ئه‌ڤرۆ:
ژ باشترین ماسکێن بۆ رەشاتیا بنێ چاڤان ماسکێ شەربەتا باجانکانە یا سروشتی (تەماتە) و باشتر ئەوە کو ل مال ھاتبیتە دروست کرن چونکی یا سروشتیی یە، تماتە و ئاڤا لیمونان و بیجەکا کرکمێ باش تیکەل بکە تاکو دبیتە ئیک کەرەستە و باشی ل لایی بن چاڤیًن خوە بدە ب تایبەت جھێ کو رەشاتی لیً و بو ماوێ 10 هه‌تا 20 خولەکان بھێلە باشی ب ئاڤا تێنشیر بشو و ئەڤی ماسکی بو بن چاڤێن خوە بکار بینە حەفتیێ دوو تا سێ جاران دێ جوداھیەکا بەرچاڤ بینی
ئه‌ڤرۆ نيوز، نيوار محه‌مه‌د سه‌ليم:
بڕياره ئه‌ڤرۆ و سوبه‌هى هه‌لبژارتنێن قووناغا ئێكێ يا خولا سيێ يا هه‌لبژارتنێن گۆڕان ل هه‌ولێر و سلێمانێ بهێنه كرن و ل دهۆك و كه‌ركووك ئه‌ڤ هه‌لبژارتنه ناهێنه كرن.
هه‌لبژارتنێن گۆڕان دێ ل 150 بازنان و 191 رايه‌لا هێنه ئه‌نجام دان و سه‌نديكا پارێزه‌ران و رێكخراوێن جڤاكا مه‌ده‌نى دێ چاڤدێريێ كه‌ن.
د هه‌لبژارتنا رايه‌لان دا، ده‌نگده‌ر دێ ده‌نگى ب سێ پۆستان ده‌ن كو پێكهاتينه ژ رێكخه‌ر و سكرتێرێ گشتى و كارگێرێ رايله‌لى بۆ بازنێ هه‌لبژێرن و ده‌نگده‌ر دێ ده‌نگى ب چار پۆستان ده‌ن كو ئه‌و ژى پێكهاتى نه ژ پۆستێ بازنه‌يى و سكرتێر و كارگێرێ بازنه و نوونه‌رێن ژنان ل هه‌ر ناڤه‌نده‌كا ده‌نگدانێ ژى سێ كه‌س كو پێكهاتينه ژ سه‌نديكا پارێزه‌ران و رێكخراوێن جڤاكێ مه‌ده‌نى و ژوورا هه‌لبژارتنان يا بزاڤا گۆڕان دێ سه‌رپه‌رشتيێ كه‌ن.
به‌لێن ئيسماعيل، ئه‌ندامێ ژوورا هه‌لبژانێن بزاڤا گۆڕان راگه‌هاند: هه‌لبژارتنێن ناڤخۆيى دێ ب دو قووناغات بڕێڤه چن، د قووناغا ئێكێ دا، ده‌سته‌يا بازنه‌يى و رايه‌ل دێ هێنه هه‌لبژارتن و قووناغا دويێ ژى دێ جڤاتا قه‌زايێ هێته هه‌لبژارتن، ئه‌و كه‌سێن ل جڤاتا قه‌زايێ دهێنه هه‌لبژارتن، ئێكسه‌ر ئێك دێ بيته باژێرڤانێ قه‌زايێ و دێ بيته ئه‌ندامێ جڤاتا نشتيمانى يا بزاڤا گۆڕان.
موئه‌يه‌د ئه‌حمه‌د، پارێزڤانێ پارێزگه‌ها دهۆكێ يێ بزاڤا گۆڕان بۆ ئه‌ڤرۆ نيوز گۆت: “هه‌لبژارتنێن ناڤخۆيى يێن بزاڤا گۆڕان دێ ب تنێ هه‌ردو پارێزگه‌هێن هه‌ولێر و سلێمانيێ هێنه كرن و ل دهۆك و كه‌ركووك ناهێنه كرن”.
زێده‌تر گۆت: “ل ڤان هه‌ردو پارێزگه‌هان هێشتا ئاماده‌كارى دهێنه كرن و ب گۆره‌يى كۆنگرێ گۆڕان هه‌ر دو سالان جاره‌كێ پێدڤيه هه‌لبژارتن بهێنه كرن و هێشتا يێن ڤان پارێزگه‌هان نه‌بووينه دو سال، چونكو ل هه‌يڤا چار و پێنج يێن سالا 2013 هاتينه ئه‌نجام دان”.
