ئه‌ڤرۆ نيوز:
شاها ده‌پێ شانۆيێ، مريام فارس، ژ لايێ ئه‌لكترۆنى ژى ڤه سه‌ركه‌فتنێن مه‌زن تۆماركرن كو شيايه ل سه‌ر تۆڕا جڤاكيا فه‌يسبۆكى نمره‌كا پيڤايى يا نوو بشكێنيت.
په‌يچێ ڤێ ستێرێ نوكه زێده‌ترى 10 مليۆن پشته‌ڤانان هه‌نه، ئه‌ڤه ژى نه نمره‌كا چاڤه‌رێ نه‌كريه ژ به‌ر وێ پشته‌ڤانيا وێ ل لوبنان و رۆژهه‌لاتا ناڤين و جيهانێ هه‌يى.
ب هه‌لكه‌فتا گه‌هشتنا پشته‌ڤانێن وێ ب 10 مليۆن كه‌سان، پشته‌ڤان و حه‌زژێكه‌رێن وێ گه‌له‌ك كۆمێنتێن كه‌يف خۆشيێ بۆ نڤيسين ب وێ هه‌لكه‌فتێ.
لیستا ئێكگرتوویا ئیسلامی كوردستان ل جڤاتا پارێزگه‌ها دهۆكێ داخوازا پوستێن ئیداری دكه‌ت ل گوره‌يی ئه‌وێ رێژه‌یا كورسیێن ب ده‌ست ڤه ئینايی ل پارێزگه‌هێ.
سه‌باح عه‌لی شه‌ریف ئه‌ندامێ جڤاتا پارێزگه‌ها دهۆكێ و سه‌رۆكێ لیستا ئێكگرتوو بۆ ئه‌ڤرۆ نیوز گۆت: “ل ده‌مێ كۆمبوونا جڤاتا پارێزگه‌ها دهۆكێ هاتیه كرن، ئه‌م وه‌كو ئێكگرتوویا ئیسلامی به‌رهه‌ڤی كۆمبوونێ نه دبووین، كا دڤێت چاوان حوكمه‌ت ل سه‌ر بنياتێ بنكه‌فراوان بيت، وه‌سان پارێزگه‌هـ ژى بهێته به‌لاڤكرن، مه بۆ ڤێ چه‌ندێ سوزه‌ك ژ پارێزگارێ به‌رى نوكه و يێ نوكه ژى وه‌رگرتبوو”.
زێده‌تر گۆت: “ل سه‌ر وی بنگه‌هی مه پشكدارى كر و ده‌نگ ل سه‌ر بۆ پارێزگار و سه‌رۆكێ جڤاتا پارێزگه‌هێ دا، به‌لێ هه‌تا نها د ناڤبه‌را جڤاتا پارێزگه‌ها دهۆكێ ب شیوه‌یه‌كێ فه‌رمی دا، دانوستاندن ل سه‌ر نه هاتینه‌كرن، ب تنێ هنده‌ك ئاماژه هه‌نه كو سه‌رۆكێ حوكمه‌تا هه‌رێما كوردستانێ و پارێزگاری دهۆكێ ل رۆژێن بهێت دێ دانوستاندنێ ل سه‌ر كه‌ن”.
سه‌باح عه‌لی ئاماژه ب وێ چه‌ندێ ژى كر كو دڤێت ل گوری پیڤه‌رێ ده‌نگ ب ده‌ست ڤه ئینانا كورسیێن جڤاتێ بیت كو ئێكگرتوو ژی لیستا دويێ یه، مافێ وێ يه ئێك پۆستێن ئیداری وه‌رگریت .
