سیاسه‌ت و سیاسه‌تكرن مافه‌كێ ره‌وایێ هه‌ر لایه‌نه‌كێ سیاسی یه‌ بخوه‌ بكه‌ت ل گه‌ل هه‌ر كه‌سه‌كی یان هه‌ر لایه‌نه‌كێ دی لێ دڤێت د وێ سیاسه‌تێ دا به‌رچاڤ وه‌رگرتنا هه‌ستێ خه‌لكی بهێته‌ كرن وه‌رگرتن ئه‌ویێن متمانه‌ دایه‌ وان لایه‌نان ئه‌ڤجا چ ل سه‌ر ئاستێ په‌رله‌مانی، حكومی، حزبی بیت، پشتی سه‌ره‌دانا شاندێ ئێكه‌تی نیشتمانی كوردستان بۆ به‌غدا و كۆمبوون ل گه‌ل نووری مالكی ئه‌وێ ئه‌ڤه‌ پتره‌ ژ ده‌ه مه‌هانه‌ بودجه‌ و قووتێ خه‌لكێ كوردستانێ بری و ئه‌ڤرۆ كوردستان یا د وێ قه‌یرانا دارای دا دنالیت، هه‌روسا ب سیاسه‌تا نه‌ حه‌كیمانه‌یا جه‌نابێ مالكی ئه‌ڤ شه‌رێ ب سه‌ر مه‌ دا هاتیه‌ سه‌پاندن هه‌ر ئه‌ڤ مالكیه‌ بوویه‌، ئه‌ڤ سه‌ره‌دانێن حزبی د ڤی ده‌مێ نازك دا جهێ پرسیارێ یه‌؟؟ نزانم ل سه‌ر چ بنیات هوون ده‌ستێ خوه‌ دكه‌نه‌ د ده‌ستێن ڤان درندان دا دێ هه‌ما پیچه‌كێ هه‌ست ب به‌رپرسایه‌تیێ بكه‌ن ل به‌رامبه‌ری خه‌لكێ كوردستانێ ب گشتی و ده‌نگده‌رێن خوه‌ بتایبه‌تی، ب دیتنا من دوور ژ پشته‌ڤانی و ئالیگیریا هه‌ر لایه‌نه‌كێ حزبی ئه‌ز باوه‌رم ئه‌ڤرۆ ئه‌وا هه‌وه‌ كری جهێ پرسیار و حێبه‌تیێ بوویه‌ ل جه‌م پتریا ئه‌ندام و لایه‌نگر و پشته‌ڤانێن هه‌وه‌ ژی، د ده‌مه‌كێدا به‌ری نوكه‌ حوكمه‌تا هه‌رێما كوردستانێ مژوولی دارێتنا به‌رنامه‌یێن خوه‌ بوویه‌ ژ بۆ پاراستنا ئاخ و كه‌رامه‌تا مه‌ كوردستانیان، ئه‌و ژی ب كۆلانا خه‌نده‌كان ل كه‌مه‌را هه‌ولێرا پایته‌خت و كه‌ركووكا دلێ كوردستانێ، هه‌ر دیسا رۆژئاڤایێ باشۆرێ كوردستانێ گه‌له‌ك براده‌ران ب موزایده‌یێن حزبی ب ناڤ دكر لێ ده‌رئه‌نجام جلێ هات؟، ئه‌رێ مانه‌ بۆ پاراستنا كوردستانێ بوویه‌!! هه‌ر دیسا ب ئایدولۆژیا سه‌رۆكێ هه‌رێمێ مه‌سعوود بارزانی هه‌ستكرن ب به‌رپرسایه‌تیا نه‌ته‌وایه‌تی وب هزروبیر و سیاسه‌تا خوه‌ یا حه‌كیمانه‌ ئه‌و كه‌سێ ئه‌ڤرۆ جیهان هه‌می شانازیێ بێ د به‌ن و كۆمكرنا هه‌می ئالیێن سیاسی یێن رۆژئاڤایێ كوردستانێ ل سه‌ر مێزا دانوستاندنێ و گه‌هشتنا رێكه‌فتنێ ب ناڤێ(رێكه‌فتنا دهۆكێ) و بوویه‌ رێكه‌فتنه‌كا دیرۆكی بۆ كوردان ل هه‌ر كۆژیه‌كێ جیهانێ ب گشتی و ته‌ڤایا ملله‌تێ كورد ل ل سه‌ر ئاستێ هه‌ر چار پارچێن كوردستانێ ب تایبه‌تی، هه‌روسا رازیكرنا هه‌ڤپه‌یمان و ده‌وله‌تێن زلهێزێن جیهانێ ژ بۆ وه‌شاندنا هێزا پێشمه‌رگه‌ی و چه‌كێن گران بۆ بالپشتیا برایێن مه‌ یێن كورد ل رۆژئاڤا دژی ڤی شه‌ڕێ ب خورتی هاتیه‌ سه‌پاندن ل سه‌ر ته‌ڤایا ملله‌تێ كورد بێی ل به‌رچاڤوه‌رگرتنه‌ك كا ئه‌ڤ پێشمه‌رگه‌ یان ئه‌ڤ وه‌لاتیێ كورد ژچ حزبه‌ یان لایه‌نێ وی یێ سیاسی چیه‌ به‌لكو بێی جوداهی دبیته‌ ئارمانجا ڤێ رێكخراوا تیرۆرستی، چونكو تنێ كوردن، به‌رامبه‌ری ڤان هه‌لویستێن نه‌ته‌وایه‌تی یێن بارزانی براده‌رێن ئیكه‌تیێ به‌رامبه‌ری ڤان كاران رادبن ب حزبیكرنا شاندنا چه‌كی بۆ رۆژئاڤایی ئه‌رێ ما ئه‌ڤه‌ یا به‌رئاقله‌ ؟! هه‌ر دیسا سه‌ره‌دانا بۆ لایێ دوژمنێ كوردان مالكی دكه‌ن ئه‌وێ ئه‌ڤرۆ پێشبینیا دادگه‌هكرنا وی دهێته‌ كرن و كه‌س ژ مه‌ نینه‌ وه‌كو وه‌لاتی مه‌ هه‌میان باجا برینا بودحه‌ی و مووچه‌یێ ل سه‌ر ده‌ستێ ڤه‌ نه‌ مه‌ردێ مالكی مه‌ هه‌میان باجه‌یا دای كاكێ من،كێشه‌یێن هه‌وه‌ ل به‌غدا نینن به‌لكو كێشه‌یێن هه‌وه‌ ل بنێ گوهێ هه‌وه‌نه‌ وه‌رن ل سلیمانیێ پێكڤه‌ ل گه‌ل وه‌لاتی و هه‌ڤشاریێن خوه‌ بریننه‌ ل سه‌ر مێزا گفتۆگۆیێ ئه‌ڤه‌ پتره‌ ژ حه‌فت مه‌هاته‌ نه‌شیاینه‌ جڤاتا پارێزگه‌ها سلیمانیێ پێكبینن، نه‌چن ل گه‌ل مالكی برینن وه‌رن ل گه‌ل كه‌ڤنه‌ برایێن خوه‌ یێن ته‌ڤگه‌را گۆران برینن به‌لكو بگه‌هنه‌ چاره‌یه‌كێ و سلیمانیێ ژ وێ قه‌یرانا مه‌زن ده‌ر بینن و هنده‌ك رێزێ ل وی خه‌لكی بگرن یێن ده‌نگ داینه‌ هه‌وه‌ و وه‌رن دیسا وه‌كی به‌ری نوكه‌ من دیاركری ئه‌ڤه‌ پتره‌ ژ ده‌ه مه‌هانه‌ ئه‌م یێن د ئاگرێ جه‌نابێ مالكیدا دكه‌لین و قه‌یران ل دووڤ قه‌یرانێ یا بۆ مه‌ كوردان دروست كری، د ده‌مه‌كیدا ژڤانه‌ شانده‌كێ بالایێ حكومه‌تا هه‌رێما كوردستانێ سه‌ره‌دانا به‌غدایێ بكه‌ت ژ بۆ دانوستاندنێ ل سه‌ر وان كێشه‌ و ئارێشێن ماینه‌ هه‌لاویستی ئه‌ز تێناگه‌هم ئه‌رێ ما هوون ژی پشكه‌ك نینن ژ ڤێ حوكمه‌تێ؟؟!! ئه‌رێ ما ئه‌ڤه‌ نه‌ موزایدیێن حزبینه‌؟! ئه‌رێ هوون بێژن نیازا سه‌ره‌دانا شاندێ بلندێ مه‌كته‌با سیاسییا ئێكه‌تی نشتمانی كوردستان بۆ به‌غدایێ و كۆمبوون ل گه‌ل مالكی و لایه‌نیێن دی یێن سیاسی به‌ری چوونا شاندێ بلندێ حوكمه‌تا هه‌رێما كوردستانێ بۆ به‌غدایێ پێخه‌مه‌ت چاره‌كرنا كێشه‌یێن هه‌لاویستی چ دگه‌هینیت؟! به‌رسڤا ڤێ پرسیارێ بلا بۆ خوانده‌ڤان بێت هێژا بیت.
