بێگومان قووناغا نوكه یا رۆژهه‌لاتا ناڤین تێدا ده‌رباز دبیت گه‌له‌ك مه‌ترسیێن مه‌زن بسه‌ردا هایتنه، هنده مه‌ترسی ژی ده‌رفه‌ت بۆ كوردان ژی ئافراندیه، ڤه‌گۆهاستنا مه‌ترسیێ بۆ ده‌رفه‌ت و قازانجان به‌رێ هه‌ر تشته‌كێ پێدڤی ب ئێكرێزی و هه‌ڤده‌نگیا فاكته‌رێن سه‌ره‌كی یێن كۆمه‌لگه‌ها كوردستانێ یه. فاكته‌رێن سه‌ره‌كی ژی ژ وان رێخستن و حزبان پێكدهێت كو خودان پێگه‌ها جه‌ماوه‌ری یه، ده‌رفه‌تێن دارایی و كه‌نالێن په‌یوه‌ندیێ ل گه‌ل ده‌ستهه‌لاتدارێن جیهانێ نه.
پارتی دیموكراتی كوردستان و پارتا كاركه‌رێن كوردستانێ دو ژ وان هێزانێن كو هه‌ر ئێك ب شێوازێ تایبه‌تێ خوه، خوه‌دی ئه‌و ده‌رفه‌ت و شیانێن ئاماژه پێكرینه و ب به‌راوه‌ردی ل گه‌ل پارتێن دی یێن كوردستانێ رۆله‌كێ سه‌ره‌كی د سیاسه‌تا كوردی دا دگێرن. ئه‌ڤ دو پارته د گه‌له‌ك مژاران دا ژ هه‌ڤجودانه و بیر و تێگه‌هه‌كێ جودا بۆ چاره‌كرنا پرس و گرفتێن ناڤ كۆمه‌لگه‌ه و بزۆتنه‌یا كوردی نیشان داینه. لێ هه‌ڤده‌م چاره‌نڤێسا هه‌ڤشێوه‌یێ كوردی و ره‌وشا زال ل سه‌ر هه‌رێمێ و دوژمنه‌كێ هه‌ڤپشك وان دگه‌هینیته ئێك و مینا گه‌له‌ك جاران نه‌چارن كو هه‌ڤدو بگرن و د رێزه‌كێ دا هه‌ڤكاریا هه‌ڤدو بكه‌ن.
ژ بیرا مه نه‌چیت هه‌ڤگرتنا راسته‌قینه‌یا ڤان دو پارتان ب واته‌یا ئێكگرتنا دو پارچه و نیڤا كوردستانێ دهێت و هه‌كه پێنگاڤێن وه‌سا ببنه كریار و راستی، گه‌له‌ك كارتێكرن ل سه‌ر هه‌موو خه‌باتا كورد دكه‌ن و گه‌ره‌نتیه‌كا گرنگ بۆ وان ده‌ستكه‌فتانه كو هه‌تا نوكه ب ده‌ستڤه هاتینه و زه‌مینا گه‌له‌ك ده‌ستكه‌فتێن نوو ژی ئاڤا دكه‌ن.
پشتی هێرشا داعشێ به‌رگریا قه‌هره‌مانیا پێشمه‌رگه‌ی، گه‌ریلا و شه‌ڕڤان ل به‌رامبه‌ر ڤێ هێزا مه‌ترسیدار و وه‌حشی دا، جیهان ب چاڤه‌كێ دی به‌رێ خوه دده‌ته كوردان. واته ب چاڤه‌كێ رێز و خۆشه‌ویستی و لایه‌نگری و پشته‌ڤانی ژ كوردان، هه‌روه‌سا تێگه‌هشتن ژ وان ئێش ئازاران كورد تووشی بووینێ. مه‌زنترین میدیایێن جیهانێ ل سه‌ر ئاستێن هه‌ری بلند یێن رێزگرتنێ به‌حسێ كچێن كۆبانێ دكه‌ن و هۆزانڤان و نڤێسه‌رێن ناڤدرا هه‌لبه‌ست و سروودان ب وان دبێژن. ئه‌ڤ تێگه و نێهراندنه ژ لایێ رێبه‌ر و سه‌رۆكێن وه‌لاتێن بڕیارده‌رێن جیهانێ هه‌تا خه‌لكێن ئاسایی ل سه‌ر شه‌قامێن پتریا وه‌لاتێن جیهانێ هاتینه نیشادان.
ئه‌ڤه ده‌ستكه‌فته‌كێ مه‌زنه بۆ هه‌موو كوردان، پارت و رێبه‌رێن وان. چو كه‌سه‌كی نه‌خاسمه پارتێن مه‌زن نابیت بهێلن ئه‌ڤ ده‌ستكه‌فتا ب نرخ تێك بچیت یانژی ژێ كێم ببیته‌ڤه. به‌روڤاژی پێدڤیه كار بۆ زێده‌كرن و مه‌زنكرنا وی بهێته‌كرن. مه‌زنترین كار ژی ل ڤێ بارێ دا ئێككرنا ده‌نگ و سه‌نگا هێزێن سه‌ره‌كی یێن بزۆتنه‌وه‌یا كوردستانێ یه كو پارتی دیمۆكراتی كوردستان و پارتا كاركه‌رێن كوردستانێ پێشه‌نگیا وان دكه‌ن. پشكه‌كا هه‌ری زێده یێن هێزن كوردی په‌یوه‌ندی و هه‌ڤكاریا وان ل گه‌ل هه‌ڤدو گه‌له‌ك باشه ب تنێ ئه‌ڤ دو لایه‌نه واته (پارتی و پ. ك. ك) ل سه‌ر كۆمه‌كا خالان رێك نه‌كه‌فتینه.
ئه‌ڤ ئێكگرتن و ئێك هه‌لۆیستیه ده‌مه‌كی دگه‌هیته زێرڤه‌یێ كو كۆنگره‌كێ نه‌ته‌وی یێ به‌رفره‌ه بهێته گرێدان، ئه‌رك و كارێن وان بهێنه ده‌ستنیشانكرن و سه‌رۆك و به‌رپرسێن خوه بهێنه هه‌لبژارتن. به‌لێ چو جاران، چو كۆنگره‌ك ناگه‌هیته ئاستێ سه‌ركه‌فتنێ هه‌كه هێزێن مه‌زن و خودان سه‌نگ یێن كوردی د مژارێن پرسێن سه‌ره‌كی و گرنگ دا نه‌گه‌هنه ئێك و مۆرا خوه ل بن رێككه‌فتنه‌كا ستراتیژی لێ نه‌ده‌ن.