سه‌رۆكێ ليستا ئێكگرتوو ل جڤاتا پارێزگه‌ها دهۆكێ ئاشكه‌را كر كو ئه‌و وه‌كو ئێكگرتوو پێشنیازا وێ چه‌ندێ دكه‌ن كو جێگره‌كێ پارێزگارى ل گه‌ل چه‌ند پۆستێن ئيدارى و رێڤه‌به‌رێن ناحيا و قايمقامان هه‌بن.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ دێ ساهى بيت ل گه‌ل په‌يدا بوونا هنده‌ك ئه‌ورێن كێم و پلا گه‌رماتيێ ژى دێ نێزيكى يا رۆژێن به‌رى نوكه بيت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ لاوازبوونا پاله‌په‌ستۆيێن بلندێن سيبريا پێشنى دكه‌ن كو سوبه‌هى رۆژا ئێكشه‌مبى رێكه‌فتى 30\11\2014 ئه‌سمانێ دهۆكێ ساهى بيت ل گه‌ل په‌يدابوونا هنده‌ك ئه‌ورێن كێم.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ ژى يێ يا نێزيكى تۆماركريا رۆژێن به‌رى نوكه بيت ب ره‌نگه‌كى د ناڤبه‌را پێنج بۆ 15 پله دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى باكوورێ رۆژهه‌لات و باشوورێ رۆژئاڤا بيت ب ره‌نگه‌كى دێ ل سه‌ر خوه بيت د ناڤبه‌را پێنج بۆ 10 كليۆمه‌تر د ده‌مژمێره‌كێ و ماوێ ديتنێ ژى دێ هه‌شت بۆ 10 مه‌تر بيت.
ئه‌ڤرۆ نيوز:
هه‌رسێ سه‌رۆكاتيێن هه‌رێما كوردستانێ، سه‌رۆكێ وه‌زيرێن عيراقێ و سه‌رۆكێ جڤاتا نوونه‌رێن عيراقێ د ڤێ حه‌فتيێ دا دێ سه‌ره‌دانا توركيا كه‌ن و پشكه‌ك ژ سه‌ره‌دانێ به‌حسكرنه ل سه‌ر ره‌وشا نوكه يا عيراقێ.
عيماد يوخه‌نا ئه‌ندامێ جڤاتا نوونه‌رێن عيراقێ د به‌ياننامه‌كێ دا كو به‌لاڤكريه ئاماژه ب وێ چه‌ندێ كريه كو د ڤێ حه‌فتيێ دا، سه‌ليم جبۆرى سه‌رۆك جڤاتا نوونه‌رێن عيراقێ دێ د ڤێ حه‌فتيێ دا سه‌ره‌دانا توركيا كه‌ت و پاشان ب ره‌نگه‌كێ فه‌رمى بۆ ئيرانێ هێته داخوازكرن بۆ به‌حسكرنێ ل سه‌ر كۆمه‌كا پرسێن سياسى.
ئه‌و چه‌نده ژى ئاشكه‌را كريه كو بابه‌تێ دانوستاندنێ دێ ل سه‌ر په‌يوه‌نديێن عيراقێ و وه‌لاتێن هه‌ڤسۆ بن كو پشكه‌كا دى ژى دێ دانوستاندن بيت ل سه‌ر ره‌وشا ئه‌منى و چاوانيا روو ب رووى بوونا تيرۆرێ و دێ به‌حس ل بابه‌تێن ئابوورى ژى هێته كرن.
هه‌ڤده‌م سه‌رۆك وه‌زيرێن عيراقێ ب ره‌نگه‌كێ فه‌رمى بۆ وه‌لاتيێ توركيا هاتيه داخوازن و بڕياره د ڤێ حه‌فتيێ دا به‌ر ب وى وه‌لاتى برێ بكه‌ڤيت.
د ڤێ ده‌ربارێ دا، ئايدن مه‌عرۆف ئه‌ندامێ په‌رله‌مانێ كوردستانێ بۆ باسنيوز راگه‌هاند د چارچوڤێ ئه‌و په‌يوه‌نديا تله‌فۆنى دا، ئه‌حمه‌د داود ئوغلۆ سه‌رۆكێ وه‌زيرێن توركيا داخوازا هه‌ر ئێك ژ سه‌رۆكێ هه‌رێما كوردستانێ و حه‌يده‌ر عه‌بادى بۆ توركيا كريه.
ب گۆره‌ى زانياريێن باسنيوز به‌لاڤكرن هه‌رسێ سه‌رۆكاتيێن هه‌رێما كوردستانێ، سه‌رۆكێ وه‌زيرێن عيراقێ و سه‌رۆكێ جڤاتا نوونه‌رێن عيراقێ دێ د ڤێ حه‌فتيێ دا ل توركيا ل گه‌ل سه‌رۆكێ وه‌زيرێن توركيا كۆم بن.
