ئەڤرۆ:
یاریکەرێ تیما تەپا پێی یا یانا گارە ئەوێ لڤی وەرزی پەیوەندی ب یانێ کری دیارکر کو تیما وان د ھەمی یاریێن خوە دا ژ ھەژی سەرکەفتنێ بوون و پێدڤی بوو بەری بدووماھیک ھاتنا خولێ ب چەندین حەفتیا ببانە قارەمان
زێدەتر کاروان جەرجیس د دیدارەکێ دا بۆ رۆژناما ئەڤرۆ گۆت: ھەر ژ دەستپێکا خولێ مە ھزر دکر ھەر یاریەکا بکەین بومە یا چارەنڤیسی یە لەورا ژی ئەم شیاین زوربەیا یاریان ب سەرکەڤین و یاریێن ئەم نە سەرکەفتین ئەم ژھەژی سەرکەفتنێ بووین چنکو مە تەپاپێی یا دروست ب تەکتیک و ھونەر دکر .
زێدەتر ناڤبری گۆت: برنا ناسناڤی ل خولەکێ کو ئێک قوناغ بیت و قەرەبووکرن تێدا نەبیت گەلەکا ب زەحمەتە بشێی ھەڤرکیا ڤان ھەمی کاودانا بکەی لێ ئەم شیاین ب ھاریکاریا راھێنەرێ مە وکارگێریا ڤان بەربەستا ھەمی یا راکەین و دەربازبینە خولا پلا نایاب.
کاروانی ئەو چەندە ژی دیارکر کو نھێنی یا سەرکەفتنا وان ئەوبو کو ھەمی تیمێن ھەڤرکیا وان دکر شیان خوسارەت کەن و دیارکر کو دلسوزی و ھەڤ دلیا یاریکەرا ل گەل راھێنەرا و کارگێریێ ژی ئەگەرەکێ دی یێ سەرکەفتنا وان بوو.
ل دووماھیێ کاروانی گوت: ھەر تیمەکا راھێنەر و یاریکەر و کارگێری وەک خێزانەکێ بن خو ھەکە ھەڤبەست و پاداشت ژی نەبن دێ سەرکەڤن چنکو یاریکەرێ کورد زێدەتر چاڤێ وی ل ئارامیێ یە ل د تەپا پێی دا

ئەڤرۆ:
بریارە ئەڤرۆ و سوباھی شەش یاری ژ گەرا ھەژدێ ل یاریگەھێن جودا یێن ھەرێما کوردستانێ بھێنە کرن و ھەرسێ نوونەرێن پارێزگەھێ دھۆک و زێرەڤانی و زاخۆ دێ بزاڤێ کەن سەرێ لیستەیا خولێ ڤەگەرینن دەمێ ب زەحمەترین یاریێن خولێ ئەنجامدەن ئەڤرۆ.
د ڤێ گەرێ دا یانا دھۆک خودانا رێزا دویێ ب ٣٢ خالان بەر ب ھەولێرێ چویە داکو یاریا خوە ھەمبەر یانا ھندرین بکەت ئەوا ل رێزا یازدێ ب ١٧ خالان کو د ڤێ یاریێ دا پێدڤیە یانا دھۆک سەرکەفتنێ تومار بکەت پێخەمەت بەردەوامی دان ب ھەڤرکیێن سەرێ لیستەیا خولێ.
بۆ ڤێ یاریێ راھێنەرێ یانا دھۆک حازم سالح دیارکر کو ھەمی شیانێن خوە مەزێخن سەرکەفتنێ تومار بکەن و قەرەبویا ئەوان خالان بکەین ئەوێن یاریێن بوری دا ھاتینە ژدەستدان و بۆ ڤێ یاریێ ھەمی یاریکەر بەرھەڤن و مە بزاڤ کریە چارەسەریا ئەوان خەلەتیێن یاریا بوری دا بکەین داکو دوبارە یاریەرێن تیمێ دوبارە نەکەن.
د یاریەکا دی دا یانا زێرەڤانی خودانا رێزا سیێ ب ٣٢ خالان ئەو ژی بەر ب سلێمانیێ چویە بۆ ئەنجامدانا یاریا خوە ھەمبەر سەرکێشا خولێ یانا نەوروز ب ٣٣ خالان کو دھێـە ھژمارتن زەحمەترین و خوشترین یاریێن ڤێ گەرێ ئەنجامدەن ل یاریگەھا یا دویێ کو ھەمی بزاڤێن نوونەرا پارێزگەھێ ئەون بشێن سێ خالێن ڤێ یاریێ بۆ خوە دەستڤەبینت و یانا نەوروز ژ سەرێ لیستێ بدەتە پاش، بۆ ڤێ یاریێ ژی راھێنەرێ زێرەڤانی سلێمان رەمەزان بۆ ئەڤرۆ گۆت: یاریا مە یا ڤێ گەرێ دێ ب زەحمەترین یاری بیت و پێشبینیا ھەمی ئەنجامان دھێنە کرن ژ بەر ھێزا ھەردو تیمان لەورا مە بەرھەڤیەکا باش بۆ ڤێ یاریێ کریە و تیما خوە و ھەمی خالێن لاوازی و ھێزا تیمێ شرۆڤەکریە پێخەمەت ب کێمترین زەرەر ڤێ گەرێ ب دووماھی بینن و چو کێماسی ناف تیمێ دا نینن یاریکەرێ پیشەکارێ سێلڤادوری مادرو ژی ڤەگەریایە ناف تیمێ دا کو دێ ھێزەکا دە ل ناف تیمێ دا زێدەکەن.
د یاریەکا دی یا ھەمان گەر دا یانا زاخۆ ل ناف جەماوەرێ خوە ل یاریگەھا دەلال دێ مێڤانداریا یانا پێشمەرگە یا ھەولێر کەت کو دھێتە نیاسین بھێزترین تیما قوناغا دویێ یا خولێ ھەردو تیم چارێ و پێنجێ دھێن ب جوداھیا خالەکێ لەورا دھێتە پێشبینی کرن یانا زاخۆ زەحمەتەکا مەزن بینت داکو بشێت سەرکەفتنێ تومار بکەن و جوداھی ناڤبەرا خوە و ھەڤرکا خوە ل سەر رێزا چارێ ب گەھینتە چار خالان.
ژ یاریێن دی یێن ڤێ گەرێ ھەولێر دێ ل یاریگەھا خوە ل گەل کەرکووک کەت و برایەتی و شێروانە ل یاریگەھا یا ئێکێ ھێتە کرن و سلێمانی دێ ل یاریگەھا خوە مێڤانداریا ئارارات کەت.