له‌ورا د ڤێ قووناغا گرنگ و چاره‌نڤێسساز دا شۆره‌شا كوردی دا په‌یمانه‌كا ستراتیژی كو هه‌موو پرسێن زیانبار ل ناڤبه‌را پارتی و په‌كه‌كێ بنئاخ بكه‌ت و بنیاتێ ڤی هه‌لۆیستی ده‌مدرێژ بهێته دارشتن، پێدڤیه‌كا فه‌ره و پێدڤیه هه‌ر دو لایه‌ن پێنگاڤێن رژد بۆ بهاڤێژن.
نووترين نووچه
- سەرۆك بارزانی و بالیۆزێ ژاپۆنێ دوپاتی ل پێشڤەبرنا پەیوەندیێن د ناڤبەرا هەرێمێ و ژاپۆنێ دا كر
- نێچیرڤان بارزانی: هەرێما كوردستانێ دخوازیت پەیوەندیێن خوە ل گەل ژاپۆنێ پێشڤە ببەت
- ئەندامەكێ كۆمیتەیا ناڤەندییا پارتی: پارتی و ئێكەتی ل سەر پترییا تەوەرێن پێكئینانا حوكمەتێ یێن رێككەفتین
- فازل نەبی: پشتی راگەهاندنا ئەنجامێ سەرژمێریێ پێدڤییە پشكا كوردستانێ ژ بودجەی بهێتە زێدەكرن
- پەرلەمانتارەك: هنارتنا بودجەی دێ پرۆسەیا سیاسی د ناڤبەرا هەرێمێ و بەغدایێ دا بهێزتر كەت
- مەحما خەلیل: هندەك بەرپرسێن ئیراقێ هەڤپشكێن جینۆسایدا شنگالێ نە
- وەزارەتا دەرڤە یا ئەمریكی: ئیدارەیا ترەمپی دێ بەردەوام بیت د كاركرنێ دا ل گەل هەرێما كوردستانێ
- دەم پارتی: پەیاما ئۆجەلانی دێ یا ڤیدیۆیی بیت
- نێچیرڤان بارزانی دوپاتیێ ل بهێزكرنا پێكڤەژیانا ئاشتییانە د ناڤبەرا هەموو پێكهاتەیاندا دكەت
- د. شێرزاد زەكەریا: توركیا و پەكەكێ بۆ ئاشتیێ پێدڤی ب هاریكاریا سەرۆك بارزانی هەیە
سهرهكى Twitter
سه‌د سالیا شه‌ڕێ جیهانیێ ئێكێ
رۆژ دچن و زمان نا راوه‌ستیت و دیرۆك دنڤیسیت و جیهان دهێته گوهۆرین، به‌ری سه‌د سالان ئانكو به‌ری چه‌رخه‌كێ جیهان د مه‌زنترین شه‌ڕ دا بوو ئه‌و ژی شه‌ڕێ جیهانیێ ئێكێ بوو. شه‌رێ جیهانی یێ ئێكێ (1914 ـ 1918) دهێته هژمارتن ئێك ژگرنگترین روودانێن دیرۆكی، خرابیێن ڤێ شه‌ڕی گه‌هشتنه سه‌رانسه‌ری جیهانێ و ب تایبه‌ت جیهانا ئه‌ورۆپی و رۆژهه‌لاتا ناڤین و هه‌تا ببووینه گۆره‌پانێن شه‌ڕی، ڤی شه‌ڕی گوهۆرینێن مه‌زن خستبوونه د ژیانا گه‌له‌ك گه‌لان دا.
سالێن به‌ری روودانا شه‌ڕێ جیهانی یێ ئێكێ هنده‌ك كێشه‌ییِن نێڤده‌ولی سه‌رهه‌لدان و د شیان دا بوو ئه‌ڤ كێشه هاتبانه چاره‌سه‌ركرن ئه‌گه‌ر ژی هزرا له‌شكری د وی سه‌رده‌می یا زال نه‌بوو ل ده‌ف سیاسه‌تا هنده‌ك وه‌لاتێن مه‌زن یێن ئه‌ورۆپا.
ب هه‌بوونا هنده‌ك كێشان به‌ری روودانا شه‌ڕی هه‌ر ژ (1870-1914) كو سیسته‌مێ په‌یوه‌ندیێن نهێنی یێن نێڤده‌وله‌تی هه‌بووینه و ئه‌و ژی بووینه ئێك ژ ئه‌گه‌رێن روودانا شه‌ڕی دیاركرین، ژ وان په‌یوه‌ندیێن (نه‌مسا و ئه‌لمانیا) (فره‌نسی و رۆسی) (ونێزیكبوونا بریتانی یابانی) و (بریتانی فره‌نسی) و.. . هتد.
هه‌ر وه‌سا هنده‌ك روودانێن دی یێن مێژووی هه‌بووینه و كاریگه‌ر بووینه و دهێنه هژمارتن ژ ئه‌گه‌رێن نه راسته‌وخوه یێن شه‌ڕی وه‌ك (قه‌یرانا بولانج) و (كێشا دریڤۆس) هه‌روه‌سا داگیركرنا (ئه‌لزاس و لۆرین) ژ لایێ ئه‌لمانیا ڤه كو دو ده‌ڤه‌رێن فره‌نسی بوون و داگیركرنا بۆسنه و هڕسك ژ لایێ نه‌مسایێ ڤه و كێشه‌یێن مه‌راكش و شه‌ڕێن به‌لقانێ و هه‌ڤركیا دروستكرنا چه‌كی و پێشكه‌فتنا هزرا نه‌ته‌واتی و سه‌رهه‌لدان و پێشكه‌فتنا هزرا له‌شكری و هه‌ڤڕكیێن داگیركرنێ هه‌تا رێژه‌كا مه‌زن، ئه‌ڤ چه‌نده هه‌می دبنه ئه‌گه‌رێن نه راسته‌وخوه یێن شه‌ڕی. جیهان د بارودۆخێن خراب دابوو هه‌تا راده‌كی جیهان د شه‌ڕێ ده‌روونی دا بوو، جیهان به‌س ل هیڤیا چریسكا شه‌ڕی بوو. كورێ شاهێ ئیمبراتوریا نه‌مسا (فردیناند وهه‌ڤژیناوی) قه‌ستا باژێرێ سراییفۆ پایته‌ختێ بۆسنه كربوون و د 18/7/1914 هاتنه كوشتن ل سه‌ر ده‌ستێ كه‌سه‌كێ ب ناڤێ (جفریێلۆ پیرسیب) خه‌لكێ بۆسنه بوو و د كۆمه‌لا (ده‌ستێ ره‌ش) یا سڕبی دابوو، نه‌مسا داخواز ژ ئه‌لمانیا كر شه‌ڕه‌كێ تۆلڤه‌كرنێ بكه‌ت دژی سڕبیا و هه‌ڤالێن وێ. ب ڤێ چه‌ندێ چریسكا شه‌ڕێ جیهانی یا ئێكێ سه‌رهه‌لدا و شه‌ر ده‌ستپێكر و ئه‌ڤه دبیته ئه‌گه‌رێ سه‌ره‌كی یێ شه‌ڕی. ئه‌ڤ شه‌ڕه بۆ ده‌مێ چار سالان ڤه‌دكێشیت ژ 1914 تا 1918، بدووماهیك دهێت ب سه‌ركه‌فتنا هێزێن هه‌ڤپه‌یمان و سنۆره‌ك بۆ ئه‌لمانیا و هه‌ڤالێن وێ دهێته دانان د كۆنگرێ ئاشتیێ دا ل پاریسێ ل سالا 1919، هه‌روه‌سا ده‌وله‌تا ئوسمانی نامینیت پارچه پارچه دبیت و گه‌له‌ك ده‌وله‌تێن نوو ژی دروست دبن.