ئه‌ڤرۆ نيوز:
سۆپاسالارێ وه‌زاره‌تا پێشمه‌رگه‌يى ئاماژێ ب وێ چه‌ندێ دكه‌ت كو پێدڤى ب گۆره‌يى دستوورێ عيراقێ هێزێن پێشمه‌رگه‌يى هاتبانه ب چه‌ككرن، به‌لێ نه‌هاتنه كرن و ئه‌ڤه ژى پشتگوهـ خستنا داخوازيێن كوردايه و دژى دستوورى يه ژى.
فه‌ريق جه‌مال محه‌مه‌د سۆپاسالارێ وه‌زاره‌تا پێشمه‌رگه‌يى د داخۆيانيه‌كێ دا بۆ باسنيوز راگه‌هاند كو پێدڤى بوو ب گۆره‌يى دستوورێ عيراقێ د ماوێ بۆرى دا حوكمه‌تا عيراقێ چه‌ك دابايه پێشمه‌رگه‌يى، به‌لێ نه به‌غدا ب تنێ هه‌ڤكاريا له‌شكرى يا پێشمه‌رگه‌يى نه‌كريه، به‌لێ مووچه ژى ژ خه‌لكێ كوردستانێ بريه و گۆت: “د ماوێ بۆرى دا، پاره‌كێ مه‌زن وه‌كو بودجا سيادى يا هه‌ردو وه‌زاره‌تێن ناڤخۆ و به‌ره‌ڤانيا عيراقێ مه‌زاختى نه و چو ژ وان هاريكاريان نه‌گه‌هشتينه ده‌ستێ پێشمه‌گه‌يى و پشكا وان نه‌دايێ”.
ئه‌و ئێك ژى ئاشكه‌را كر كو ل سه‌ر ده‌مێ حوكمێ مالكى مه‌زنترين تاوان دژى پێشمه‌رگه و خه‌لكێ كوردستانێ هاتيه كرن ب برينا پارێ خه‌لكێ كوردستانێ و ئابلۆقه‌دانا پێشمه‌گه‌يى د ده‌مه‌كى دا ئه‌گه‌ر د ماوێ بۆرى دا حوكمه‌تا عيراقێ چه‌ك ب پێشمه‌رگه‌يى دابايه، كاودان وه‌كو نوكه لێ نه‌هاتن.
نه‌ڤه‌شارت ژى كو تێكشاندنا تماما سۆپايێ عيراقێ ل مووسل رێ خۆشكر كو ب سه‌دان هزار پارچێن چه‌كێ گران و سڤك بكه‌ڤيته ده‌ستێ داعش.
ئه‌ڤرۆ نيوز:
ژڤان و ياريێن ئه‌ڤرۆ يێن خولێن ئنگليزى و ئيتالى و ئسپانى و ئه‌لمانى دێ ب ڤى ره‌نگێ ل خوارێ بيت:
پرێمه‌رلیگ – گه‌را 13 ێ
03:45 وێست برۆمیچ ئاڵبیۆن – چێڵسی – كۆمێنتكار: فه‌هد عوتێبی
06:00 لیڤه‌رپول – ستۆك سیتی – كۆمێنتكار: حماد عنزی
06:00 مانچێسته‌ر یونایتد – هال سیتی – كۆمێنتكار: سوار زه‌هه‌ب
06:00 بێرنلی – ئاستۆن ڤێلا – كۆمێنتكار: خالید غوول
06:00 كیونز پارك رینجه‌رز – لیسته‌ر سیتی – كۆمێنتكار: حه‌سه‌ن عه‌یده‌رۆس
06:00 وێستهام یونایتد – نیوكاسل یونایتد – كۆمێنتكار:عادل خلو
06:00 سوانزی سیتی – كریستاڵ پاڵاس – كۆمێنتكار:محه‌ممه‌د به‌ره‌كات
08:30 سه‌نده‌رلاند – چێڵسی – كۆمێنتكار:حه‌فیت ده‌راجی
سێریا ئه‌ی – گه‌را 13 ێ
08:00 ساسۆلۆ – هێلاس ڤیرۆنا – كۆمێنتكار: عه‌بدولا معه‌مه‌ری
