ئه‌ڤرۆ نيوز:
د سه‌ره‌دانه‌كا نه‌چاڤه‌رێكرى دا، سه‌رۆكێ جڤاتا نوونه‌رێن عيراقێ، سه‌ليم جبۆرى، گه‌هشته پارێزگه‌ها كه‌ركووك و ل گه‌ل جڤاتا پارێزگه‌ها كه‌ركووك كۆمبوو.
سه‌ليم جبۆرى، سه‌رۆكێ جڤاتا نوونه‌رێن عيراقێ ئه‌ڤرۆ 9\12\2014 گه‌هشته كه‌ركووك و نوكه ل گه‌ل جڤاتا پارێزگه‌هێ د كۆمبوونێ دايه و دێ پشتى كۆمبوونێ كۆنگره‌كێ رۆژنامه‌ڤانى ساز كه‌ت.
سەرۆکێ حوکمەتا ھەرێما کوردستانێ د ھەڤدیتنەکێ دا ل گەل کەنالێ (بی بی سی) یێ بریتانی راگەھاند، بەغدا بێی ھەرێما کوردستانێ نەشێت پەترۆلا کەرکووکێ بھنێریتە دەرڤە و دیارکر نۆکە ل عیراقێ و ھەرێما کوردستانێ پرسا سەرەکی ئەوە کا چاوان شەڕێ داعش بھێتە کرن.
نێچیرڤان بارزانی بۆ کەنالێ ناڤبری گوت ژی”نۆکە حوکمەتەک و سەرۆک وەزیرەکێ نوو ل بەغدا یێن ھەین و د سیاسەتا مەژی دا بوویە کو کاری ل گەل حوکمەتا نوو یا عیراقێ بکەین”
ل دۆر ھنارتنا پەترۆلا کەرکووکێ دبێژیت”ب راستی و ب شێوەکی پراکتیکی، عیراق بێی حوکمەتا ھەرێما کوردستانێ نەشێت پەترۆلا کەرکووکێ بھنێریت”.
ئه‌ڤرۆ:
ھێمن ھەورامی بەرپرسێ پەیوەندیێن دەرڤە یێ پارتی دیموکراتی کوردستان بۆ ئەڤڕو دیارکر مە ستراتیژیەتا بەر ب دەولەتبوونا ھەرێما کوردستانێ یا ھەی, ئانکو دخوازین ئەڤ ھەرێمە بمینیت و گەشە بکەت و بەر ب دەولەتبوونێ ڤە بچیت و گۆت “مە دو خالێن بنەرەتی یێن ھەین ئەو ژی دەرفەت و مەترسی یە کو ب ھەردو خالان تەماشەی کوردستانێ دکەین, ئێک ژ وان دەرفەتان ژی ئەوە کو ژ سەد سالێن بۆری و ھەتا نھا بۆ ئێکەمین جارە ھەرێما کوردستانێ دبیتە جھەکێ کارتێکەر نەک کارتێکرن لێ ھاتیەکرن, ئەڤە ژی دەرفەتەکە بۆمە ھاتیە پێش، لێ ئەم ژبیر نەکەین چەند دەرفەت بۆمە بھێنە پێش، دێ مەترسی ژی ل سەر ھەرێمێ د پتربن” .
بەرپرسێ پەیوەندیێن دەرڤە یێ پارتی دیار کرژی، ھەر چەندە ھندەک دەرفەتێن باش بۆمە ھاتینە پێش، لێ مەترسیەکا مەزن ژی ھەیە ئەو ژی ئێکرێز نەبوونا خەلکێ ھەرێما کوردستانێ یە و گۆت” ھەکە سەحکەینە رۆژھەڵاتا ناڤین، دێ بینین کو عەقلێ دیکتاتوریەتا توندرەو ل سەر ئاستێ دەوڵەتی بەر ب لاوازبوونێ ڤە دچیت کو ئەڤە ژی دەرفەتەکە بۆ ھەرێما کوردستانێ، لێ ژبیرا مە نەچیت عەقل و ھزرا (مەزھەبی ) یا گەشە دکەت و ئەڤە ژی مەترسیە و نەمانا دکتاتۆران ژی وەکو کەس ئەڤە ژی دەرفەتەکا باشە بۆ ھەرێمێ، لێ ھاتنا ھندەک دکتاتۆرێن دی وەک مالکی ئەڤە ژی مەترسیە بۆمە”.