جۆره‌كێ نوو ژ هه‌ستا نه‌ته‌وی!!
ل سالێن هه‌شتیان رژێما به‌عسا فاشست ب ده‌رخستنا خێزانێن كورد ژ جه و وارێن وان ده‌ست ب عه‌ره‌بكرنێ كر، هه‌ر وه‌سا گرتن و كوشتن و ده‌سته‌ر و بلۆككرنا سامانێ (حجز و مصادره ممتلكات) وان، ژ پێخه‌مه‌ت كێمكرنا رێژه‌یا كوردان ل هنده‌ك ده‌ڤه‌ران عه‌ره‌بكرن دژوارتربوویه، من نه‌ڤێت گه‌له‌ك بچمه ناڤ بابه‌ت و درێژیێ بده‌مێ ژ به‌ر كو ئه‌م هه‌می وێ چه‌ندێ باش دزانین كا بۆچی ئه‌ڤ چه‌نده دكرن و مه‌ره‌م ژێ چ بوو؟ به‌لێ مه‌به‌ستا من ئه‌وه كو بێژم ئه‌رێ ئێدی من چ باوه‌ریێ ب وان كه‌سێن كو خودان باوه‌رنامه‌یا زانكۆیێ نه هه‌بیت، بوورن من به‌حسێ كورێن دهۆك و ده‌وروبه‌رێن وێ نینن نه‌خێر، تكایه كه‌س شاش تێنه‌گه‌هیت، به‌لكو به‌حسێ یێن دی دكه‌م و هوون باش دزانن به‌حسێ كێ یه، هه‌ستێن نه‌ته‌وه‌ی ل جه‌م وان نه‌بیت و هه‌كه هه‌بیت ژی ناگه‌هیته ئاستێ مروَڤه‌كێ نه‌خوانده‌ڤان!؟ ره‌نگه بێژین ئه‌ڤ كابرایه بۆچی ڤێ ئاخفتنێ دبێژیت؟ چونكو هێشتا هه‌ستا نه‌ته‌وه‌یی لاوازه ل ده‌ف ئه‌و كه‌سێن كو خوه دانن ره‌وشه‌نبیر هههه.. . نۆشداره‌كێ گه‌نج د وێ باوه‌رێ دایه كو ڕێژا كوردان ل كه‌ركووكێ 35% یه!؟ ئه‌ڤه‌یه هه‌ستا نه‌ته‌وه‌ی؟ ژ به‌ر كو من چ هه‌ستا نه‌ته‌وه‌یی ژێ نه‌دیت ئه‌و براده‌ر هه‌ر ب زمانێ عه‌ره‌بان دئاخفت و گۆت ((های المزایدات السیاسیه)!!!؟ به‌لێ جه‌نابێ دكتۆری، تو راستی و ئه ز كورێ ئه‌وی باژێرێ خه‌له‌تم ومن ئا گه‌ه ژ ڤێ چه‌ندێ نه‌بوو، به‌لێ باش بوو ته گۆته من ماڵا ته‌و بابێ ته ئاڤابیت بۆ وێ هه‌ستا ئاست بلند یێ ل ده‌ف ته‌و هندی ئێكی وه‌كی ته!. من دڤێت بێژمه جه‌نابێ دكتۆرێ ره‌وشه‌نبیر هه‌كه هه‌ستێن ته ب ڤی ئاوای بن و كوڕێن هه‌ژار ژی هه‌رده‌م سینگێ خوه دده‌نه به‌ر گولله‌یا دوژمنی ته‌نانه‌ت ژ بۆ په‌یداكرنا ئارامی و سه‌ربه‌خوه‌كرن و پاراستنا نامووسێن هه‌ر تاكه‌كێ كورد و نه‌خاسمه مالباتا ته ژی ئێكه ژ ملله‌تێ كورد من، نه‌ڤێت چو دی بێژم خۆزی ب ته‌نێ (5) رۆژان تو ل گه‌ل تیمه‌كا دكتوران ل ناڤ شه‌ری دا بای و هه‌تا هینگینێ ته هزر ل خوه و پێشمه‌رگه‌ی دكر ئه‌و ده‌م بۆ ته دیاردبوو، ئه‌و كینه ئارامیێ بۆ ته په‌یدا دكه‌ن و ب ئاوایه‌ی، به‌لێ تو ژی هه‌قی و نا هه‌قیێ ل ته ناگرم چونكو د خۆشترین ژ یان دا دژی، نه یا وه‌كی ژیانا پێشمه‌رگه‌یه، به‌لێ هندی ئێكێ وه‌كی ته هه‌یه ل گۆری ساته‌كێ پێشمه‌رگاتیێ بن.