ئه‌ڤرۆ یا فه‌ره‌ ئه‌م مفای ژ دیرۆكێ وه‌ربگرین و هه‌می لایه‌نیێن سیاسی یێن كورد ده‌ستێن خوه‌ بكه‌ینه‌ د ناڤ ئێكدا و ناكۆكیان بدانینه‌ لایه‌كی و به‌س خزمه‌تا دوژمنێن خوه‌ بكه‌ین و هه‌ستكرن ب به‌رپرسایه‌تیا نه‌ته‌وایه‌تی به‌رامبه‌ری ملله‌تێ خوه‌ كار بكه‌ین ژ بۆ گه‌هشتنا ئارمانجێن نیشتمانی و نه‌ته‌وایه‌تی یێن ملله‌تێ كورد، هه‌كه‌ مه‌ نانه‌ك هه‌بیت بلا بكه‌ینه‌ چار پرت و به‌س كه‌یفا دوژمنان بمه‌ بێت.

بازرگان، توێژه‌كێ گرنگ و هه‌ستیارن د گیانێ گشت گه‌ل و ملله‌تان دا، ئه‌ڤ توێژه‌ یا گرێدایی یه‌ ب باژێری ڤه‌ یانكو هه‌ر كه‌رتێ بازرگانی و بازرگانن باژێران ئاڤادكه‌ن و ژبلی كو ژیانا ئیكونومی و دارایی د ده‌ستێ وان دایه‌، دیسان ئه‌ڤ توێژه‌ ل گه‌ل كه‌لوپه‌لێن ئه‌و هاورده‌ دكه‌ت و چاند و كلتوور و پێزانینێن ملله‌ت و باژێر و گه‌لێن دی ژی دگه‌ل خوه‌ دئینن و به‌رۆڤاژی ژی شۆناس و ناسنامه‌ و چاند و هونه‌ر ملڵه‌تێ خوه‌ ژی ب خه‌لكێ دی دده‌نه‌ نیاسین.
ئه‌گه‌ر ئه‌ڤ توێژه‌ یا هوشیار بیت و خودان هه‌سته‌كا نیشتیمانی و نه‌ته‌وه‌یی بیت دێ كاریت فاكته‌رێن ب نه‌ته‌وه‌بوونێ (بازارێ هه‌ڤپشك ئێكه‌ ژ فاكته‌رێن نه‌ته‌وه‌بوونێ) و بنه‌مایێن ده‌وله‌تێ دروست بكه‌ت، بنێره‌ دیرۆكا گشت وه‌لاتێن پێشكه‌فتی دێ بینی ئه‌ڤێ توێژێ كاره‌كێ رژد كریه‌ ژبۆی ب هێزكرنا ئابووریا وه‌لاتێ خوه‌ و دروستكرنا ستراكتورێن سه‌ربه‌خۆییا نیشتیمانی، هه‌ول دایه‌ ب پاره‌ و سه‌رمایێ خوه‌ پرۆژه‌كتێن بازرگانی و پیشه‌سازیێن مه‌زن و ستراتیژی دروست بكه‌ن، كو بۆ ده‌مێ سه‌دان ساڵان وه‌لاتی مفای ژێ وه‌ربگرن و هاریكار و پالپشتێن حوكمه‌تێن خوه‌ بووینه‌ نه‌مازه‌ د چاخێن ته‌نگاڤیان دا، وه‌كو میناك ده‌ما ده‌وله‌تا ئیسرائیل هاتیه‌ پێكئینان، رێژه‌یا هه‌ره‌ زۆرا بازرگان و سه‌رمایه‌دارێن ئیسرائیلی رێژوكا باش ل پارێن خۆ ل ئه‌ورۆپا و ئه‌مریكا باكوور ڤه‌گۆهاستنه‌ ئه‌ڤێ ده‌وله‌تا ساڤا و نووی پێ دگه‌هیت، هه‌ر چه‌نده‌ وان دزانی د ده‌وله‌تێن دی دا دێ پتر یێن سۆدمه‌ند بن و د وان وه‌لاتان دا سه‌قامگیریا سیاسی و ئابووری و ئه‌منی هه‌یه‌ و د ئیسرائیلێ ئه‌و فاكته‌رێن گرنگ ژبۆی گرنتیكرنا سه‌رمایه‌یێ وان نینه‌، لێ وان ته‌ماشه‌ی كارێ هه‌نێ كر وه‌كو ئه‌ركه‌كێ نیشتیمانی و نه‌ته‌وی و هه‌تا وه‌كو ئه‌ركه‌كێ ئایینی ژی ل قه‌له‌م دا، له‌وما شیان رۆله‌كێ گرنگ و هه‌ستیار ب بینن د پرۆسه‌یا ئاڤاكرنا ده‌وله‌ته‌كا ب هێز و سه‌قامگیر دا.