ھێمن ھەورامی ئاماژە دا وێ چەندێ کو ئەمریکا جارەکا دی نەشێت کوردان ل رۆژھەڵاتا ناڤین ل پشت گوە بھاڤێژیت، ژ بەر کو کوردستان یا کاریگەرە بۆ ئەمریکا و ھەکە ئەمریکا ڤیا یەکسانیێ د ناڤبەرا سونەیان و شیعان دا دروست بکەت، نەشێت بێی کوردان و ھەکە ئەمریکا دخوازیت ئارامیا رۆژھەڵاتا ناڤین بھێتە پاراستن و دژی تیرۆرێ ب راوەستن وێ ژی بێ کوردان نەشێت بکەت و ھەکە خوە ئەمریکا پەترۆل ژی نەڤیا ل رۆژھەڵاتا ناڤین، لێ ھەر دڤێت پەترۆلا ڤێ دەڤەرێ بۆ ئابورێ جیھانی بەردەوام ببیت و ئەمریکا یا پێدڤی ھەرێما کوردستانێ یە.
ل دۆر ئیرانێ ژی دبێژیت” ئیران بۆ پرۆژێ خوەیێ رۆژھەڵاتا ناڤین نەشێت کوردان پشت گوە بھاڤێژیت و ستراتیژیەتا سەرەکی یا ئیرانێ ژی بۆ ناڤخوەیا عیراقێ بەرفرەھکرنا پێگەھێ شیعانە و لاواز کرنا سونایە کو ڤێ پێنگاڤێ ژی بێ کوردان نەشێت بھاڤێژیت, ھەروەسا تورکیا ژی نەشێت کوردان پشت گوە بھاڤێژیت، ژ بەر کو تورکیا بەرژەوەندیێن ئابوری یێن مەزن ل گەل ھەرێما کوردستانێ یێن ھەین”.
ئه‌ڤرۆ:
بەرپرسێ لقا پارتی دیموکراتی کوردستان ل پارێزگەھا ھەلەبجە راگەھاند، کۆرسیێن پارێزگەھێ ل گەل پۆستێن کارگێریا ھەلەبجە ھاتینە بەلاڤکرن ل سەر لایەنێن سیاسی و تنێ پارێزگەر و سەرۆکێ جڤاتا پارێزگەھێ د ناڤبەرا ئێکەتیێ و گۆڕان دا ماینە، ھەروەسا دیارکر، ئەڤ ئاریشەیا ل پارێزگەھا سلێمانیێ د ناڤبەرا ئێکەتیێ و گۆڕان دا لسەر پۆستێ پارێزگاری ھەی، ل ھەلەبجە دوبارە بوویە و رێکناکەڤن ل سەر ئەڤی پۆستی.
فازل بەشارەتی، بەرپرسێ لقا 12 یا پارتی دیموکراتی کوردستان ل پارێزگەھا ھەلەبجە بۆ رۆژناما ئەڤرۆ دیارکر، کو رێککەفتن ل سەر بەلاڤکرنا پۆستێن پارێزگەھا ھەلەبجە ھاتیەکرن و گۆت” پشتی دەرچوونا بڕیارا ب پارێزگەھبوونا ھەلەبجە ھاتیە دەرکرن، لایەنێن سیاسیێن پارێزگەھێ کۆمبوونەک ل بارەگەھێ بزاڤا ئیسلامی گرێدان و دانوستاندن ل دۆر بەلاڤکرنا پۆستێن پارێزگەھێ و چاوانیا پێکئینانا جڤاتا پارێزگەھێ ھاتەکرن، ژ بەر کو ھەلبژارتنێن جڤاتا پارێزگەھان ل ھەلەبجە نەھاتینە کرن، لەوما لایەنێن سیاسی ل سەر بەلاڤکرنا کۆرسیان و دانانا جڤاتێ رێککەفتن، تنێ دو پۆست ماینە ڤالا ئەوژی پۆستێ پارێزگاری و سەرۆکێ جڤاتا پارێزگەھێ کو ھەردو پۆست بەھرا ئێکەتیێ و بزاڤا گۆڕانن، لەوما دڤێت ھەردو لایەن رێکبکەڤن ل سەر تژیکرنا ھەردو پۆستێن پارێزگەھێ، مخابن ئەڤ ئاریشەیا ل پارێزگەھا سلێمانیێ د ناڤبەرا ئێکەتیێ و گۆڕان دا پەیدابووی گەھشتیە پارێزگەھا ھەلەبجە ژی و نەشێن دناڤ خوەدا رێکبکەڤن، بەلێ مە پتر دەلیڤە دایە ھەردو لایەنێن سیاسی و ھەکە نەگەھنە رێککەفتنێ، ئەڤە لایەنێن سیاسی رازینابن، ب تایبەتی ئەم وەکی پارتی دیموکراتی کوردستان رازینابین ب ڤی شێوەی رفتار ل گەل پارێزگەھا ھەلەبجە بھێتەکرن و کەسەکی بکەنە پارێزگار کو تنێ ب ناڤ پارێزگاربیت”.