بۆچی ئه‌م پێدڤی ئاسایێشێنه؟
ئێمناهی و ئاسایێش ب هه‌می جۆرێن خوه‌ڤه ئێكه ژ گرنگترین پێداویستیێن مرۆڤی و تیۆرێن تایبه‌تێن هه‌ین كه د فه‌رهه‌نگا سایكۆلۆژی و رێبازێن جودایێن وێ ته‌كه‌زیێ ل سه‌ر دكه‌ن. ئێمناهی و ئاسایێشا سایكۆلۆژی پێكدهێت ژ هه‌ستا هندێ كو جڤاك دانی ب مرۆڤی بدده‌ت و ڕێزێ ل وی دگریت و وی ب پشكه‌ك ژ خو دهژمێریت. ئانكۆ ژێنگه‌ها جڤاكی هه‌ڤاله‌كێ گرنگه د ژیانا وی تاكێ هه‌ست ب ئێمناهی و ئاسایێشێ دكه‌ت و به‌روڤاژی وێ ژی دروسته. چه‌ند خوارن و ڤه‌خوارن بۆ ژیانا مرۆڤی پێدڤینه هند ژی ئێمناهی و ئاسایێش بۆ وه‌رارێ و گه‌شه‌كرنا مرۆڤی و ساخله‌میا سایكۆلۆژیا تاكی فه‌ر و گرنگه. ئه‌ڤ جۆرێ ئێمناهی و ئاسایێشێ به‌ری هه‌ر تشته‌كی ژ خێزانێ و جێگیری و نه‌گۆهۆڕیا وێ و هه‌بوونا ئێمناهییا خێزانێ ده‌س پێدكه‌ت. هه‌كه زارۆك د ناڤ خێزانێ دا هه‌ست ب ئێمناهی و ئاساێشێ نه‌كه‌ت، دێ چاوا ب دروستی و باشی هێته په‌روه‌رده‌كرن و پێگه‌هاندن؟ دێ چ جۆره مرۆڤه‌ك ژ وی دوروست بیت؟ ئه‌رێ هه‌كه تاكه‌ك د خێزانه‌كا پڕ ئێمناهی په‌روه‌رده ببیت و تێدا هه‌ست ب ئێمناهی و ئاسایێش و ئارامیێ بكه‌ت و ببینیت هه‌می یان گه‌له‌ك ژ پێدڤیێن وی ل سه‌ر ده‌ستێ خێزانێ دهێنه دابینكرن، بزاڤێ ناكه‌ت ڤێ هه‌ستێ ل سه‌ر ژینگه‌ها جڤاكیا ده‌رڤه ژی پیاده و جێبه‌جێ بكه‌ت و د وێ ژینگه‌ها مرۆڤی دا ژی هه‌مان هه‌ستا ئێمناهیێ ل جه‌م وی دروست ببیت؟ ئه‌رێ هینگی وه‌سا نابینیت كو كه‌سێن د وێ جڤاكی دا ژێده‌رێن باش یێن چاكیێ ل گه‌ل وی و ڤیانا وی و هاریكاریكرنا وینه؟ ئه‌رێ هینگی هه‌ست ناكه‌تن ئه‌ڤ ژینگه‌ها مرۆڤی یا ده‌وروبه‌ری وی دپه‌ژرینیتن و قه‌بوول دكه‌ت؟ په‌ژراندنا جڤاكی وه‌كی پشكه‌ك ژ هه‌ستكرن ب ئێمناهی و ئاسایشا سایكۆلۆژی ئێكه ژ گرنگترین پێدڤایان بۆ هه‌ر مرۆڤه‌كی. پشتی ڤێ هه‌ستێ تاكی دێ باوه‌ری ب خوه هه‌بوون ل جه‌م په‌یدا بیت و ئه‌ڤ باوه‌ری بخوه‌بوونه و باوه‌ری ب ژینگه‌ها جڤاكیا ده‌وروبه‌رێ خوه هاتن بۆ ژیانێ و مانێ فه‌ر و پێدڤیه. ئه‌م ب ڤێ ئێكێ پێدڤی ب هندێنه كو ل ده‌مێ رووب رووبوونا كاودان یان گیانه‌وه‌ره‌ك مه‌ترسیدار یان نه‌ساخیه‌كێ ئاسایشه‌ك بۆ مه هه‌بیت. به‌لێ كه‌سه‌كێ ژ ئێمناهی و ئاسایشا خودێ خوه و یا سایكۆلۆژیك دووربیت به‌رده‌وام یێ د دودلی و گۆمان و ترسێدا. ئه‌ڤ ترسه دێ وی پالده‌ت بۆ هندێ ژ خودێ خوه پشتڕاست نه‌بیت، چونكی هه‌ست ب مه‌ترسیه‌كێ ل سه‌ر خۆدێ خوه دكه‌ت و چ گومان تێدا نین ئه‌ڤ مه‌ترسیه كارتێكرنێ ل سه‌ر هه‌می لایه‌نێن وی یێن سایكۆلۆژی و جڤاكی و فیزیكی ژی دكه‌ت. ژ لایه‌نێ فیزیكی ڤه دێ تووشی ئاریشێن جه‌سته‌یی بیت و ژ لایه‌نێ سایكۆلۆژیڤه د كاودانه‌كێ خرابێ ده‌روونیدا ژیت و جۆره‌ها قه‌یران و ئێش و ئازارێن ده‌روونی بۆ وی دروست بیت. پێدڤیی ب ئێمناهی و ئاسایشا سایكۆلۆژی تاكی پالدده‌ت بۆ هندێ كو تێكه‌لی مرۆڤێن دیترێن د جڤاكێدا ببیت یان بزاڤێ بكه‌ت كو ژ لایێ ڤێ جڤاكی ڤه بهێته په‌سه‌ندكرن چونكی ئه‌ڤ په‌سنده بۆ وی گرنگه و هه‌كه ئه‌ڤ قووناغه
دروست ببیت دێ تاك ژی د ناڤ ڤێ جڤاكێدا هه‌ست ب بوونا خوه كه‌ت و ئه‌ڤ په‌یوه‌ندیا دولایه‌نه وه‌كی جاده‌كا دو ساید كو تێدا دانوستاندن یا د ناڤبه‌را تاكی و جڤاكی دا هه‌ی و وه‌ریسێ وێ ژی ئێمناهی و ئاسایش و ئارامیا هه‌ر دو لایه‌نان و باوه‌ریا وانه ب خودێ خوه و ب یێ به‌رامبه‌ر. ب ڤێ ئێكێ ژی كاركرن بۆ گه‌هشتن ب ئارمانجێن تایبه‌ت و گشتی و نه‌ته‌ویی ژی دێ ئاسانتر و بله‌زتر هێنه بده‌ستڤه ئینان.