به‌رۆڤاژییا بازرگانان و بزنسمانێن عه‌ره‌ب كو وان ب تنێ هزرا قازانجێ دكر یێن ئاماده‌بوون ته‌عامولێ ل گه‌ل دۆژمنێن خوه‌ بكه‌ن ژ پێخه‌مه‌تی قازانجه‌كێ زێده‌تر، ل جه‌م بازرگانێ عه‌ره‌ب (گرنگ نینه‌ چ دكریت و ل كێ دكریت و دفرۆشیه‌ كێ)؟ یا گرنگ ئه‌وه‌ ب (چ دكریت و ب چه‌ندێ دكریت و ب چه‌ندێ دفرۆشیت)؟ ئه‌ڤ جیاوازیا دنێڤبه‌را بازرگان و سه‌رمایه‌دارێن ڤان هه‌ر جه‌مسه‌ران نه‌ ب تنێ یا گرێدایی یه‌ ب توێژا هه‌نێ ڤه‌، به‌لكو ب ته‌ڤایا جیهانبینی و كلتوورێ هه‌ر دوویان ڤه‌ گرێدایه‌، ئه‌مێن كورد ژی چونكه‌ ئه‌ڤه‌ بو ده‌مێ سه‌دان سالایه‌ ل ژێر داگیركرنا راسته‌وخوه‌ یا عه‌ره‌بانین و مه‌ هه‌می تشتێ خۆ راده‌ستێ كلتوور و چاندا وان كریه‌ و (بازرگانی پشكه‌كه‌ ژ كلتورێ هه‌ر نه‌ته‌وه‌كێ)، له‌وما ئیرۆ سه‌یر نینه‌ ئه‌گه‌ر بازرگانێ كورد ب چیته‌ هه‌ر وه‌لاته‌كی كه‌ل و په‌لان بینیت و خرابترین كوالیتی بكریت و بازارێ كوردستانێ بكه‌ته‌ جهێ خه‌رجكرنا كه‌ل و په‌ل و خوارنێن ئێكسپایه‌ر، دبینم تشته‌كێ چاڤه‌رێكریه‌ ئه‌گه‌ر ئاشكرا بیت كو چه‌ند به‌رپرس و بازرگان و بزنسمان كرین و فرۆتنێ دگه‌ل داعشێن تیرۆرست دكه‌ن، ئه‌ڤ چه‌نده‌ یا دوور نینه‌، چونكو د كلتورێ جڤاكی مه‌ دا سه‌ره‌ده‌ری دگه‌ل دۆژمنان نه‌بوویه‌ شه‌رم به‌لكو تشته‌كی زۆر ئاسایی یه‌ ئیرۆ ئه‌گه‌ر ئاشكرا بیت كو ئه‌ڤ لایه‌نه‌ یان یێ دی بازرگانی یان هه‌تا تێكهه‌لیێن له‌شكری و سیخوری و سیاسی ل گه‌ل ئه‌ڤ دۆژمنی یان یێ دی كریه‌، ما نه‌ پێدڤی یه‌ جڤاك پێش حوكمه‌تێ ئه‌وی لایه‌نی شه‌رمزار بكه‌ت؟ و فشارێ ل سه‌ر حكومه‌تی به‌ت هه‌تا بزووترین ده‌م ئه‌وان كه‌سان سزابده‌ت وه‌ك خیانه‌ته‌كا نیشتیمانی ئه‌ڤی كاری ریجیست بكه‌ت، سازیێن په‌یوه‌ندیدار هه‌ر ئێك ل ئالیێ خوه‌ ڤه‌ ب ئه‌ركێ خوه‌ راببیت ل هه‌مبه‌ر ئه‌ڤێ تاوانا مه‌زن و خیانه‌تا نه‌ته‌وی ئه‌وا ل سه‌ر ده‌ستێ هنده‌ك كه‌سێن هه‌ست ب به‌رپرسیاریه‌تا نیشتیمانی و نه‌ته‌وی ناكه‌ن هاتیه‌ كرن.

