ئه‌ڤرۆ نیوز:
لویس ئێنریکی راهێنه‌رێ یانا به‌رشه‌لونه ناڤێ 22 یاریكه‌ران بۆ یاریا به‌رامبه‌ر پاریسانجێرمان د قوناغا 8 یا خولا یانێن قاره‌مانێن ئوروپا ئاشكراكر كو بریاره ل رۆژا چارشه‌مبى بهێته كرن.
پێكهاتێ به‌رشه‌لونه ژى ئه‌ڤه‌یه:
تیرشتیگن، بڕاڤۆ ،جۆردیۆ ماسیب ، مۆنتۆیا، پیکی ، ڕاکیتچ ، بۆسکێتس ، چاڤی ، پێدرۆ، ئینێستا، دسوارێز، میسی، نەیماڕ، ڕافینیا، ماسکیرانۆ ، بارترا، دۆگلاس، ئەلبا ، سێرجیۆ ڕۆبێرتۆ ، ئەدریانۆ ، ماتیۆ، منیر حەدادی.
ئه‌ڤرۆ نیوز:
ب ده‌نگێن 77 په‌رله‌مانتاران، پرۆژه قانوونا به‌رهه‌ڤكرنا دستوورێ هه‌رێما كوردستان – عیراق بۆ راپرسیێ ل په‌رله‌مانێ كوردستانێ هاته په‌سه‌ندكرن، هه‌روه‌سا په‌رله‌مانى بریارا دروستكرنا لژنه‌یه‌كێ بۆ به‌رهه‌ڤكرنا دستوورى ده‌رخست.
پرۆژه قانوونا به‌رهه‌ڤكرنا دستوورێ هه‌رێما كوردستانێ بۆ راپرسیێ يا كو ل په‌رله‌مانى هاتيه په‌سه‌ندكرن پێدڤیه د 90 رۆژان دا، بهێته به‌رهه‌ڤكرن.و بزڤریته په‌رله‌مانى بۆ دووباره ده‌نگدانێ و پێدڤى دو ل سه‌ر سێ یا ده‌نگێن ئه‌ندامێن په‌رله‌مانى هه‌یه بۆ ده‌ربازكرنێ، هه‌ڤده‌م لژنه‌كا 21 كه‌سێ دێ هێته پێكئینان ژ ئه‌ندامێن په‌رله‌مانى و كه‌سێن شاره‌زا و قانوونى.
ئه‌ڤرۆ نیوز:
سەروکاتیا باژێرڤانیا دهوکێ، د په‌یجێ خوه یێ فێسبوكێ دا، چه‌ند وێنێن كاركرنێ د پرۆژێ ئه‌نده‌رپاسا كوردستان ( یا به‌رنیاس ب ده‌ورا هه‌سپا) به‌لاڤكرینه.
سه‌رپه‌رشتیارێ پروژه‌ی ئه‌ندازیار (نه‌مر حسامه‌دین) دیاركریه كو كارێ پروژێ ئه‌نده‌رپاسا كوردستان یا به‌رده‌وامه داكو ل ده‌مێ دیاركری دا ئه‌ڤ پروژێ ستراتیژی بهێته ئه‌نجامدان و بكه‌ڤته دخزمه‌تا باژێری دا و گۆت: ئه‌ڤرو ٢٠١٥/٤/١٣ به‌رده‌وام كار د چێكرنا برگێن پروژێ ئه‌نده‌رپاسا كوردستان دهاته كرن، پشتی به‌لێنده‌رێ نوی ده‌ستبكار بۆی و ماوه‌یه‌كێ دی ئه‌وژی (٧٥) رۆژێن كاری پێ هاتینه دان ژبۆ پروژه‌ی كو ب دووماهى بهێت و كوژمێ پروژه‌ی ١٠ ملیار و٣٠٠ ملیون دینارن و رێژا كاری نوكه ٧٥% ژێ هاتیه ئه‌نجامدان و نوكه گه‌هشتیه قوناغا دانانا گێرده‌را و ب ئه‌نجامدانا ڤی برگێ ژی دێ پروژه قوناغه‌كا باش بریت.
