ئه‌ڤرۆ نيوز:
يه‌كا ئيدارى يا يانا زاخۆ ژڤانێ ڤه‌كرنا ياريگه‌ها خوه يا نوو راگه‌هاند و دێ ژ لايێ سه‌رۆكێ حوكمه‌تا هه‌رێمێ ڤه هێته ڤه‌كرن و ياريا ئێكێ ژى دێ د ناڤبه‌را وان و هه‌لبژارتيێ عيراقێ دا بيت.
ب گۆره‌يى ئه‌و زانياريێن ب ده‌ست ئه‌ڤرۆ نيوز كه‌فتين، بڕياره ل 3ى خزيرانێ ياريگه‌ها يانا زاخۆ يا نوو ژ لايێ سه‌رۆكێ حوكمه‌تا هه‌رێما كوردستانێ ڤه بهێته ڤه‌كرن و ئێك ژ برگێن ڤه‌كرنێ ئه‌نجامدانا ياريه‌كا هه‌ڤالينى يه ل گه‌ل هه‌لبژارتيێ عيراقێ.
هه‌ر ب گۆره‌يى ئه‌و پێزانينێن ل به‌ر ده‌ست ئه‌ڤرۆ نيوز هه‌ين، كۆژمێ 20 مليۆن دۆلاران مه‌زاختيێ ڤێ ياريگه‌هێ بووه هه‌تا ئاماده‌كرنێ.
ئه‌ڤرۆ نيوز:
سه‌رۆك جڤاتا نشتيمانيا بزاڤا گۆڕان راگه‌هاند كو ئه‌و د رازى نه، بارزانى سه‌رۆكێ هه‌رێما كوردستانێ بيت و ب لايێ وان تشته‌كێ ئاسايى يه.
د. ره‌ئۆف عوسمان، سه‌رۆكێ جڤاتا نشتيمانيا بزاڤا گۆڕان د چاڤپێكه‌فتنا خوه دا ل گه‌ل كۆڤارا شار كو ئه‌ڤرۆ رۆژا شه‌مبى رێكه‌فتى 16ى گۆلانا 2015ێ هاتيه به‌لاڤكرن، راگه‌هاند: “ل ده‌ف مه ئاسايى يه، بارزانى بۆ جاره‌كا دى سه‌رۆك بيت”.
سه‌رۆكێ جڤاتا نشتيمانيا بزاڤا گۆڕان رازيبوونا بزاڤا وان بۆ مانا بارزانى ب چه‌ند مه‌رجه‌كان گرێدايه، كو پێكهاتيه ژ: “هه‌كه د دستوورى دا، سيسته‌مێ په‌رله‌مانى بێته بنه‌جهكرن و د ل په‌رله‌مانى بهێته هه‌لبژارتن و ب پڕانيا ده‌نگان بيت”.
ئه‌ڤرۆ نيوز:
يانا به‌رشه‌لۆنا ل ڤى وه‌رزى ئاسته‌كێ بلند نيشا دا و شيا د هه‌موو ئه‌و قاره‌مانيێن كو تێدا يا پشكدار بگه‌هيته دووماهيێ ل سه‌ر ئاستێ كاس و خول و شامپيۆن ليگێ و د دووماهى سێ يارى دا، هه‌كه سه‌ركه‌فتنا تۆمار بكه‌ت دێ سێ ناسناڤان ل ڤى وه‌رزى ب ده‌ست ڤه ئينيت.
هه‌ر چه‌نده ل ده‌سپێكا ڤى وه‌رزى ئاستێ به‌رشه‌لۆنا وه‌كو پێدڤى نه‌بوو، به‌لێ پاشان و ب رێبه‌راتيا لويس نه‌ريكى، يانا به‌رشه‌لۆنا يا ئسپانى ئاسته‌كێ بلند د خولا ئسپانيا و كاسا مه‌لكى و شامپيۆن ليگێ پێشكێشكر و شيا د هه‌ر سێ قاره‌مانيان دا بگه‌هيته ياريا دووماهيێ و ل ب ده‌ستڤه‌ئينانا هه‌رسێ ناسناڤان دا گه‌له‌ك يا نێزيكه.
به‌رشه‌لۆنا پێشڤه‌هاتيه سه‌رێ ليستا خولا ئسپانيا و 17ى ڤێ هه‌يڤێ دێ رووى ب رووى يانا ئه‌تله‌تيكۆ مه‌دريد بيت و هه‌كه د وێ ياريێ دا به‌رشه‌لۆنا سه‌ركه‌فتنێ ب ده‌ست ڤه بينيت به‌رى ب دووماهى هاتنا خولێ ب حه‌فتيه‌كێ دێ قاره‌مانيا خوه راگه‌هينيت.
