ئه‌ڤرۆ:

پشتی کو ھاتە راگەھاندن سەرۆکێ ھەرێما کوردستانێ دێ سەرەدانا ئەمریکا کەت و دۆسیا ئاڤاکرنا دەولەتا کوردی دھێتە سەر مێزا سەرۆکێ ئەمریکا، ھەم د ئاستێ نێڤدەولەتی و ھەم ژی د ناڤ وەلاتیێن کورد دا دەنگڤەدانەکا مەزن دایە و وەلاتێن دۆست و وەلاتیێن کورد پشتەڤانیا بۆ دۆسیا سەرۆک بارزانی و راگەھاندنا دەولەتا کوردستانێ دکەن. و ھەر وەسا وەلاتیێن کورد بریارا کۆنگرێسێ ئەمریکا وەک پشتەڤانیەکا مەزن بۆ سەربخوەیا کوردستانێ دبینن.

نووچەیێ سەرەدانا سەرۆک بارزانی بۆ ئەمریکا و دۆسیا ئاڤاکرنا دەولەتا کوردی، ژ ئالیێ ھژمارەک کەسایەتیێن ناسکری و بەرپرسێن وەلاتێن ئورۆپا ڤە ب گەرمی ھاتە پێشوازیکرن و د ناڤ وان دا ھانس فیشەر سەرۆکێ نەمسا، بیرنارد کۆشنەر وەزیرێ بەرێ یێ دەرڤە یێ فرەنسا، ئیسمائیل بێشیکچی نڤیسەر و ڤەکۆلەرێ تورکیا، خوئان لاپۆرتا سەرۆکێ بەرێ یێ یانا بەرشەلۆنا و سەرۆکێ پارتا سۆسیالیستا ھەرێما کاتۆلۆنیا یا سەر ب ئیسپانیا، ئارتور ماس سەرۆکێ پەرلەمانێ کاتالۆنیا و ھژمارەک سیناتۆرێن کۆماریخوازان ل ئەمریکا و نڤیسەرێن ئەمریکی جیە دگرن.
د ڤێ دەربارێ دا ھانس فیشەر سەرۆکێ نەمسا د پرێس رۆژنامەڤانی دا ل سەر پرسیارا رۆژنامەڤانێ کورد یلماز ئۆزکۆرکماز راگەھاند ئەو پشتەڤانیێ ل ھندێ دکەن کو دڤێت گەلێ کورد ژی وەک ھەموو نەتەوێن خوەدان دەولەت ب ئیرادا خوە پاشەرۆژا خوە دیار بکەن و ئەز پشتەڤانیێ ل دۆسیا بەرێز بارزانی دکەم یا بۆ ئاڤاکرنا دەولەتا کوردی و گۆت: (پەیوەندیێن وەلاتێ من ل گەل ھەرێما کوردستانێ د ئاستەکی بلند دانە و ل دووڤ ھزرا من ب تایبەت پشتی شەرێ ل دژی داعشێ گەلێ کورد سەلماند کو ل رۆژھەلاتا ناڤین نرخێن مرۆڤی دپارێزن و وەک گلۆپەکا کەسکن د ناڤ ڤێ ھەرێمێ دا و بۆ ڤێ چەندێ ژی دڤێت دەلیڤە بھێتە دایین کو گەلێ کورد پاشەرۆژا خوە ب ئیرادا خوە دیار بکەت).
بیرنارد کۆشنار وەزیرێ دەرڤە یێ بەرێ یێ فرەنسا ژی د دیدارەکی دا ل گەل تەلەفزیۆنا فرەنسی راگەھاند کو دڤێت زێدەتر پشتەڤانیا بەرخوەدانا گەلێ کورد ل دژی تیرۆرۆستێن داعشێ بھێتە کرن و گۆت: (ھەرێما کوردستانا عیراقێ بۆ مە گەلەک گرنگە و ھەڤپەیمانێ راستەقینە یێن رۆژئاڤا نە و نابیت بھێنە پشگوە خستن و ب زۆرێ ل سەر وان ئێکەتیا عیراقێ بھێتە فەرزکرن و بۆ ڤێ چەندێ ژی یا راست ئەڤە گەلێ کورد ب خوە چارەنڤیسێ خوە دیار بکەن).
