ئه‌ڤرۆ نیوز:
ئومێد محه‌مه‌د سه‌عید رێڤه‌به‌رێ گشتى یێ كونترول و گه‌هاندنا كاره‌بێ ل حكومه‌تا هه‌رێما كوردستانێ راگه‌هاند كو ئه‌ڤرۆ وان كومبوونه‌ك ل وه‌زاره‌تێ ئه‌نجامدا و پشتى ره‌وشا ویستگه‌هێن كاره‌بێ هه‌لسه‌نگاندى و ل به‌رچاڤ گرتنا پلێن گه‌رمانێ، ئه‌و دێ شێن كاره‌با نیشتمانى بۆ هه‌یڤا ئایارێ، د ناڤبه‌را 21 بۆ 22 ده‌مژمێران كاره‌بێ دابین كه‌ن و یا مایى دێ موه‌لیده كاره‌بێ بۆ وه‌لاتیان دابین كه‌ن.
ئه‌ڤرۆ نیۆز، سالار دۆسكى:
ب به‌رهه‌ڤبوونا به‌رپرسێ لقێ ئێك عه‌بدولخالق باپیرى، فه‌هیم عه‌بدوللا سه‌رۆكێ ئه‌نجوومه‌نێ پارێزگه‌ها دهۆك، هه‌ژماره‌كا هونه‌رمه‌ند و روژنامه‌ڤانێن ده‌ڤه‌رێ، ئێڤاریا ئه‌ڤرۆ 30/4/2015 سه‌ندیكا هونه‌رمه‌ندێن كوردستانێ لقێ دهۆك ل باره‌گایێ خوه ، 21 مامۆستایێن هونه‌رمه‌ند كو دامه‌زرێنه‌رێن په‌یمانگه‌ها هونه‌رێن جوان دهۆك بووینه ب زێرى خه‌لاتكرن.
خانم ئه‌ڤین حسێن، سه‌رۆكا لقێ دهۆك یا هونه‌رمه‌ندێن كوردستانێ، په‌یڤه‌ك پێشكێشكر و به‌رهه‌مێ نوكه یێ هونه‌رى پارێزگه‌هێ ب هێڤێنێ ئه‌ڤان مامۆستایێن هونه‌رمه‌ند دازانین كو ماوێ ساله‌كێ بێ مووچه خوه‌به‌خش وانه گۆتینه په‌یمانگه‌هێ، دیسان ده‌ست خوه‌شى ل ماندیبوون و خزمه‌تا وان مامۆستا كر و سه‌رێ رێزێ بۆ ماندیبوونا ئه‌ڤان مامۆستان چه‌ماند.
ل دووڤ دا هه‌ر ئێك ژ به‌رپرسێ لقێ و سه‌رۆكێ جڤاتێ په‌یڤێن خوه پێشكێشكرن و رۆلێ هونه‌رمه‌ندان بلند نرخان، پاشان دو پارچه مۆزیكه هاتنه پێشكێشكرن كو ژلایێ قوتابیێن په‌یمانگه‌هێ ڤه هاتبوونه به‌رهه‌فكرن، دووڤ دا (21) مامۆستایێن دامه‌زرێنه‌ر ب خه‌لاتێ زێرى ژلایێ سه‌ندیكایێ ڤه هاتنه خه‌لاتكرن.
ئه‌ڤرۆ نیوز،زنار تۆڤى:
لیژنا كاروبارێن سه‌ربازى ل كونگرێسێ ئه‌مریكا روژا پێنجشه‌مبى 30 نیسانا 2015 پروژه یاسایا ده‌سهه‌لات پێدانا چالاكیێن به‌رگریا نیشتیمانى په‌سه‌ندكر و ئه‌ڤ پروژه بریاره دبه‌رژه‌وه‌ندا پێشمه‌رگێ كوردستانێ دایه،
دبه‌شه‌كێدا پشتگیریێ ل داخوازیا سه‌روكێ ئه‌مریكا باراك ئوباماى دكه‌ت ب ته‌رخانكرنا 715 ملیون دولاران وه‌كو هاریكاریێن سه‌ربازى بۆ هێزێن عێراقى كو دژى داعشێ دجه‌نگن.
دپروژێ لیژنا كاروبارێن سه‌ربازى ل كونگرێسى هاتیه داخوازكرن كو 25% ژ وان هاریكاریان بۆ هێزێن پێشمه‌رگه‌ى و هێزێن سوننى بهێته ته‌رخانكرن و راسته‌وخو و بێى زڤرین بۆ به‌غدا پێ بهێته دان.