د كاسا شاهێ ئسپانيا ژى دا، يانا به‌رشه‌لۆنا شيا ژ يانێن ريال به‌له‌د وه‌ليد، ئێلچى، ئه‌تله‌تيكۆ مه‌دريد و ڤياريال ببه‌ت و بگه‌هيته قووناغا دووماهيێ و بڕياره ژى 30ى گۆلانێ د ياريا دووماهيێ دا، رووى ب رووى ئه‌تله‌تيكۆ بلباو بيت و هه‌كه وێ ياريێ ژى ببه‌ت دێ بيته قاره‌مانا شاهێ ئسپانيا.
د شامپيۆن ليگێ ژى يانا كه‌ته‌لۆنى ئه‌ركێ خوه يێ ب زه‌حمه‌تتر يێ بۆراندى پشتى ژ قووناغا كۆمان دا و قووناغێن دى دا، سه‌ركه‌فتن ل سه‌ر هه‌ر ئێك ژ تيمێن ب هێز يێن وه‌كو مانچێسته‌ر ستى يا ئنگليزى و پاريس سان جيرمان يا فره‌نسى و بايرين ميونخ يا ئه‌لمانى تۆماركرى و نوكه چاڤه‌رێ روو ب رووبوونا يۆڤانتۆسا ئيتالى يه ل ميونخ و دڤێت ل وه‌لاتێ ئه‌لمانيا بۆ جارا هه‌شتێ ب گه‌هشتنا خوه بۆ ياريا دووماهيێ بۆ جارا پێنجێ ڤێ قاره‌مانيێ ژى ب ده‌ست خوه بێخيت.
هێلا هێرشبه‌ريا به‌رشه‌لۆنا ب هێله‌كا گه‌له‌ك ب هێز دهێته هژمارتن و ب تايبه‌ت ميسى ئه‌وێ ژ 53 ياريان 53 گۆل بۆ يانا خوه تۆمار كرين و 30 گۆل ژى دروست كرينه و نيمار ژى 37 گۆل تۆمار كرينه و 10 دروست كرينه و سوارێز ژى 24 گۆل تۆمار كرينه و 23 ژى دروست كرينه.
ئه‌ڤرۆ نيوز
رێڤه‌به‌ريا گشتيا كاروبارێن ئاينێ ئێزديان ل وه‌زاره‌تا كاروبارێن ئاينى ل هه‌رێما د به‌ياننامه‌كێ دا راگه‌هاند كو بزاڤێن گوهۆڕينا ئاينێ ئێزديان دهێنه كرن و ئه‌و وه‌كو رێڤه‌به‌رى ژ رێڤه‌به‌ريێن كه‌مپا و لايه‌نێن حكومى و ئه‌منى دخوازن كو رۆلێ خوه د رێ گرتنا ڤێ بزاڤێ دا ببينن.
د به‌ياننامه‌كێ دا كو ئه‌ڤرۆ نيوز دانه‌ك ب ده‌ست خوه خستيه هاتيه: “ل ڤێ دووماهيێ هنده‌ك دياردێن گه‌له‌ك مه‌ترسيدار ل كه‌مپێن ئاواران يێن گرێدايى ب ئێزديان ڤه دهێته ديتن”.
زێده‌تر هاتيه: “ئه‌ڤ ديارده ب چه‌ند رێيانه؛ يا ئێكێ هنده‌ك رێكخراو يێن ته‌بشيرى كاودانێن ئێزديێن ناڤ كه‌مپان ب ده‌ليڤه دبينن ب رێيا دابينكرنا تشتێ بۆ وان سه‌رنجراكێش، يا دويێ ژى بزاڤێن هنده‌ك لايه‌نێن سياسى و ب تايبه‌ت د ناڤ ژنان دا و ب چه‌ككرنا وان، ديسا ديارنه‌مانا ژ نشكه‌كێ ڤه يا هنده‌ك كچ و كوڕان”.
وه‌كو رێڤه‌به‌ريا گشتيا كاروبارێن ئێزديان ل ئه‌وقافێ ژ رێڤه‌به‌ريێن ڤان كه‌مپان و رێڤه‌به‌ريێن حوكمى و هێزێن ئه‌منى يێن حوكمه‌تێ خواستيه كو رۆلێ خوه ببينن د سه‌ره‌ده‌ريكرنا ڤان كه‌يسان دا.
داخواز ژ خووسك و برايێن ئاواره ژى كر كو د چاڤ ڤه‌كرى و هشيار بن ژ بزاڤێن ڤان ره‌نگه رێكخراوان و جهێن سياسى ئه‌وێن كاودان و هه‌ستێ خه‌لكێ وان به‌رچاڤ وه‌ردگرن و ب ده‌رفه‌ت دبينن.
