ئه‌ڤرۆ نیوز:
حه‌یده‌ر عه‌بادى سه‌رۆك وه‌زیرێن عیراقێ ئه‌ڤرۆ به‌رهه‌ڤى روونشتنا جڤاتا نوونه‌رێن عیراقێ بوو و د گوتاره‌كێ دا راگه‌هاند: ئه‌گه‌ر نه‌شێت ئاسایشا وه‌لاتیان ب پارێزیت، دێ ده‌ستا ژ پۆستێ خوه به‌رده‌ت و روودانێن ئه‌نبار ژى ب ” شه‌ره‌كێ ده‌روونى” وه‌سفكر و ئه‌و چه‌نده ره‌تكر كو ل وێ پارێزگه‌هێ خوه ڤه‌كێشابن.
ئه‌ڤرۆ نیوز:
مه‌سعود بارزانى سه‌رۆكێ هه‌رێما كوردستانێ ل ده‌باشان سه‌را جه‌لال تاله‌بانى سكرتێرێ گشتى یێ ئێكه‌تیا نیشتمانیا كوردستانێ دا.
به‌رى چه‌نده‌كێ دیدارا د ناڤبه‌را مه‌سعود بارزانى و جه‌لال تاله‌بانى ب دووماهى هات و سه‌رۆك بارزانى دووماهى ب سه‌ره‌دانا خوه بۆ سلێمانیێ ئینا.
د كومبوونێ دا، سه‌رۆك بارزانى ئه‌جیندایا سه‌ره‌دانا خوه بۆ ئه‌مریكا بۆ جه‌لال تاله‌بانى به‌حس كر و ل دووڤ راگه‌هاندنێن ئێكه‌تیێ، تاله‌بانى داخواز ژ بارزانى كریه ل ئه‌مریكا پێداگیریێ ل مافێن كوردان بكه‌ت.
هه‌ر ل دووڤ راگه‌هاندنێن ئێكه‌تیێ، پشتى ڤه‌گه‌ریانا بارزانى ژ ئه‌مریكا، دێ جاره‌كادى بارزانى سه‌را ده‌باشان كه‌ت و ل گه‌ل تاله‌بانى كوم بیت.
ئەڤرۆ نیۆز:
ئەندامەکێ لژنا سامانێن سرۆشتی ل پەرلەمانێ کوردستانێ بۆ مالپەرێ ئەڤرۆ نیۆز ئاشکراکر کو ب تنێ نەبوونا پانزینێ ل ھەر دو باژێرێن دھۆک و زاخۆ سەر ھلدایە و ناڤبری ھۆکار بۆ چەندین ئەگەران ڤەگەراند.
سالح بشار ئەندامێ لژنا سوتەمەنیێ ھێشتا ژی گۆت: بتنێ قەیران ھەردو باژێران وبویە و ترس بو خەلکی چێبوویە، ئەوشا پانزینێ نھا ژ دوھی چێترە، ژێدەرێن پانزینێ ل پارێزگەھا دھۆک 50% نافخویی یە و 50% ژ دەرڤە دھێت، وەزارەتا سامانێنسرشتی بەرھەڤی کرینە کو پانزینێ ل ھەولێرێ بھنێرە دھۆکێ و دەسپێکریە ژی، کێمبوونا وێ ھندەک پانزین ژ دەرڤە ھات بوو و لدووڤ پیڤەران نەبوو ھاتبوو زڤراندن
سالح بشاری ژ فراکسیۆنا زەر ئەوچەندەژی گۆت: کومپانیەک پانزینێ ژ دەرڤە دئینت و ئەگەر نەھینت ژی دێ ھەولێرێ بەردەوام دێ ھێت و دبیت ھەتا رۆژا ئەینی ئەڤ کێشە ب دووماھی بێت.
رێڤەبەرێ بەلاڤکرنا بەرھەمێن گازێ ل دھۆکێ ب وەکالەت عه‌بدلواحد بۆ ئەڤرۆ نیوز دیارکر کو ئه‌ڤرۆ ل دانێ سپێدی 600 ھزار لیترێن پانزینی ل سەر ویستگەھێن دھۆکێ ھاتنە بەلاڤکرن و ل دانی ئیڤاری ژێ دێ 500 ھزار لیتر ھێنە بەلاڤکرن وزارەتا سامانێن سروشتی ژی ل ھەرێمێ بریار دایە سوبەھی 29ى نيسانێ هه‌تا 30ى نيسانێ دوورێن 8 ملیون لیترین پانزینی رەوانەی پارێزگەھا دھۆکێ بکەت.
