ئه‌ڤرۆ:

یاریێن دویێ یێن قوناغا دویێ ژ قارەمانیا یانێن ئوروپا قارەمانێن خولا ئەف شەڤە دێ دەستپێکەن کو د یاریێن ئەف شەڤەدا ل دەمژمێر ١٠:٤٥ موناکو یا فرەنسی زێدەتر چەنس و دەلیڤا دەربازبونا و گەھشتن ب یاریێن قوناغا چارێک دووماھیێ یا ھەی دەمێ مێڤداناریا یانا ئەرسینال یا ئێنگلیزی دکەت ل یاریگەھا خوە تایبەت پشتی د یاریا ئێکێ دا شیای سەرکەفتنێ تومار بکەت ب سێ گولان بەرامبەر گولەکێ.

ھەتا نوکە یانێن ریالمەدرید یا ئسپانی، پاریس سان جێرمان یا فرەنسی، بایرن میونخ یا ئەلمانی و پورتو یا پرتوگالی دەربازبونا خوە مسوگەر کریە و موناکو ژی یا نێزیکە ب گەھیتە د گەل دا و دیسان ئەف شەڤە ل سەر ئەتلەتیکو مەدرید یا ئسپانی خودانا رێزا دویێ د قارەمانیا وەرزێ بوری دا پێدڤیە د ناڤا جەماوەرێ خوە دا قەرەبویا خوسارەتیا یاریا ئێکێ ل گەل بایر لێڤەر کوێزن ب گولەکێ بێ بەرامبەر بکەت داکو بشێت بەردەوامیێ ب دەتە پشکداریا خوە د قارەمانیێ دا.

ل یاریگەھا لویسێ دویێ یانا موناکو دێ بزاڤێ کەت پارستنا ئاست و ئەنجامێ یاریا خوە یا ئێکێ بکەت پێخەمەت گەھشتن ب یاریێن قوناغا چارێک دووماھیێ بو جارا ئێکێ پشتی وەرزێ ٢٠٠٣ – ٢٠٠٤ دەمێ ژ ریال مەدرید و چێلسی بوری بەری پورتو بێ باربکەت ژ ناسناڤی د یاریا دووماھیێ دا.

یانا منناکو یا د بەرھەڤیەکا باش دا بو پێشوازیکرنا تیما راھێنەرێ خوە یێ بەرێ ئارسێن ڤێنگەری تایبەت پشتی سەرکەفتن ل یاریا خولا فرەنسا ل سەر باستیا تومارکری کو مورالا یاریکەران یا بلندە و نوکە یێ د ھەڤرکیا ئێک ژ سێ رێزێن بەراھیا خولا وەلاتێ خوە ژبو مسوگەرکرنا پلێتا پشکداریا سالا بھێت یا ڤێ قارەمانیێ و ھەمی خال د بەرژەوەندا یانا موناکو دانە چونکو د دیروکا ڤێ قارەمانیێ دا چو یانە نەشیاینە قەرەبویا خوسارتیا خوە یا یاریا ئێکێ ب دو گولان یا زێدەتر بکەن و ب گەھنە قوناغا ل دووڤدا و ژ سالا ١٩٩٥ وەرە یانا فرەنسی د ناڤا یاریگەھا خوە دا ب جوداھیا دو گولان خوسارەت نەبویە دیسان یا پێشبینیکریە یانا ئەرسینال بو وەرزێ پێنجێ ل دووڤ ئێک نەشیت بەردەوامیێ ب دەتە ھەبونا خوە د ھەڤرکیێ دا و ژ ڤێ قوناغێ دەرباز نەبیت، ھەر چەندە دەرونێ یاریکەرێن ئەرسینال یێ ئارامە پشتی تومارکرنا سەرکەفتنێ د دووماھی یاریا خولا ئێنگلیزی دا.