ئه‌م ملله‌تێ كورد و ب تایبه‌تی باشۆرێ كوردستانێ یێن گه‌هشتینه‌ قووناغه‌كێ چو جارا مێژوویێ ئه‌ڤ ده‌رفه‌ته‌ نه‌ دایه‌مه‌، ل چه‌رخێ بیست و ئێكێ و جیهانێ هۆسا پێشكه‌فتن بخوه‌ڤه‌ دیتیه‌ هه‌ما هه‌ر چ سحبه‌تا مه‌ نه‌مایه‌ ئه‌م وه‌كی ڤان ملله‌تان ل رۆژهه‌لاتا ناڤه‌راست و هێش ئه‌م بخوه‌ دخۆرین كو ئه‌م جیهانا سیێنه‌. جاره‌كا دی مێژوویێ به‌رپه‌رێن خوه‌ ڤه‌دان وه‌كی ئه‌لبۆمه‌كا وێنان و بیرهاتن بۆ مه‌ نووكرنه‌ڤه‌ ل گه‌ل داگیركه‌ران، جینۆساید، تالانكرن،كوشتن، ره‌ڤاندن.. هتد، ل ده‌مێ ئه‌نفالێن ره‌ش ب سه‌ر ملله‌تێ مه‌ دا هاتین ل سالێن هه‌شتیان حه‌تا سالێن نۆتان مه‌ چو نه‌بوو ژبلی ره‌ڤێ و نه‌مه‌ چ دزانی ونه‌ مه‌ چ دیت ئه‌م ب هیڤیا خه‌لكی ڤه‌بووین دا د هه‌وارامه‌ بهێن و مه‌ بۆ جیهانێ وێنه‌كه‌ن، دا حالێ مه‌ ببینن و وانژی وه‌كی هه‌ر جار ل دووڤ وژدانا خوه‌ كاردكر كا چ تشت بۆ وان یێ باشه‌ داوی دیاركه‌ن وه‌كی دبینین ل سه‌رده‌مێ نوكه‌ ژ نوی هنده‌ك پارچه‌ ڤیدیۆ یێن دئێنه‌ به‌لاڤه‌كرن و ل سه‌ر دئێنه‌ نڤیسان بۆ ئێكه‌م جار به‌لاڤ دبیت. ئه‌ڤ پیجا ئازادیا ئه‌م كه‌تینه‌ تێدا بۆ مه‌ هندی خۆشیا به‌حشتێ بوو، به‌لێ هندی ناڤێ كه‌سێ كورد ل سه‌ر مه‌بیت و ئاخا مه‌ كوردستان بیت دێ حالێ مه‌ ل گه‌ل ده‌وروبه‌رێن مه‌ و دوژمنێن مه‌ ئه‌ڤه‌ بیت، نموونه‌ ژی ئه‌م یێن ب چاڤێن خوه‌ دبینین كا ئه‌ڤرۆ چ رووبده‌ت و جاره‌كا دی مه‌ دیت كا چ ب سه‌رێ مه‌ كوردان هات چ ب سه‌رێ برایێن مه‌ یێن ئێزدی هات ژ بۆ پاراستنا ئاخ و ملله‌تێ خوه‌ چه‌ند قوربانی هاته‌ دان و چه‌ند شه‌هید مه‌ دان جاره‌كا دی خوینا كوردان هاته‌ رێنن.
