ھەولێر، قائید میرۆ:
ئەمریک دێ دو بنگەھێن سەربازی لھەرێما کوردستانێ چێکەت و بۆڤێ مەرەمێ دەمەکێ نێزیک دێ دەست پاقژکرنا فڕۆکەخانا ناحیا ھەریر ھێتەکرن و نوکە یێ کار بۆ چۆلکرناڤێ دکەن، ھەروەسا پێشبینی تێتەکرن بنگەھەکێ دی یێ سەربازی ل ناحیا بامەڕنێ بھێتە ڤەکرن.

ژێدەرەکێ ئاگەھدار بۆ رۆژناما ئەڤرۆ دیارکر، دەمەکێ نێزیک دێ دەست چێکرنا بنگەھەکێ سەربازیێ ئەمریکی لھەرێما کوردستانێ ھێتەکرن و گۆت” بڕیارە دەمەکێ زۆرێ نێزیک بنگەھەکێ سەربازیێ ئەمریکی ژلایێ سوپایێ ئەمریکا ل سنورێ پارێزگەھا ھەولێرێ بھێتە ئاڤاکرن و ئەف بنگەھە دێ بۆ فڕینا فڕۆکەیێن ئەمریکا و ھەڤپەیمانبیت، ئەوژی بۆ لێدانا چەکدارێن داعش دێ ھێتە بکارئینان، کو دێ ل دەشتا ھەریرێ بیت و بەری سەرھەلدانێ ژی فڕۆکەخانا سەربازیا رژێما بەعسیان بوویە،کۆمپانیایەکا تورکی یا کارێ چێکرنا جووتسایدێ ھەولێر_ ئاکرێ دکەت، فڕۆکەخانە وەکی کەمپێ حەواندنێ بۆ خوە بکار د ئینا، بەلێ ھاتیە ئاگەھدارکرن دەمەکێ نێزیک بھێتە چۆلکرن و دێ دەست ب دانانا بنگەھێ سەربازیێ ئەمریکی ھێتەکرن، چونکی دەمێ پرۆسا ئازادکرنا عێراقێ ژی سەربازێن ئەمریکی ئەف بنگەھەکێ بۆ خوە بکار تینا و جھەکێ گونجایە بۆ رێڤەچوونا مەشقێن سەربازی و دانانا فڕۆکەیان”.

ئەڤی ژێدەری کونەڤیا ناڤێ وی بھێتە بەلافکرن ئەویەکژی خویاکر، ئەگەرێن زۆر ھەنە بنگەھەکێ دیێ سەربازی ل ناحیا بامەڕنێ یا سەر ب پارێزگەھا دھۆکێ بھێتە ڤەکرن، چونکو ئێک ژ ئاریشەیێن وەشاندنا گورزێن سەربازی ل بنگەھێن داعش دیریا فڕۆکەخانەیێن سەربازیە و بەری نوکەژی فەرماندەیێن سوپایێ ئەمریکا ئەف چەندە ب وەزارەت و حوکمەتا ھەرێمێ راگەھاندبوو، کو وان جھەکێ نێزیک نینە بۆ گەھاندنا فڕۆکە و پێدڤیێن سەربازی بۆ ھەرێما کوردستانێ و ھەردو لایەن رێکەفتینە لسەر ڤەکرنا بنگەھێن سەربازی”.

شێخان، بارزان سلێمان مزووری:

ژێدەرەکی ژ ھێزێن پێشمەرگەیێ کوردستانێ ل میحوەرێ زۆمار بۆ ئەڤرۆ نیوز دیار کر کو نوکە ھێزێن پێشمەرگەی ب چەکێ گران ھێرش کریە سەر چەکدارێن تیرورستێن داعش ل ناڤ گوندێ عوینات ل دەڤەرا زۆمار.

ئەڤی ژێدەری گۆت: “بارەگایێن مەزن یێن وان ل وێ دەڤەرێ ھەنە و ل وێرێ خوە ل سەر دەڤەرێ بەلاڤ دکەن، داعش ژی چەکێ خوە یێ مەزن ل ناڤ گوندی کۆم کریە”.

ئاشکەرا ژی کر کو پێشبینی دکەن ل ڤان نێزیکان ئەڤ گوندە ژی بکەڤیتە ژێر کۆنترۆلا ھێزێن پێشمەرگەی.

ھێزێن پێشمەرگەی شەھیدەک ژی ل ڤی گوندی دایە کو (موقەدم جەمیل شلی)ە، برایێ پێشمەرگێ ئیلۆنێ یێ دەڤەرا ئاکرێ خالد شلی.

ئه‌ڤرۆ نيوز:

ژ پشتى ژ ناڤچوونا رژێما سه‌دام حسێن ل سالا 2003 و هه‌تا نوكه‌ ب تايبه‌ت پشتى ڤان روودانێن دووماهيێ و ده‌ست ب سه‌رداگرتنا چه‌ند ده‌ڤه‌رێن عيراقێ ژ لايێ داعش ڤه‌، هژماره‌كا ئێكجار مه‌زن ژ خه‌لكێ عيراقي رووى كريه‌ هه‌رێما كوردستانێ.

ب گۆره‌ى راپۆرتا رێكخراوا نێڤده‌وله‌تى 47% ژ ئاوارێن هه‌رێما كوردستانێ عه‌ره‌بن و ب ڤێ چه‌ندێ ژى رێژا عه‌ره‌بان ل ناڤ هه‌رێمێ نوكه‌ دبيته‌ 19%ێ.

ب گۆره‌ى راپۆرته‌كا دى يا هه‌رێما كوردستانێ، نوكه‌ خه‌لكێ هه‌رێمێ پێنج مليۆن و 300 هزار كه‌سن، هه‌كه‌ ئاواران ژى زێده‌ كه‌نه‌ سه‌ر رێژا وان دگه‌هيته‌ حه‌فت مليۆن و 300 هزار كه‌سان، ئانكو 27.4% ژ خه‌لكێ هه‌رێما كوردستانێ ئاواره‌نه‌، ژ وان ژى عه‌ره‌بان پشكا شێرى يا ب به‌ركه‌فتى.

ئه‌ڤێ راپۆرتێ ئاشكه‌را ژى كريه‌ كو ل هنده‌ك باژێرێن هه‌رێمێ رێژا ئاواران ب سه‌ر يا خه‌لكێ وێرێ يێن كورد كه‌فتيه‌، شه‌قلاوا ژى وه‌كو نمونه‌ ئينايه‌ كو هژمارا خه‌لكێ شه‌قلاوا 25 هزار كه‌سن، به‌لێ هژمارا ئاواران تێدا 35 هزار كه‌سن.