ئه‌ڤرۆ نیوز، ناجی به‌ده‌ل:
ئازاد عادل ماموستایێ زانكویا نه‌ورۆز و بسپور د بیاڤێ ئه‌مریكا دا بو ئه‌ڤرۆ نیوز دیاركر به‌ریا سه‌رۆك وه‌زیرێ عیراقێ سه‌ره‌دانا ئه‌مریكا بكه‌ت سه‌ره‌دانا هه‌مو لایه‌نین سیاسی یێن عیراقی ب تایبه‌تی هه‌رێما كوردستانێ كر كو گرانی و كاریگه‌ریا خو ل سه‌ر هه‌ڤسه‌نگیا شه‌ری ل دژی داعشێ و سیاسه‌تا نێڤ ده‌وله‌تی هه‌یه، ژبوی هه‌رێم قایل بیت ل گه‌ل وان به‌شداریا شه‌رێ موسلێ بكه‌ت داكو بكه‌ته سه‌ركه‌فتنه‌ك بو خوه ده‌ما سه‌ره‌دانا ئه‌مریكا بكه‌ت.
ماموستا یێ ناڤبری ئه‌و چه‌نده ژی دیاركر ئه‌مریكا گه‌هشتیه ئه‌وێ باوه‌ریێ كو هێزا سه‌ره‌كی و راسته‌قینه ل دژی داعشێ و ل عیراقێ كوردن و كاریگه‌ریا هه‌رێما كوردستانێ و هێزا پێشمه‌رگه‌ی ل سه‌ر ئاستێ نێڤ ده‌وله‌تی له‌ورا ئه‌مریكا هه‌رده‌م ل گه‌ل حكومه‌تا عیراقێ ته‌ئكیدی ل سه‌ر پشته‌ڤانیكرن و هاریكاریكرنا هێزا پێشمه‌رگه‌ی دكه‌ت.
ئازاد عادل ئه‌و چه‌نده ژی گوت: حكومه‌تا عیراقێ داخازا به‌شداریبونا هه‌رێمێ ل شه‌رێ رزگاركرنا موسلی دكر به‌س هه‌رێم نه یا به‌رهه‌ڤ بو به‌لێ پشتی سه‌ره‌دانا حه‌یده‌ر عه‌بادی كو ب سه‌ره‌دانه‌كا سیاسی و سه‌ربازی و خوشكرنا په‌یوه‌ندیێن به‌غدا و هه‌رێمێ دهێته هژمارتن، .
ماموستایی ناڤبری ئه‌و چه‌نده ژی دیاركر كو چونا حه‌یده‌ر عه‌بادی و داخوازكرنا وی بو ئه‌مریكا ژبوی دانوستاندنێ یه ل سه‌ر ره‌وشا ناڤخویا عیراقێ و پرسا به‌رهنگاربونا داعشێ و چه‌وانیا په‌یوه‌ندیێن ناڤه‌ندی ل گه‌ل هه‌رێمێ و هه‌مو ته‌خ و چینێن دی یێن عیراقێ ل چ ئاستدایه و چه‌وا باشتر لێ بكه‌ن و ئارامی بو عیراقێ ڤه‌گه‌ریت .
ئه‌ڤرۆ نیوز:
ب فه‌رمانا سه‌رۆك وه‌زیرێن عیراقێ حه‌یده‌ر عه‌بادى، لیوا نه‌جم جبوورى وه‌ك فه‌رماندێ ئوپه‌راسیونێن نه‌ینه‌وا هاته دامه‌زراندن.
نه‌جم جبوورى فه‌رماندێ نوو یێ ئوپه‌راسیونێن نه‌ینه‌وا ب ئاژانسا ئه‌نادول یا توركى راگه‌هاندیه: شڤێدى دره‌نگ پشتى من دیداره‌ك ل گه‌ل سه‌رۆك وه‌زیرێن عیراقێ ئه‌نجامداى، پاشى ئه‌ز هاتمه ئاگه‌هداركرن كو وه‌ك فه‌رماندێ فه‌رمانده‌یا ئوپه‌راسیونێن نه‌ینه‌وا دێ ده‌ست ب كاربم.