ژلایەکێ دووڤە ل یاریگەھا ڤێسنتی کالدیرون یانا ئەتلەتیکو مەدرید یا ئسپانی پێدڤیە بزاڤێ بکەت پاراستنێ ل سەر ئەنجامێن خوە یێن باش بکەت د ناڤا جەماوەرێ خوە و خەونا خوە یا وەرزێ بوری دەمێ گەھشتیە یاریا دووماھیێ دوبارە بکەت و خوە ژ گرێ یا یانا بایرن لێڤەرکوێز قورتال بکەت ئەوا د یاریا ئێکێ دا سەرکەفتن ب گولا یاریکەرێ خوە یێ ترکی ھاکان جالھانوگلو تومارکری و یانا ئەتلەتیکو دێ شیانا تەرخان کەت بو تومارکرنا سەرکەفتنا چارێ ل دووڤ ئێک د ناڤا جەماوەرێ خوە دا د قارەمانیا ڤی وەرزی دا پێخەمەت گەھشتن ب قوناغا چارێک دووماھیێ بو جارا حەفتێ د دیروکا خوە دا و بێ بارکرنا ھەڤرکا خوە ژ دەربازبونێ.

د ڤێ یاریێ دا راھێنەرێ یانا ئسپانی دیگو سیمیونی یێ ئەرژەنتینی دێ یاریێ بێ پشکداریا دو یاریکەرێن خوە یێن خودان رولەکێ کاریگەر ھەی کەت ئەوژی مندیش و یێ ئوروگوایانی دیگو گودین ب ئەگەرا راوەستاندنێ و ل ھەمبەر دێ گولکەرێ کرواتی ماریو ماندزوکیچ یێ بەرھەڤ بیت پشکداریێ بکەت.

ل بەرامبەر یانا لێڤەرکوێزن دێ ب مورالەکا بلند ھێتە د ناڤا ڤێ یاریێ دا ب تایبەت پشتی ل پێنچ دووماھی یاریێن خوە سەرکەفتن تومارکری و چو گول ل سەر نەھاتینە تومارکرن و دیسان یاریەکا دی یا گرنگ ل پێشیێ یە ئەوژی ل چارێک دووماھیا کاسا ئەلمانیا ل ھەمبەر بایرن میونخ.

ئەڤرۆ:
پێنج ژ ئەندامێن ئێکەتیا تەپا پێ یا ناڤەندی ل ھەرێما کوردستانێ کو ئێک ژ وانان جێگرێ سەروکێ ئێکەتیا تەپا پێ بوو دوھی دەست ژ کارکێشانێن خوە پێشکێشی لژنا ئولومپی یا کوردستانێ کرینە.
کەسێن دەست ژ کارکێشانێن خوە پێشکێشکرین نوونەرێن تەپا پێ بوون یێن دەڤەرا سلێمانیێ کو سەر ب ئێکەتیی نێشتیمانی کوردستان ڤەنە و د پێکھاتی بوون ژ سەرکار عەلی خان، حەمید خالد، کروان جەمە فەرەج، سەعدی غەریب و عومەر خەتاب و یێ ئێکێ کو جێگرێ سەروکێ ئێکەتیا تەپا پێ یا کوردستانێ یە د داخویانیەکێ دا و روژناما ئەڤرۆ گوت: ئەف دەست ژ کارکێشانا مە ھاتە پێش بێ کو چو فشارێن لایەنێن سیاسی یان دەرەکی ل سەر مە ھەبن و زێدەتر مە ڤیایە دەلیڤە بدەینە ھندەک کەسێن دی خزمەتا تەپا پێ بکەن کو ژ ٢٠٠٦ وەرە ل ڤێ ئێکەتیێ کار دکەین و مە دەست ژ کارکێشانێن خوە پێشکێشی سەروکێ لژنا ئولومپی یا ھەرێما کوردستانێ کرینە.
ژلایەکێ دەەڤە و ل دووڤ وان پێزانینێن دەست ب روژنامەیا ئەڤرۆ کەفتین ژ وەرزشڤانەکێ باژێرێ سلێمانیێ یێن دخواستن ئەف کەسە دەست ژ کاری بەردەن و نەخوساتی ناڤێ وی بھێتە دیارکرن داخویاکرن لایەنێن دەرەکی فشار ل سەر ڤان کەسان ھەبوو دەست ژ کارکێشانێن خوە پێشکێش بکەن چونکو نەشیا بوون وەکو پێدڤی خزمەتا تەپاپێ یا باژێرێ سلێمانیێ بکەن و ڤان کەسان خو رادەستی سەروکێ ئێکەتیا تەپا پێ یا کوردستانێ کربوون و بەری دەست ژ کارکێشانێن خوە پێشکێش بکەن ب روژەکی ل باژێرێ سلێمانیێ کومبون ل گەل ھاتبوو کرن و بو دیارکربوو دەلیڤێ ب دەنە ھندەک کەسێن دی ل جھێ ھوە کار بکەن.