پۆست ـ داعش
كورد ڤێجارێ پێدڤی یه دوور هزربكه‌ت، پێدڤیه هزرا پۆست ـ داعش بكه‌ت. هێزه‌ك ژ داعشێ ژی دڕنده‌تر یا برێڤه بۆ گیانێ كوردان، هێشتا ب دروستی خوه تاقینه‌كریه بۆ هێرشكرنا سه‌ر ملله‌تێ كورد. ئه‌و هێرشێن د سه‌دسالیا چووییدا ل ئیراقێ هاتینه ئه‌نجامدان ل دژی كوردان پرانیا وان هێرشێن سووننه ـ دارشتی بوون. تا نها ئه‌و هێرشێن به‌رفره‌هێن داعشێ ئه‌نجامداین هه‌ر په‌نجه‌موورێن سوونیێن ئیراقێ ل سه‌ر مووركرینه. لێ ژ ئه‌ڤرۆ و پێدا هێزه‌ك دن یێ خوه بۆ گیانێ كوردان ئاماده دكه‌ت، ئه‌ڤ هێزه خودان پشته‌ڤانیه‌كا هه‌رێمی یه، هه‌روه‌سا ئه‌و هێزه نه‌ك تنێ خودان پشته‌ڤانیه، لێ به‌لێ یا بوویه به‌شه‌ك ژ ستراتیجیا وێ پشته‌ڤانیا هه‌رێمی، ئه‌م دشێین بێژین یا بوویه پشكه‌ك ژ كیانێ وێ پشته‌ڤانیێ. وێ هێزێ هه‌می پێدڤی یێن ئابووری بوو هاتینه دابینكرن، هه‌می فاكته‌رێن جیۆپۆلیتیك ژی ژێره یارمه‌تیده‌رن، ئه‌و هێزه پشكه‌ك گرنگ پێكدئینیت د به‌لانسا هێزا سه‌ربازیا سه‌رده‌ست ل رۆژهه‌لاتا ناڤه‌راست دا. ئێدی كوردۆ باش هزربكه، پێدڤیه ژ ئیرۆ پێدا خۆ ئاماده بكه‌ن بۆ جه‌نگێ پۆست ـ داعش، چونكی جه‌نگێ پۆست داعش چێدبیت جه‌نگه‌ك وێرانكه‌ر بیت، جه‌نگێ مان و نه‌مانێ بیت بۆ سته‌تیویا كوردی، ده‌ركه‌فتنا ڤێ هێزێ دوباره‌كرنا وێ هندابوونا دیرۆكیا وێ یه، ئه‌ڤرۆ هێدی هێدی یا ده‌ردكه‌ڤیته‌ڤه د ناڤ مه‌یدانا ململانێیه‌كا دژوار دا، لێ یا ب به‌رنامه دارێشتیه و خوه‌دان ئارمانجه، ئه‌ڤرۆ ڤێ هێزه هه‌بوونا خوه ل سه‌ر ئه‌ردی سه‌لماندیه، له‌ورا هه‌می چه‌مكێن سه‌ربازی، ئه‌وله‌كاری، سیاسی و ئیداری د ده‌ستێ خوه دا گرتینه، دبیت وه‌ك پێدڤی عه‌قلانیه‌تیا بزاڤا سیاسیا كوردی هزر بۆ ڤێ هێزێ نه‌كربیت. د ناڤا ڤێ هێزێ دا چه‌ندین ڕه‌وتێن توندڕه‌و، ره‌یسست و دوژمنكارانه په‌یدابووینه، ئێدی وه‌لێ هاتیه، كورد، پێدڤی ناكه‌ت گومانێ بێخته‌سه‌ر ڤێ هێزا توندڕه‌و. بۆ به‌رهنگاربوونا ڤێ هێزێ، بزاڤا سیاسیا كوردی هه‌رچو زووه پێدڤی ب لێكۆلین و لێگه‌ریانێن عه‌قلمه‌ندانه هه‌یه. هه‌ڵوێستێن سیاسی یێن گشتگیر و هه‌م یێن تایبه‌ت ل ئیراقێ دهێنه نه‌خشاندن په‌ی بیرو بۆچوونێن ڤێ هێزا تۆندڕه‌و. ب پشتیه‌ڤانی و رێنمایێن هیزا هه‌را مه‌زنا هه‌رێمی ڤێ هێزێ ده‌ستكاریا تێگه‌هێن سیاسی و جڤاكی بو ره‌وشا رۆژهه‌لاتا ناڤێن ل دووڤ به‌رژه‌وه‌ندیێن خوه بۆ په‌یوه‌ندیێن جڤاكی و سیاسی و ئابووری و نیشتیمانی ل عیراقێ داڕشتینه. دیسا ڤێ هێزێ خالێن لاوازێن بزاڤا سیاسیا كوردی ده‌ستنیشان كرینه و به‌رده‌وام یا ئه‌كتیڤه بۆ پتر لاوازكرنا په‌یوه‌ندیان د ناڤ رێزێن بزاڤا سیاسیا كوردیدا و هه‌تا ڕادده‌یه‌ك مه‌زن سه‌ركه‌فتی بوویه. ئه‌ڤ هێزه یا سه‌ركه‌فتی بوو د ده‌مێ چه‌ند سالێن بووریدا بۆ مۆنۆپۆلكرنا قانوون و ریسایێن تایبه‌ت و گشتی، مۆنۆپۆلكرنا سامانێ گشتی، هیزا چه‌كداری و سیاسه‌تا گشتی ل عیراقێ.
پێدڤییه ژ نها پێڤه بزاڤا سیاسیا كوردی خوه ل ئاست ڕوودان و پێشهاتیاندا ببینیت، كاره‌ك دل ئێشه كو هه‌تا نها بزاڤا سیاسی ب تنێ یا ل پاش ڕوودانان دبه‌زیت، قه‌ت پێش ڕوویدانا نه‌كه‌تیه، ژ ئه‌ڤرۆ پێدا پێدڤیه عه‌قلێ ستراتیجیا بزاڤا سیاسیا كوردی د بنه‌ره‌تدا بێهته گهوڕین بۆ ئاسته‌كێ كو گرێدایی بیت ب پێشهاتیێن ناڤچه‌یی و نێڤده‌وله‌تی ڤه.
ئه‌م هه‌می دزانین كو د دژوارترین و تاڵترین كاودان و كاره‌ساتدا ب درێژاهیا سه‌د سالیا بیستێ هه‌تا سالا ٢٠٠٣ چو حوكمه‌ته‌ك ابه‌غدا بریارا مووچه بڕین و قوتكرنا بووجێ گشتی نه‌دابوو و ئه‌و هه‌نگاڤ نه‌نابوون، لێ به‌ره‌ڤاژی هه‌می وان گۆتگۆتكێن د ده‌مێ بیست هه‌تا سی سالێن چوویدا ده‌رباره‌ی هێزێن شیعی بوومه ڤه‌دچڕاندن كو ئه‌و هه‌ڤپه‌یمانێن مه‌نه، دوستێن مه‌نه، په‌یمانێن سیتراتیجی مه بهه‌ڤرا هه‌نه و دوستێن مه‌یێن ڕوژێن خه‌باتێ بوون دژی سه‌ددامێ گۆڕبگۆڕ. ل نازكترین و هه‌ستیارترین ده‌مدا، دوست و برایێن مه‌یێن شیعه ئه‌و كاره كرن كو هێشتا سه‌ددامێ گۆڕبگۆر ب هه‌می دوژمنداری و دڕندایه‌تیا خوه، هزرژی ژوێ چه‌ندێره نه‌كربوو ئه‌نجام بده‌ت به‌رانبه‌ر ملله‌تێ كورد، ژ ٢٠٠٣ یێ تا نها هه‌می حكومتێن شیعی ل ئیراقێ هه‌می هه‌وڵداینه بو پێشێلكرنا هه‌می مافێن گشت نه‌ته‌وه و گرۆپێن ئه‌تنیكی ل ئیراقی، هه‌ر وه‌خته‌ك بو وان ده‌رفه‌تك په‌یدا ببیت بێی ئێكودو ده‌ستێ خوه وه‌شاندیه دژی به‌رژه‌وه‌ندیین هه‌می نه‌ته‌وه و ئایین و مه‌زهه‌بێن ل ئیراقێ دژین، ئه‌ڤ ده‌ستوه‌شاندنێن هه د هه‌می بواراندا بوویه، د وارێ سیاسی و ئابووری، ئه‌وله‌هی، یاسایی و سیخوری و له‌شكری دا.. .. هتد.
ئه‌وا من دڤێت ئه‌ز بدمه خۆیاكرن ،ئه‌وه، كو هه‌می هێزێن شیعی، چه‌پڕه‌و و ڕاستڕه‌و، دیندار و عه‌لمانی، ره‌شنبیر و خێله‌كی، مه‌ده‌نی و عه‌سكه‌ری، یه‌كده‌نگن، هه‌ریه‌ك بجوره‌كی دژ ب هه‌می سروشته ـ مافێن گشت گرۆپێن دی ل ئیراقێ، نه‌خاسمه ملله‌تێ كورد. د ده‌مێ چه‌ند حه‌فتی و مه‌هێن بووریدا، ب تایبه‌تی ئه‌و هێزێن ملیشایی یێن شیعه هاتینه ده‌ڤه‌رێن كه‌ركووك و دیاله، چه‌ندین كار و چالاكیئه‌نجامداینه دژی به‌رژه‌وه‌ندی و دژی وان هه‌لویست و ساخله‌تێن ئه‌م وه‌ك ملله‌ت ل سه‌ر دهاتینه تێگه‌هاندن كو دوستێن سروشتێ ملله‌تێ كوردن. رێگه‌گرتن ل چوونا كوردان و ئوتومبێلێن وان بۆ ناڤچه‌یێن دی یێن عیراقێ، چه‌ندین كورد ب بارمه‌ته گرتینه و هنه‌ك ژ وان شه‌هیدكرینه و چاره‌نڤیسێ گه‌له‌كان ژی نه‌دیاره. ئه‌ڤ هێزێن شیعه مه‌زهه‌ب چه‌ندین جارا ڕۆبرۆبووینه ل گه‌ل هێزێن پێشمه‌رگه‌هی ل وان ده‌ڤه‌ران، چه‌ندین جاران بریندار داینه، چه‌ندین پێشمه‌رگه تا نها ده‌سته‌سه‌رن د ده‌ستێ وان هێزێن شیعی دا.
پێدڤیه ئه‌م كورد خوه بۆ جه‌نگێ پوست ـ داعش به‌رهه‌ڤك بكه‌ین، ب بۆچوونا من جه‌نگێ پۆست ـ داعش جه‌نگه‌ك گه‌له‌ك دژوارتره ژ جه‌نگێ دژی داعش، وه گه‌له‌ك به‌رفره‌هتر و چاره‌نڤسسازتره. ئه‌و جه‌نگه‌ژی، جه‌نگێ شێعه ل به‌رامبه‌ر كوردان، هێزێن شیعه ژ مێژوه‌ره خوه بۆ ڤی جه‌نگی به‌رهه‌ڤ دكه‌ن. جه‌نگێ كورد و شیعه جه‌نگه‌كێ حه‌تمیه و چ بیانوو نین كو بزاڤا سیاسیا كوردی هه‌ر ژنها ئاماده‌كاری و پێداویستیێن وی جه‌نگی به‌رهه‌ڤ نه‌كه‌ت. ئه‌م هه‌می دزانین كو ئه‌و هه‌نگاڤێن هێزێن شیعی هاڤێتین دژی كوردان، برینه‌ك گه‌له‌ك دژوار خستینه د ناڤ جه‌رگێ دپلۆماسیه‌تا كوردیدا، ئه‌م هه‌می ماینه حه‌یری كا چاوا ب چ ووژدان هێزێن شیعی ئه‌و كاره دژی دۆستێن خوه یێن دێرین ئه‌نجامدان، لێ تشتێ ژ وێژی حێبه‌تیتر ئه‌وه، كو چاوا بزاڤا سیاسیا كوردی هزرا روژه‌كا وه‌سا نه‌دكر، چاوا ئاماده‌كاری و هه‌نگاڤێن عه‌قلانی بۆ ڤان جۆره هه‌لویستێن نه‌مه‌ردانه نه دارشتن بوون، ئه‌م هه‌می دزانین كو ده‌روبه‌رێن ملله‌تێ كورد پڕن ژ ناحه‌ز و فێلبازان. پێدڤیه ستراتیجیا دپلوماسیا كوردی دارشتنه‌ك عه‌قلانی و ئه‌كادیمی بۆ بێهته كرن، سیاسه‌تا گشتی یا ڤێ بزاڤێ ل په‌ی ڤان به‌رژه‌وه‌ندیان بێهته دارشتن، مه كوردان پێدڤی ب دامه‌زراندنا ده‌زگه‌هێن ستراتیجی بۆ لێكۆلێنێن هزری، سیاسی، ئابووری، عه‌سكه‌ری، په‌روه‌رده‌یی و ب پله‌یه‌ك ئیداره‌یی هه‌نه، ئه‌ڤ ده‌زگه‌هێن هه ل ژێر چه‌تره‌كا زانستیدا بێهنه كومكرن، ئه‌و چه‌تره رابیت ب داڕشتنا سیاسه‌تێن گشتی یێن كوردستانی ل گۆر به‌رژه‌وه‌ندیێن كوردستانیان، نه‌ك تنێ كوردان، به‌لكو كوردستانییان.