بەشارەتی گۆت ژی” ئاریشەیا سەرەکیا پارێزگەھبوونا ھەلەبجە، نەبوونا چو قانوونانە بۆ دانانا جڤاتا پارێزگەھێ، بۆ ڤێ مەرەمێ ژی پرۆژە پێشنیارەک ھاتیە بەرھەڤکرن و ئەم وەکی لایەنێن سیاسی یێن ھەلەبجە ل گەل سەرۆکایەتیا جڤاتا وەزیران رێککەفتینە و ئەڤ پرۆژە پێشنیارە مە ھنارتیە سەرۆکایەتیا ھەرێما کوردستانێ و سەرۆک بارزانی ئیمزاکریە و دوبارە یێ ڤەگەڕیایە سەرۆکایەتیا جڤاتا وەزیران و داخواز دکەین بەری ھاتنا بھێنڤەدانا زڤستانێ یا پەرلەمانێ کوردستانێ، دەست ب خواندنا ئێکێ بۆ بکەت و بھێتە پەسەندکرن، راستە ژلایێ قانوونی ڤە یا ب زەحمەتە جڤاتا پارێزگەھێ وەکی ناڤ بھێتە دیارکرن، بەلێ مە ئاریشە ل گەل ڤێ چەندێ نینە و ھەر ناڤەکێ بۆ دادنن ئەم درازینە، تنێ جڤاتەک بۆ پارێزگەھا ھەلەبجە بھێتە دانان و بودجە بۆ بھێتە مەزاختن، ھەتا بشێین پرۆژەیێن خزمەتگوزاری ئەنجام بدەین”.
ئەڤرۆ:
گۆڤارا بەرنیاسا ئەمریکی TIME کو ئێک ژ گۆڤارێن ناڤدارێن جیھانێ یە، ناڤێن بەربژارێن سالێ ئاشکرا دکەت کو مەسعود بارزانی سەرۆکێ ھەرێما کوردستانێ ژی ئێک ژ وانە.
گۆڤارا ناڤھاتی بۆ سالا 2014 ھەشت کەساتیێن جیھانێ بۆ برنا ڤی ناسناڤی دەستنیشان کرینە کو بڕیارە سوبەھی د رێورەسمەکی دا ل باژێرێ نیویۆرک یێ ئەمریکی بھێتە ئەنجامدان.
نانسی گیبس راگەھاند کو گۆڤارا وان ئەڤ بەربژارە ل سەر بنەمایێ وێ چەندێ یێن دەستنیشانکرین کو وان کاریگەریەکا مەزن ل سەر روودان و نووچەیێن ئەڤ سالە یێن جیھانێ ھەبوویە و گۆت: “ئێک ژ ڤان دێ ژ ئالیێ دەستەیا رێڤەبەرێن نڤیسەرێن گۆڤارێ ڤە ھێتە دەستنیشانکرن”.
ڤی ناسناڤی ل سەر ئاستێ جیھانێ ناڤودەنگەکێ زۆر یێ ھەیی و ل سالا بۆری ناسناڤ دابوو پاپا فرانسیس پاپایێ ڤاتیکانێ و بەری دو سالان ژی پێشکێشی باراک ئۆباما سەرۆکێ ئەمریکا کربوو.
