ئه‌ڤرۆ نیوز:
سكرتێرێ گشتى یێ نه‌ته‌وێن یه‌كگرتى كریارا ته‌قینێن خوه‌كوژى یێن دوهى شه‌رمزاركرن كو ژ ئه‌نجامێ وێ زێده‌تر ژ 33 وه‌لاتى هاتینه شه‌هیدكرن.
دوهى ل ئاهه‌نگا ئه‌وروزێ دا داعش دو ته‌قین ل باژێرێ حه‌سه‌كێ روژئاڤایێ كوردستانێ ئه‌نجامدان كو د ئه‌نجامێ وێ ته‌قینێ دا زێده‌تر ژ 33 وه‌لاتى شه‌هیدبوون و ب سه‌دان كه‌س برینداربوون.
بان كى مون دیاركر ئێك ژ ئه‌جیندایێن داعش دروستكرنا ململانێیا تائیفى د ناڤبه‌را نه‌ته‌وان دا، دڤێت رێگرى لێ بهێته كرن.
ئه‌ڤرۆ نیوز:
د پەیامەکێ دا نێچیرڤان بارزانی سەرۆک وەزیرێن هەرێما کوردستانێ جەژنا نەورۆزێ ل گەلێ باکۆرێ کوردستانێ پیرۆز دکەت و پشتەڤانیا خوە بۆ پێڤاژوویا ئاشتیێ ل تۆرکیا دوپات دکەت.
ئەڤ پەیاما نێچیرڤان بارزانی ل ئاهەنگا ئامەدێ کو نێزیکی 3 ملیۆن کەس تێدا ئامادەببوون هاتە خاندن ئەڤە ژی دەقێ وێ یە.
بۆ هەڤسەرۆکێن رێزدار یێن HDP و DTK و DBP
سلاڤ و رێز
زۆر سۆپاس بۆ داخازناما هەوە ژبۆ جەژنا نەورۆزا ئامەدێ، نەورۆزا وە و هەمی کورد و کوردستانییان ب دل و جان پیرۆز دکەم.
هیڤیدارم ئەڤ جەژنە بۆ کورد و کوردستانییان و هەمی گەلێن هەرێمی و جیهانێ سەرکەفتن و کەیف و خوەشیان دگەل خوە بینیت.
بڤێ هەلکەفتێ دوبارە پشتەڤانیا خوە بۆ بزاڤێن پێڤاژوویا ئاشتی و چارەسەریێ دوپات دکەین کو بۆ ڤێ هەلکەڤتێ هاتینە هاڤێتن ، وەک هەردەم د ئامادەینە بۆ هاریکاریکرنا سەرئێخستنا ڤێ پێڤاژوویێ.
نێچیرڤان بارزانی
سەرۆکێ حکومەتا هەرێما کوردستانێ
ئه‌ڤرۆ نيوز:
عه‌بدولا ئۆجه‌لان، سه‌رۆكێ پارتا كرێكارێن كوردستانێ PKK د په‌يامه‌كا نڤيسى دا، كو د مه‌راسيمێن نه‌رورۆزێ دا، ل باژێرێ ئامه‌د يێ باكورێ كوردستانێ هاته خواندن، راگه‌هاند كو بۆ دانانا چه‌كى ئه‌و داخوازێ ژ PKK دكه‌ت كۆنگره‌يى بگێريت و تێدا بڕيارێ ل سه‌ر دانانا چه‌كى بكه‌ن.
د ڤێ نامێ دا يا كو ب زمانێ توركى و كوردى ژ لايێ سرى سوره‌يا ئۆنده‌ر و په‌روين بۆلدان په‌رله‌مانتارێن پارتى ديموكراتى گه‌لان ڤه هاتيه خوارندن تێدا هاتيه ژى: “داعش چو چو رامان بۆ مرۆڤاتيێ و دڕنده‌يێ نه‌هێلاينه”.
ئاماژه ب خه‌باتا چه‌كدارى ژى كر و گۆت: “ئێدى نه‌شێين وه‌كو سالێن به‌رى نوكه درێژاهيێ ب خه‌باتا چه‌كدارى بده‌ين”.