سالار دۆسکی، له‌زگين جۆقى:
ئه‌ڤرۆ نيوز:
ده‌سته‌يا سه‌رۆكاتيا په‌رله‌مانێ كوردستانێ بڕيار دا ده‌مێ روونشتنا ژماره 10 ديار بكه‌ت كو پێش نيڤرۆيا سوبه‌هى رۆژا چارشه‌مبى 28ى نيسانا 2015ێ بيت و به‌رنامێ كارى ژى ب ڤى ره‌نگى يه:
ئێك: چاڤخشاندن و دانوستاندن ل سه‌ر نه‌رازيبوونا به‌رێز سه‌رۆكێ هه‌رێمێ ل سه‌ر ماددێ 5 يێ قانوونا ژماره 7 يا سالا 2014 ژ قانوونا خانه‌نشينكرى يا راستڤه‌كريا ئێكێ ژ قانوونا ده‌سته‌يا گشتى يا ده‌سپاكيێ ل هه‌رێما كوردستانێ – عيراق ژماره 3 سالا 20111ێ.
دو: ژناڤبرنا بڕيارا پێكئينانا لژنه‌كێ ده‌مكى بۆ ڤه‌كۆلين و دووڤچوون بۆ جينوسايدناساندنا تاوانێن دژى پێكهاتێن هه‌رێما كوردستانێ – عيراق ژماره 22 يا سالا 2014ێ.
سێ: خواندنا ئێكێ بۆ پرۆژێ قانوونێن ل خوارێ ب گۆره‌يى مادێ 71 ژ په‌يره‌ويێ ناڤخۆ يێ په‌رله‌مانێ كوردستانێ ژماره 1 يێ سالا 1992 يێ راستڤه‌كرى.
1- پرۆژێ قانوونا به‌رسينگگرتن و بازرگانيكرنێ ب مرۆڤى ل هه‌رێما كوردستانێ – عيراق.
2- پرۆژێ قانوونا دووركه‌فتنێ ژ سڤكاتيكرنێ ب ئاينان ل هه‌رێما كوردستانێ – عيراق.
3- پرۆژێ قانوونا راگرتنا كاركرنێ ب قانوونا كرێدانا خانوبه‌ران يا ژماره 9 يا سالا 2008ێ ل هه‌رێما كوردستانێ – عيراق.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 28ى نيسانا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1305 |
| 1 يۆرۆيێ ئه‌ورۆپى | 1410 |
| 1 ليرێ توركى | 480 |
ژ به‌ر كو ره‌وشا دراڤى به‌رده‌وام دهێته گوهۆڕين بۆ زانينا نووترين گۆڕانكاريان سه‌ره‌دانا مالپه‌رێ ئه‌ڤرۆ نيوز بكه.
ئه‌ڤرۆ نيوز:
رۆژناما “الشرق الاوسط” ژ زارده‌ڤێ سه‌ركرده‌كێ ته‌ڤگه‌را سه‌در راگه‌هانديه كو سه‌رۆكێ ره‌وتێ موقته‌د سه‌در ل به‌ره هه‌ر دو وه‌زيرێن پێشه‌سازى و ئاڤێ يێن ل سه‌ر به‌هرا وان بگوهۆڕيت.
ئه‌ڤى ژێده‌رێ نه‌ڤيايێ ناڤێ خوه ئاشكه‌را كه‌ت بۆ رۆژنامێ دايه زانين كو ئه‌ڤێ چه‌ندێ چو په‌يوه‌ندى ب گه‌نده‌ليێ ڤه نينه، به‌لكو ژ ئه‌گه‌رێ وێ چه‌ندێ يه كو ب دروستى كارێ خوه ناكه‌ت.