ئەڤرۆ:
رێکخراوا چاڤدێریا مافێ مرۆڤی ل سووریێ راگەھاند کو فرۆکێن شەری یێن ئیسرائیلێ ھێرشی چەندین ناڤەندێن سەربازی و چەکێن گران یێن سووریێ ل رەخ دیمەشقێ کرینە و ھەموو بنگەھێن سەربازی و چەکێن گران ھاتینە ژناڤبرن، لێ د ئەنجاما وێ ھێرشێ دا چو کەسەک نەھاتیە کوشتن.
ل ئالیێ دی وەزارەتا دەرڤە یا سووریێ د داخۆیانیەکا فەرمی دا راگەھاند کو ئیسرائیلێ قانوونێن نێڤدوەلەتی بنپێکرینە و دڤێت نەتەوێن ھەڤگرتی ل ھەمبەر ڤێ یەکێ بێدەنگ نەبیت و ھۆشداریێ بدەتە ئیسرائیلێ کو نابیت سنۆرێ وەلاتێ مە ببەزینن.
سەبارەت ب ھێرشا فرۆکێن شەری یێن ئیسرائیلێ ل سەر چەندین ناڤەندێن سەربازی ل رەخ فرۆکخانا دیمەشقێ ھەتا نھا بەرپرسێن ئیسرائیلێ چو داخۆیانیێن فەرمی نەداینە، لێ پەیڤدارا وەزارەتا دەرڤە یا ئیرانێ مەرزیە ئەفخەم د پرێس کۆنفرانسەکێ دا دیار کر کو ئیسرائیل سەروەریا سووریێ بنپێ دکەت و نابیت وەلاتێن جیھانێ ل ھەمبەر ڤێ یەکێ بیدەنگ بن، چونکو ھەکە ئەو ھێرش ل سەر ئیسرائیلێ ھاتبا کرن دا نھا ھەموو وەلاتێن جیھانێ ھەلویستەکێ ئاشکرا نیشا بدەن، لێ بۆچی ھەمان ھەلویست ل ھەمبەر ھێرشێن ئیسرائیلێ ناھێتە دیتن، ئەڤە ژی نیشا ددەت کو ئیسرائیل پشتراستە کو چو وەلاتەک دەنگێ خوە ناکەت و ھەکە ئەو ھێرشێن ئیسرائیلێ بەردەوام بن ئیران بێدەنگ نامینیت.
ئه‌ڤرۆ نيوز:
د دیدارەکێ دا بۆ رۆژناما ئەڤرۆ کو سەرجان مەحمود ل وەلاتێ تورکیا بەرھەڤکریە، بالیۆزێ ئەلمانیا ل وی وەلاتی راگەھاند کو د شەرێ ل دژی تیرۆرستان دا دێ ھەتا داویێ ھاریکاریا کوردان بکەن و گۆت: “شەرڤان و پێشمەرگەیێن کورد ب دلەکی مەزن ڤە بۆ ئازادیا ئاخا خوە شەرێ تیرۆرستێن داعشێ دکەن و ئەز جارەکا دی دبێژم د شەرێ ل دژی تیرۆرێ دا چ ژ دەستێ مە بھێت ئەم دێ کەین و کوردان ب تنێ ناھێلین”.
ئیبرھارد پۆل بالیۆزێ ئەلمانیا ل تورکیا بۆ دیتنا رەوشا پەنابەرێن کۆبانێ یێن ل سروجێ “پیرسوس” ل گەل شاندەکا حوکمەتا ئەلمانیا سەرەدانا کەمپێن پەنابەران کر و پشتی سەرەدانا خوە تایبەت بۆ رۆژناما ئەڤرۆ راگەھاند کو ئەو کەیفخوەشە کو ئەڤرۆ سەرەدانا کوردێن رۆژئاڤا ل سروجێ دکەت و گۆت: “ل ئەلمانیا ب سەد ھزاران وەلاتیێن کورد دژین و بۆ سەرنج راکێشانا سەر رەوشا کۆبانێ و شنگالێ رۆژانە چالاکیان ئەنجام ددەن و ئەم ژی وەک ئەلمانیا نەشێین ل ھەمبەر کریارێن نە مرۆڤی یێن تیرۆرستان بێدەنگ بمینین و ئەڤ سەرەدانا مە ژی بۆ ناسکرنا رەوشا خەلکێ کۆبانێیە و دلنیا بن ئەم دێ د ھەر واری دا ھەڤکاریێن پێدڤی بدەینە گەلێ کورد و پشتەڤانیێ ل وان بکەین”.