خواست ژى كو پێدڤيه ب ره‌نگه‌كێ زوو كۆنگرێ په‌كه‌كێ بهێته گێران و د وى كۆنگره‌يى دا بڕيار بهێته وه‌رگرتن كا ئايا په‌كه‌كه چه‌كى بدانيت يان ژى نه.
ئه‌ڤرۆ نيوز، بارزان مزوورى:
ل سه‌ر رێيا سه‌ره‌كيا ناحيا زليكان سه‌ر ب قه‌زا شێخان ڤه، ل نێزيك دووريانا گۆندێ باوباو ل بنارا چيايێ مه‌قلرۆب ل ده‌مژمێر 1:30 ده‌قيقه، ترۆمبێله‌كا ژ جۆرێ پيكئاب وه‌رگه‌ريا و د ئه‌نجام دا، پێنج كه‌س بريندا بوون.
نه‌قيب به‌درخان محه‌مه‌د سه‌ليم، ژ پشكا هاتنوچوونا قه‌زا شێخان، بۆ ئه‌ڤرۆ نيوز گۆت: “ئه‌ڤرۆ سپێدێ پيكئاپه‌ك كو سه‌رنشينێن وێ ب مه‌ره‌ما گه‌شتكرنێ ده‌ركه‌فت بوون بۆ نه‌ورۆزێ وه‌رگه‌ريا و تێدا حەفت کەس بريندار بوون”.
نه‌قيب به‌درخان محه‌مه‌د سه‌ليم گۆتژى: “ژ وان حەفت برینداران دو زارۆ و سێ ژن و دو زەلامن بۆ نەخۆشخانا شێخان ھاتنە رەوانەکرن، بەلێ ژ بەر گرانیا برینێن وان، شه‌ش كه‌س بۆ نەخۆشخانا تەنگاڤیان ل دھۆکێ ھاتنە رەوانەکرن”.
ئه‌ڤرۆ:
ژبۆ وێ چەندێ کو ب ژیانەکا ساخلەم بژی پێدڤیە ل سەر تە حەفت پێنگاڤان ب ھاڤێژی و ب ڤی رەنگی:
– ھاریکاریێ دگەل کەسانێن دەور و بەرێن خوە بکە و پێدڤی یە تە ھەستەکا مروڤانە ھەبیت، بەلێ ھشیاربە ب ھەر تشتەکێ ل دەوروبەرێن خوە ب کارتێکرن نەکەڤە.
– ھندی د شیان دابیت خوارنێن خاڤ بخوو و رۆژانە گەلەک ئاڤێ ڤەخوو.
– جلکێن ژ پامبی یان ھەر تشتەک سروشتی ھاتینە چێکرن ل بەرخوە بکە کو پیستی تە بشێت ھەناسەیێ تێدا بکەت.
– خوە ژ مروڤ و ھزرێن نەباش ب پارێزە و فبَر ببە چاوان دێ کەیە کەنی.
– خوە ژ بینەریا بەرنامێن توند یان دەنگ وباسێن رۆژانە ب پارێزە، ب تایبەت ئەگەر دەرونیا تە یا دروست نەبیت.
– ل دویف سیستەمەکێ خوارنا ساخلەم ژیانا خو ب بورینە و راببە ب ئەنجامدانا کارێن وەرزشی.
– پرانیا دەمێن خو دگەل وان کەسێن تە حەز ل سەر ھەی ببورینە,بەلێ بلا ھەردەم ل ھزرا تە بیت کو تو بتنێ دشێی خو ب گوھوری و کەسەک پشتەڤانیا تە ناکەت ژبو ڤێ پێنگاڤێ.
ئه‌ڤرۆ نيوز، نيوار محه‌مه‌د سه‌ليم:
د داخۆيانيه‌كا تايبه‌ت دا بۆ ئه‌ڤرۆ نيوز، د. كه‌مال كه‌ركووكى، فه‌رماندێ ميحوه‌رێ رۆژئاڤايێ كه‌ركووك و ئه‌ندامێ سه‌ركرداتيا پارتى ديموكراتى كوردستان دياركر كو نوكه هه‌موو ئه‌و گوندێن ناڤ ده‌ستێ داعش دا يێن كوردان هاتينه ئازادكرن.