ب گۆره‌يى گۆتنێن ئه‌ندامێ جڤاتا نشتيمانيا گۆڕان بڕياره ل سالا بهێت ل هه‌يڤا چار و پێنج ئه‌ڤ هه‌لبژارتنه ل ڤان پارێزگه‌هان بهێنه ئه‌نجام دان و گۆت: “دێ هه‌موو بزاڤان كه‌ين د ده‌مێ خوه يێ قانوونى دا وان هه‌لبژارتنان ئه‌نجام بده‌ين”.
ئه‌ڤرۆ نيوز:
رێڤه‌به‌ريا گشتيا كه‌شناسيا هه‌رێمێ كوردستانێ راگه‌هاند كو ل ده‌سپێكا حه‌فتيا بهێت دێ پێله‌كا باران بارينێ ب سه‌ر هه‌رێما كوردستانێ دا هێت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رێ ل هه‌رێما كوردستانێ راگه‌هاند كو دێ هه‌رێما كوردستانێ ل رۆژا شه‌مبى رێكه‌فتى 13\12\2014 كه‌ڤيته به‌ر پاله‌په‌ستوويێن نزمێن ده‌ريا سۆر، ژ ئه‌نجامێ ڤێ چه‌ندێ ژى ئه‌سمانێ هه‌رێمێ دێ يێ نيڤ ئه‌ورى بيت و پاشان بيته ئه‌ورێ ته‌مام و ل دانێ ئێڤارى بيته باران و ل رۆژا د دووڤدا 14\12 دێ ئه‌ڤ كارتێكرنه مه‌زنتر لێ هێت ب ئێكگرتنا هه‌ردو پاله‌په‌ستوورێن ده‌ريا سۆر و ده‌ريا سپى يا ناڤه‌راست و دێ ئه‌سمان ب تمامى بيته ئه‌ور و باران بارين دێ يا به‌رده‌وام بيت و هنده‌ك بريسى ژى ل هنده‌ك جهان دێ هه‌بن.
هه‌ر ب گۆره‌يى ڤێ نڤيسارا پشكا پێشبينيان دێ پلا گه‌رماتيێ ژى ب ره‌نگه‌كێ گه‌له‌ك به‌رچاڤ هێته خوار و له‌زاتيا بايى ژى دێ زێده بيت بۆ 30 هه‌تا 40 كيلۆمه‌تران د ده‌مژمێره‌كێ دا و مه‌ودايێ ديتنێ ژى دێ كێم بيت ب رێژا پێنج بۆ حه‌فت كيلۆ مه‌تر.
دايه زانين ژى دێ كارتێكرنا ڤێ پێلێ دێ ل رۆژا دوشه‌مبى لاواز بيت و ل رێكه‌فتى 15\12\2014 كارتێكرنا وێ نامينيت.
ل دووڤ پێشبينيان ژى دبيت ل دهۆك و هه‌ولێر 10 هه‌تا 15 ملم و سلێمانيێ 15 هه‌تا 25 ملم باران بباريت.
ئەڤرۆ:
د راپۆرتەکێ دا بۆ رۆژناما ئەڤرۆ کو نەوزاد زادە بەرھەڤرکیە ئاماژە ب وێ چەندێ کریە کو ل گور بریارەکا وەزارەتا پەروەردێ یا حوکمەتا ھەرێما کوردستانێ ئەو قوتابیێن کو پشکا خواندنا خوە دگوھۆریت واتە ژ زانستی بچیتە وێژەیی و سالا ئێکێ دەرنەچیت ئەو دێ جارەک دن چیتەڤ وێژەیی ، و ڤێ یەکێ ژی بارێ ھندەک قوتابیان گرانکریە و دخوازن ھەر ل جھێ خوە بخوونن.
