ئه‌ڤرۆ نيوز:

ئوسامه‌ نوجێفى، جێگرێ سه‌رۆك كۆمارێ عيراقێ ل دهۆكێ ل گه‌ل پارێزگار و ئه‌ندامێن جڤاتا پارێزگه‌ها مووسل به‌حس ل ئاماده‌كاريێن رزگاركرنا مووسل كرن.

ب گۆره‌يى به‌ياننامه‌كێ ژ نڤيسينگه‌ها جێگرێ سه‌رۆك كۆمارى هاتيه‌: “ئازادكرنا مووسل نه‌يا دووره‌ و پێشبينى دكه‌ين ب زووترين ده‌م ڤه‌گه‌رينه‌ مالێن خوه‌”، ئاماژه‌ ب وێ چه‌ندێ ژى كر كو مووسل پێدڤى ب ئێكگرتن و لێكتێگه‌هشتنێ يه‌ د ناڤبه‌را هه‌موو ئه‌ندامێن جڤاتا پارێزگه‌هێ دا.

ئاشكه‌را ژى كريه‌: “ئاماده‌كاريا شه‌رى، نه‌ ب تنێ لايه‌نێن له‌شكرى ب گرنگيه‌ مه‌زن ڤه‌ دهێنه‌ وه‌رگرتن، به‌لێ لايه‌نێن دى يێن ئيدارى و رێكخستنێ و ساخله‌ميێ و هه‌موو ئه‌وا گرێدايى ژێرخانا ئابوورى و گۆت: “پێدڤيه‌ پشته‌ڤانى ل سه‌ربازگه‌هێن له‌شكرى بهێته‌ كرن و هه‌موو هێزێ بێخنه‌ كار و ئه‌و هێزێن دێ ب ئازاديا مووسل رابن ژ هه‌موو لايان د پێك هاتى بن، نه‌ ب تنێ نه‌ته‌وه‌ك يا تايفه‌كا ده‌ستنيشانكرى بن”.

دێ به‌ياننامێ دا ئاماژه‌ ب وێ چه‌ندێ ژى هاتيه‌ كرن كو ئه‌و چو شه‌رێن ميليشياتا ناخوازيت، به‌لكو هێزه‌كا رێكخستى ل بن ئالايێ ده‌وله‌تا عيراقێ ب تنێ و دڤێت خه‌لكێ مووسل بهێته‌ پاراستن.

ئه‌ڤرۆ نيوز:

سه‌لامه‌ خه‌فاجى، ئه‌نداما كۆمسيۆنا بلندا مافێن مرۆڤى ل عيراقێ داخواز ژ حوكمه‌تا هه‌رێما كوردستانێ كر كو قوتابيێن ئاواره‌ ژ رسوماتێن خواندنێ بهێنه‌ لێبۆرين ئه‌وێن ئه‌ڤ ساله‌ ل كوليژێن كوردستانێ يێن ئه‌هلى دخوونن ژ به‌ر ره‌وشا وان يا تايبه‌ت.

د به‌ياننامه‌كێ دا كو خه‌فاجى يا د هه‌مان ده‌م دا به‌رپرسا فايلا مافێ خواندنێ ل وێ رێكخراوێ به‌لاڤكريه‌ كو ئه‌و ل گه‌ل به‌رپرسێ سه‌رپه‌رشتى و سالناما زانستى ل وه‌زاره‌تا خواندنا بلند و ڤه‌كۆلينێن زانستى، نه‌بيل ئه‌عره‌جى و رێڤه‌به‌رێ خواندن و پلاندانانێ، سه‌هيل نه‌جم، روونشتيه‌ و به‌حس ل ره‌وشا قوتابيێن ئاواره‌ ب تايبه‌ت ئه‌وێن ل كوليژێن ئه‌هلى د خوونن و ئه‌و كێشێن د كه‌ڤنه‌ به‌ر سينگێ وان كريه‌.

ئاماژه‌ ب وێ چه‌ندێ ژى كريه‌ كو ئه‌وێ خواستيه‌ قوتابيێن ئاواره‌ بێ به‌رامبه‌ر ل كوليژێن ئاواره‌ ل پارێزگه‌هێن عيراقى بهێنه‌ وه‌رگرتن و گۆت: “هيڤى دكه‌ين حوكمه‌تا هه‌رێمێ رسوماتێن خواندنێ ل كوليژێن ئه‌هلى ژ قوتابيێن ئاواره‌ ئه‌وێن ئه‌وێن ل وێرێ دخوونن ببوريت و هه‌موو كوليژێن عيراقێ ژ به‌ر ره‌وشا وان يا تايبه‌ت”.

هه‌ر دڤێ به‌ياننامێ دا ئاماژه‌ ب وێ چه‌ندێ كريه‌ كو پێدڤيه‌ 18% ژ كوليژێن ئێڤاران بۆ كه‌سانێن قوربانيێن رژێما ژ ناڤچووى و قوربانيێن تيرۆرێ بهێنه‌ ته‌رخانكرن بێى به‌رچاڤ وه‌رگرتنا نمرێن وان ب رێيا هه‌ڤركيێ د ناڤبه‌را وان دا.