بالیۆزێ ئەلمانیا ھەروەسا راگەھاند ژی کو رەخنەیێن گەلەک دژوار ل سەر حوکمەتا تورکیا ھەنە و ھژمارەک مەزن ژ رۆژنامەڤان و پەرلەمانتارێن کوردێن تورکیا و سازیێن سڤیل بۆ مە دیار کرینە کو تورکیا سنۆرێن خوە بۆ دەربازبوونا تیرۆرستێن داعشێ ڤەکری ھێلایە و تیرۆرست ژ ئاخا تورکیا ڤە ھێرشێ کۆبانێ دکەن و گۆت: “ئەز دێ رەخنە و زانیاریێن کو کەڤتنە دەستێ مە ل گەل حوکمەتا تورکیا و حوکمەتا خوە پارڤە بکەم و دڤێت ھەموو ئالیەک بزانیت کو داعش نە ب تنێ بۆ کوردان لێ بۆ ھەموو جیھانێ مەترسیە و ب تایبەت ژی بۆ تورکیا و دڤێت تورکیا د شەرێ ل دژی تیرۆرستێن داعشێ دا ب دلسۆزی و ب ھەر رەنگەکی ل گەل ھەڤپەیمانا نێڤدەولەتی کار بکەت”.
ل سەر ھاریکاریا بۆ پەنابەرێن کۆبانێ یێن کو نھا ل باکورێ کوردستانێ نە ژی بالیۆزێ ئەلمانیا راگەھاند کو نوونەرێن سازیێن خێرخوازی یێن ئەلمانیا ژی ل گەل مە سەرەدانا کەمپێن پەنابەران کرن و ھژمارەک پاکێتێن ھاریکاریێ ل گەل خوە دا ئیناینە و پشتی ناسکرنا رەوشا پەنابەران دێ ئاستێ ھاریکاریێن مرۆڤی زێدە بکەین و تشتێن پێدڤی دێ دابین کەین و گۆت: “ئەم ھەم ژ بەرخوەدانا ل کۆبانێ ژ نێزیک ڤە ئاگاھدارین و ھەم ژی رۆژانە ل گەل حوکمەتا خوە گەنگەشەیێ ل سەر رەوشا خەلکێ کۆبانێ دکەین و ئەز دشێم ب دلنیایی ڤە بێژم کو ئەم خەلکێ کۆبانێ ب تنێ ناھێلین و چ ژ دەستێ مە بھێت ئەم دێ بۆ وان کەین، ئەڤە ئەرکێ ھەموو ئوروپا و جیھانا پێشکەڤتیە”.
پشتی سەرەدانا کەمپێن پەنابەران بالیۆزێ ئەلمانیا و ئەندامێن پەرلەمانێ تورکیا پێکڤە پرێس کۆنفرانسەک سازکرن و د پرێس کۆنفرانسا ل سروجێ دا ل گەل بالیۆزێ ئەلمانیا، ئەنداما پەرلەمانێ تورکیا ئایسەل توگلوک راگەھاند ئەو جارەکا دی ب ئاشکرا ژ بالیۆزێ ئەلمانیا ل تورکیا و ژ ھەموو جیھانێ را دبێژن کو تورکیا ھاریکاریا تیرۆرستێن داعشێ دکەت و گۆت: “ھەم ب بەلگەیێن نڤیسکی و ھەم ژی ب ڤیدیۆ و ھاتیە سەلماندن کو تورکیا دەریێن خوە بۆ تیرۆرستان ڤەکریە و ھاریکاریا مادی و لەشکەری ژ تورکیا و ب رەنگەکی ئاشکرا بۆ تیرۆرستان دچیت و ئەڤە ب چو رەنگەکی ناھێتە قەبوول کرن”.
ل ئالیێ دی د شەرێ ل دژی تیرۆرستێن داعشێ ل کۆبانێ د ناڤا ٤٨ دەمژمێران دا ب دەھان تیرۆرست ھاتینە کوشتن و ئۆپەراسیۆنێن بۆ ئازادکرنا گوندان ژی ب رەنگەکی دژوار بەردەوام دکەن و ھەماھەنگیەکا گەلەک باش د ناڤبەرا پێشمەرگە و شەرڤانێن یەکینەیێن پاراستنا گەل دا ھەیە.