ئه‌ڤرۆ نيوز ژڤانێن به‌لاڤكرنا مووچێ هه‌يڤا ئيلۆنێ يێن ماين به‌لاڤ دكه‌ت
ئه‌ڤرۆ نيوز:
بڕياره د سێ رۆژێن بهێت دا، وه‌زاره‌تا دارايى و ئابوورى ل حوكمه‌تا هه‌رێما كوردستانێ، مووچێ هه‌يڤا ئيلۆنێ يێ پێنج وه‌زاره‌ت و خانه‌نشينكريان به‌لاڤ كه‌ت.
ب گۆره‌ى ئه‌و پێزانينێن ب ده‌ست ئه‌ڤرۆ نيوز كه‌فتين، بڕياره رۆژا دوشه‌مبى و سێشه‌مبى هه‌ر ئێك ژ وه‌زاره‌تێن باژێرڤانى و گه‌شتوگۆزار و كاره‌ب و كاروبارێن شه‌هيد و ئه‌نفالكريان و چاندن و ژێده‌رێن ئاڤێ ل گه‌ل خانه‌نشين كريان مووچێ خوه وه‌ربگرن.
هه‌ر ب گۆره‌ى وان پێزانينان، بڕياره رۆژا چارشه‌مبى ژى مووچێ هه‌موو كارمه‌ندێن وه‌زاره‌تا ناڤخۆ يا حوكمه‌تا هه‌رێما كوردستانێ هێته دان.
ل دۆر ڤێ چه‌ندێ ئه‌ڤرۆ نيوز بۆ پشتراستكرنا ڤى نووچى په‌يوه‌ندى ب وه‌زاره‌تا دارايى و ئابوورى يا حوكمه‌تا هه‌رێما كوردستانێ كر، به‌لێ ئه‌وان ره‌تكر كو ئاشكه‌ران كه‌ن چاوان و كه‌نگى دێ مووچێ ڤان وه‌زاره‌تان هێته به‌لاڤكرن.
زانكۆیا ئارتۆكلۆ تۆمه‌تان ره‌ت دكه‌ت
ئه‌ڤرۆ نيوز، ناجی به‌ده‌ل:
قوتابيه‌كێ پشكا كوردولۆژى ل زانكۆيا ئارتۆكلۆ يا ماردينى دياركر كو ئه‌و تۆمه‌تێن سه‌رۆكێ زانكۆيێ و مامۆستايێن وێ پشكێ پێ هاتينه گرتن د سياسى بوون و چو په‌يوه‌ندى ب گه‌نده‌ليێ ڤه نه‌بوو.
سه‌عيد ئوسمان، قوتابيێ پشكا كوردولۆژى ل زانكۆيا ئارتۆكلۆ يا ماردينى د داخۆيانيه‌كێ دا بۆ ئه‌ڤرۆ نيوز گۆت: “حزكمه‌تا توركيا قه‌درى يه‌لدم، جێگرێ سه‌رۆكێ زانكۆيا ئارتۆكلۆ يا ماردينى و سه‌رۆكێ پشكا كوردولۆجى ل گه‌ل 50 مامۆستايێن دى ب تۆمه‌تا گه‌نده‌ليێ ده‌سته‌سه‌ركرن، پاشان پشتى پێنج رۆژان هاتنه ئازادكرن”.
ئه‌ڤى قوتابيێ ماسته‌رێ زێده‌تر گۆت: “بابه‌تێ ئه‌ڤ مامۆستايه پێ هاتينه گرتن چو په‌يوه‌ندى ب گه‌نده‌ليێ ڤه نه‌بوو، بابه‌ته‌كێ سياسى بوو، به‌لێ ل ژێر په‌ردێ گه‌نده‌لێ هاتبوونه ده‌سته‌سه‌كرن، ب مه‌ره‌ما ژناڤبرنا ڤێ پشكێ”.
ئاشكه‌را كر كو ژ به‌ر سه‌ركه‌فتنا ڤێ پشكێ د نێزيككرنا كوڕێن كوردان ژ هه‌ر چار پارچێن كوردستانێ و گه‌له‌ك وه‌لاتێن دى يێن جيهانى، حوكمه‌تا توركيا بزاڤ كرن كێشان ل هه‌مبه‌ر دروست بكه‌ن دا كو بهێته داخستن.
سه‌عيد ئوسمان دا زانين ژى كو سوبه‌هى ئێڤارى بڕياره د كۆنگره‌كێ رۆژنامه‌ڤانى دا، ل به‌ر ده‌رێ زانكۆيا ئارتۆكلۆ يا ماردينى، د پرێس كۆنفرانسه‌كى دا، قه‌درى يه‌لدم به‌ياننامه‌كێ ب خوينيت و تێدا ئه‌و تۆمه‌تێن ئاراسته‌يى وى هاتينه كرن ب گۆره‌ى به‌لگه‌يێن پێدڤى ره‌تكه‌ت.
ئه‌ڤى قوتابى ته‌كست ل سه‌ر وێ چه‌ندێ كر كو ئه‌ڤه زێده‌ترى بابه‌ته‌كێ سياسى چو تشتێ دا نينه، دێ به‌رده‌وامى ژى ب كارێ پشكێ هێته دان و خواندن ل وێرێ دێ يا به‌رده‌وام بيت
دەرچوویێن دھۆکێ دێ ل پەروەردا شێخان ھێنە دامەزراندن
شێخان، بارزان مزووری:
رێڤەبەرێ پەروەردا قەزا شێخان دیار کر کو 70 فۆرمێن گرێبەست یێن بۆ پەروەردا وان ھاتینە دابینکرن و گۆت “رەنگە دەرچوویێن دھۆکێ ل پەروەردا شێخان ب گرێبەست بھێنە دامەزراندن و ئەڤە ژی نە دبەرژەوەندا شێخان دایە”.
