ئەڤرۆ، مەحمود نھێلی:
ھەر ل دەسپێکا سەرھەلدانا بھارا ١٩٩١ ل دەڤەرا ئامێدیێ ڤەلڤین ھاتنە کرن بۆ دەرێخستنا رێکخستی و سەربازێن رژێما عیراقێ ل ڤێ دەڤەرێ بەلێ ژ بەر کو دا گەلەک قوربانی نەبن ژلایێ سەرکردایەتیا حزبێن کوردستانی و سەرکردەیێن دەڤەرێ ڤە فەرمان پێ نەھاتە کرن زوو دەست ب سەر ھەلدانێ بکەن و ژ بەر وێ یەکێ ژی تا ھەماھەنگیا ل گەل فەوجێن جەیشا شەعبی و چەتەیان ھاتیە کرن دەم ڤەکێشا .
ئێک ژ وان پێشمەرگەیێن کو ھەر ل رۆژێن دەسپێکی ل چیایی ھاتی و ھەماھەنگی ل گەل خەلکێ دەڤەرێ کری بۆ ئەنجامدانا سەرھەلدانێ دیارکر، ل دووڤ نەخشەیەکێ رێک و پێک ل ئێڤاریا ١٣ سەر ١٤ ئادارا ١٩٩١ ڤەلڤین دەسپێکرن کومبوونەکا دیروکی ل مالا ھەڤالەکی مە کو یێ کرێدار بوویە دخانیێ مەجیدێ عەبدولروحمان ڤە مە ئەنجامدا و دوێ کومبوونێ دا بریارا سەرھەلدانێ ھاتە دان کار و بەرپرساتی جە و دەم بۆ سەرھەلدانێ ھاتنە کرن و دوێ کومبوونێ دا ئەڤ بریارە ھاتنە دەرکرن:
١- ل سپێدەھیا رۆژا ١٤-٣ ھەموو ھەڤال و ئەندام و لایەنگرێن حزبێن سیاسی یێن کوردستانی و خەلکێ دەڤەرێ بھێنە ئاگەھدار کرن کو ل دەمژێر دوویێ نیڤرو ل بەردەرگەھێ قشلا کەڤن ل سەر جادەیا سەرەکی یا ئامێدیێ ئامادە بن.
٢- لافیتە و بەلاڤوک و دروشم بھێنە دروستکرن دگەل تومارکرنا کاسێتان بۆ ھاندانا جەماوەری بۆ ئەنجامدانا سترانێن شورەشگێری ب رێیا بلندگوویێن مزگەفتا مەزنا ئامێدیێ بھێنە گۆتن پشتی شیاین کلیلێن مزگەفتی ب شێوەیەکێ ب دەست ڤە بینن.
٣- مفا وەرگرتن ژ چەکێ وان ھەڤالێن باوەر پێکری ئەوێن چەکێ جیش شەعبی و ھەرچەکەکی دی ھەی بۆ پاراستنا جەماوەرێ سەرھەلدایی.
٤- ھەماھەنگی ھاتە کرن ل گەل فەوجا ٩٣ یا چەتەیان ل ئامێدیێ کو ئەوان ژی ھەلویستەکی گەلەک باش ھەبوو و شیان رولەکێ باش بگێرن و ھەروەسا وان ژی ھەماھەنگی ل گەل لەشکەرێ عیراقێ کو یێن ھەموو دەڤەرێ ل سەنتەرێ باژێرێ ئامێدیێ کومببین کرن کوئەو ژی شەری نەکەن و خوە رادەست بکەن .
پشتی بریارێن سەری ھاتیە ب جھئینان، زور ب ئازایانە جەماوەرێ ئامێدیێ ل جە و وەختێ دیار کری دەست ب (ھەرنە پێش ھەرنە پێش ) کر ھەتا کو دەست ب سەر ھەموو دام و دەزگەھێن حکومی یێن ئامێدیێ و دەڤەرێ دا گرتی.