ئه‌ڤرۆ نيوز:
ب رێيا ڤيديۆيه‌كێ كو ژ لايێ رۆژنامه‌ڤان هۆگر محه‌مه‌د سلێڤانه‌يى ڤه هاتيه به‌هه‌ڤكرن، تێدا چه‌ندين گرۆڤه هه‌نه كو عه‌مار كۆفى ب پلان هاتيه دوورخستن، عه‌مار كۆفى ژى دبێژيت ئه‌ڤه يه راستى.
پشتى گۆتنا سترانا من خه‌م ده‌ريايه‌كا كويره ل رۆژا پێنجشه‌مبى ژ لايێ عه‌مار كۆفى ڤه پشكدارێ به‌رنامێ عه‌ره‌ب ئايدل ل كه‌نالێ mbc ى و پاشان په‌سته‌ك ب پێشمه‌رگه‌يى گۆتى، ل رۆژا ئه‌ينى ژ به‌رنامه‌يى هاته ده‌رخستن، هه‌ر چه‌نده كارگێريا كه‌نالى راگه‌هاند كو ئه‌و ژ به‌ر كێميا sms هاتيه ده‌رخستن ژ به‌رنامه‌يى، به‌لێ د ديداره‌كێ دا بۆ رۆژناما ئه‌ڤرۆ دياركر كو ئه‌وان گۆتبوويێ وێ سترانێ نه‌بێژه و گۆت: “ده‌ما من ئه‌و ستران هه‌لبژارتى، من زانى دێ ده‌ركه‌ڤم، به‌لێ من رژدى ل سه‌ر گۆتنا سترانێ كر”.
ئه‌ڤرۆ نيوز، نيوار محه‌مه‌د سه‌ليم:
نه‌قيبه‌كێ هێزا پێشمه‌رگێ كوردستانێ ل ميحوه‌رێ سحێلا د نامه‌كێ دا كو بۆ ئه‌ڤرۆ نيوز ره‌وانه كريه، تێدا ب ناڤێ پێشمه‌رگێن كوردستانێ سۆپاسيا عه‌مار كۆفى دكه‌ت ل سه‌ر سترانا وى يا د به‌رنامێ عه‌ره‌ب ئايدل دا.
نه‌قيب محه‌مه‌د وه‌عه‌دولا د نامه‌كێ دا سۆپاسيا عه‌مار كۆفى دكه‌ت و ب پێشمه‌رگێ ميديايێ ب ناڤ دبه‌ت و دبێژيت: “ئه‌ڤرۆكه شانازيه بۆ مه گه‌نجه‌كێ وه‌كو عه‌مار كۆفى بوويه پێشمه‌رگه ل كه‌ناله‌كێ عه‌ره‌بان و ل به‌رنامه‌كێ وه‌كو عه‌ره‌ب ئايدل”.
نه‌قيب محه‌مه‌د ئاماژه ب وێ چه‌ندێ ژى كر كو ئه‌وى سه‌رێ وان بلند كر و داخوازێ ژ كه‌نالێن كوردى يێن هۆنه‌رى ژى مينا ڤين تى ڤى و كوره‌ك تى ڤى دكه‌ت كو ئه‌لبۆمه‌كێ بۆ چێكه‌ن و دبێژيت: “هيڤيدارم هه‌لبه‌ستڤان ژى بۆ به‌رهه‌ڤكرنا هه‌لبه‌ستان د هاريكار بن ل گه‌ل ئه‌ڤى ستێرێ پێشمه‌رگه”.
پشتى گۆتنا سترانا من خه‌م ده‌ريايه‌كا كويره ل رۆژا پێنجشه‌مبى ژ لايێ عه‌مار كۆفى ڤه پشكدارێ به‌رنامێ عه‌ره‌ب ئايدل ل كه‌نالێ mbc ى و پاشان په‌سته‌ك ب پێشمه‌رگه‌يى گۆتى، ل رۆژا ئه‌ينى ژ به‌رنامه‌يى هاته ده‌رخستن، هه‌ر چه‌نده كارگێريا كه‌نالى راگه‌هاند كو ئه‌و ژ به‌ر كێميا sms هاتيه ده‌رخستن ژ به‌رنامه‌يى، به‌لێ د ديداره‌كێ دا بۆ رۆژناما ئه‌ڤرۆ دياركر كو ئه‌وان گۆتبوويێ وێ سترانێ نه‌بێژه و گۆت: “ده‌ما من ئه‌و ستران هه‌لبژارتى، من زانى دێ ده‌ركه‌ڤم، به‌لێ من رژدى ل سه‌ر گۆتنا سترانێ كر”.
