ئه‌ڤرۆ:

راگەھاندنا تورکیا و ئەمریکا جھەکی گرنگ دانە سەرەدانا سەرۆکێ ھەرێما کوردستانێ بۆ ئەمریکا و ھەڤدیتنا ل گەل ئۆباما و ھەڤدیتنا د ڤێ قۆناغێ دا وەک سەرکەڤتنەکا دبلۆماسی و ب ھێز بوونا دەستێ کوردان د ئاستیچ نیچڤدەولەتی دا بناڤ کرن و ئاشکرا ژی کرن کو سەرۆکێ ئەمریکا رۆلێ پێشمەرگەی د شەرێ ل دژی داعشێ دا بلند نرخاندیە و سۆز دایە دێ ھەردەم پشتەڤانێ گەل و ھەرێما کوردستانێ بیت.

رۆژناما نیویۆرک تایمز د ھژمارا خوە یا نوو دا جە دا ھەڤدیتنا سەرۆکێ ئەمریکا و سەرۆکێ ھەرێما کوردستانێ و دیار کر ئەوە جارا چارێ یە بارزانی وەک سەرۆکێ ھەرێما کوردستانێ ب فەرمی ل کۆشکا سپی دھێتە پێشوازیکرن و د نووچەیا خوە دا بەحسێ ناڤەرۆکا ھەڤدیتنا ئۆباما و بارزانی کر و ئاشکرا کر کو د ھەڤدیتنێ دا سەرۆکێ ئەمریکا رۆلێ حوکمەت، گەل و ھێزا پێشمەرگەی د شەرێ ل دژی داعشێ دا بلند نرخاند و سۆز دا کو دێ ھەردەم پشتەڤانێ گەل و حوکمەتا ھەرێما کوردستانێ بیت.

