ھەولێر، قائید میرۆ:

لیژنا کاروبارێن پێشمەرگەی یا پەرلەمانێ کوردستانێ مژۆلی بەرھەڤکرنا پرۆژە قانوونەکا نوویە، ھەتا ئەڤسالە خزمەتا پێشمەرگەی ب دوسالا بھێتە ھژمارکرن و ئەندامەکێ لیژنێ ژی دبێژیت، دەمێ ھژمارکرنا خزمەتا پێشمەرگەی دێ پلەیێن وانژی بڤێ ئەگەرێ زێدەببن.

قادر رەزگەیی، ئەندامێ لیژنا کاروبارێن پێشمەرگە یا پەرلەمانێ کوردستانێ بۆ رۆژناما ئەڤرۆ دیارکر، کو پرۆژە قانوونەک یا تێتە بەرھەڤکرن بۆ خزمەتا ھێزێن پێشمەرگەیی و گۆت” پشتی کو پرۆژە قانوونەک بۆ ھژمارکرنا خزمەتا فەرمانبەرێن حوکمەتێ ھاتیە بەرھەڤکرن و بڕیارە بۆ ئەڤسالە خزمەتا فەرمانبەران ب دو سالان بھێتە ھژمارەتن، نوکە ئەمژی وەکی لیژنا پێشمەرگەی مژۆلی بەرھەڤکرنا پرۆژە قانوونەکێی نە، ھەتا وەکی رێزگرتن ل خەبات و قوربانیدانا ھێزێن پێشمەرگەی د سەنگەرێ بەڕەڤانیکرنێ دابووینە د ئەڤسالەدا، خزمەتا ئەڤسالە حوکمەت بۆ ھێزێن پێشمەرگەی ب دو سالان ھژماربکەت و پێشمەرگەژی ژڤێ بڕیارا حوکمەتێ بێ بەھرنەبیت، چونکو قانوونا مەدەنی خزمەتا پێشمەرگەی ناگریت و دڤێت پرۆژە قانوونەکا تایبەت بھێتە بەرھەڤکرن، پرۆژە قانوون یا تێتە بەرھەڤکرن و دەمەکێ نێزیک دێ د کۆمبوونا پەرلەمانی دا ڤەخواندنا ئێکێ بۆ ھێتەکرن و کەڤیتە بیاڤێ بجە ئینانێ دا”.

قادری گۆتژی” پێشمەرگە ھەژی ھەموو خزمەتەکێ یە و ئەگەر ئەف پرۆژە قانوونە ھاتە پەسەندکرن، ئەڤە راستەوخۆ دێ پلەیێن سەربازیێن پێشمەرگەی ژی زێدەببن، چونکو پلەیێن ئاسایی ھەر سێ سالا جارەکێ زێدەدبن و پلەیێن بلند چوار سالا جارەکێ، سالەک ب دو سالێن خزمەتێ بھێتە ھژمارتن، دێ پلەژی گورەی سالێن خزمەتێ زێدەببن، لەوڕا ئەم یێ لەزێ دکەین بۆ پەسەندکرنا پڕۆژە قانوونێ و مزگینیێ دەمە ھێزێن پێشمەرگەی دێ دەمەکێ نێزیک پەسەندبیت”.

زەلامەکی شەش ھەیڤان ھەڤژینا خوە پشتگوھاڤێت بۆ و چوو بو ل میسل دژیت، پشتی شەش ھەیڤ ب سەرڤە چووین ھەڤژینا وی ل دووڤ زەلامێ خوەرا دچیت و د بێژیتێ وەرە تە کورەک ھەیە، گەڤ ل ھەڤژینا خوەکر بوون و گۆت بوویێ تۆ بھێی بێژیە من وەرە یان بەحسێ پاران بکەی دێ سەرێ تە دانمە سەر پشتا تە ئانکو گەفێن ب ڤی شێوەی لێ دکرن، دادگەھێ ژی بریاردا ئەڤ زەلامە ب سزایێ شەش ھەیڤان حوکم بیت.

