ئەڤرۆ:
لژنا بەریکانەیان ل ئێکەتیا عیراقێ یا تەپا پێ گوھۆرین د ژڤانێ یاریێن گەرا دووماھیێ یا ھەڤرکیێن خولا عیراقێ دا کرن ژوانا یاریا دھۆک دێ ھێتە پاشخستن.
د ڤی چارچوڤەی دا شەھاب ئەحمەد ئەندامێ ئێکەتیا تەپا پێ یا عیراقێ دیارکر لژنا بەریکانەیان ل ئێکەتیا تەپا پێ بریار دایە گوھۆرین د ژڤانێ یاریێن گەرا دووماھیێ یا ھەڤرکیێن خولا نایاب دا بھێنەکرن ل دووڤ داخوازا یانێن پشکدار لەورا بریار ھاتەدان ئەڤرۆ یاریا مینا ل گەل نەفت بکەت ل یاریگەھا زوبێر ل باژێرێ بەسرا و ئەمانە یا بەغداد ژی یاریا خوە ل گەل حدود بکەت.
ناڤبری ئەو چەندە ژی دیارکر رۆژا شەمبی یا بھێت دێ یاریا د ناڤبەرا نەجەف و تەلەبە دا ھێتەکرن ل یاریگەھا یا ئێکێ، یاریا یانا دھۆک ل گەل شورتە دێ ھێتە پاشخستن بۆ دەمەکێ ل دووڤ داخوازا کارگێریا یانا دھۆک ژبەرکو دێ ئەڤ یاریە یا ھەڤدەم بیت ل گەل یاریێن خولا کوردستانێ.

ئەڤرۆ:
حەفتیا دەھێ ژ قوناغا دویێ ژ ھەڤرکیێن خولا نایابا کوردستانێ ب بریارە ئەڤرۆ برێڤە بچن و د گوپیتکا یاریێن ڤێ گەرێ دا زێرەڤانی دێ بیتە مێڤانا ھەولێر و دھۆک دێ ل یاریگەھا خوە پێشمەرگا سلێمانیێ مێڤان کەت و زاخۆ دێ ل کەرکوکێ ھەڤرکیا وێ کەت.
ل یاریگەھا خوە خودانا رێزا دویێ تیما تەپا پێ یا دھۆک دێ مێڤانداریا خودانا رێزا بەری دووماھیێ تیما تەپا پێ یا پێشمەرگا سلێمانیێ کەتن، دڤێ یاریێ دا دھۆک دێ ھەمی ھەولێن خوە مەزێخیت ب ئەنجامەکێ سەرکەفتی ژڤێ یاریێ ب دەرکەڤیت بۆ وێ چەندێ بەردەوامیێ بدەتە ھەڤرکیێ و گڤاشتنێ مەزنتر لێبکەت لسەر خودانا رێزا ئێکێ ژلایەکێ دووڤە پێشمەرگا سلێمانیێ دێ ھەولدەت خوە ژ رێزێن دووماھیێ دووربێخیت لەورا دێ یاریەکا ب زەحمەت بیت بۆ ھەردو لا.
لدور ڤێ یاریێ راھێنەرێ یانا دھۆک حازم سالح بۆ رۆژناما ئەڤرۆ گوت:یاریەکا گرنگە بومە و دێ ھەولدەین سەرکەفتنێ تومارکەین بو وێ چەندێ بەردەوامیێ بدەینە ھەڤرکیێ و بدەستڤە ئینانا ناسناڤی چنکو چارەنڤیسێ مە د دەستێ مەدایە و ھەر یاریەکا بکەین دڤێت بسەرکەڤین بو وێ چەندێ چاڤێ مە ل یاریێن ھەڤرکێن مە نەبیت.
زێدەتر ناڤبری لدور رێزگرتنا تیما بەرامبەر گۆت: مە یاریکەرێن خوە وەسا تێگەھاندینە کو ھەرو یاریەکا بکەین دڤێت رێزگرتێ ل تیما بەرامبەری خوە بگری ل رێزا چەندێ بیت و ھەر یاریکەرەکێ ب چاڤەکێ کێم سەحکەتە تیما بەرامبەر دێ ژ رێزێن یانێ ھێتە دوورخستن.
د یاریەکا دی دا ل یاریگەھا دویێ یا فرەنسو حەریری تیما تەپا پێی یا زێرەڤانی د گوپیتکا یاریێن ڤێ گەرێ دا دێ بیتە مێڤانا یانا ھەولێر، بۆ ڤێ یاریێ زێرەڤانی پێدڤی ب سەرکەفتنێ یە بۆ وێ چەندێ سەرێ لیستێ پارێزیت و ھزر د وێ چەندێ دا بکەن کو حەفتیا بھێت دێ د چاڤەرێبن .
بۆ وەرگرتنا داخویانیەکێ لدور ڤێ یاریێ دەستەکا راھێنەریا زێرەڤانی رازی نەبوون چ داخویانیان بدەن.
ل یاریگەھا کەرکووک نوونەرا سیێ یا پارێزگەھێ دێ یاریەکا ب زەحمەت بەرامبەر مێڤانادارا خوە تیما تەپا پێی یا کەرکووک کەت، بۆ ڤێ یاریێ گەلەک گڤاشتن لسەر تیما زاخۆ نینە ژبەر کو ھەتا رادەکی ژ ھەڤرمیا ب دەستڤە ئینانا ناسناڤی دوورکەفتیە لێ ھەڤرکا وێ کەرکووک دێ یاریێ ب ھەمی ھێزا خوە کەت بو وێ چەندێ ب سەرکەڤیت و ژ رێزێن دووماھیێ دوورکەڤیت.