رۆژناما رادیکال یا تورکیا ژی راگەھاند کو بارزانی د ھەڤدیتنا ل گەل ئۆباما بەحسێ شەرێ ل دژی داعشێ و پاقژکرنا رۆژھەلاتا ناڤین ژ تیرۆرستان کر و ژ سەرۆکێ ئەمریکا داخوازا زێدەتر پشتەڤانیێ بۆ پێشمەرگە و ھەرێما کوردستانێ کر و ل ھەمبەر دا سەرۆکێ ئەمریکا سۆپاسیا گەل، حوکمەت و ھێزێن پێشمەرگە کر و دیار کر ئەو ب رێزەکی مەزن ڤە ل رۆلێ کوردان د شکەستنا داعشێ دا دنێرن و گۆت: (ئەم چە دەمەکێ گەل و ھەرێما کوردستانێ ب تنێ ناھێلین و ھەردەم پشتەڤانێ کوردانین و بەرھەڤین ھێشتا زێدەتر ژی ھاریکاریێ بدەینە ھەرێما کوردستانێ).
رۆژناما دی زایدونگ یا ئەلمانی ژی د ڤان ھەردو ھژمارێن خوە یێن داوی دا راپۆرتێن تایبەت ل سەر رەوشا ھەرێما کوردستانێ و پەیوەندیێن ھەرێما کوردستانێ ل گەل ئەمریکا و ئوروپا را چێکر و راگەھاند کو کۆچکا سپی ب پێشوازیا سەرۆکێ ھەرێما کوردستانا عیراقێ بۆ ھەمو جیھانێ نیشان دا کو کورد ھەڤپەیمانێ رۆژئاڤانە ل رۆژھەلاتا ناڤین و ھەم ئەمریکا و ھەم ژی ئوروپا دخوازن ھەرێما کوردستانێ پاراستی بیت و ئاشکرا ژی کر کو راستەوخوە یان نە راستەوخوە دێ ھەم ئەمریکا و ھەم ژی کەنەدا و ئوروپا ھاریکاریێن سەربازی، ئابووری و چەکێن پێشکەڤتی بدەنە ھەرێما کوردستانێ.
ل ئالیێ دی روبرت فیسک رۆژنامەڤان و شارەزایێ رۆژھەلاتا ناڤین د نڤیسا خوە دا ل سەر پەیوەندیێن ھەرێما کوردستانێ ل گەل ئەمریکا و ئالۆزیێن رۆژھەلاتا ناڤین دیار کر کو سەرۆکێ ئەمریکا باراک ئۆباما د ڤێ قۆناغێ دا ب زانەبوون و ب بەرنامەکا دارێتی پێشوازی ل سەرۆکێ ھەرێما کوردستانێ کریە و گۆت: (ئۆباما کوردان وەک دۆست و ھەڤپەیمانێ خوە دبینیت و ناخوازیت ھەرێما کوردان د بن گەفێن تیرۆرستان دا بیت و بۆ ڤێ چەندێ ژی گرنگیەکا مەزن ددەتە پلانا رزگارکرنا مووسل و دەڤەرێن دی یێن عیراقێ و ھەرێما کوردستانێ ل ژێر دەستێ داعشێ دا و ئۆباما دخوازیت پێشمەرگەیێن کورد کو د شەرێ ل دژی داعشێ دا بوونە خوەدان ئەزموونەکا سەرکەڤتی رۆلێ خوە د رزگارکرنا مووسلێ دا ژی ب گێرن).
ھەر د ڤێ دەربارێ دا جەنگیز چاندار نڤیسەر و رۆژنامەڤانێ ناڤدار یێ تورکیا ژی راگەھاند کو ئەمریکا ژ رۆلێ کوردان د شەرێ ل دژی داعشێ دا گەلەک رازیە و ناخوازیت ئارامیا کوردستانێ بکەڤیتە ژێر مەترسیێ و گۆت: (ل دووڤ ھزرا من ئەمریکا ئێدی وەک ھەڤپەیمانەکا دروست ل ھەرێما کوردستانێ دنێریت و ھەم د رزگارکرنا مووسلێ و ھەم ژی بۆ باشکرنا رەوشا ئابووریا ھەرێما کوردستانێ دێ ھەڤکاریێن پێدڤی پێشکێش کەت، ژ بەر کو رۆلێ پێشمەرگەی د راوەستاندنا پێشڤەچوونا داعشێ دا گەلەک گرنگە و ئەو یەک د ئاستا جیھانی دا دەریێن ھەر وەلاتەکی بۆ کوردان ڤەکر و گەل و سەرکردایەتیا کورد پێنگاڤەکا دی نێزیکی خەونا ئاڤاکرنا دەولەتا سەربخوە یا کوردستانێ کر ل عیراقێ).
جەنگیز چاندار ھەروەسا دیار ژی کر نھا کلیلا پاشەرۆژا کوردان کەڤتیە د دەستێ کوردان دا و نھا ژ ھەر دەمی زێدەتر ل جیھانێ پشتەڤانێ کوردان زێدە بووینە و گۆت: (ھەم ئەمریکا و ھەم ژی ئوروپا پشتی ھێرشێن داعشێ بۆ سەر وەلاتێن رۆژھەلاتا ناڤین و ب تایبەت عیراق و سووریێ دیتن کو بۆ وان ھەڤپەیمانەکا دیمۆکراتیک پێدڤیە و کوردان ژی ب کریارێن خوە بۆ جیھانێ سەلماندن کو ئەو دشێن ببنە ناڤەندا دیمۆکراسی، پێکڤەژیان و ئارامیێ و ئەوە ژی ل ئوروپا ھزرا پشتەڤانیکرنا دەولەتەکا کوردی بلندتر کریە و باوەر دکەم وەلاتێن وەک کەنەدا، فرەنسا، نەمسا، ئیتالیا، سوید و فنلەندا ب تەمامی پشتەڤانیا دەولەتا کوردی ل عیراقێ بکەن).