ئه‌ڤى سه‌ركردێ ته‌ڤگه‌را سه‌در دايه زانين ژى كو موقته‌دا سه‌در به‌رده‌وام دووڤچوونا وان كه‌سێن ل سه‌ر پشكا وان د ناڤ حوكمه‌تێ دا دكه‌ت دا كو يێ ئاگه‌هدار بيت و چو خه‌مسارى ژ لايێ وان ڤه نه‌هێته كرن.
رۆژناما ناڤبرى په‌يوه‌ندى ب جڤاتا وه‌زيرێن عيراقێ ژى كريه ل دۆر ڤى بابه‌تى، به‌لێ جڤاتا وه‌زيرێن عيراقێ راگه‌هاند كو ئه‌وان چو داخوازيێن ژ ڤى ره‌نگى پێ نه‌گه‌هشتينه.
بڕياره ئه‌ڤرۆ سه‌رۆكێ هه‌رێما كوردستانێ مه‌سعود بارزانى سه‌ره‌دانا باژێرێ سلێمانيێ بكه‌ت و ل گه‌ل جه‌لال ته‌له‌بانى سكرتێرێ گشتێ ئێكه‌تيا نشتيمانى كوردستان كۆم ببت.
ب گۆره‌يى چه‌ند ژێده‌رێن باوه‌ر پێكرى، ئه‌ڤرۆ مه‌سعود بارزانى سه‌رۆكێ هه‌رێما كوردستانێ دێ چيته سلێمانێ و چه‌ند كۆمبوونێن گرنگ ئه‌نجام ده‌ت و ژ وان ژى دێ چاڤ ب سكرتێرێ گشتيێ ئێكه‌تيا نشتيمانى كوردستانێ كه‌ڤيت.
سه‌رۆكێ هه‌رێما كوردستانێ ل ڤێ حه‌فتيێ ل دهۆكێ ژى ل گه‌ل لايه‌نێن سياسى و ريهسپىێن دهۆكێ كۆمبوو و چه‌ندين ته‌وه‌رێن گرنگ ل گه‌ل گه‌نگه‌شه كرن.
3ى گۆلانا 2015ێ بۆ گه‌نگه‌شه‌كرنا ره‌وشا نوكه يا عيراقێ و پڕچه‌ككرنا هێزێن پێشمه‌رگه‌يى سه‌رۆكێ هه‌رێما كوردستانێ دێ ب سه‌ره‌دانه‌كا فه‌رمى چيته ئه‌مريكا و به‌رى چوونا خوه ژى ل گه‌ل لايه‌نێن سياسى و وه‌لاتيێن هه‌رێمێ ژ بوو زانينا داخوازى و بچوونێن وان كۆم دبيت.
ئه‌ڤرۆ نيوز:
بڕيا بوو ئه‌ڤرۆ رۆژا سێشه‌مبى رێكه‌فتى 28ى نيسانا 2015ێ حه‌يده‌ر عه‌بادى سه‌رۆك وه‌زيرێن عيراقێ ئاماده‌يى روونشتنا جڤاتا نوونه‌رێن عيراقێ ل دۆر ره‌وشا ئاسايشا وه‌لاتى كۆم بانه و هنده‌ك پرسيار ل سه‌ر وێ ره‌وشێ ژێ هاتبانه كرن، به‌لێ بێى كو جڤاتا نوونه‌ران ئاگه‌هدار بكه‌ت كو ئاماده نابيت يان ژى ئه‌گه‌ران ديار بكه‌ت، سه‌رۆك وه‌زيرێن عيراقێ ئاماده‌يى روونشتنا جڤاتێ نه‌بوو.
ئەڤرۆ:
ژێدەرەکی ژ وەزارەتا ئەوقافێ و کاروبارێن ئایینی ل ھەرێما کوردستانێ بۆ رۆژناما ئەڤرۆ راگەھاند، کارێ پشکا مەزن ژ مەلایان پشتی شەرێ داعشێ د ھەشت مەھێن بۆری دا یێ باشبوو، لێ ژ بەر کو ھژمارا مەزگەفتان ل ھەرێمێ گەلەکن، ھەکە کارێ ھژمارەکا کێم ژ مەلایان یێ خراب بیت، دێ ب گرانی ل سەر وەزارەتا ئەوقافێ و مەلایان راوەستیت، ئاماژێ ددەت ژی ژێیاتیا ئایینی یا ھندەک مەلایان یا ب ھێزترە ژ ژێیاتیا نەتەوی.