ئەڤرۆ، جیھان کۆرەمارکی:

پارێزەر ھەڤال وەھاب رەشید بۆ ئەڤرۆ دیارکر کو ژنەکێ شکایەت ل زەلامێ خوە کر کو پشتگوھاڤێتیە و چوویە ل میسل بژیت و زارۆیەک ژێ ھەیە و گۆت: پشتی شەش ھەیڤ ب سەرڤە چووین چو ل دووڤ زەلامێ خوەرا دا بێژیتێ وەرە تە کورەک ھەیە، گەڤ ل ھەڤژینا خوەکر بوون و گۆت بوویێ تۆ بھێی بێژیە من وەرە یان بەحسێ پاران بکەی دێ سەرێ تە دانمە سەر پشتا تە ئانکو گەفێن ب ڤی شێوەی لێ دکرن، گۆتژی دادگەھێ ژی بێ ئامادەبوونا زەلامێ وێ شەش ھەیڤان حوکمکر، پشتی ڤان روودانا ھەڤژینێ وێ پێ حەسیا یێ حوکم بوویی رەڤی چوو ھەولێرێ، دادگەھێ ب رێیێن خوە یێن قانوونی فەرمانا دەستەسەرکرنا وی برە ھەولێرێ و تاوانبار ھاتە گرتن، پشتی زەلامێ وێ چوویە د زیندانێ ڤە گۆتە ھەڤژینا خوە ئامادەمە تە چ دڤێت بۆ تە بکەم، ھەڤژینا وی گۆتێ ئەڤە شەش ھەیڤە تە ئەزا ھێلایم و تە نەفەقا نە دایە زارۆیێ خوە، دادگەھێ جارەکا دی دوپاتی ل سەر بریارا خوە کر و شەش ھەیڤام حوکم کرە ڤە، ناڤھاتی دیارکر ژی کو ژنێ داوا بەردانێ کر و نەفەقا کورێ خوە ژێ خواستن و ھەردوو بۆ چێبوون، ل دووڤ مادا حەفت یا قانوونا توند و تیژیا خێزانی یا سالا ٢٠٠٨ ێ، پشتی ئەڤ قانوونە دەرکەتی داوایێن ب ڤی رەنگی ل دادگەھێ مشە بووینە چونکو پتر مافێ ئافرەتێ تێدا یێ پاراستیە، لێ د مادەکی دا ھاتیە دەمێ ژن و مێر پێکدھێن نابیت سزایێن جەزائی ب دانە سەر.

زێدەتر گۆت: وەکو پارێزەرەک ھند ل گەل ڤێ قانوونێ نینم دڤێت راستڤەکرن تێدا بھێنەکرن مادا حەفت ژ ڤێ قانوونێ یا مەتاتیە ھەر گاڤەکا دادوەری بڤێت دشێت زەلامی بگریت ئانکو مافێن زەلامی دھێنە پێشێلکرن و یێن ژنێ پتر دھێنەدان.

 پارێزەر ھەڤال ل دووماھیێ دبێژیت: گەلەک جارا مە گۆتیە ئەڤ سەنتەرێن ھاتینە دانان یێن توند و تیژیێ دڤێت کارمەندێن بسپور و شارەزا ھەبن چونکو زوربەیا جاران ئەڤ سەنتەرە بووینە ئەگەرێ ژێکڤەبوونا ژن و مێران چونکو بابەتی ژ قەبارێ وی مەزنتر لێ دکەن دڤێت حالەتێن وەسا دادوەرەکێ تایبەت ھەبیت.

ئەڤرۆ، مللەت جەمال:

ژێدەرەکی ژ رێڤەبەریا ھاتنوچوونا پارێزگەھا دھۆکێ دیار کر کو چار کارگەھێن دروستکرنا تابلویێن ترۆمبێلان بۆ وەلاتیان دابین کرینە، دا کو سیستەمێ تابلویان ببیتە ئێک و ئێدی کەس نەشێت دەستکاریێ د تابلویێن ترۆمبێلان دا بکەت و نوکە ھەمی وەلاتی و شوفێر دشێن قەستا رێڤەبەریا ھاتنوچوونێ بکەن و ل دووڤ ھندەک رێنمایان تابلویێن ترۆمبێلێن خوە بگھۆرن.

کۆمیسەر وەلید حەسەن خەلیل رێڤەبەرێ کارگەھان بۆ رۆژناما ئەڤرۆ دیار کر کو ئەڤ کارگەھە ژ وەلاتێ ئەلمانیا ھاتینە و دەلیڤا سەختەکاریێ تێدا نینە، چونکی ھەمی وەک ئێکن و گۆت “سێ کارگەە ژ وانا ل بنگەھێ رێڤەبەریێ ل دومیز ھاتینە دنان بۆ ترۆمبێلێن تایبەت و کرێ و کارگەھەک ژی ل بنگەھێ کواشێ ھاتیەدانان بۆ ترۆمبێلێن بارھەلگر و ترێلە و ترۆمبێلێن مەزن وەک کار ئاسانیەک بۆ وان ترۆمبێلان کو ل کواشێ دھێنە پشکنین”.