10:45 كیڤۆ ڤیرۆنا – لازیۆ – كۆمێنتكار: نه‌بیل نه‌قشبه‌ندی
لالیگا – گه‌را 13 ێ
06:00 گیتافێ – ئاتله‌تیك بلباو – كۆمێنتكار: ئه‌حمه‌د معه‌ممه‌ری
08:00 ئیسپانیۆل – لیڤانتی – كۆمێنتكار: عیسا حه‌ربین
10:00 ماله‌گه – ریال مه‌درید – كۆمێنتكار: عه‌لی محه‌ممه‌د عه‌لی
12:00 سێلتاڤیگۆ – ئێیبار – كۆمێنتكار:محه‌ممه‌د كوالینی
بۆندزلیگا – گه‌را 13 ێ
05:30 بایر لیڤه‌ركوزن – كۆلن – كۆمێنتكار:
05:30 هێرتا به‌رلین – بایرن میونشن – كۆمێنتكار: حاتم بتێشه
08:30 هۆڤینهایم – هانۆڤه‌ر – كۆمێنتكار: له‌حدان فه‌یحانی
ئەڤرۆنیۆز ،سالار دۆسکی:
پشتی ئیمزاکرنا رێکەفتنێ دناڤبەرا بەغدا و ھەرێما کوردستانێ دا وەک پێنگاڤەکا دەسپێکی بۆ نێزیکبوونا ھەولێر و بەغدا دا کو رۆژانە ھەرێم 150 ھزار بەرمیلێن گازێ ب رێکا سومۆ فرێکەت و بەرامبەر بەغدا (500) ملیۆن دۆلاران ب ھنێریتە ھەرێما کوردستانێ و بریارە شاندەکێ بلندێ ھەرێما کوردستانێ سەردانا بەغدا بکەت. ژێدەرک ژ سەرۆکاتیا ئەنجوومەنێ وەزیران دیارکریە کو بریارە شاندنێ ھەرێما کوردستانێ کو ب سەرۆکاتیا نێچیرڤان بارزانی سەرۆکێ حوکمەتێ و قوباد تەلەبانی جێگرێ سەرۆکێ حوکمەتێ رۆژا ئێک شەمبی 30\11\2014 بچنە بەغدا ب مەرەما روونشتن و ئەنجامدانا کومبوونا دگەل مەزنە بەرپرسێن حوکمەتا عیراقێ.
ھەڤدەم ھەمان ژێدە ئاشکراکر کو پێشبینی دھێتەکرن کو شاند پێکھاتی بیت ژ سەرۆک و جێگرێ حوکمەتا کوردستانێ و ھەر ئێک ژ وەزیرێن (سامانێن سرۆشتی، دارایی وئابووری، پلاندانان).
چاڤدێره‌كێ ره‌وشا رۆژئاڤايێ كوردستانێ بۆ ئه‌ڤرۆ نيوز دياركر كو هێشتا چه‌كدارێن داعش نه‌گه‌هشتينه ناڤا سه‌حه‌كه و شه‌رڤانێن يه‌په‌كێ به‌رهه‌ڤيه‌كا باش كريه.
يوسف رۆژئاڤايى، چاڤدێر ل سه‌ر ره‌وشا رۆژئاڤايێ كوردستانێ گۆت: “چه‌كدارێن داعش شياينه ده‌ستێ خوه بداننه سه‌ر چه‌ند گوندێن بچووك يێن نێزيكى حه‌سه‌كێ و خه‌لكێ وان گۆندان ژى چوويه ناڤا باژێرێ حه‌سه‌كه”.
زێده‌تر گۆت: “هێشتا داعش نێزيكى پێنج كيلۆمه‌تران يا ژ باژێرێ حه‌سه‌كه دووره، داعش ئه‌و هێز پێ نينه بشێت هێرشێ بكه‌ته سه‌ر حه‌سه‌كه، ئه‌و هێزا ل گه‌ل گه‌له‌ك يا كێمه”.