ئه‌ڤرۆ نیوز:
عه‌بدولوه‌هاب ساعدى فه‌رماندێ ئوپه‌راسیونێن پارێزگه‌ها سه‌لاحه‌دین ئه‌ڤرۆ راگه‌هاند كو هێزێن ئێمناهیێ یێن عیراقى شیان پارزینگه‌ها بێجى كونترول بكه‌نه‌ڤه.
عه‌بدولوه‌هاب ساعدى ئاماژه ب وێ یه‌كێ كر كو د روى ب روى بوونا ل گه‌ل چه‌كدارێن داعش، چه‌ندین چه‌كدارێن وان هاتینه كوشتن و ل پارزینگه‌هێ هاتنه دوورخستن.
دوهى چه‌كدارێن داعش ژ سێ ئالیان ڤه هێرش كربوونه سه‌ر پارزینگه‌ها بێجى و شیابوون پشكه‌كا وێ پارزینگه‌هێ كونترول بكه‌ن.
پارزینگه‌ها بێجى مه‌زنترین پارزینگه‌هه ل عیراقێ و دكه‌ڤیته پارێزگه‌ها سه‌لاحه‌دین.
ئەڤرۆ نیوز، نزار مەجید:
ل رۆژا ئەینیا بۆری کاروانیێن سنورێ گوندێ روبوسکێ ژ لایێ جەندورمێن تورکیا ڤە رێک ل وان دھێتە گرتن کو نابیت ب ئێکجاری ژ سنوری بزڤرنە ڤە سەر گوندێن خوە و ھەژمارا وان كو نێزیکی٢٥٠ کەسان بوون، بۆ ئازادكرنا وان ژى پتری ٣٠٠ کەسان ژ لایێ روبوسکێ ڤە د ھەوارا وان چووینە و ئەڤرۆ ١٣ى نيسانا ٢٠١٥ێ دھێنە ئازادکرن و ب مەرج .
ل دور ڤێ چەندێ ساح ئالما کو خەلکێ گوندێ بێجھێ یە تایبەت بۆ ئەڤرۆ نيوز گۆت: “ئەڤە چەندین سالە بۆ نانێ روژێ ل سەر سنورێ د ناڤبەرا باکور و باشوور دا ئەم ھاتنوچوونێ دکەین ئەو بوو ل دەمێن بوری دا نێزیکا ٤٠ کەسان ژ لایێ فروکەیێن تورکیا ڤە دھێنە شەھیدکرن ھێشتا بکەرێن وێ بویەرێ نەھاتینە دەستەسەرکرن”.
زێده‌تر گۆت: “بەری چەند رۆژان جارەکا دی تەقە ل کاروانیا کر و ھەشت دەوار کوشتن و نوکە رێک ل خەلکێ گرتیە”.
ژ لایەکێ دی ڤە خەلات ئالما کو گرتیە ل سەر سنوری ئەڤە نێزیکی سێ رۆژایە نەشیایە قەستا گوندێ خوە بکەت ماینە د ناڤبەرا گوندێن کەشان و شردێ دا و دبێژيت: “ھەکە خەلکێ گوندێن باشووری خوارن بۆ مە نە ئینابایە دبیت مە گیانێ خوە ژدەست دابا بەلێ ب پشتەڤانیا خەلکێ مە د ھەوارا مە ھاتن ئەڤرو دێ رێکێ دەنە مە قه‌ستا مالێن خوە بکەین لێ ب وی مەرجی ئێدی نەھێنە سەر کارێ خوەیێ کاروانیێ”.
ل دوماھیێ ژى محه‌مه‌د ئەنجویی گۆت: “ھیڤیە حوکمەتا ھەرێما کوردستانێ بۆ ڤێ مەبەستێ دانوستاندنێ د گەل تورکیا بکەت چونکە ئەم چ تشتێ قەچاخ نائینین و ب تنێ یا ئەم دکەین ژ نەچاریە و ژبلی نانێ رۆژێ ئەم چ دی ب دەست خوە نائێخین”.
وێنه ژ په‌يجێ روبوسكى هاتينه ده‌رخستن
نيشاندان