ل دۆر رێنمایێن گھۆرینا تابلویان رێڤەبەرێ کارگەھان گۆت “ھەر کەسێ بڤێت تابلویا ترۆمبێلا خوە بگھۆریت ژ ژمارا کاتی بۆ دھۆک دێ ھەر وەک بەرێ مامەلێن خوە برێڤەبەت و ئەو ترۆمبێلێن ژمارەکری ب تنێ دڤێت تابلویێن کەڤن بۆ تابلویێن نوو بگھۆرن، لێ پێدڤیە ترۆمبێل بھێنە پشکنین و ب تنێ 36 ھزار دیناران دێ دەن، لێ ھەکە ترۆمبێل ژمارە کاتی بیت و بۆ ئێکەم جار بیت بھێتە ژمارەکرن ب تنێ دێ ملیۆنەک و  ھزار 500 دیناران بەرامبەر تابلویان دەت”.

ل دۆر دەمێ برێڤەبرنا مامەلێ وەلیدی گۆت “ب سوپاسیڤە رێڤەبەرێ ھاتنوچوونێ ھەمی پێدڤیێن کاری بۆ مە دابین کرینە، بگرە ژ جھەکێ بەرفرەە و ھژمارەکا کارمەندان، داکو زوو مامەلە برێڤەبچن، لەورا ھەر کەسێ سەرەدانا مە بکەت ب نیڤ دەمژمێرێ دێ مامەلا خوە ب تەمامی برێڤەبەت و ب تنێ پێنج خولەکا ل کارگەھێ دمینیت”.

ل دووماھیێ ناڤبری دیار کر کو بریارە ل رۆژێن بھێت کارگەھەکا دی ژی بگەھیتە بەردەستێ وان و ئێکسەر دێ کەڤیتە د خزمەتکرنا شوفێران دا، چونکو رۆژ بۆ رۆژێ شوفێر زێدەتر قەستا وان دکەن و نوکە رۆژانە نێزیکی 100 تابلویان ددەنە شوفێران و پێشبینی دھێتەکرن ئەڤ ھژمارە ل رۆژێن بھێت زێدە بییت، لێ وان شیان ھەنە د رۆژەکێ دا 500 تابلویا زێدەتر چاپ بکەن.

ئه‌ڤرۆ نيوز، ناجی به‌ده‌ل:

سه‌دیق شه‌رۆ به‌رپرسێ راگه‌هاندنا رێڤه‌به‌ریا گشتیا په‌روه‌ردا دهۆكێ بۆ ئه‌ڤرۆ نیوز راگه‌هاند كو هه‌ر كه‌سێ ل میلاكه‌كێ ریڤه‌به‌ریه‌كێ بيت و بڤێت بهێته‌ ڤه‌گوهاستن بۆ ملاكێ په‌روه‌ردێ، دشێت ل گوری داخوازیه‌كێ پێشكێشی په‌روه‌ردێ بكه‌ت ژ بووی خوه‌ ڤه‌گوهێزیته‌ سه‌ر میلاكێ په‌روه‌ردێ و ل گوری پیدڤی و گرنگیا باوه‌رناما ئه‌وی كه‌سى هه‌ی و پێدڤی بوونا په‌روه‌ردێ بيت.

ناڤبری ئه‌و چه‌نده‌ ژی دیاركر ئه‌و كه‌سێ داخوازیێ پێشكێش دكه‌ت، دڤێت ئه‌و كه‌س نڤیسارا نه‌رێگریا رێڤه‌به‌ریا خوه‌ بۆ په‌روه‌ردێ ژێ بینیت دا كو ئه‌و لایه‌نێ ژێ دهێت تووشی ئاریشێن بێ كادر نه‌بیت .

سه‌دیق شه‌رۆ ئه‌و چه‌نده‌ ژی دیاركر كو ئه‌و كه‌سێ دڤێت بهێته‌ ڤه‌گوهاستن بۆ میلاكێ په‌روه‌ردێ بۆ ئه‌وان بسپوریێن وان پیدڤی پێ هه‌ی كو ل ملاكێن دی یێن وه‌زاره‌تێ دا هه‌نه‌ و ل گوری لیژنه‌كا تایبه‌تمه‌نده‌ بڕیار ل سه‌ر ڤه‌گوهاستنا وان دهێته‌ دان.