دا زانين ژى كو شه‌رڤانێن يه‌په‌كێ ل وێ ده‌ڤه‌رێ به‌رهه‌ڤيه‌كا باش يا كرى و دشيانێن وان دا هه‌يه هه‌ر هێرشه‌كا بهێته سه‌ر باژێرى تێك بشكێنن.
بەرپرسێ پەیوەندی و راگەھاندنێ ل رێڤەبەریا گشتی یا ئەوقافێ ل پارێزگەھا دھۆکێ بۆ مالپەرێ ئەڤرۆ نیۆز دیارکر کو رێڤەبەریا گشتی یا ئەوقافا دھۆکێ ب ھەفکاری ل گەل لقێ دھۆکێ ئێکەتیا زانایێن ئیسلامی، نڤیسنگەھا دھۆک یا به‌رهنگاربوونا توند و تیژیێ دژی ئافرەتان کومبوون ل گەل پتر ژ ١٠٠ گۆتاربێژێن مزگەفتێن پارێَزگەھا دھۆک ئەنجامداینە، ب مەرەما کو گۆتارا ئەڤرۆ یا رۆژا ئەینی ل سەر بابەتێ توند وتیژیێ دژی ئافرەتان بیت .
مالک رەمەزان بەرپرسێ راگەھاندنێ رێڤەبەریا گشتی یا ئەوقافێ ل پارێزگەھا دھۆکێ دیارکر ژی کو ھەر سال ڤێ حەفتیێ بابەتێ توند و تیژیێ دژی ئافرەتان دھێتە بەحسکرن، کوکارەکێ مەزن ژلایێ رێکخراوێن پەیوەندار و حوکمەتا ھەرێما کوردستانێ ڤە دھێتە ئەنجاندان، ل سەرانسەری پارێزگەھا دھۆکێ گۆتارێن ئەڤرۆ ل سەر ڤی بابەتی بوون.
مالکی خواست ژی کو ھەردەم مامۆستایێن ئاینی خوە بابەتێن گرنگ بکەنە خودان ئەوێن گرێدایی ب پاشەرۆژا مللەتێ کورد ڤە، بابەتێن ب وی رەنگی بن کو ئەڤ مللەتە ب شێت ژیانەکا خوەش ب بیتە سەر و تایبەت بابەتێن ھندێ کو ئاینێ راست و دروست بھێتە بەلاڤەکرن دناف خەلکی دا.
بەرپرسێ راگەھاندنێ ل رێڤەبەریا گشتی یا ئەوقافێ گۆتژی: ھەموو پارێزگەھێن عیراقێ و جھێ داخێ یە خەلک چووینە ناڤ تیرورستێن داعش، سوپاس بۆ خودێ ل پارێزگەھا دھۆکێ ھەتا نوکە ئەڤ تشتە نەروودایە و ئەڤەژی ڤەدگەریت بۆ گوتارا راست و دروستا مامۆستایێن ئاینی ل پارێزگەھا دھۆکێ.
د روودانەکا ھاتنوچوونێ دا ل سەر رێيا گشتی یا د ناڤبەرا قەزا بەردەرەش و ناحیا کەلەک دا، سێ ترۆمبێلان لێكدا و د ئەنجام دا پێنج وەلاتی بریندار بوون.
کومیسەر حازم محمد ژ راگەھاندنا ھاتنوچوونا بەردەرەش بۆ ئەڤرۆ نیوز گۆت: “شەڤا بوری رۆژا پێنجشەمبی ل رێکەفتێ 27-28/11/2014 ل دەمژمێر ١:٠٠ شەڤێ د روودانەکا ھاتنوچوونێ دا ل سه‌ر رێيا د ناڤبه‌را قه‌زا به‌رده‌ره‌ش و ناحيا كه‌له‌ك دا سێ ترۆمبێلان لێكدا و د ئه‌نجام دا پێنج وه‌لاتى بريندار بوون، هاتنه ره‌وانه كرن بۆ نه‌خۆشخانا به‌رده‌ره‌ش ب مه‌ره‌ما چاره‌كرنێ”.
زێده‌تر گۆت: “ئه‌گه‌رێ روودانێ ژ به‌ر پێگرينه‌كرنا شوفێران ب رێنمايێن هاتنوچوونێ بوويه”.
نيشاندان