سوعاد عەلی ئێکە ژ وان قوتابیێن کو زیاندارێ ڤێ یەکێ بووی و گۆت: “پارسال ژ بەر ھندەک کاودانان ئەز ژ زانستی چوومە وێژەیی و د سالا ئێکێ دا دەرنەچووم و ئەڤ سالە دبێژن دڤێت جارەک دن بچیە زانستی و ئەڤ یەک ژی بارگرانیەکا زور بوو من و کێشە بۆ بدەھان قوتابیێن دن درۆستکریە ژ بەرکو پارسال ھەموویێ من وێژەیی خواندی یە و ئەڤ سال ژی ژ مەھا نەە ھەتا نھا وێژەیی دخوونم و ژ نوو بریار ھاتیە کو جارەک دن زانشتی بخوونم و بتنێ دوو ھەیڤێن مایی بوو تاقیکرنێن پێشەکی”
زێدەتر گۆت: “دڤێت جھێن شولەژێ ب زووترین دەم چارەسەریەکێ ببینن، ئەز پێشنیازدکەم کو جھێن شولەژێ چارەنڤیسێ وان قوتابیان دیار بکەت یان ژ زانستی نەبەن وێژەیی یان ھەر ل وێژەیی بھێلن و ما گونەە چی یە کو ئەڤ بارگرانیە بو مروڤی درۆستکریە نەک ئەز بتنێ زیاندار بوویمە بەلکو دەھان قوتابی زیانداربووینە“.
قوتابیەکێ دن ب ناڤێ موحسن بابەکر رەخنە ل بڕیارا حوکمەتێ ھەیە و گۆت: “نە ئاریشەیە ئەڤ بریارە دەرکەفتی، بەلێ ئاریشە ئەوە ئەڤ بریارە گەلەکا گیرویە ژ بەرکو ئەز وەکو قوتابیەک چەوا دێ کارم د ماوەیێ دوو سێ ھەیڤان قوناغا زانستی ھەموویێ برم ، بەلێ ئەگەر ئەز ھەر زانستی مابامە دا چارەسەریا دەرچوونا خوە کەم“.
ژ لایێ خوڤە خورشید یەحیا ھاریکارێ رێڤەبەرێ گشتیێ پەروەردا پارێزگەھا دھوکێ دیارکر کو گوھۆرینا بەشی کارەکێ ب ساناھی نینە و بۆ ئەڤرۆ گۆت: “ھەر قوتابیەکێ بەشێ خوە گوھۆری واتە ژ زانستی بچیتە وێژەیی و د سالا ئێکێ دا پشکدارێ تاقیکرنێن دەرەکی نەبیت و سالا دووڤدا جارەک دن دێ چیتەڤ بەشێ خوو واتە جارەک دن چیتە زانستی و ئەڤە رێنمایێن نوونە و دڤێت ھەموو قوتابی پێگیربن“.
ژ لایەکێ دنڤە محەمەد سەعید بەرپرسێ ئەزموونان ل رێڤەبەریا پەروەردا قەزا ئامێدیێ دیارکر کو ل سنوورێ پەروەردا قەزا ئامێدیێ نێزیکێ 30 قوتابیان ئەڤ ئاریشە ھەیە و بۆ ئەڤرۆ گۆت: “دەرکرنا ھەر بریار و رێنمایەکێ ژلایێ وەزارەتا پەروەردێ پێدڤی یە د دەمێ خوەدا بیت ئەگەر دێ کومەکا قوتابیان زیاندارببن ھەر بوو نموونە ئەڤ بریارە نھا دەرچوویە و قوتابی ھەیە دوو سالان ژ زانستی دویر کەفتی و جارەک دن بچیتە زانستی دێ لسەر وی بیتە بارگرانی“.
زێدەتر گۆت: “دڤێت وەزارەت چارەسەریەکێ بۆ ئەڤان قوتابیان ببینیت یان ژی دڤێت قوتابی قبول بکەن و بخوونن و قبوولکرنا وێ ژی بوو قوتابیان بارگرانیە“.
ئەگەر ل سنوورێ ھەر پەروەردەکێ نێزیکێ 30 قوتابیان ئەڤ ئاریشە ھەبیت دێ ل سنوورێ پارێزگەھا دھوکێ بنە نێزیکێ 270 قوتابی و ل ھەموو کوردستانێ واتە پارێزگەھا ھەولێر و سلێمانی و دھۆک و کەرکووک بنە نێزیکێ 1500 قوتابیان.
ئه‌ڤرۆ نيوز:
راگه‌هاندنا پۆليسێن پارێزگه‌ها دياركر كو ب مه‌ره‌ما نه‌هێلانا كێشێن ل سه‌ر فرۆتنا ترۆمبێلێن ب قست و سالنامێن سه‌خته ئه‌و ب هه‌ڤكارى ل گه‌ل رێڤه‌به‌ريا هاتنوچوونا دهۆكێ ل گه‌ل خودانێن پێشانگه‌هێن ترۆمبێلان كۆمبوون.
