ئه‌ڤرۆ نيوز:
بڕياره ئه‌ڤرۆ سێ ياريێن دى ژ گه‌را 9ێ يا خولا نايابا كوردستانێ بهێنه كرن و د ياريا خوه دا ل ياريگه‌ها خوه دهۆك دێ مێڤانداريا پێشمه‌رگه‌يى هه‌ولێر كه‌ت.
د ڤێ ياريێ دا، دهۆك خودانا 15 خالان دێ بزاڤا ڤه‌گه‌راندنا رێزا دويێ كه‌ت پشتى دوهى پێشوه‌خت ب وه‌كهه‌ڤيا خوه يانا زاخۆ هاتيه وێ رێزێ، به‌رامبه‌ر وێ پێشمه‌رگا هه‌ولێر خودانا مه‌زنترين بۆندێن ئه‌ڤ ساله دێ بزاڤا باشتركرنا ره‌وشا خوه كه‌ت ئه‌وا نوكه ل رێزا حه‌فتێ دهێت ب 9 خالان.
د ياريه‌كا دى دا، يانا هه‌ولێر خودانا رێزا دويێ ل وه‌رزێ بۆرى دێ بزاڤێ كه‌ت به‌رده‌واميێ ده‌ته سه‌ركه‌فتنێن خوه ل ڤى وه‌رزى ب به‌هانه‌يا ڤه‌گه‌راندنا هه‌يبه‌تا خوه كو هه‌تا نوكه ئێك سه‌ركه‌فتن تۆماركريه، به‌لێ ئه‌ركێ وێ يێ ب ساناهى نابيت كو دێ به‌رامبه‌ر ئێك ژ هه‌ڤركێن خوه يێن وه‌رزێ بۆرى تيما ئارارات كه‌ت، ئه‌وا د ڤى وه‌رزى دا د ره‌وشه‌كا پيچه‌ك باشتر ژ هه‌ولێر دا دبۆريت.
ياريا سيێ ژى دێ د ناڤبه‌را هه‌ردو يانێن خودانێن رێزێن دووماهێ دا بيت، هندرين خودانا رێزا دووماهيێ دێ مێڤانداريا يانا پێشمه‌رگا سلێمانيێ كه‌ت خودانا رێزا به‌رى دووماهيێ، خوساره‌تيا چو ژ هه‌ردوكان د ڤێ ياريێ دا، دێ هيڤيێ وان مرينيت ژ بۆ رزگار بوون ژ ڤێ ره‌وشا ئه‌و تێدا.
دوهى سێ يارى ژ ڤێ گه‌رێ هاتنه كرن و تێدا زێره‌ڤانى بۆ جارا ئێكێ سه‌ركه‌فتن ل سه‌ر تيما شێروانه ل كه‌لار تۆمار كر ب دو گۆلان بێ به‌رامبه‌ر و به‌رده‌وامى دا سه‌ركێشيا خولێ ب 19 خالان و زاخۆ ژى پێشڤه‌هاته رێزا دويێ ب ره‌نگه‌كێ به‌روه‌خت ب 16 خالان سه‌ره‌رايى وه‌كهه‌ڤيا خوه ل گه‌ل تيما برايه‌تى بێ گۆل، نه‌ورۆز ژى ما ل رێزا چارێ ب 15 خالان پشتى وه‌كهه‌ڤ بووى ل گه‌ل تيما سلێمانيێ بێ گۆل.
نيشاندان
