بدەن و رەوشەنبیرێن کورد ژی داخواز ژ پەرلەمانێ ئیرانێ کرینە کو لیژنەکا سەربخوە ڤەکۆلینێ ل دۆر روودانا مھابادێ بکەت و دڤێت بەرپرسێن وێ روودانێ و یێن بووینە ئەگەرێ مرنا لاوێن کورد بگەھنە سزایێن خوە و گۆت: (رەوشەکا گەلەک خراب نھا ل رۆژھەلاتێ کوردستانێ ھەیە، ترسا سەرەکی یا ئیرانێ ئەوە کو جارەکا دی خوەنیشادان دەستپێ نەکەن و بەرفرەھتر نەبن و ژ بەر ھندێ ژی ب رێیا ئۆپەراسیۆنێن ڤێ دووماھیێ دخوازن رێکخەر و پشکدارێن خوەنیشادانێن رۆژێن بۆری دەستەسەر بکەن و خەلکێ ژی چاڤترسی بکەن دا کو جارەکا دی دەست ب خوەنیشادانێن وەسا نەکەن و بێگومان گرتنا برینداران و کەسێن پشکداری د خوەنیشادانان دا کرینە دێ کاریگەریا خوە ل سەر جڤاکێ کوردی کەت و ئەز باوەرم دێ خوەنیشادان بەردەوام بن و ناھێتە راگرتن).
ناڤھاتی د دووماھیا ئاخڤتنا خوە دا رەخنە ژ رێکخراوێن مافێ مرۆڤی یێن ئورۆپا و جیھانی گرت و دیار کر کو ب دەھان لاوێن کورد ژ ئەنجاما خوەنیشادانان ھاتنە کوشتن و ب دەھان کەس ژی بریندارن و چارەنڤیسێ گەلەک کەسان ژی دیار نینە، لێ وەک پێدڤی وان رێکخراوان ھەلویستێ خوە نیشا نەدان و پێدڤی بوو وان گەفەک مەزن ل ئیرانێ کربا دا رێ بدەت دەزگەھێن راگەھاندنێ روودانان ب رەنگەکێ راست بگەھیننە خەلکی، لێ ئەو یەک نەھاتە کرن و ئەوە ژی نیشا ددەت کو ژ بەر دانوستاندنێن نھا ل گەل ئیرانێ گەلەک وەلات ھزرا بەرژەوەندیێن خوە دکەن و مافێ مرۆڤی ھاتیە پشتگوە خستن.

ئەڤرۆ:

جێگرێ سەرۆکێ لژنا ناڤخوە و ئاسایشێ ل پەرلەمانێ کوردستانێ دیار کر، چەندین سیستەمێن مۆلەتێن شوفێریێ ل ھەرێما کوردستانێ ھەنە، ئەڤ سیستەمە بووینە رێ خوەشکەر کو روودانێن ھاتن و چوونێ بەردەوام ھەبن، ھەمان ئەندام پەرلەمان ئاشکرا دکەت کو لیژنا ناڤبری ماوەکێ درێژە کار دکەت بۆ کێمکرنا روودانان و دانانا سیستەمەکێ پێشکەفتیێ مۆلەتێن ھاژووتنا ترۆمبێلان.