ئەسعەد محیەدین رێڤەبەرێ پەروەردا قەزا شێخان بۆ رۆژناما ئەڤرۆ دیار کر کو ئەو پێدڤی ب 482 پلێن دامەزراندنێنە و گۆت “ئەڤ فۆرمە بەس بۆ دەرچوویێن کۆلیژا پەروەردا بنیات و پەیمانگەھێن پەروەردێ نە، ل دەمەکی ئەم پێدڤی ب دەرچوویێن ئاداب و زانست و کارگێری و ئابوورینە، چونکی پتریا دەرچوویێن دەڤەرێ ئەڤ دەرچوویەنە”.
ناڤبری دیار کر ژی چێ دبیت دەرچوویێن دھۆکێ بۆ پەروەردا شێخان بھێنە دامەزراندن و دەرچوویێن دەڤەرا شێخان بێ بەھر ببن ژ ڤان پلێن گرێبەست و گۆت “ھەکە دەرچوویێن دھۆکێ ل سەر پەروەردا بھێنە گرێبەست چ مفای ناگەھینتە مە، چونکی دێ داخوازا ڤەگوھاستنێ کەن و دێ بیتە بارگرانیەک بۆ پەروەردا قەزا شێخان”.
زانکۆیا سەلاحەدین دێ ڤەکۆلینان ل شوونوارێن بەردەرەش دکەت
ئەڤرۆ نیوز، رەزوان رۆژبەیانی:
شاندەکێ بسپۆرێن دیرۆکی و شوونواری ل زانکۆیا سەلاحەدین سەرەدانا قایمەقامیا قەزا بەردەرەش کر ژ بوو ڤەکۆلین و لێگەریانێن زانستی ل شوونوارێن دەڤەرا بەردەرەش کو ژ نەمان و ناڤچوونێ بھێتە پاراستن.
حکمه‌ت مه‌ولود بەرپرسێ راگەھاندنا قایمەقامیا قەزا بەردەرەش بۆ ئەڤرۆنیوز خویاکر کو ئەڤرۆ ل رێکەفتێ 23\11\2014 شاندەکێ بسپۆرێن دیرۆکی و شوونواری ل زانکۆیا سەلاحەدین ب سەرپەرشتیا شوونوارناس دکتور نه‌عمان جومعە ئيبراھیم سەرەدانا قایمەقامیا قەزا بەردەرەش کرژ بوو لێگەریان و ڤەکۆلینێن زانستى ل سەر شوونوارێن دەڤەرێ.
حکمه‌ت مولۆد گۆتژی: “گەلەک جھێن دیرۆکی و شوونواری ل دەڤەرا بەردەرەش ھەنە، بەلێ ھەتا نوکە نەھاتینە ناساندن و وەکو پێدڤی لێگەریان و ڤەکولینێن زانستی ل سەر نە ھاتینە کرن گەلەک ژ وان ژی بەرەف نەمانێ دچن، ئەگەر پتر گرنگی پێ نەھێتە دان”.
حکمه‌ت مولود دیار ژی کر کو قایمەقامێ بەردەرەش ژ لایێ خوه ڤە ھاریکار و پشتەڤان دبیت بۆ سەرخستنا وان ڤەکۆلینان کو ل سەر شوونوارێن بەردەرەش بھێنە کرن.
عيراقێ دێ كه‌ساتيێ 2014 هه‌لبژێرێت
ئه‌ڤرۆ نيوز:
عيراق دێ ب رێيا ئه‌نترنێتى كه‌ساتيێ سالا 2014 هه‌لبژێريت نوكه سه‌رۆكێ هه‌رێما كوردستانێ مه‌سعود بارزانى و سه‌رۆك كۆمارێ عيراقێ دكتور فوئاد مه‌عسوم د پێشيا رێزبه‌ندێ دانه.
چه‌ند چالاكڤانێن مه‌ده‌نى ل عيراقێ 19 كه‌س ده‌ستنيشان كرينه كو بڕياره كه‌ساتيێ سالا 2014 ل عيراقێ هه‌لبژێرن.
د ڤێ به‌ريكانێ دا، چار كه‌ساتيێن كورد هه‌ڤركيێ ل سه‌ر به‌ريكانێ دكه‌ن كو ژ وان ژى هه‌ر ئێك ژ سه‌رۆكێ هه‌رێما كوردستانێ مه‌سعود بارزانى و سه‌رۆك كۆمارێ عيراقێ دكتور فوئاد مه‌عسوم و نه‌وشيروان مسته‌فا سه‌رۆكێ بزاڤا گۆڕان و ڤيان ده‌خيل ئه‌نداما جڤاتا نوونه‌را د پێشره‌ويێ دانه.
ب گۆره‌ى رێكخه‌رێن ڤێ به‌ريكانێ، سه‌ركه‌فتيێن وێ دێ ل حه‌فتيا ئێكێ ل سالا نوو هێنه راگه‌هاندن.
د ڤێ راپرسيێ دا ئه‌ڤ كه‌سه د پشكدارن:
مه‌سعود بازرانى سه‌رۆكێ هه‌رێما كوردستانێ.
فوئاد مەعسوم، سەرۆك كۆمار.
حەیدەر عەبادی، سەرۆكێ وه‌زيران.
عەمار حەكیم، ئەمیدارێ جڤاتا بلندا ئیسلامی.
سەلیم جبوری، سه‌رۆكێ جڤاتا نوونه‌ران.
ئیبراهیم جەعفەری، وەزیری دەرڤە يێ عێراقێ.
ئوسامە نوجیفی، جێگرێ سەرۆك كۆمارى
ئەیاد عەلاوی، جێگرێ سەرۆك كۆمارى.
نوری مالیكی، جێگرێ سەرۆك كۆمارى.
ساڵح موتلەگ، جێگرێ سەرۆك وەزیران.
نەوشیروان مستەفا، رێكخەرێ گشتی بزاڤا گۆڕان.
ماجدە تەمیمی، ئه‌نداما جڤاتا نوونه‌ران.
ڤیان دەخیل، ئه‌نداما جڤاتا نوونه‌ران.
هادی عامری، وه‌زير په‌يوه‌ندى و ڤه‌گوهاستنێ.
قەیس الخزعلی، ئه‌ميندارێ گشتيێ عه‌صايب ئه‌هل ئه‌لحه‌ق.
تورهان مفتی، سه‌رۆكێ پارتا حه‌ق يا توركمانى.
خالد مەلا شێخ، سه‌رۆكێ كۆمه‌لا ئيسلامى يا عيراقى.
شێخ مەلیك سەعدى، موفتيێ عيراقێ.
نيشاندان
WP Facebook Auto Publish Powered By : XYZScripts.com