ھەروەسا خوان لاپۆرتا سەرۆکێ بەرێ یێ یانا بەرشەلۆنا و سەرۆکێ پارتا سۆسیالیستا کاتەلۆنیا ژی د بەرناما رادیۆ یا بەرشەلۆنا دا راگەھاند کو خەباتا وان بۆ سازکرنا ریفراندوما کاتەلۆنیا بەردەوام دکەت و گۆت: (ئەز تێناگەھم بۆ چی دەولەتێن داگیرکەر ل سەر پاشەرۆژا گەلان بریارێ بدەن، د ڤێ سەدسالێ دا ئێدی دڤێت ھەر نەتەوەک ب ئیرادە و داخوازیا خوە چارەنڤیسێ خوە دیار بکەن و ئەز ھەردەم پشتەڤانیێ ل گەلێن باسکێ، سیجیلیا، کۆرسیکا و کوردستانێ و ھەموو گەلێن بێ دەولەت دکەم ژ بەر کو ب زۆرێ دیمۆکراسی دروست نابیت و پێکڤە ژیان ژی ب یەک ئالی نابیت).
ئیسمایل بێشیکچی نڤیسەر و ڤەکۆلەرێ تورکیا ژی ل سەر تۆرا ئنترنێتێ راگەھاند کو ئەو رۆژانە دووڤچوونا خەباتا گەلێ کورد دکەت و گۆت: (گەلێ کورد د درێژیا دیرۆکێ دا بەرخوەدان و تێکۆشینەکا گەلەک مەزن داینە بۆ ئازادی و ئاڤاکرنا دەولەتەکا سەربخوە و بۆ ڤێ چەندێ تووشی ب دەھان کارەسات و کۆمکوژی و ئەنفال و روودانێن مەزن ھاتینە و ھەر دەمێ دەلیڤەک پەیدا بوو دڤێت گەلێ کورد ڤێ دەلیڤێ بۆ ئازادیا خوە بکار بھینیت و ل دووڤ ھزرا من ئەڤ دەمێ کو ئەم تێدا دژین مەزنترین دەلیزە یە بۆ ئاڤاکرنا دەولەتا کوردی و نھا بۆ راگەھاندنا دەولەتەکا مەزنا کوردستانێ ژی رەوش گەلەک گونجاییە و دڤێت گەلێ کورد ڤێ دەلیڤێ ژ دەست نەدەن و ئەز د ڤێ چارچۆڤێ دا دۆسیا د دەستێ بەرێز بارزانی دا بۆ ئاڤاکرنا دەولەتا کوردی گەلەک ب نرخ و پیرۆز دبینم).
ئارتور ماس سەرۆکێ پەرلەمانێ کاتالۆنیا و ھەژمارەک سیناتۆرێن کۆماریخوازێن ئەمریکا ژی د داخۆیانیێن جودا جودا دیار کرن کو مافێ نەتەوا کورد چارەنڤیسێ خوە دیار بکەت و ئاشکرا ژی کرن کو ئەو دێ پشتەڤانیێ ل راگەھاندنا دەولەتا سەربخوە یا کوردستانێ بکەن و دەرخستنا بریارا کۆنگرێسی ئەمریکا بۆ پر چەککرنا ھێزێن پێشمەرگێن کوردستانێ ژی پشتەڤانیەکا مەزنە بۆ دەولەتبوونا کوردستانێ. ل ئالیێ دی پرانیا وەلاتیێن کورد ژ ھەر چار پارچێن کوردستانێ ب رەنگێن جودا جودا بریارا کۆنگرێسێ ئەمریکا وەک پشتەڤانیەکا مەزن بۆ سەربخوەیا کوردستانێ ل قەلەم دان و سۆپاسیا کۆنگرێسێ ئەمریکا کرن.
ئەڤ راپۆرتە سەرجان مەحمود بۆ رۆژناما ئەڤرۆ بەرھەڤ کریە.