د ڤێ ده‌ربارێ دا، خه‌يرى بۆزانى، رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ بۆ ئه‌ڤرۆ نيوز ئه‌ڤ بابه‌ته پشت راست كر و هيڤى ژ حوكمه‌تا هه‌رێما كوردستانێ خواست كو ب رژدى كار ل سه‌ر ڤان خالان بكه‌ن.
خه‌يرى بۆزانى گۆتژى: “ئه‌ڤ رێكخراوێن بيانى يێن تايبه‌ت ب ته‌بشيرى ڤه كو گرێدايى ئاينێ مه‌سيحيانه دچنه ناڤ كه‌مپان و كاودانێن وان ب ده‌رفه‌ت دبينن و د سه‌ردا دبه‌ن”.
ئاماژه ب وێ چه‌ندێ ژى كر كو ل سه‌ر هه‌مان ره‌وش، هنده‌ك لايه‌نێن لايه‌نێن سياسى ب مه‌ره‌ما رزگاركرنا ده‌ڤه‌رێن وان ل ژێر ده‌ستێ داعش كچ و كوڕان د به‌نه ناڤ رێزێن خوه و ب چه‌ك دكه‌ن و گۆت: “ل ڤى ماوێ دووماهيێ چه‌ندين كچ و كوڕ ژ نشكه‌كێ ڤه ديار نه‌ماينه و چووينه ناڤ رێزێن وان”.
رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێ ئاينى ل هه‌رێما كوردستانێ هيڤى ژى خواست كو د چاڤ ڤه‌كرى بن، به‌رامبه‌ر ڤان ره‌نگه كاران و بزاڤێ ل سه‌ر پاراستنا ئاين و كلتۆرێ خوه بكه‌ن وه‌كو ئێزدى.
ئه‌ڤرۆ نيوز:
ڤێ حه‌فتيێ په‌رله‌مان دێ دانوستاندنێ ل سه‌ر پرسا سه‌رۆكاتيا هه‌رێما كوردستانێ ده‌ست پێ كه‌ت و ل ده‌سپێكێ ژى سه‌رۆكاتيا په‌رله‌مانێ دێ د ناڤبه‌را خوه دا كۆم بن و پاشان ژى ل گه‌ل فراكسيۆنان رووننه خوار و به‌حس ل سيناريۆيان هێته كرن دا كو ئه‌و پرس بهێته ئێكلاكرن.
فه‌خره‌دين قادر، سكرتێرێ په‌رله‌مانێ كوردستانێ، بۆ مالپه‌رێ فه‌رميێ پارتى ديموكراتى كوردستان راگه‌هاند: “بۆ پرسا سه‌رۆكاتيا هه‌رێما كوردستانێ هه‌تا نوكه چو نه‌هاتيه كرن و ڤێ حه‌فتيێ دێ دانوستاندن ل سه‌ر وێ پرسێ ده‌ستپێكه‌ن و ل ده‌سپێكێ ژى په‌رله‌مان دێ كۆم بيت و پاشان ژى كۆمبوونا ل گه‌ل هه‌موو فراكسيۆنان ئه‌نجام ده‌ت”.
د هيڤا ته‌باخا ئه‌ڤ ساله دا، ويلايه‌تا سه‌رۆكێ هه‌رێما كوردستانێ دێ ب دووماهى هێت، ژ به‌ر هندێ ڤێ حه‌فتيێ دێ سه‌رۆكاتيا په‌رله‌مانى ل گه‌ل فراكسيۆنان كۆم بيت و به‌حس ل وان سيناريۆيان كه‌ت يێن دێ بۆ چاره‌كرنا ڤێ پرسێ روو ي روو وان بن، دێ بزاڤ ژى هێته كرن ئه‌ڤ پرسه ب رێكه‌فتنا د ناڤبه‌را هه‌موويان لايان دا بهێته ئێكلاكرن.
وه‌كو سكرتێرێ په‌رله‌مانى دبێژيت: “چه‌ند سيناريۆيه‌ك يێن هه‌ين دا كو ڤێ پرسێ ئێكلا بكه‌ن، راستڤه‌كرنا قانوونا سه‌رۆكاتيا هه‌رێمێ ژى دبيت ئێك ژ وان سناريۆيان بيت”.
ئه‌ڤرۆ نيوز:
رێڤەبەریا گشتیا کەشناسیێ ل ھەرێما کوردستانێ راگەھاند کو سوبه‌هى ئه‌سمان دێ هه‌تاف بيت ل گه‌ل هه‌بوونا تۆزه‌كا سڤك.
پشکا پێشبینیان ل رێڤەبەریا گشتیا کەشنایا ھەرێمێ راگەھاند کو هاتنا قشارێن بلندێن ده‌ريا ناڤه‌راست و به‌رده‌واميا فشارێن نزمێن گزيرتا عه‌ره‌بى بۆ سەر ھەرێما کوردستانێ ئەو پێشبینی دکەن کو سوبه‌هى رێكه‌فتى 17ى گۆلانا 2015ێ ئه‌سمان ببيته هه‌تاڤ ل گه‌ل هه‌بوونا تۆزه‌كا سڤك.