مەریوان نەقشبەندی رێڤەبەرێ پەیوەندیێن وەزارەتا ئەوقافێ و کاروبارێن ئایینی بۆ (ئەڤرۆ) گوت” ل دووڤ قانوونێ مەلا فەرمانبەرێن وەزارەتا ئەوقافێ نە و وەکو ھەر فەرمانبەرەکێ دی، پێرابوونێن کارگێری ل گەل دھێنە کرن و کارەکێ ئاساییە مەلا ژ خواندنا گوتارێن ئەینیێ بھێنە راوەستاندن یان لادان”.
د بەرسڤا پرسیارەکا ئەڤرۆ دا، ئایا حالەتێن لادانا مەلایان ژ کارێن وان، یان ژ خواندنا گۆتارێن ئەینیان ژ ئەگەرێ ھەڤسۆزیا وان ل گەل داعشێ ل ھەرێمێ ھاتیە تۆمارکرن، مەریوانی گوت” حالەتێ لادانا مەلایان ل ھەریمێ ھەبوویە، لێ ژبەر پرسا داعشێ نەبوویە، بەلکو ل سەر بابەتێن جودا جودا بووینە، دبیت ژبەر بابەتێ توندرەویێ ، یان ناڤزڕاندنێ، یان نە گونجاندن ل گەل رێنمایێن وەزارەتا ئەوقافێ، ئانکو بابەتێن جۆرا و جۆرن نەکو ل سەر داعشێ ھاتینە لادان”.
ل دۆر ب ھێزبوونا ژێیاتیا ئایینی ل دەڤ مەلایان و لاوازبوونا ھەست و ژێیاتیا نەتەوی، مەریوان نەقشبەندی گوت” ھەکە ھەستا نەتەوی ل دەف ھندەک مەلایان یا کێم بیت، ب دیتنا من د نەحەق نینن، ژ بەر کو وان ب تنێ وانەیێن شەریعێ یێن خواندین کو پەیوەندی ب ھەستا نەتەوی ڤە نەبوو و ئەو وانە و پرۆگرامێن وان وەرگرتین پتر د فقھی و شەرعی بوون و پتریا وان وەلاتێن دەرڤە نەدیتینە، ھەکە د وارێ لاوازبوونا ھەستا نەتەوی دا د لاوازبن، ب حالەتەکێ ئاسایی دبینم، دیسا نە ھەموو مەلا ژی ژێیاتیا وان یا ئایینی یا زێدەترە ژ یا نەتەوی، بەلکو دشێم بێژم ھندەک ژ وان ئەڤ چەندە یا ل دەف ھەی”.
سەبارەت نە دوعاکرنا ھندەک مەلایان د گۆتارێن ئەینیێ دا بۆ پێشمەرگەی کو ب خوینا خوە بەرگریێ ژ ئاخ و وەلاتیێن کوردستانێ دکەن، دبێژیت” ڤێ پرسیارێ ژ وان بکەن و ئەم کەسێ نەچار ناکەین دوعا بکەت، ژبەر کو دوعا تشتەکێ کەسایەتیە”.
ل دۆر ھژمارا مەلایێن کورد یێن گەھشتینە داعشێ، دبێژیت” ددەمێ دو سالێن بۆری دا و ھەتا نوکە ب تنێ چار مەلا یێن گەھشتینە داعشێ کو ھندەک ژ وان فەرمانبەرێن مە بوون و ھندەک ژی فەرمانبەرێن مە نەبوون، لێ ب رازیبوونا وەزارەتا ئەوقافێ گۆتارێن ئەینیێ خواندینە وەکو ئەو مەلایێ ل ڤێ دووماھیێ دناڤ داعشێ دا ھاتیە کوشتن کو ل سەر داخوازیا مە ل گوندەکێ قەزا دوکان ل سلێمانیێ بۆ دەمەکی گۆتارێن ئەینیێ دخواندن، لێ نە فەرمانبەرێ مەبوو، پاشی چوویە دناڤ داعشێ دا و ل گەل وان ھاتیە کوشتن”.
نيشاندان