د. كه‌مال كه‌ركووكى گۆت: “سه‌ركه‌فتنێن پێشمه‌رگه‌يى ل ميحوه‌رێ رۆژئاڤايێ كه‌ركووكێ د به‌رده‌وامن و نوكه ئه‌و هه‌موو گۆندێن كوردان ل وێ ده‌ڤه‌رێ هاتينه ئازادكرن”.
كه‌ركووكى گۆتژى: “هنده‌ك گۆندێن برايێن عه‌ره‌ب ژى هاتينه ئازادكرن و دێ د به‌رده‌وام بين هه‌تا كو هه‌موو ئه‌و گۆندێن سه‌ر ب كه‌ركووك ڤه بهێنه ئازاد كرن”.
ئاماژه ب وێ چه‌ندێ ژى كر كو ئه‌و پێشڤه‌چوونێ ل ده‌ڤه‌رێن دى يێن ژ ده‌رڤه‌يى پارێزگه‌ها كه‌ركووك ناكه‌ن و نوكه ب تنێ ئه‌و دێ وان ده‌ڤه‌رێن كوردان يێن ل بن ده‌ستێ داعش ئازاد كه‌ن.
ئه‌ڤرۆ نيوز:
حوكمه‌تا هه‌رێما كوردستانێ ئه‌و هێرشيێن تيرۆرستى يێن سه‌ر حه‌سه‌كێ شه‌رمزار دكه‌ت و دبێژيت: “دوهى ل ده‌مه‌كى كو كوردستانى ل حه‌سه‌كێ مژوولى برێڤه‌چوونا رێوره‌سمێن پيرۆزكرنا جه‌ژنا نه‌ورۆزێ بوون و ئاهه‌نگ بۆ ئاشتى و پێكڤه‌ژيانێ دگێران، دو هێرشێن تيرۆرستى كرنه سه‌ر و ب مخابى ڤه د وان هه‌ردو هێرشان دا هژماره‌كا وه‌لاتيان شه‌هيد و بريندا بووين”.
هاتيه ژى: “سه‌ره‌رايى سه‌ره‌خۆشيان بۆ كه‌سوكارێن شه‌هيدان، هيڤيا ساخبوونێ بۆ برينداران دخوازين، دووپات دكه‌ين كو تيرۆر ب ژناڤبرنا تاوانان و وه‌حشيه‌تگه‌ريا تيرۆرستان، گه‌لێ كوردستانێ ل بزاڤ و خه‌باتا خوه د پێناڤى ئاشتى و ئازادى و گه‌هشتنا ب هه‌موو مافێن خوه يێن ره‌وا سار ناكه‌ت، هه‌ڤدژى ڤێ چه‌ندێ كوردستانى بۆ بزاڤ و خه‌باتێن خوه و تێكوشاندنا زێده‌تر و گه‌رمتر هان دده‌ت”.
دوهى 20\3 د ده‌مێ گێرانا ئاهه‌نگان، ل باژێرێ حه‌سه‌كێ يا رۆژئاڤايێ كوردستانێ، ژ ئه‌گه‌رێ دو ته‌قينێن جودا جودا زێده‌تر ژ 35 كه‌س شه‌هيد بوون و 89 كه‌سێن دى ژى برينداربوون.
ته‌قين ل ده‌مژمێر 6 ئێڤارى ل مه‌يدانا شه‌هيدان ل ناڤ ئاپورا جه‌ماوه‌رى دده‌مێ گێرانا ئاهه‌نگا نه‌وروزێ ل هه‌مبه‌ر باره‌گايێ تەڤگەرا جڤاکا دیموکراتیک روودايه و ژ ئاليه‌كێ دى ل هه‌مان باژێر ل هه‌مبه‌ر باره‌گايێ پارتى ديموكراتى كوردستان سوريا هه‌ر ل ده‌مێ گێرانا ئاهه‌نگا نه‌وروزێ ته‌قينه‌ك روودايه و د ئه‌نجامێ هه‌ردو هێرشان دا 35 كه‌س شه‌هيد بوون و 89 كه‌سێن دى ژى برينداربووينه
نيشاندان