به‌رپرسێ راگه‌هاندنا په‌روه‌ردا گشتی یا دهۆكی ئه‌و ئێكه‌ ژی دازانین ئه‌گه‌ر هه‌ر كه‌سی دڤێت بهێته‌ ڤه‌ گوهاستن و رێڤه‌به‌ریا و ی رێگر بوو رازیبون بۆ ناهێته‌كرن و گۆت: “ده‌سپێكێ دڤێت ریڤه‌به‌ریا وی رێگر نه‌بیت و یا دويێ ژی په‌روه‌رده‌ ل سه‌ر رازی بیت ئه‌ڤجا دشیت خزمه‌تا خوه‌ و كارێ خوه‌ ڤه‌گوهێزته‌ سه‌ر په‌روه‌ردێ”.

ئەڤرۆ، ئازاد نسری:

بەرپرسێ پشکا ئەزموونان ل رێڤەبەریا پەروەردەیا دھۆک یا رۆژئاڤا دیار کر کو ل رۆژا 12\11 دەرگەھێ پێشکێشکرنا ئەزموونێن دەرەکی یێن پۆلا 12 ئامادەیی بۆ سالا خواندنێ 2014-2015 ھاتە ڤەکرن.

ل دۆر وان کەسێن مافێ پێشکێشکرنێ ھەی، خالد ئەحمەد خالد بەرپرسێ پشکا ئەزموونان ل رێڤەبەریا پەروەردەیا دھۆک یا رۆژئاڤا دیار کر کو قوتابیێ کەفتیێ دو سالان ل پۆلا 12 ئامادەیی و کورێن ژ دایکبوویێن 1990 و کچێن ژ دایکبوویێن 1989 و بەر ب خوارێ و قوتابیێن پۆلا 11 ژی ھەکە ژ بەر تەمەنی مافێ خواندنێ ل قوتابخانان نەمابیت، ھەروەسا قوتابیێن پۆلا نەھێ بنەرەت یێن ل سالا خواندنێ 2013-2014 ئەزموونێن گشتی کرین، لێ دڤێت ئەڤە دانەکێ ژ بۆردێ خوە ژ پەروەردا گشتی بینن و گۆت “ب تنێ قوتابیێن پۆلا 12 ئامادەیی یێن ل سالا خواندنێ 2013-2014 کەفتین دێ ئێکسەر ئەزموونێن ویزاری ئەنجام دەن و یێن دی ھەموو دێ ئەزموونێن پێشەکی ئەنجام دەن”.

خالد ئەحمەد دیسا دیار کر کو ھەکە قوتابیەکی پشکا خوە گوھارت بیت ژ زانستی بۆ وێژەیی یان ژی ژ وێژەیی بۆ زانستی، ئەو ئەڤ سالە دێ شێت پێشکێشی دەرەکی بکەت، لێ دڤێت دانەکێ ژ بۆردێ خوە یێ دووماھی جار گوھارتی ژ پەروەردا کشتی یا دھۆکێ بینیت.

قوتابیێن ل سالا خواندنێ 2011-2012 ل پۆلا 10 ئامادەیی بیت و سالا خواندنێ 2012-2013 ل پۆلا 11 بیت و 2013-2014 ل پۆلا 12 ئامادەیی بیت دێ ئەزموونان ل سەر 80 یێ ئەنجام دەن و یێن دی ھەموو دێ ل سەر 100 نمران کەن و گۆت “قوتابی دئازادن ب زمانێ کوردی “کرمانجی یان سورانی” یان ژی ب زمانێ عەرەبی پێشکێشی دەرەکی بکەن”.

ناڤھاتی خویا کر کو پێدڤیە ھەر قوتابیەکێ پێشکێش دکەت، 10 وێنەیێن رەنگاورەنگ ل گەل باوەرنامەیا خوە و کۆپیەکا ناسنامەیا بارێ شارستانی یا رەنگاورەنگ ل گەل خوە بینت و گۆت “ئەم ب تنێ قوتابیێن پارێزگەھا دھۆکێ وەردگرین و ھەر قوتابیەک دێ پێشکێشی پەروەردا سنۆرێ ئاکنجیبوونا خوە کەت”.

قوتابی دشێن ھەتا رۆژا 10\12\2014 پێشکێش بکەن.