ئه‌ڤه ژى ده‌قێ ناما وى پێشمه‌رگه‌يه:
سلاڤ و رێز بۆ پێشمه‌رگێ ميديايێ عه‌مار كۆفى
جهێ سه‌ربلنديێ يه ئه‌ڤرۆ گه‌نجه‌كێ وه‌كو ته بوويه پێشمه‌رگه ب رێيا ميديايێ و ل پرۆگرامه‌كێ عه‌ره‌بان يێ وه‌كو عه‌ره‌ب ئايدل، ئه‌م وه‌كو پێشمه‌رگه شانازيێ ب گه‌نجه‌كێ وه‌كو ته دبه‌ين، چونكو چه‌كێ ته سترانا كوردى بوو ل كه‌ناله‌كێ عه‌ره‌بى يێ ب هێزێ وه‌كو mbc، ته ب ناڤێ پێشمه‌رگه‌يى وه‌لاتێن عه‌ره‌بى هژاندن.
راسته تو ل سه‌ر سترانا پێشمه‌رگێن سه‌رێ چيايى، هاتيه دوورخستن، به‌لێ په‌ياما ته گه‌هشت و سه‌ربلندين ب كه‌سه‌كێ وه‌كو ته.
د هه‌مان ده‌ما دا داخوازێ ژ كه‌نالێن هۆنه‌رى يێن كوردى مينا ڤين و كوره‌ك دكه‌ين ب زووترين ده‌م ئه‌لبۆمه‌كێ بۆ ته چێكه‌ن و داخوازێ ژ هه‌موو هه‌لبه‌ستڤانان ژى دكه‌م ل گه‌ل ته د هاريكار بن، چونكو ته سه‌رێ هه‌موو كوردان بلند كر، هه‌موو ميديايێن ناڤخۆيى و عه‌ره‌بى ڤان رۆژان يێ به‌حس ل ده‌رخستنا ته دكه‌ن و يێن بێژن غه‌در يا لێ هاتيه كرن.
ب ناڤێ هه‌موو پێشمه‌رگه‌يى سۆپاسيا ته دكه‌ين بۆ په‌يڤا پێشمه‌رگه و سۆزێ دده‌ينه ته و هه‌موو خه‌لكێ كوردستانێ كو هه‌تا مرنێ دێ به‌ره‌ڤانيێ ژ ئاخا پيرۆزا كوردستانێ كه‌ين.
بژيت پێشمه‌رگه
بژيت كورد و كوردستان
نه‌قيب/ محه‌مه‌د وه‌عدولا محه‌مه‌د
ميحوه رێ سحێلا
دهۆك
ئه‌ڤرۆ نيوز، ناجی به‌ده‌ل:
شاره‌زايه‌كێ وارێ سياسى ديار دكه‌ت كو نه‌رماتيا ئۆبامايى به‌رامبه‌ر كێشێن ژ ده‌رڤه‌يى ئه‌مريكا بوويه ئه‌گه‌رێ وێ چه‌ندێ كو گرۆپێن تيرۆرى يێن مينا داعش پێشكه‌فتنێ ب خوه ڤه ببينن و ئاشكه‌را ژى كر كو نوكه ئه‌مريكا گه‌هشتيه وێ راستيێ خورتبوونا كوردا ل ده‌ڤه‌رێ خورت بوونا وێ یه ل رۆژهه‌لاتا ناڤین.
