ئه‌ڤرۆ:

ئێشانێن پشتێ ژ نەخۆشیێن ڤی سەردەمی نە و گەلەک د بەلاڤەنە و ژ ھەر پێنج کەسان چار ژێ گازندەیان ژ ئێشانا پشتا خوە دکەن یان تووش دبنێ، ئێشانا پشتێ نەخۆشیا دوێ یە ل جیھانێ و پشتی پەرسیڤی دھێت و نەخۆش گەلەک قەستا نوشداران دکەن بۆ ڤێ مەرەمێ و ئەوێن پشت ئێشان ھەبیت و شوفێربیت پێدڤیە خوە ژ تەسەیان بپارێزیت، چونکو تەسە ئێشانێن پشتێ دژوارتر لێ دکەن.
د.ھوگر محەمەد بالتەی، تایبەتمەندێ چارەسەریا سروشتی و نەخۆشیێن گەھان دیارکر کو کێمتر ژ ١٥% ژ ئێشانێن پشتێ ژ ئەگەرێ تێکچوونا کرکرکێ یان رۆماتیزم و شکەستنێ نە و وەرەم ژی و ژ ئەگەرێن ئێشانا پشتێ ژی پێکھاتینە ژ نەپووتەدان ب قامەتا لەشی و پشتگوە ھاڤێتنا راھێنانێن وەرزشی و فێربوون و بەردەوامبوون ل سەر روونشتنا خەلەت و چەماندنا پشتێ ب شێوەیەکێ شاش و گۆت: باشترین رێک بۆ نڤستنێ ئەوە کو ل سەر تەنشتەکێ بنڤیت و یا باشتر ئەوە لایێ راستێ بیت ژبەرکو ئەو ھاریکارە بۆ دەرکرنا ترشیاتیێ د رووڤیکان دا، ھەروەسا دێ باشتر بیت کو پشتا مرۆڤی یا راست بیت و ستوویێ مرۆڤی ل گەل مۆرکێن پشتێ بیت ئەوژی ب کارئینانا بالیفکەکێ کو یا نزم بیت و سەرێ مرۆڤی گەلەک یێ بلند نەبیت و دیسا نابیت گەلەک ل خوارێ ژی بیت.
ھەروەسا دیارکر ژی کو نابیت پالپشت و بالیفکێن بلند بھێنە ب کارئینان، ژبەرکو ئەو دبنە ئەگەرێ خواربوونا ستووی و پاشی دبنە ئەگەر کو پشتا مرۆڤی ھەموو ب ئێشیت، دیسا دێ باشتر بیت چوک و کوسک ل بەرێک بھێنە کێشان داکو زەڤلەکێن پشتێ ئالوز نەبن و پشت راست ببیت و ئەڤ لڤینە دباشن کو فشار ل کرکرکێ و دسکێن پشتێ نەبیت.
د.ھوگر دیارکر باشترین جھێ نڤستنێ ئەوە گەلەک یێ نەرم نەبیت و ژبەرئێک نەچیت داکو پشتا مرۆڤی یا سروشتی بیت و نەبیتە ئەگەر جھەک بلند یان نزم ببیت و ب ڤێ رێکێ لەشێ مرۆڤی ھەموو دێ خوە راست گریت و گۆتژی:نڤستنا ل سەر ئەردێ رەق ژی دبیتە ئەگەرێ فشارکرنێ ل سەر ھەستیێن کوسکی و پاشی پشت ئێشان ژێ پەیدادبیت، ھەروەسان نڤستن ل سەر دوشەکێن سپرنگی یان ل سەر کورسیک و قەنەپەیان ئێشانێن دژوار ل پشتێ پەیدادکەن و بەردەوام ژی ئەو ئێشان دمینن.
ھەروەسا دیارکر ژی کو ھندەک رێک ھەنە گەلەک زیانێ ل پشتێ دکەن و جوانیا لەشێ مرۆڤی ژی تێک ددەن و ئێشانێن دومدرێژ ژێ پەیدادبن و ھەتا دبنە ئەگەر کو ھندەک نەخۆشیێن ئەندامی ژی ژێ پەیداببن کو شدیانا ھەستیان و ئینزلاق و د پتریا دەمان دا ژی مرۆڤی شیان ھەنە خوە ژێ دوور بکەت ئەوژی ب دووڤچۆنا رێکێن نڤستنا ساخلەم و گۆت: تەسە ژی دبنە ئەگەر ئێشانێن دژوارتر لێ بھێن، لەورا ئەوێن پشتا وان دئێشیت و شوفێربن، باشترە ژ تەسەیان دھشیاربن.
ھەروەسان دیارکر ژی کو ھندەک تشت ھەنە پێدڤیە مرۆڤ خوە ژێ دوور بکەت ل دەمێ راھێنانێن پشتێ دکەت، ژبەرکو رەنگە ئەو راھێنان ببنە ئەگەرێ زێدەتر ئێشانا پشتێ و فشارکرن ل سەر دەماران بھێتە کرن و گۆت: ژوانژی نابیت مرۆڤ خوە گەلەک ب چەمینیت داکو نەرماتیا زەڤلەکان ژدەست نەدەت، ھەروەسان نابیت ھەردو ئالیێن لەشی پێکڤە بھێنە چەماندن و دیسا بۆ ستووی و ملان ژی راھێنانێن تایبەت ھەنە و ھەر کەسێ پشتا وی ب ئێشیت دێ باشتر بیت بەری دەست ب راھێنانێن وەرزشی بکەت شیرەتا ژ نوشدارەکێ تایبەتمەند وەربگریت و پاشی دەست پێ بکەت.