نه‌قيب هێمن سلێمان، به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “ئه‌ڤرۆ پشكا پۆليسێن نه‌هێلانا گۆنه‌هباريان و رێڤه‌به‌ريا پۆليسێن باژێرى، رۆژهه‌لات ب هه‌ڤكارى ل گه‌ل رێڤه‌به‌ريا هاتنوچوونا پارێزگه‌ها دهۆكێ كۆم بوون”.
زێده‌تر گۆت: “ئه‌ڤ كۆمبوونه ب مه‌ره‌ما نه‌هێلانا ئاريشان بوو ل دۆر فرۆتنا ترۆمبێلێن ب قست و سالنامێن ترۆمبێلان يێن سه‌خته و داخواز ژ خودانێن پێشانگه‌هان كر كو هاريكاريا وان ب كه‌ن دا كو كێشێن د ڤى ده‌رباره‌يى دا نه‌هێلن”.
ئەڤرۆ نیۆز، سالار دۆسکی:
پشتی دەرکەفتنا تاکە کورێ کورد ل پرۆگرامێ ئەرەب ئایدۆل (عەمار کۆفی) بوویە بابەتێ گەرمێ رۆژنامە و گوڤاران و سازیێن راگەھاندنێ نافخوە و دەرڤە ودەرکەفتنا وی ب غەدرە ھاتیە قەلەم دا، کەنالێ mbc ب رێکا مالپەرێ خوە راپرسینەک بەلاڤەکریە ب بھانا ھندێ زووترین کەسێ دەرکەفتی دەنگا بینت دێ زڤریتە ڤە، ل دۆر بابەتی بابێ عەمار کۆفی، محەمەد سالح کیڤی بۆ مالپەرێ ئەڤرۆ نیۆز دئاخڤیت.
محەمەد سالح کیڤی گۆت: پشتی دەرکەفتنا (عەمار کۆفی) خەلک ئاخفت و کەنالی دیارکریە کو باوەرنەدکر پشتی دەرکەفتنا (عەمار کۆفی) دێ ئەڤ رەنگڤەدانە پەیدابیت، ئاشکراکر کو دەرکەفتنا وی د چەندین مالپەر و سایت و پەیچێن فێسبووکی ل کوردستانێ و جیھانا عەرەبی رەنگ ڤەدا، بابێ کۆفی گۆتژی: پێشبینی دکەین ئەڤ راپرسینە مژوول بوونا وەلاتیان و پیچەک دەنگ و گڤاشتن ل سەر کەنالی کێم ببیت.
ھەڤدەم ئاشکراکر کو پەیوەندی ب عەمار کۆفی کرینە و دووپاتکریە کو ئەڤە مژوولی یا وەلاتیانە، عەماری گۆت: نازڤرم و من ژی گۆتیێ نە زڤرە، بابێ وی گۆت: دبیت رۆژا ئەینی کەنالێ mbc سپرایز ھەبیت..
بابێ وی گۆتژی: چەندین کەسان دیاری بۆ (عەمار کۆفی) بەرھەڤ کرینە ھەتا دزڤریتە کوردستانێ، جھێ ئاماژەکرنێ یە پێشتر بابێ عەماری دیارکر بوو کو عەماری ھەتا دوویێ ناڤنجی خواندیە و ژبەر دەست کورتیا خوە ژ خواندنێ دووکریە و ب مەرەما کارکرنێ، ھەمبەر نافکرنا (کۆفی) ژی بابێ وی گۆت: ناڤێ من محەمەد سالح کیڤی یە و ب زمانێ عەرەبی بێژنە کێڤی (کۆفی).
ئه‌ڤرۆ نيوز:
ده‌رباره‌يى وه‌رگرتنا قه‌رزێن حوكمه‌تا هه‌رێما كوردستانێ، ب مه‌ره‌ما بڕياردان ل سه‌ر حه‌لالبوون يان حه‌رامبوونا ئه‌وان قه‌رزان، ئێكه‌تيا زانايان داخوازيه‌كێ ئاراسته‌يى سه‌رۆكاتيا په‌رله‌مان و حوكمه‌تا هه‌رێما كوردستانێ دكه‌ت.