د. ئازاد عادل بسپۆر د زانستێن سیاسی دا بۆ ئه‌ڤرۆ نیوز گۆت: “د دیرۆكا ئه‌مریكا و سه‌رۆكێن ئه‌مریكا دا هه‌مبه‌ر رۆژهه‌لاتا ناڤین رۆلێن جودا هه‌بووینه و ئه‌و پارت و گرۆپا نها ل سه‌ر ده‌سه‌لاتێ ل ئه‌مریكا گرۆپه‌كێ لیبرال و دیموكراته و نه كۆماری یه، ده‌ما سه‌رۆك بوش د پرسگرێكین رۆژهه‌لاتا ناڤین دا رۆلێ خوه د مه‌یدانا سیاسی دا دیت، ئۆبامای بڕیارا ڤه‌كێشانا هێزێن ئه‌مریكا ژ عیراقێ كر و بزاڤ كرن زيندانا گوانتانامۆ بگريت و ئه‌ڤێ ژى كاریگه‌‌ریا خوه ل سه‌ر رۆژهه‌لاتا ناڤین هه‌بوو”.
زێده‌تر گۆت: “ئۆبامايى هند خوه گرێ نه‌دایه ب چیته ناڤ ئه‌وان پرسگرێكێن نه گرێدايى ئه‌مریكا دا و ره‌خنه لێ هاتنه گرتن و تومه‌تباركر ب كارڤه‌دان و بڕیارێن وى، گرۆپێن تیرۆری درۆست بوون و زۆر بوون و مفا ژ ئه‌ڤان ره‌خنا وه‌رگرت و ده‌ما ژ لایێ داعش ڤه مه‌ترسی ل سه‌ر كوردان درۆست بووى، ئێكسه‌ر هاته سه‌ر خه‌ت و نها مژولی ئه‌وێ چه‌ندی یه ده‌سه‌لاتێ بۆ خوه ڤه‌گه‌رێنیت و ئه‌وان شاشیێن كرین چاره بكه‌ت”.
نها پرۆژێ قانوونه‌كێ ل كۆنگرێسێ ئه‌مریكایه دا ژبووى دانا ره‌زامه‌نديێ ل سه‌ر دانا چه‌كێ گران ب هه‌رێما كوردستانێ كو يه‌كه‌كا 190 هزار كه‌سى ژ پێشمه‌رگه‌يى ب هه‌موو پێدڤياتى ڤه بهێته دروستكرن.
ناڤبری ئه‌و چه‌نده ژی دیاركر كو هه‌بوونا ئه‌وى پرۆژێ قانوونێ ل كۆنگرێسێ ئه‌مریكا دێ مفایه‌كێ باش هه‌بیت بۆ كوردان و گۆت: “سیاسه‌تمه‌دارێن كوردان هه‌رده‌م ره‌خنه لێ گرتی نه و ب نه‌رمی دده‌نه خویاكرن هه‌مبه‌ر تیرۆرێ و ل سه‌رده‌مێ ئۆبامايی گرۆپێن تیرۆری پێشكه‌فتن ب خوه ڤه دیتیه و بۆ نه‌هێلانا ئه‌ڤان ره‌خنه‌یان ئه‌گه‌ر ده‌سه‌لاتێ ب ده‌ست خوه ڤه بینیت ئه‌و دێ زێده‌تر هاریكاریا كوردان” .
د. ئازاد عادل دا زانین كو باوه‌ریا ئه‌مریكا ب هێزا پێشمه‌رگه‌يی و باوه‌ریا وان به‌ریا نها ب هێزێن دی دايی و شكه‌ستن ئینايى و نها به‌حس ل رۆلێ هه‌رێما كوردستانێ و هێزا پێشمه‌رگه‌يی دكه‌ن و دڤێت ببیته پێگوره‌كێ بهێزێ وێ ل رۆژهه‌لاتا ناڤین و خورتكرنا ئه‌ڤێ هێزێ د به‌رژه‌وه‌ندا وان دایه و شيره‌تكارێن ئۆبامایی ژی گه‌هشتنه ئه‌وێ هزری به‌ریا نها هزرێن شاش ل ده‌‌رهه‌ق كوردان دا كرینه و نها ئه‌و تاكه هێز و پشته‌ڤانیه بۆ سه‌ر خستنا ئه‌مریكا ل ده‌ڤه‌رێ و خورتبوونا كوردا خورت بوونا وێ یه ل رۆژهه‌لاتا ناڤین، له‌ورا برێيا ئه‌ڤێ قانوونێ دێ هێزا كوردی ل ده‌ڤه‌رێ خورتتر و بهێزتر بیت ژ جاران .
نيشاندان