نازم کەبیر، جێگرێ سەرۆکێ لژنا ناڤخوە و ئاسایشێ ل پەرلەمانێ کوردستانێ بۆ رۆژناما ئەڤرۆ ئاشکراکر، بزاڤێن لیژنا ناڤبری بەردەوام ل سەر وێ یەکێ یە کو رەوشا ھاتن و چوونێ ل ھەرێما کوردستانێ بەر ب باشببوونێ ڤە بچیت و بزاڤا بکەن ل دووڤ بەرنامەکێ رێکخستی مۆلەتێن ھاژووتنێ بھێنە رێکخستن د چارچووڤێ ھندەک رێنما و قانوونێن نوو دا و مفا ژ سەربۆرا وەلاتێن پێشکەفتی بھێتە وەرگرتن، دیسا قانوونا ھاتن و چوونا ھەرێما کوردستانێ بھێتە راستڤەکرن.
نازم کەبیر ھێشتا ژی گۆت: ھەموو وەلاتێن پێشکەفتی ھزر د ھندێ دھێتەکرن ژێدەرێن گیان ژ دەست دانێ و ب تایبەت روودانێن ھاتن و چوونێ رێ لێ بھێتەگرتن، چونکو ڤێ سەدەمێ گەلەک تشت ل دووڤ دا دھێن و سەر و مال تێ دچیت، دیسا گەلەک کەس پەککەفتی دکەڤن، دیسان بۆ راستڤەکرنا قانوونا ھاتن و چوونێ کو د بەرژوەندیا وەلاتیان دا بیت ژڤانە شاندەکێ بلند ژ لیژنا نافخوە و ئاسایشێ ل پەرلەمانێ کوردستانێ سەردانا وەلاتی سوید بکەت بۆ دیتنا سەربۆرا وی وەلاتی و مفا وەرگرتن ژ ئەزموونا وان، دیسان رەوشا ھاتن وچوونێ بەر ب باشبوونێ بچیت و سیستەمێ مۆلەتێن ھاژووتنێ ل کوردستانێ ببیتە ئێک سیستەم، چونکو نوکە ل کوردستانێ چەندین سیستەم ھەنە بۆ دانا مۆلەتێ وەک سیستەمێ دانیمارکی و سیستەمێ کەڤنێ عیراقێ، ل پارێزگەھا دھۆک ل سەر سیستەمێ کەڤنێ عیراقی مۆلەتێن ھاژووتنێ بۆ شوفێران دھێنە دان.
جێگرێ سەرۆکێ لژنا ناڤخوە و ئاسایشێ ل پەرلەمانێ کوردستانێ گۆت ژی: رێکخستنا قانوونا ھاتن و چوونێ ل پەرلەمانێ کوردستانێ ب تنێ ب لیژنا ناڤبری ڤە ناھێتەکرن، بەلکو پێدڤی ھەفکاریێ یە ل گەل وەزارەتێن پەروەردێ، رەوشەنبیری و باژێرڤانی و ھەموو ژ لایێ خوە ڤە کار بکەن کو روودانێن ھاتن و چوونێ ل کوردستانێ بەر ب کێمبوونێ ڤە بچن، بۆ نموونە پێدڤیە وەزارەتا پەروەردێن ھەر ل قوناغێن سەرەتایی و دەستپێکا خواندنێ ل پرۆگامێن خواندنێَ دا قوتابیان فێری نیشانێن ھاتن و چوونێ بن و دیسا رەوشەنبیریەک بۆ بھێتە ئاڤاکرن و ئاشنابیت ب رێنما و نیشانێن ھاتن و چوونێ و ئەڤە ل گەل وی مەزن ببن، دیسان دێ روونشتن ل گەل کەسانێن بسپور و شارەزا ھێنەکرن ب وێ مەرەمێ کو ب قانوونێ ئەڤ سیستەمە بھێتە رێکخستن.
نازمی گۆت ژی: ھەبوونا روودانێن ھاتن و چوونێ ژ دو ئالیان ڤە زەڕەرا خوە ھەیە، ھەم روویێ گیانی و مادی بۆ وەلاتی ھەیە، راستە کامیرێن چاڤدێریێ ھەتا رادەکێ باش ھژمارا قوربانیا ل ھەرێما کوردستانێ کێمکریە، لێ دێ بزاڤا کەین ئەڤ ھژمارە ھێشتا کێمتر ژی لێ بھێت.
نازم کەبیر ئەو چەندە ژی گۆت: دڤێت ھەموو کوردستان ببیتە ئێک سیستەم و گرنگیەکا تایبەت ب ھاژووتنا ناڤ باژێری بھێتەدان و نە ھەما ھەر ئێکێ ترا ب دووماھی ئینا و مۆلەت وەرگرت ئەو شوفێرە دڤێت دووڤچوون ھەبیت، دیسا دڤێت ھزر ل وەرزێن سالێ و ھاژووتنا ترۆمبێلێ و دانا مۆلەتدانێ بھێتە وەرگرتن کا بارانە، ھاڤینە و ژ نوو مۆلەت بۆ شوفێری بھێتەدان.
جێگرێ سەرۆکێ لژنا ناڤخوە و ئاسایشێ ل پەرلەمانێ کوردستانێ بەردەوامی دا گۆتنێن خوە و ئاشکراکر کو ل دووڤ ئامارێن رێڤەبەریا گشتیا ھاتن و چوونێ ل ھەرێما کوردستانێ ل سالا ٢٠١٣ روودانێن سەرانسەری ھەرێما کوردستانێ ھاتینە تۆمارکرن پتر ژ ١٣٠٠ کەسان گیانێ خوە ژ دەست دا بوو و ژبلی برینداران، ل سالا ٢٠١٤ ئەڤ روودانە کێمتر بوویە و ئەگەر ژی کامیرێن چاڤدێریێ بووینە و راستە خەلک گازندێ دکەت و ب تایبەت سزادانێ، لێ مفایێ ڤان کامیران گەلەک بوویە و روودان کێمتر لێکرینە.