دڤى پروژه‌ى دا هه‌روه‌سا هاتیه داخوازكرن كو 75% ژوان هاریكاریان بهێنه راگرتن،هه‌تاكو وى ده‌مێ وه‌زاره‌تا ده‌رڤه و به‌رگریا ئه‌مریكا پشتراست دكه‌نه‌ڤه كو حكومه‌تا عێراقێ شیایه مه‌رجێن سه‌رخستنا ئاشته‌وایى یا نیشتیمانى ل عێراقێ جێبه‌جێ بكه‌ت،ئه‌گه‌ر حكومه‌تا عێراقێ نه‌شیا وان مه‌رجان جێبه‌جێ بكه‌ت،60% ژ وان هاریكاریێن سه‌ربازى ئه‌وێن ماین،راسته‌وخو بۆ پێشمه‌رگه‌ى و هێزێن سوننى دێ هێنه هنارتن. دبه‌شه‌كێ دییێ پروژه‌ى دا هاتیه،كو تایبه‌ته ب پرسا روو ب روو بوونا داعشێ ل عێراقێ و پێشنیاز هاتیه‌كرن كو ئوفیسا هاریكاریێن ئه‌منى دگه‌ل عێراقێ بهێته ڤه‌كرن.
ئه‌ڤ پروژه ژلایێ(مه‌ك سورنبێرى) سه‌روكێ لیژنا كاروبارێن سه‌ربازى ل كونگرێسى ئاراسته‌ى ڤێ لیژنێ كریه و ب 60 ده‌نگێن ئه‌رێ و 2 ده‌نگێن نه‌رێ هاتیه په‌سه‌ندكرن،له‌ورا ڤێ لیژنێ بڤى ره‌نگى پشته‌ڤانیا ڤى پروژه‌ى كریه،كو دبه‌رژه‌وه‌ندا كورد و سوننه‌یاندایه، بۆ وێ چه‌ندێ كو دكونگرێسى دا گفتوگۆ لسه‌ر بهێته‌كرن و بێخنه ده‌نگدانێ.
ئه‌ڤه دده‌مه‌كى دایه،دوهى چارشه‌مبێ نڤێسینگه‌ها حه‌یده‌ر عه‌بادى سه‌روك وه‌زیرێن عێراقێ راگه‌هاند،كو حكومه‌تا عێراقێ ڤێ پێشنیازێ ره‌تدكه‌ت.
نڤێسینگه‌ها سه‌روك وه‌زیرێن عێراقێ دیاركر:حكومه‌تا عێراقێ پێشوازى ل هه‌مى وان وه‌لاتان دكه‌ت كو پالپشتیا عێراقێ دكه‌ن و هاریكاریێن سه‌ربازى پێشكێش دكه‌ن ل شه‌رێ دژى داعشێ دا،دهه‌مان ده‌مدا هه‌مییان دلنیا دكه‌ین كو مامه‌له‌كرن دگه‌ل حكومه‌تا عێراقێ یا نوكه و به‌رى نوكه دچارچووڤێ رێزگرتن ل سه‌روه‌رى یا عێراقێ بوو ئه‌ڤه‌ژى به‌شه‌كه ژ باوه‌ریا نه‌گوهورا حكومه‌تا عێراقێ.
نڤێسینگه‌ها عه‌بادى د به‌یاننامه‌یا خودا جه‌ختكرن لسه‌ر هندێ كریه،كو هه‌ر پرچه‌ككرنه‌كا برێیا حكومه‌تا عێراقێ و پلانا سه‌ربازى نه‌بیت نابیت روو بده‌ت،ئه‌و پروژه یاسایا ژ لیژنا په‌یوه‌ندیێن ده‌رڤه یا ئه‌نجومه‌نێ نوونه‌رێن ئه‌مریكا هاتیه پێشنیازكرن ره‌تدكه‌ین،چونكى دێ بیته جهێ ناكوكیێن زێده‌تر لڤێ ده‌ڤه‌رێ و داخوازدكه‌ین نه‌هێته جێبه‌جێكرن.
ئه‌ڤرۆ نیوز:
هونه‌رمه‌ند زه‌كه‌ریا عه‌بدولا د په‌یجێ خوه یێ فێسبوكێ دا پشته‌ڤانیا خوه بۆ به‌رنامێ ره‌نجا شه‌هیدان دیاركریه و دیاركریه: رۆلێن گه‌لێ مه رح و گیانێ خوه كرنه فیدایا كوردستانێ و ئارامى و ئاسایشا خه‌لكى، بلا ئه‌م ژى هه‌مى پشكداربین د كه‌مپینا هه‌ڤكاریكرنا كه‌س و كارێن شه‌هیدێن سه‌ربلند یێن وه‌لاتێ مه.
زەكەریا عەبدوڵڵا ل نه‌وروزا سالا بوورى وه‌ره، چ پۆسته‌ك د تورا جڤاكى یا فێسبوكێ به‌لاڤ نه‌كریه.