مه‌لا عه‌بدولا مه‌لا سه‌عيد سه‌رۆكێ ئێكه‌تيا زانايێن ئاينى ل هه‌رێما كوردستانێ بۆ راديۆيا ناڤخۆ راگه‌هاند كو هه‌كه حوكمه‌تا هه‌رێمێ و په‌رله‌مانێ كوردستانێ ب پێدڤى بزانن دڤێت ل ده‌سپێكێ پرۆژێ وه‌رگرتنا قه‌رزان ره‌وانه‌يى ئێكه‌تيا زانايان بكه‌ن، دا كو به‌رچاڤ كه‌ين و كۆمبوونێن به‌رفره‌هـ ژى ل سه‌ر بكه‌ين، ب تێكرايا ده‌نگان بڕيارێ ل سه‌ر حه‌لالبوون يان حه‌رامبوونا وان قه‌رزان بده‌ين.
ئه‌و چه‌نده ژى ئاشكه‌را كر كو نابيت هه‌ر كه‌سه‌ك ژ لايێ خوه ڤه بڕيار ل سه‌ر حه‌لالبوون يان حه‌رامبوونا وه‌رگرتنا قه‌رزێن حوكمه‌تا هه‌رێمێ بده‌ت، چونكو وه‌رگرتنا مفايى ژ قه‌رزان ل سه‌ر چه‌ند جۆران هه‌يه، هه‌تا كو پرۆژێ قانوونێ نه‌بينن، نه‌شێن بڕيارێ د وێ ده‌ربارێ دا بده‌ن.
ئه‌ڤ داخۆيانيا سه‌رۆكێ ئێكه‌تيا زانايێن ئاينى د ده‌مه‌كى دا كو حوكمه‌تا هه‌رێمێ پێشنيازه‌ك ره‌وانه‌يى په‌رله‌مانێ كوردستانێ كريه، ب مره‌ما په‌سه‌ندكرنێ و قه‌ركرنێ ژ چه‌ند وه‌لاتان.
ئه‌ڤرۆ نيوز:
حوكمه‌تا هه‌رێما كوردستانێ ب فه‌رمى هێلا ئه‌نترنێتێ ژ ده‌ڤه‌رێن بن ده‌سته‌لاتا داعش بڕى و نوكه بزاڤێ دكه‌ت هێلا مۆبايلێ ژى ژێ ببڕيت.
لژنا شوونوار و خزمه‌تگۆزاريێن باژێرڤانى و ڤه‌گۆهاستن و گه‌هاندن و گه‌شتوگۆزارێ ل په‌رله‌مانێ كوردستانێ ده‌رباره‌يى پرسا بڕينا هێلا ئه‌نترنێتێ ژ ده‌ڤه‌رێن كوردستانى يێن بن ده‌سته‌لاتا داعش، هه‌ر ئێك ژ وه‌زيرێ ناڤخۆ و ڤه‌گۆهاستن و گه‌هاندنێ گازيكرن.
مه‌ولود باوه‌موراد وه‌زيرێ ڤه‌گۆهاستن و گه‌هاندنێ ل حوكمه‌تا هه‌رێما كوردستانێ ب وه‌كاله‌ت بۆ هاولاتى گۆت: “پشكه‌ك ژ وان كۆمپانيێن مۆله‌تا كاركرنێ ژ هه‌رێمێ وه‌رگرتين، پشتى داعش ئه‌و ده‌ڤه‌ره گرتين، هێلێن ئه‌نترنێتێ يێن ژ وێ ده‌ڤه‌رێ بڕين”.
گۆتژى: “د كۆمبوونێ دا ل گه‌ل په‌رله‌مانى مه بڕيار دا، هه‌ر كۆمپانيه‌كا نوكه هێلا ئه‌نترنێتێ نه‌بڕيبيت، بهێنه ئاگه‌هدار كرن و هێلێن وان بهێنه راگرتن”.
ده‌رباره‌يى ئه‌و كۆمپانيێن ل ده‌سته‌يا په‌يوه‌نديێن عيراقێ مۆله‌تا كاركرنێ وه‌رگرتى ژى گۆت: “وه‌زيرێ ناڤخۆ يێ هه‌رێمێ ل سه‌ر وێ پرسێ ل گه‌ل وه‌زيرێ ناڤخۆيێ عيراقێ دێ هه‌ماهه‌نگيێ كه‌ن”.
