ئه‌ڤرۆ:

پارێزەرەکێ دادگەھا دھۆکێ راگەھاند، بۆ سەلماندنا ھەر تاوانەکێ ل سەر ھەر تورەکا جڤاکی بھێتەکرن دڤێت وەلاتی سکالایەکێ ل دادگەھێ تومار بکەت و ھەموو پێزانینان و ھەر تشتەکی بەلاڤ بوویی بدەتە دادگەھێ و دیاربکەت داکو دادگەە و ئاسایش بشێن دووڤچوونێ بکەن، گۆتژی ھەکە ھاتوو وەلاتیەکێ ب رێیا فێسبووکێ ڤێدیویەک یان وێنەک یان ھەر پێزانینەک بەلاڤکر کو کارتێکرنێ ل ئاسایشا نەتەوەی بکەت ئانکو د بەرژەوەندییا دوژمنی دا بیت دێ مادێ چارێ تیرورێ ل سەر ھێتە چەسپاندن.
پارێزەر محەمەد رەشید بەزاز ل دادگەھا دھۆکێ بۆ ئەڤرۆ دیارکر کو بۆ سەلماندنا ھەر تاوانەکا ل سەر ھەر تورەکا جڤاکی بھێتەکرن دڤێت ئەو تور ژلایێ کومپانیێن پەیوەندییان ڤە ھاتبیتە تومارکرن و ئەو تاوان ل دادگەھێ بھێتە تومارکرن و داواکار ھەموو پێزانێن ھاتینە بەلاڤکرن بدەتە دیارکرن و بێژیت داکو دادگەە و ئاسایش بشێن دووڤچوونێ بکەن، گۆتژی قانوونا نەھێلانا خراب کارئینانا ئامیرێن پەیوەندیکرنێ یا ژمارە شەش یا سالا ٢٠٠٨ ێ ل ھەرێما کوردستانا عیراقێ، مادێ ئێکێ ئامیرێن پەیوەندیکرنێ و ئێلکترونی ژ کاروبارێن تایبەتن نابیت بھێنە ئاشکراکرن و بەلاڤکرن، مادێ دویێ سزایێ وی کەسی حەبسە نە کێمتر ژ شەش ھەیڤان و نە زێدەتر ژ پێنج سالان و غورامەکرنە ژی کو نە کێمتر بیت ژ ملیون دیناران و نە زێدەتر بیت ژ پێنج ملیون دیناران یان ئێک ژ ڤان ھەردو سزایان ھەکە ئامیرێ موبایلێ یان ئەنترنێت فێسبوک … ھتد خراب بکارئینا ب رێیا گەفکرنێ یان بەلاڤکرنا قەسێن کرێت و خەبەر یان بەلاڤکرنا دەنگ و باسێن خراب کو ترسەکێ پەیدا کەت یان ڤیدیویەکێ یان وێنەیێن کەسوکی بەلاڤ کەت یان نامێن کرێت بەلاڤ کەت نە ل دووڤ رەوشت و ئەدەبێن گشتی بیت یان رابیت ب گرتنا وێنان بێ روخسەت یان بەلاڤکرنا وێنێن کرێت یێن دووری رەوشتی یان کەسەکی پالدەت بو ئەنجامدانا تاوانەکێ یان پێزانین و نھێنیێن خێزانا یێن تایبەت بەلاڤ کەت داکو زەرەرێ ل یێ بەرامبەری خوە بکەت، ھەروەسا مادێ سیێ دبێژیت سزایێ وی کەسی حەبسە نە کێمتر ژ سێ ھەیڤان و نە زێدەتر ژ سالەکێ و غورامەکرن کێمتر نەبیت ژ ٧٥٠ ھزار دیناران و زێدەتر نەبیت ژ سێ ملیون دیناران یان ئێک ژ ڤان سزایان ھەکە ھاتوو ئیزعاجا وەلاتیان کر ب ھەر ھوییەکا پەیوەندیکرنێ کر وەکو د ھەردو مادێن ئێکێ و دویێ دا ھاتی، ھەروەسا د مادێ چارێ دا ھاتیە کو وەلاتیەکێ تاوانەک ئەنجام دا وەکو د مادێ دویێ و سیێ دا ھاتی و پشکدار بۆ د تاوانێ دا وەکو ئەگەرێ ئێکێ یێ تاوانێ دێ ھەمان سزا وەرگریت.
زێدەتر گۆت: د مادێ پێنجێ دا ھاتیە دێ بیتە کاودانەکێ توند ھەکە ئەنجامدەرێ تاوانێ ئێک بیت ژ ھێزێن ئێمناھیێ یان ئاسایشێ بیت یان سیفەتێ خوە یێ فەرمی ب دەرفەت بزانیت یان ھەر کەسەکێ نھێنیێن خەلکی بزانیت ب حوکمێ کو فەرمانبەرە دێ ھەمان سزا وەرگریت، گۆتژی مادێ شەشێ و یێ دووماھیێ دبێژیت دڤێت کومپانیێن پەیوەندیکرنێ ناسناما ھویێن پەیوەندیکرنێ تومار بکەن د ماوێ شەش ھەیڤان دا، ھەکە ھاتوو کومپانیێ پێگیری نەکر دێ سزایێ وێ نە کێمتر بیت ٥٠ ملیون دیناران و نە زێدەتر ژ ١٠٠ ملیون دیناران.
ناڤھاتی دا زانین ژی کو ھەکە ھاتوو وەلاتیەکێ ب رێیا فێسبووکێ ڤێدیویەک یان وێنەک یان ھەر پێزانینەک بەلاڤکر کو کارتێکرنێ ل ئاسایشا نەتەوەی بکەت ئانکو د بەرژەوەندییا دوژمنی دا بیت دێ مادێ چارێ تیرورێ ل سەر ھێتە چەسپاندن.