سوپاس بۆ خودێ ژ بەر ئێک رێزیا خەلکێ دەڤەرێ و مللەتێ مە سەرھەلدانا باژێرێ ئامێدیێ یا سپی بوویە و بتنێ ئێک بریندار ھەبوو کو برینا وی ژی یا سڤک بوو.
پشتی ڤێ یەکێ لژنە ھاتینە پێک ئینا بۆ پاراستنا جھێن گشتی یێن ئیداری و تا کو مەفرەزەیێن پێشمەرگەیان گەھشتیە ناڤ باژێری و دەست ب رێڤەبەریێ کری.
تێ زانین دورێن ٨٠٠ سەربازێن رژێما عیراقێ ل رۆژا سەرھەلدانێ ل باژێرێ ئامێدیێ بوون و ژ بەر ھەماھەنگیا فەوجا ٩٣ یا چەتەیان ل گەل وانا ئەو ھەموویان بێ شەر خوە رادەستی جەماوەری کرن و سەرھندی َ را کو رەوشا خەلکی یا ئابوری نەیا باش بوو لێ ئەڤ ھەموو لەشکەرە ل قوتابخانەیەکێ ھاتنە کومکرن و نان و خارن و نڤینک ژلایێ وەلاتیان ڤە بۆ ڤان سەربازان ھاتنە دابینکرن و زێرەڤان ژی دانانە بەر داکو کەس نێزیک نەبیت ھەروەسا گەلەک ژ وانا ترۆمبێل بۆ ھاتنە گرتن بۆ ڤەگوھاستنا وانا بۆ وی جھێ وانا دڤیت و تا پارە ژی بۆ ھاتنە دابینکرن و ھەموو ب سەلامەتی ل ئامێدیێ دەرکەفتن ئەڤە ژی نیشانا خوەش مروڤیێ و مەردینیا مللەتێ کورد دیار دکەت.
دەربارەی ناحیە و گوندێن دەوروبەرێن ئامێدیێ ژی کانی ماسێ و بامەرنێ وچەمانکێ یێن چولکری بوون و ل دێرەلۆکێ و شێلادزێ ژی رژێمێ سەباز و لەشکەر و ئەمن و زەلامێن خوە ھەموو بۆ سەنتەرێ قەزا ئامێدیێ ڤەکێشا بوون و بتنێ لژنە ھاتنە پێک ئینان بۆ پاراستنا جھێن کارگێری و جھێن گشتی یێن وان دەڤەران.
لێ ل سەرسنکی لیوایەکا لەشکەری ھەبوو و بەرگری ژێ ھاتە کرن و شەر کر و زوو خوە رادەست نەکر و چەند پێشمەرگەی و وەلاتی ژی شەھید بوون د شەرێ ل گەل وێ لیوایێ دا قوربانی ھاتنە دان.
لێ پشتی ھەموو لایانە ڤە ھێرشکریە سەر نەچار بوون شکەستن کەفتێ یێن رەڤی رەڤین و یێن دن ژی ھەموویا خوە رادەست کرن و تا دەمژێر حەفتێ ئێڤاریا ١٤-٣-١٩٩١ سەرسنک ژی ھاتە پاقژکرن ژ سەربا و رێکخستیێن رژێما عیراقی.
سەرھەلدانا دەڤەرا ئامێدیێ ھەموو حزب و وەلاتیێن دەڤەرێ بەشداری تێدا کربوو و مەسیحین دەڤەرێ ژی رولەکێ باش ھەبوویە و ئێک ژ وان یێن ئامیرەیێن بێ تەل بو پێشمەرگە و جەماوەرێ سەرھەلدایی دروست دکرن مەسحیێ باژێرێ ئامێدیێ بوویە و شیانە د ئێک رۆژدا تەڤایا قەزا ئامێدیێ ب ھەموو گوند و ناحیە ڤە ژ رژێما بەعس ئازاد بکەن.