ل دۆر راگرتنا هێلا ئه‌نترنێتێ ژى گۆت: “راگرتنا هێلا تله‌فۆنێ ل وان ده‌ڤه‌ران يا ب زه‌حمه‌ته، چونكو ژبلى وان رۆژانه هژماره‌كا زۆرا وه‌لاتيان مفايى ژێ دبينن و رۆژانه بكار دئينن، ب تايبه‌ت په‌يوه‌نديكرنا پێشمه‌رگه‌يى ب كه‌سوكارێن وان”.
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا خواندنا بلند و ڤه‌كۆلينێن زانستى ل حوكمه‌تا هه‌رێما كوردستانێ راگه‌هاند كو ژ به‌ر به‌رژه‌وه‌نديا گشتى ماوێ په‌يوه‌نديكرنێ ب زانكۆ و په‌يمانگه‌هان هاته درێژكرن و هيڤى خواست كو د وى ماوه‌يى دا قوتابى مامه‌له‌يێن خوه ته‌مام بكه‌ن دا كو زوو ده‌ست ب خواندنێ بكه‌ن.
د نڤيساره‌كێ دا كو دانه‌ك بۆ ئه‌ڤرۆ نيوز هنارتيه، هاتيه كو ژ به‌ر به‌رژه‌وه‌نديا گشتيا هه‌موو قوتابيێن نوو وه‌گرتى ل زانكۆ و په‌يمانگه‌هێن هه‌رێما كوردستانێ و بۆ دانا ده‌رفه‌تا زێده‌تر بۆ په‌يوه‌نديكرنێ ب زانكۆ و په‌يمانگه‌ها كو لێ هاتينه وه‌رگرتن، ل سه‌ر داخوازا زانكۆيان وه‌زاره‌تا خواندنا بلند و ڤه‌كۆلينێن زانستى بڕيار دا ب درێژكرنا ماوێ په‌يوه‌نديكرنێ ب زانكۆ و په‌يمانگه‌هان هه‌تا رۆژا پێنجشه‌مبى رێكه‌فتى 18\12\2014 د هه‌مان ده‌م دا، ده‌واما فه‌رمى يا قووناغا ئێكێ دێ 13\12\2014 ده‌ست پێ كه‌ت.
ئاماژه ب وێ چه‌ندێ ژى كريه كو ژ به‌ر هندێ داخوازێ ژ قوتابيان بكه‌ن بزاڤێن خوه باشتر لێ بكه‌ن دا كو بشێن مامه‌له‌يێن خوه ته‌مام بكه‌ن و په‌يوه‌نديێ ب زانكۆ و په‌يمانگه‌هان بكه‌ن دا كو زووتر ده‌ست ب خواندنێ و وانێن خوه‌ب كه‌ن.
ئه‌ڤرۆ نيوز:
ژ سێ كه‌ساتيێن ئێكێ ب هژمارا دووڤكه‌فتيان Follower ل سه‌ر تۆرا جڤاكيا يا تۆيته‌رى كچه‌كا سترانێژه و سه‌رۆكێ هه‌رێما كوردستانێ ژى ل رێزا سيێ دهێت.
پشتى د. به‌رهه‌م ئه‌حمه‌د سالح جێگرێ دويێ يێ به‌رێ يێ ئێكه‌تى نشتيمانى كوردستان كو ل رێزا ئێكێ دهێت ب كۆمكرنا زێده‌تر ژ 102 هزار دووڤكه‌فتيان، هێلى لۆڤ سترانبێژا گه‌نجا كورد دهێت ب كۆمكرنا زێده‌ترى 55 هزار و 200 دووڤكه‌فتيان و سه‌رۆكێ هه‌رێما كوردستانێ ژى ل رێزا سيێ دهێت ب زێده‌تر ژ 51 هزار و 200 دووڤكه‌فتيان.
ئه‌ڤ سه‌ركه‌فتنا هێلى لۆڤێ بۆ ڤێ قووناغێ ژ ئه‌نجامێ به‌لاڤكرنا پۆستێن وێ يێن زێده و حه‌ز ژێكه‌رێن وێ يێن به‌رچاڤ دهێت كو بگه‌هيته ڤێ قووناغێ ل سه‌ر ئاستێ كوردستانێ.
نيشاندان