رێڤەبەریا گشتیا کەشناسیێ ل ھەرێما کوردستانێ ئاشکەرا ژی کریە کو پلا گەرماتیێ دێ بلند بيت وه‌كو هه‌ڤبه‌ركى ل گه‌ل رۆژێن به‌رى نوكه ب رەنگەکی د ناڤبەرا 17 بۆ 31 دا.
ل دۆر پێشبینیا رێژا ھەوایی و مەودایێ دیتنێ ژی دایە زانین کو دێ ئاراستەیێ وی دێ باشوورێ رۆژهه‌لات بیت ب رەنگەکی دێ يێ ناڤه‌ندى بیت د ناڤبەرا 10 بۆ 20 کلم د دەمژمێرەکێ دا، ماوێ دیتنێ ژی دێ 8 بۆ 10 کلم دا بیت.
ئه‌ڤرۆ نيوز:
موراد قه‌ريلان، فه‌رماندێ بڕيارگه‌ها ناڤه‌ندى يا پاراستنا گه‌ل “نه‌په‌گه” د ديداره‌كا رۆژنامه‌ڤانى دا بۆ رۆژناما ئوزگيۆر پۆله‌تيكا راگه‌هاند، هه‌يڤه‌ك زێده‌تره حوكمه‌تا توركيا عه‌بدولا ئۆجه‌لان د زيندارنێ دا پشت گوهـ هاڤێتيه و رێ ب سه‌ره‌دانان بۆ وى ناده‌ن.
قه‌ره‌يلان زمانه‌كێ ب گه‌ف گۆت: “بێ گوهدانا چو كاودانان، ئه‌م وه‌سان دبينين ئه‌ڤ سياسه‌تا توركيا قابيلى قه‌بوولكرنێ نينه و ب خوه ئه‌ڤا ڤێ چه‌ندێ به‌رامبه‌ر ئۆجه‌لان دكه‌ت، راگه‌هاندنا په‌ياما شه‌رى يه”.
به‌حس ل وێ چه‌ندێ ژى دكه‌ت كو ئه‌ڤه ماوێ هه‌يڤه‌كێ يه سياسه‌تا گرتيا به‌رامبه‌ر ئۆجه‌لان ده‌ستپێكريه و گۆت: “ئه‌م چو زانياريان ل سه‌ر نوزانين، ژ به‌ر هندێ ژى دڤێت ئاگه‌هـ ژ وێ خالێ هه‌بيت، چونكو ئه‌ڤێ چه‌ندێ قه‌بوول ناكه‌ين”.
ده‌رباره‌يى دووباره ده‌سپێكرنا شه‌رى قه‌ره‌يلان گۆت: “ئه‌م د چارچۆڤێ په‌ياما ئۆجه‌لان د ئێكلايه‌نانه ژى بين، دێ درێژاهيێ ب ئاگربه‌ستێ ده‌ين، به‌لێ دڤێت هه‌موو بزانن هه‌موو ئاراميان ژى سنورێن خوه هه‌نه، چونكو توركيا يا به‌رده‌وامه ل سه‌ر ئۆپه‌رسيۆنێن خوه”.
ئه‌ڤرۆ نيوز:
ده‌سته‌يا سووندخواريێن دادگه‌هێ، دوهى 15ى گۆلانا 2015ێ فه‌رمانا سێداره‌دانێ بۆ جه‌هه‌وه‌ر تسارنايف ده‌ركر كو يێ تۆمه‌تبار بوو ب ته‌قينێن بۆستن.
دادوه‌رێن سووند خوارى كو پێكهاتى بوون ژ حه‌فت زه‌لام و حه‌فت ژنان ب ئێك ده‌نگ ل سه‌ر وێ چه‌ندێ د هه‌ڤرا بوون كو تسارنايف هه‌ژى مرنێ يه.
د به‌رامبه‌ر ڤێ چه‌ندێ ژى د ب گۆره‌يى ده‌زگه‌هێن راگه‌هاندنێ يێن ئاماده‌بوونا هۆلا دادگه‌هێ بووين، تسارنايف نه‌رازيبوون ل سه‌ر ڤێ چه‌ندێ نيشان نه‌دايه.
ب ديتنا شاره‌زايان ژى ئه‌ڤ بڕياره دێ چه‌ندێ سالان ڤه‌كێشيت، به‌لێ پتريا بۆچوونان بۆ وێ چه‌ندێ دچن كو ل دووماهيێ دێ سزايێ سێداره‌دانێ ب سه‌ر دا هه‌ر هێته سه‌پاندن.
نيشاندان