ئەڤرۆ، یوسف موسـا:

پشتی تێپەراندنا خوندانا ئێکێ سوبەھی دێ خواندنا دویێ بۆ قانوونا نەفت و غازێ ل پەرلەمانێ کوردستانێ ھێتە کرن.

عەلی ھالۆ ئەندامێ پەرلەمانێ کوردستانێ بو ئەڤرۆ نیوز ئاشکرا کر ھەموو پەرلەمانتار ھاتینە ئاگەھدارکرن کو سوبەھی دانوستاندن دێ یا تایبەت بیت ب دانانا سندوقا نەفت و غازێ ڤە و خواندنا دویێ دێ بۆ ھێتە کرن، ھەکە پەرلەمانتارێن ھەموو لایەنان گەھشتنە رێکەفتنێ دێ بیتە پرۆژە قانوون.

پێشتر تارق جه‌وهه‌ر راوێژكارێ راگه‌هاندنێ ل په‌رله‌مانێ كوردستانێ بۆ ئه‌ڤرۆ نيوز راگه‌هاند كو د وێ كومبوونێ دا دێ دانوستاندن ل دۆر سندوقا داهاتێ نه‌فت و گازێ ل هه‌رێما كوردستانێ هێته‌ كرن كو د روونشتنێن بوورى دا خواندن بۆ هاتيه‌ كرن و لژنێن تايبه‌ت ژى د وى بياڤى دا راپۆرتێن خوه‌ به‌رهه‌ڤكرينه‌ و گۆت: د ته‌وه‌ره‌كێ دى يێ روونشتنێ دا دێ خواندن بۆ 7 پرۆژه‌ قانوونان هێته‌ كرن ژ وان ژى پرۆژێ قانوونا داواكاريا گشتى، پرۆژه‌ قانوونا په‌روه‌رده‌ و فێركرن و قانوونا جوداكرنا كه‌رتێ تايبه‌ت و گشتى ژ سيسته‌مێ شاخله‌ميێ و پروژه‌ قانوونا راستڤه‌كرنا مووچه‌ى.

ئەڤرۆ نیوز، بارزان مزووری:

ئەفسەرەکى ژ ھێزێن پێشمەرگەيی ل خالا ھنداڤی چیایێ فازلیە ل میحوەرێ ناوەران بو ئەڤرو نیوز دیار کر کو ل شەڤا بوری دەمژمێر ٤:٢٠ خولەک چەکدارێن تیرورستێن داعش ھێرشەکا بەرفره‌هـ کرە سەر ھێزێن پێشمەرگەيی ل خالا ھنداڤا چیایێ فازلیە ل میحوەرێ ناوەران ھێزێن پێشمەرگەی ب چەکێ گران بەرسڤا وان دا ماوێ پتر ژ دەمژمێرەکێ شەر یێ بەردەوام بوو، د ئەنجام دا ھێرشا وان ھاتە تێک شکاندن و زیانێن مەزن ب وان کەفتن ژمارەکا زۆر یا چەکدارێن وان ھاتنه‌ کوشتن و بریندار کرن.
دیار کر کو دەستپێکێ ھێرشا وان گەلەک یا نێزیک پێشمەرگەيی بوو، شەر ب نارنجوکان دھاتە کرن، د دووڤ دا شکەستن کەفتە وان ب تەرم ڤە خوه‌ ڤەکێشان.
ناڤبری زێدەتر گۆت: “خالا ھنداڤی چیایێ فازلیە گرنگترین خالە بۆ چەکدارێن تیرورستێن داعش، گەلەک جاران ھەول داینە کو ئەڤ خالە بکەڤیتە دەستێن وان نەشیاینە ب دەست خوه‌ ڤە بینن”.
ئه‌ڤى فه‌رماندێ پێشمه‌رگه‌يى دا زانين كو  ھیشتا ژمارا دروست یا کوشتیێن داعش نەگەھشتیە بەردەستێن وان، به‌لێ ل دووڤ پێزانينێن دەستپێکی وان گەلەک کوشتی ھەنە.

ئەڤرۆ:
ئێکەتیا مامۆستایێن کوردستانێ داخوازێ ژ جڤاتا وەزیرێن حوکمەتا ھەرێما کوردستانێ دکەت، کو ژ بڕیارەکا خوە لێڤە ب بیت و مامۆستایێن قەزایان دێ ژ ھەلوەشاندنا بریارێ مفادار بن.
عەبدولواحد محەمەد، سەرۆکێ ئێکەتیا مامۆستایێن کوردستانێ، بۆ رۆژناما ئەڤرۆ دیار کر، نوکە ئەو یێ ھەموو بزاڤان دکەن، کو پرۆژەکی رادەستی سەۆکاتیا جڤاتا وەزیران بکەن، دا کو ژ بڕیارا نەدانا پارچێن عەردی پەشێمان ب بیت و ئەڤێ بڕیارێ ب ھەلوەشینیت، ب تایبەت ل سنوورێ قەزا و ناحیان.
ئاشکرا ژی کر، راستە ل سەنتەرێن پارێزگەھان عەرد نەمایە، لێ ل گەلەک قەزان عەرد یێ ھەی و گۆت “پێدڤیە حوکمەتا ھەرێما کوردستانێ ژ بڕیارا خوە پەشێمان ب بیت و ل قەزا و ناحیان دەست ب بەلاڤەکرنا پارچێن عەردی بکەت”.
سەرۆکێ ئێکەتیا مامۆستایێن کوردستانێ خویا ژی کر، ئەو ب ژڤانن ب نڤیسار داخوازێ ژ سەرۆکاتیا جڤاتا وەزیران بکەن، کو بڕیارا راگرتنا پارچێن عەردی ب ھەلوەشینیت و ل قەزا و ناحیان جارەکا دی دەست ب بەلاڤەکرنا پارچێن عەردی بھێتەکرن.