پشتی ئازادیا 2003 و نه‌مانا دكتاتۆریێ ئه‌م شیاین حه‌تا راده‌كێ باش مفای بۆ خوه‌ ژێ وه‌ربگرین و ستراتیجیه‌كا باش دانین یا هزری و پلانان دانین بۆ پاشه‌رۆژێ و یا ژ هه‌میان گرنكتر گه‌شه‌كرنا ئابووری بوو، هۆسا ئه‌م شیاین به‌رێ گه‌له‌ك وه‌لاتێن مه‌زن یێن جیهانێ بده‌ینه‌ خوه‌ و ب ده‌هان كۆمپانیێن هه‌ره‌ مه‌زن قه‌ستا كوردستانێ كرن و هاتنه‌ دامه‌زراندن ب سیاسه‌تا حه‌كیمانه‌ یا سه‌ركردایه‌تیا كوردی ب سه‌رۆكاتیا سه‌رۆك بارزانی ل ناڤخوه‌ و ژ ده‌رڤه‌ ئه‌م شیاین ببینه‌ جهێ گرنگێدانێ و مێرگه‌كا بچووك د ناڤ گورزێن ئاگری دا ببینه‌ جهێ بێكڤه‌ ژیانێ. به‌رهه‌مێ وێژی ئه‌م ئه‌ڤرۆ یێن بینین كا چاوا د شه‌رێ مه‌ ل گه‌ل تیرۆرێ ب ناڤێ ده‌وله‌تا ئیسلامی (داعش) هه‌می ده‌وله‌تێن زلهێزێن جیهانێ یێ په‌سنا مه‌ دكه‌ن و پشتگێریا مه‌ دكه‌ن و هاریكاریا بۆ مه‌ فرێدكه‌ن، ئه‌و ژی ب رێیا پرچه‌ككرنا پێشمه‌رگه‌هی و سه‌ر پشكا وان ژی ئه‌مریكا و فره‌نسا و ئیتالیا و بریتانیا و ئه‌لمانیا. ل ڤێرێ بۆ مه‌ دیاربوو كا ژبلی ئێكگرتنێ و براینیێ و هاریكاریێ كا ئه‌م پێدڤی چینه‌ دا كو بشێن ئه‌م بخوه‌ خوه‌ نیشا جیهانێ بده‌ین ژ لایێ سیاسی، ئابووری، جڤاكی، كه‌لتووری، ره‌وشه‌نبیری.. . هتد، یا ژ هه‌میێ گرنكتر ئه‌ڤ كاودانێن ئه‌م تێدا دبۆرین وه‌كی ئه‌م دبینین و بۆ مه‌ باش نیشا جیهانێ بده‌ین، ئه‌و ژی ب رێیا ڤه‌كرنا تۆره‌كا كه‌نالین ئاسمانی یێن فه‌رمی كو تۆره‌كا پر زمان بیت ژ وان زمانێن فه‌رمی یێن جیهانی و یێن ئه‌م بزانین دێ ژێ د مفاداربین وه‌كی زمانێ،كوردی، ئینگلیزی، عه‌ره‌بی، توركی، فارسی، داكو ده‌نگوباسێن مه‌ دورست ب رێیا وێ تۆرا كه‌نالا ژ مه‌ بزانن. نموونه‌ ژی پتریا وه‌لاتان ئه‌ڤ تۆرێن كه‌نالان هه‌نه‌ و یێن وان یێن فه‌رمینه‌ وه‌كی ئه‌مریكا، وه‌لاتین ئه‌ورۆپی یێن زلهێز، توركی، ئیرانێ، وه‌لاتێن عه‌ره‌بی.
ب هزرا من دێ شێن وێنه‌كێ باش و جوان و پر مفادار یێ كوردی و پێناسا ملله‌تێ خوه‌، ئێش و ئازارێن خوه‌ ژیانا خوه‌ نیشا چاڤێن جیهانێ ده‌ین.
هه‌روه‌سا ئه‌ڤ روودان و كاره‌ساتێن ب سه‌رێ ملله‌تێ مه‌هاتین ل رۆژئاڤایێ كوردستانێ و ب تایبه‌تی ژی كوبانێ كویا دبیته‌ ئه‌گه‌رێ هه‌لاتنا رۆژه‌كا نوی و ئازادبوونا پارچه‌كا دی ژ كوردستانێ، هه‌ر هۆسا پشتی وی ده‌ستكه‌فتێ مێژوویی یێ چوونا پێشمه‌رگه‌یی بۆ ناڤ ئاخا رۆژئاڤا ل كۆبانێ، ئه‌م بشێن ڤێ ژێكڤه‌بوونا درێژ نه‌هێلین ئه‌م كورد جاره‌كا دی تێكه‌لی ئێك ببین و ببینه‌ ئێك.