ئەڤرۆ:
ئاژانسا BBC د راپۆرتەکێ دا دیار دکەت کو شەرێ ل دژی داعشێ و ئالۆزیێن کو نھا ل عیراق و سووریێ ھەنە نیشا ددەت کو ئاڤابوونا دەولەتا کوردی ئێدی خوە فەرز دکەت و ژ بەر ھندێ ژی دڤێت ئەمریکا و وەلاتێن رۆژئاڤا پشتەڤانیێ ل ئاڤاکرنا دەولەتا کوردی بکەن، چونکو کوردان سەلماند ئەو فاکتەرێ سەرەکی یێ ئارامی و ئاشتیێ نە ل رۆژھەلاتا ناڤین و دڤێت رۆژئاڤا وێ دەلیڤێ ژ دەستان نەدەت.
ئاژانسا BBC د راپۆرتەکێ دا دیار دکەت کو رەوشا رۆژھەلاتا ناڤین رۆژ ب رۆژێ خرابتر دبیت و ل عیراق و سووریێ رۆژانە ب سەدان مرۆڤ گیانێ خوە ژ دەست ددەن و داعش وەک دۆژمنێ ھەموو مرۆڤاتیێ ھێرشی بەرژەوەندیێن ئەمریکا و رۆژئاڤا کر، لێ کوردان شیان ب دەلیڤێن گەلەک کێم ل ھەمبەر وێ رێکخراوا درندە شەری بکەن و وان بدەنە راگرتن و ژ بەر ھندێ ژی دڤێت جارێ د شەرێ ل دژی داعشێ دا ئەمریکا ب باشی پشتەڤانیا ھێزێن پێشمەرگێن کوردستانێ بکەت و ل ئالیێ دی ژی دڤێت ئەمریکا ھاریکار بیت بۆ راگەھاندنا دەولەتا کوردی.
د پشکەکا دی یا راپۆرتێ دا ھاتیە کو ل عیراقێ بناغێ پێکڤەژیانێ نەمایە و رۆژ ب رۆژێ ژی ئەو راستی باشتر ئاشکرا دبیت و ژ بەر ھندێ ژی رژدبوونا ل سەر عیراقەکا ئێکگرتی ژ بلی زیانێ چو مفایەکا خوە بۆ ئەمریکا ژی نابیت و د راستی دا ئەڤرۆکە عیراق یا ھاتیە پارچەکرن و دڤێت ئەمریکا ژی وێ یەکێ قەبوول بکەت، چونکو د شەرێ ل دژی داعشێ و ھەروەسا د شەرێ بۆ کۆنترۆل کرنا تکریتێ دا ژی دیار بوو کو ناکۆکیێن د ناڤبەرا شیعە و سوننان وەسا ب ساناھی چارە نابن و یا دی ژی کورد دبین کو ھەر رۆژ زۆرداری ل وان دھێتە کرن و ژ بەر ھندێ ژی گەلەک یا ب زەحمەت کەڤتیە کو مرۆڤ بەحسێ عیراقەکا ئێکگرتی بکەت و کەس نەشێت رێ ل پارچەبوونا عیراقێ بگریت.
د دووماھیا راپۆرتێ دا ئاماژە ب ڤێ یەکێ ھاتیە کرن کو کوردستانا عیراقێ سەرەرای وان مەرجێن گەلەک ب زەحمەت و نەبوونا بودجێ ژی دەرگەھێ خوە بۆ ئاوارێن دی یێن عیراقێ ڤەکرن و کێم نەتەوێن کو ل پشکێن دی یێن عیراقێ درەڤین ل ھەرێما کوردستانێ ئاکنجی بووینە و ھەرێما کوردستانێ بوویە ناڤەندا پێکڤەژیانێ ل رۆژھەلاتا ناڤین و ژ بەر ھندێ ژی دڤێت ھەم ئەمریکا و ھەم ژی وەلاتێن ئورۆپا ب رەنگەکێ ئاشکرا پشتەڤانیێ ل راگەھاندنا دەولەتا کوردی بکەن.

ئەڤرۆ:

ل گۆر راپۆرتەکا رۆژناما رادیکال یا تورکیا پارتا نەتەوەپەرستێن تورکیا بەرنامێ خوە بۆ ھەلبژارتنێن پەرلەمانێ تورکیا یێ کو دێ ل مەھا شەش برێڤە بچن ئاشکرا کریە و د بەرنامێ وێ پارتیێ دا ھاتیە کو ھەکە ئەم ببینە دەستھەلات دێ ئۆجەلانی ژ زیندانا ئیمرالیێ دەربکەین و ببەینە زیندانەکا دی و ھەروەسا دێ دووماھیێ ب قۆناغا خیانەتێ بینین کو حوکمەتا نھا ل گەل پەکەکێ برێڤە دبەت.
ل بەردەوامیا راپۆرتێ دا ھاتیە دیار کرن کو پارتیا نەتەوەپەرست دیار کریە ئەو دێ بزاڤێ کەن کو ب رێیا سەربازی پەکەکێ و ھەموو سازیێن گرێدایی وێ ل جیھانێ ژناڤ ببەن و تورکیا ب ھێز بکەن، چونکو ل تورکیا چو پرسەک ب ناڤێ پرسا کوردی نینە و یا نھا حوکمەت ل گەل ئۆجەلانی برێڤە دبەت خیانەتە و دڤێت ئەو قۆناغە بھێتە ھلوەشاندن.
د ڤێ دەربارێ دا ئایدن گولەر مامۆستایێ زانکۆیا ئستەنبۆلێ د تۆرا کۆمەلایەتی یا فەیسبووکێ دیار کریە کو ھەکە ئاکپارتی نەشیا د ھەلبژارتنان دا دەنگێ پێدڤی بدستڤە بینیت و حوکمەتێ ئاڤا بکەت رەنگە ئەو خوە نێزیکی پارتیا نەتەوەپەرست بکەن و ل گەل وان ھندەک پرۆژێن ھەڤپشک برێڤە ببەن، چونکو گۆتارا نھا یا حوکمەتێ و ئەردۆگانی گەلەک توند و دژوار بوویە و نێزیکی گۆتارا پارتیا نەتەوەپەرست بوویە و ئەو یەک دێ تورکیا بەر ب قۆناغەکا دی یا رەش و تاری وەک سالێن ١٩٩٢ ببەت و چو ئەنجامەکا وێ ژی بۆ تورکیا نابیت.
ناڤھاتی ھەروەسا ئاماژە ب ڤێ یەکێ ژی دکەت کو دڤێت پارتیا دیموکراتی یا گەلان بچیتە پەرلەمانی، چونکو گەلەک گرنگە کو ئێدی کورد ب رێیا سیاسی خەباتێ بۆ بدەستڤەئینانا مافێ خوە بکەن و چەک ژی بھێنە بێدەنگ کرن و ھەکە پارتیا دیموکراتی یا گەلان نەچیتە پەرلەمانی رەنگە ئالۆزیێن نوو ل تورکیا روو بدەن و شەرێ دوھی ل ئاگری د ناڤبەرا لەشکرێ تورکیا و چەکدارێ پەکەکێ ژی روو دایی نیشا ددەت کو لەشکرێ تورکیا دخوازیت جارەکا دی سەنگێ خوە نیشا بدەت و ئەوە ژی مەترسیەکا مەزنە بۆ پرۆژێ ئاشتیێ و چارەکرنا پرسا کوردی ل تورکیا.