ئەڤرۆ:

جێگرا سەرۆکا لژنا قانوونی ل پەرلەمانێ کوردستانێ بۆ ئەڤرۆ دیار کر کو ئەو دێ ھەموو بزاڤان کەن پرۆژە قانوونا “پەسنا فەرمانبەران” ئانکو ھژمارتنا خزمەتا فەرمانبەران یا ئەڤ سالە ب دو سالان بەری ھاتنا سالا نوو پەسەند بکەن.

دکتۆرە بھار مەحموود خویا کر کو خواندنا ئێکێ بۆ ڤێ پرۆژە قانوونێ ھاتیە کرن و بۆ لژنا وان و یا دارایی ھاتیە ھنارتن و پەرلەمان چاڤەرێی راپۆرتێن وانە، دا کو خواندنا دویێ بۆ بکەت.

بھار خانێ ئاشکرا ژی کر کو ھەموو ئەو ئمتیازاتێن ل سالەکا ئاسایی بۆ فەرمانبەری دھێنە ھژمارتن، ل سالا دھێتە زێدەکرن ژی دێ بۆ ھێنە ھژمارتن و گۆت: “دێ بزاڤان کەین بەری ئەڤ وەرزێ قانوون دانانێ ب دووماھی بھێت، ئانکو بەری 1\1\2015 ڤێ پرۆژە قانوونێ پەسەند بکەین و باوەر ناکەم چو ئالی دژ بن”.

ھەژی گۆتنێ یە، ژ بەر قەیرانا دارایی و گیرۆبوونا مووچەی و بھێن فرەھیا فەرمانبەران، پرۆژە قانوونا “پەسنا فەرمانبەران” نوکە ل پەرلەمانی یە و ل گۆڕەی ناڤەرۆکا پرۆژەی، خزمەتا ئەڤ سالە یا فەرمانبەران دێ ب دو سالان ھێتە ھژمارتن.

ئەڤرۆ:

بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ ئەڤرۆ دیار کر کو ئەڤرۆ 30\11\2014 دێ فۆرمێن دامەزراندنا پۆلیسان ل سەر وەلاتیان ھێنە بەلاڤکرن و ھەر کەسێ حەز ھەبیت بلا سەرەدانا رێڤەبەریا پۆلیسان بکەت.

رائید ھێمن سلێمان ئەترووشی دیار کر کو رێڤەبەریا پۆلیسێن پارێزگەھا دھۆکێ دێ ھژمارەکا پۆلیسان دامەزرینیت و گۆت “دڤێت داخوازا دامەزراندنێ بۆ رێڤەبەرێ پۆلیسێن پارێزگەھا دھۆکێ بھێتە نڤیسین و ژیێ کەسێ داخوازا دامەزراندنێ دکەت ژ 18 سالان کێمتر نەبیت و ژ 35 سالان زێدەتر نەبیت و درێژاھی بۆ ژنان ژ 160سم کێمتر نەبیت و بۆ زەلامان ژ 165سم کێمتر نەبیت و کێشا زەلامی ژ 60 کیلۆیا کێمتر نەبیت و کێشا ژنان ژ ٥٥ کیلۆیان کێمتر نەبیت و ھەر دو رەگەزان دڤێت ژ باوەرناما ناڤنجی کێمتر نەبیت و چ کێشێن قانوونی ل سەر نەبن و نەھاتبنە حوکمکرن”.

ھەروەسا ناڤھاتی گۆت “دڤێت رازیبوونا پشکا نەھێلانا گۆنەھباریان و بریارا لیژنا پزیشکی ل سەر لێھاتنا لەشی و چاڤان و ناسناما بارێ شارستانی و رەگەزناما عیراقی و فۆرما خوراکی یا پارێزگەھا دھۆکێ و کارتا پێزانینان و کەفیل ھەبیت”.

ئه‌ڤرۆ نيوز:

ژێده‌ره‌كى ژ هێزێن پێشمه‌رگه‌يى ل ميحوه‌رێ گوێر و مه‌خمور راگه‌هاند كو ب پشته‌ڤانيا فرۆكێن شه‌رى يێن ئه‌مريكا و هه‌ڤپه‌يمانان، ئه‌ڤرۆ سپێدێ پێشمه‌رگه‌يى هێرش بۆ سه‌ر داعش ده‌سپێكر و چه‌ند ده‌ڤه‌ر ژ ده‌ستێن وان ئيناينه‌ ده‌ر و هه‌تا نوكه‌ شه‌ر يێ به‌رده‌وامه‌.

ب گۆره‌يى پێزانينێن ب ده‌ست ئه‌ڤرۆ نيوز كه‌فتين ژ ناڤا ميحوه‌رى، ئه‌ڤرۆ پێشمه‌رگه‌يى ب هه‌ڤكاريا فرۆكێن شه‌رى يێن هه‌ڤپه‌يمانان هێرشێ ل ميحوه‌رێ گوێر و مه‌خمور ده‌سپێكر و هه‌تا نوكه‌ هنده‌ك ژ وان گوندێن ده‌وروبه‌ر رزگار كرينه‌.

ب گۆره‌يى ژێده‌رێن ده‌نگوباسان ل ميحوه‌رێ مه‌خمور پێشمه‌رگه‌ هه‌تا نوكه‌ شياينه‌ سێ گوندان رزگار كه‌ن و ل ميحوه‌رێ گوێر ژى پێشمه‌رگه‌ شياينه‌ چه‌ند گونده‌كان رزگار بكه‌ن و هێرش يا به‌رده‌وامه‌ و پێشمه‌رگه‌ د پێشره‌ويێ دايه‌.