ئەڤرۆ:
دوھی سەرۆکێ ھەرێما کوردستانێ بەر ب ئەمریکا ب رێکەەفت و بریارە ل گەل سەرۆکێ ئەمریکی و بەرپرسێن ئیدارا وی وەلاتی کۆمببیت، بالیۆزێ ئەمریکا ل عیراقێ پێشبینیا وێ چەندێ دکەت کو ھەڤدیتنێن سەرۆک بارزانی ل گەل بەرپرسێن ئەمریکی د ئەرێنی بن، چاڤدێرەکێ سیاسی ژی دبێژیت وێ سەرەدانێ دێ ئەنجامێن باش بۆ ھەرێما کوردستانێ ھەبن و دێ ھەلویستێ راستەقینەیێ ئەمریکا بۆ قۆناغا داھاتی رۆھن بیت، د ھەمان دەم دا سەرەدانا سەرۆک بارزانی بوویە مانشێتێ سەرەکی یێ گەلەک مالپەرێن جیھانی.
بالیۆزێ ئەمریکا ل عیراقێ ستیوارت جۆنز د داخۆیانیەکا رۆژنامەڤانی دا گوت” ئەم شانازیێ ب پەیوەندیێن خوە ل گەل ھەرێما کوردستانێ و ھەموو پێکھاتێن دی ل عیراقێ دکەین” گوت ژی” کۆمبوونا سەرۆکێ ھەرێما کوردستانێ و سەرۆکێ ئەمریکی باراک ئۆبامای و جێگرێ وی جۆ بایدنی دێ یا باش و ئەرێنی بیت”.
ل دووڤ چەندین ژێدەرێن دەنگوباسان، سەرۆک بارزانی پشتی پەیاما سۆپاسیا گەلێ کوردستانێ بۆ ئەمریکا ل ھەمبەر وان ھاریکاریێن لەشکری و مادی، دێ داخوازا چەکی بۆ ھێزێن پێشمەرگەی کەت ب تایبەتی چەکێ گران و پێدڤیێن لەشکری یێن دی.
ب دیتنا دکتۆر عەبدولحەکیم خسرۆ بسپۆرێ زانستێن سیاسی ل زانکۆیا سەلاحەدین، پێدڤیە بۆ ل بەرچاڤ وەرگرتنا بارودۆخێ ھەرێما کوردستانێ و دابینکرنا پێدڤیێن ھێزێن پێشمەرگەی و پێشھاتێن نوکە و پاشەرۆژا عیراقێ و گەرەنتیا نێڤدەولەتی بۆ ھەرێما کوردستانێ، سەرکردایەتیا سیاسی یا کوردستانێ راستەوخوە ل گەل ئەمریکا بەحس بکەت، لەوما سەرەدانا سەرۆکێ ھەرێمێ بۆ وێ مەرەمێ یە و ئەمریکا ژی دڤێت بزانیت پاشەرۆژا عیراقێ دێ یا چاوا بیت کو ئەمریکا ب خوە قوربانیێن مەزن ل عیراقێ داینە، چونکی ب حوکمڕانیا خەلکەکێ نەزان د دەمێ حەفتیەکێ دا چەند پارێزگەھێن عیراقێ کەفتنە دبن کونترۆلا داعشێ دا، لەوما ئەڤە دێ بیتە ئەگەر کو ئەمریکا پەیوەندی ب سەرکردایەتیا کوردستانێ ڤە ھەبیت”.
ل دووڤ بوچوونا ڤی بسپۆرێ زانستێن سیاسی، سەرەدانا سەرۆک بارزانی دێ ئەنجامێن باش و ئەرێنی بۆ ھەبن، چونکی دێ بەر چاڤ رۆھنیەکا زێدەتر بۆ سەرکردایەتیا کوردی ھەبیت و د ھەمان دەم دا ژی دێ ھەلویستێ راستەقینەیێ ئەمریکا ل قۆناغا داھاتی بۆ سەرکردایەتیا کوردستانێ رۆھن بیت، بۆ وێ چەندێ ل سەر وی ھەلویستێ ئەمریکا، سیاسەتا گشتی یا خوە بۆ پاشەرۆژا ھەموو پرسێن مە دابرێژیت”.
ژ لایەکێ دی ڤە، سەرەدانا سەرۆک بارزانی د وی دەمی دا دھێت کو ھەرێما کوردستانێ د شەڕی دایە ل گەل تیرۆرستێن داعشێ، گەلەک ژ راگەھاندنا جیھانی ب سەرەدانەکا گرنگ د ھەژمێرن بۆ ژناڤبرنا رێکخستیا تیرۆرستی یا داعشێ ل عیراقێ و شەڕێ رزگارکرنا مووسلێ.