بۆ پشكداریكرن د ڤى به‌رنامه‌ى دا:
ل باشوورێ کوردستانێ:
ناڤێ بانكێ: بانكا كوردستان یا نێڤده‌وڵه‌تی
ناڤێ حیسابێ: RanjiShahidan
ژمارا حیسابێ: 2222
بۆ پشكێن دى یێن كوردستانێ و جیهانێ:
Swift: KIBIIQBA
IBAN: IQ01KIBI2222
Name: RanjiShahidan
ئه‌ڤرۆ نیوز:
د چوارچوڤێ سه‌ره‌دانا شاندێ كوردى بۆ په‌رله‌مانێ ئوروپا، ئه‌ڤرۆ ڤیان ده‌خیل ئه‌نداما په‌رله‌مانا عیراقێ هه‌ڤدیتنه‌ك ل گه‌ل مارتن شولز سه‌رۆكێ په‌رله‌مانێ ئوروپا پێكئینا.
نڤیسینگه‌ها ڤیان ده‌خیل راگه‌هاندیه كو ددیدارێ دا به‌حسێ وان كاره‌ساتان كر یێن ئێزدى تووش بووى ب تایبه‌ت ره‌ڤاندنا كچێن ئێزدى و رزگاربوونا هنده‌ك ژ وان و پێدڤیا وان ب چاره‌سه‌ریێ، و ژ ئالیێ خوه‌ڤه سه‌رۆكێ په‌رله‌مانێ ئوروپا هه‌مى به‌رهه‌ڤیێن خوه بۆ پشته‌ڤانیكرنا ئێزدیان دیاركر ب تایبه‌ت پرسا ب جینوسایدناساندنا ڤێ تاوانێ و چاره‌كرنا وان كه‌سێن ژ ده‌ستێ داعش رزگاربووين.
ئه‌ڤرۆ نیوز:
ئه‌ڤرۆ د كومبوونا جڤاتا وه‌زیرێن حوكمه‌تا هه‌رێما كوردستانێ، بریار هاته دان، یه‌كه‌یێن ئاكنجیبوونێ بۆ كه‌س و كارێن شه‌هیدێن شه‌رێ داعش بهێته دروستكرن.
ئامانج ڕەحیم، سكرتێرێ جڤاتا وه‌زیران راگه‌هاند، كو جڤاتا وه‌زیران ئه‌ڤرۆ د كومبوونا خوه‌دا بریار دا ب دانا جهه‌كێ ئاكنجیبوونێ بۆ خێزان و كه‌س و كارێن سه‌ربلندێن پێشمه‌رگێن شه‌هیدێن كوردستانێ كو د شه‌رێ داعش دا هاتینه شه‌هیدكرن كو دێ وه‌كو مینحه ئانكو پاداپشته‌كێ بیت، و بۆ ڤێ مه‌ره‌مێ ژى هه‌ردو وه‌زاره‌تێن ئاڤه‌دانكرنێ و ئاكنجیكرنێ و شاره‌وانى و گه‌شتوگوزار بۆ بجهئینانا بریارێ هاتنه راسپاردن.
ئه‌ڤرۆ نيوز:
پشتى په‌رله‌مانێ بۆ سه‌رۆكێ هه‌رێمێ ره‌وانه كرى، مه‌سعود بارزانى سه‌رۆكێ هه‌رێما كوردستانێ قانوونا ئاماده‌كرنا پرۆژێ دستوورێ كوردستانێ ئيمزا كر.
د راگه‌هاندنه‌كا په‌رله‌مانێ كوردستانێ دا هاتيه: “په‌رله‌مانێ كوردستانێ د روونشتنا خوه يا ژماره 8ي ا رۆژا 13ى نيسانا 2015ێ قانوونا ئاماده‌كرنا پرۆژێ دستوورێ هه‌رێما كوردستانێ – عيراق بۆ راپرسيێ په‌سه‌ند كر و ئاراسته‌يى سه‌رۆكاتيا هه‌رێما كوردستانێ كر ب مه‌ره‌ما ئيمزا كرنێ و ژ لايێ خوه ڤه سه‌رۆكێ هه‌رێما كوردستانێ ب بڕياره ژماره 7 يا سالا 2015ێ ل 13ى نيسانا 2014ێ ئيمزا ل سه‌ر قانوونێ كر.
ئه‌ڤرۆ نيوز:
ب گۆره‌يى دووماهى زانيارى ل سه‌ر بهايێ دراڤى ل بۆرسا دهۆكێ، كۆمپانيا سه‌يدو راگه‌هاند كو هه‌تا ده‌مژمێر 10:16 ده‌قيقه‌يا ئه‌ڤرۆ رۆژا دوشه‌مبى 30ى نيسانا 2015ێ ب ڤى ره‌نگێ ل خوارێ بوو:
| 1 دولارێ ئه‌مريكى | 1306 |
| 1 يۆرۆيێ ئه‌ورۆپى | 1450 |
| 1 ليرێ توركى | 488 |
ژ به‌ر كو ره‌وشا دراڤى به‌رده‌وام دهێته گوهۆڕين بۆ زانينا نووترين گۆڕانكاريان سه‌ره‌دانا مالپه‌رێ ئه‌ڤرۆ نيوز بكه.
نيشاندان