ئەڤرۆ:

بەرپرسێن کوردستانێ د داخویانیێن خو دا بۆ دەزگەھێن رۆژنامەڤانی یێن بیانی گازندا وێ یەکێ ژ ئەمریکا و وەلاتێن ھەڤپەیمانان دکەن کو چەکێ پێدڤی بۆ ھەرێما کوردستانێ نەھنارتیە و ھەروەسا ئەو چەکێ د ھنێرن ژی، بەری بۆ ھەولێرێ رەوانە بکەن، ئەو ب مەرەما پشکنینێ دبەنە بەغدا کو گەلەک جاران ئەڤە دبیتە ئەگەرێ گیروبوونێ.
ژەنەرال جون ئالن، نوونەرێ باراک ئۆبامای سەرۆکێ ئەمریکا، دیار کر کو ئەمریکا راستەوخۆ چەکی بۆ ھەولێرێ رەوانە دکەت، لێ ئەو چەندە ژی نەڤەشارت کو ئەوان دڤێت عیراق ب ئێک پارچەی بمینیت لەوما ئەو ب رازامەندیا بەغدا چەکی بۆ پێشمەرگەی دھنێرن.
لێ د پەیوەندیەکا تێلەفونی دا ل گەل رۆژناما ئەڤرۆ ھەلگورد حکمەت، رێڤەبەرێ راگەھاندن و ھشیاریا نیشتیمانی ل وەزارەتا پێشمەرگەی دیار کر کو ھەتا نوکە چ جورێ چەکی ب رەنگەگێ راستەوخۆ ژلایێ ئەمریکا ڤە بۆ پێشمەرگەی نەھاتیە ھنارتن.
ھەلگورد حکمەت پشتراستکر کو چەندین جاران وان داخواز یا ژ ئەمریکا و ھێزێن ھەڤپەیمانان کری کو چەکی ب رەنگەکێ راستەوخۆ بۆ پێشمەرگەی بھنێرن، لێ ھەتا نوکە ب رەنگەکێ راستەوخۆ چو جورێ چەکی نەگەھشتیە دەستێ وان و گۆت ژی: (مە چەندین جاران لیستا پێدڤیێن سەربازی یێن پێشمەرگەی پێشکێشی ئەمرکیا و ھێزێن ھەڤپەیمانان کریە، لێ وەکو پێدڤیە ھاریکاری نەھاتیە کرن).
ل دووڤ گۆتنێن ھەلگورد حکمەت ئەو چەکێ ھەتا نوکە وەلاتێن رۆژاڤا بۆ پێشمەرگەی ھنارتی گەلەک یێ کێمە، ژبەر کو بەرەیێ شەری یێ بەرفرەھە و ئەو چەک تێرا وێ چەندێ ناکەت پێشمەرگە ١٢٥٠ کم پێ ب پارێزیت.
ل دور وێ یەکێ کا مەرەم چی یە ئەو چەک دەستپێکێ بۆ بەغدا دھێتە ھنارتن پاشی دگەھیتە ھەرێما کوردستانێ، ھەلگورد حکمەت گۆت: (مەرەما وێ چەندێ بتنێ سەپاندنا ھەیمەنا بەغدایە ل سەر ھەرێما کوردستانێ و ھەتا کو بەغدا بزانیت کا چ جورێ چەکی یە بۆ پێشمەرگەی ھاتیە ھنارتن و بەغدا دڤێت وێ چەندێ دیار بکەت کو ئەو چەک ب رێکا وێ یێ بۆ ھەرێما کوردستانێ و پێشمەرگەی دھێتە ھنارتن).
ل گور باوەرا ھەلگورد حکمەت رەنگە ئێک ژ مەرەمێن دی یێن بەغدا ئەو بیت کو پرۆسەیا گەھاندنا چەکی بۆ ھەرێما کوردستانێ گیروو بکەت.
بەرپرسێن ھەرێما کوردستانێ گازندا وێ چەندێ ژ بەغدا دکر کو پێشمەرگە د شەرەکێ دژوار دایە ل گەل گرۆپێ تیروریستی یێ داعش، لێ ھەتا نوکە ژی ئەمریکا وەکو پێدڤی ھاریکاریا پێشمەرگەی ناکەت و چەکێ رەوانە دکەت ژی پتر بۆ بەغدا رەوانە دکەت. ل دەستپێکا ئەڤ سالە د کونگرەکێ رۆژنامەڤانی دا مەسرور بارزانی دیار کر کو ترۆمبێلێن ژ جورێ MRAPs یێ دژی مینا کو ئەمریکا ٢٥٠ بۆ بەغدا رەوانە کرینە، بەغدا بتنێ ٢٥ بۆ پێشمەرگەی ھنارتینە کو ئەڤە ژی دبیتە بتنێ ١٠%، د دەمەکێ دا کو ٩٠% ژ شەرێ داعش ل سەر ملێن پێشمەرگەیە.
ل دور ڤێ چەندێ شرۆڤەکارێن سیاسی د گۆت کو ئەمریکا چەکێ پێدڤی نادەتە ھەرێما کوردستانێ ژ بەر کو ترسا وی چەندێ ھەیە پشتی شەرێ داعش کورد ڤی چەکی ل دژی بەغدا بکار بینن ب تایبەتی ژی بۆ پرۆژێ دەولەت بوونا کوردی، بۆچوونەکا دی ژی ھەبوو کو ژ بەر گڤاشتنێن بەغدا، ئەمریکا وەکو پێدڤی چەکی بۆ ھەرێما کوردستانێ رەوانە ناکەت.
ل دور وێ چەندێ کا ئایا راستیەک ھەیە کو ئەمریکا ژ بەر گڤاشتنێن بەغدا چەکێ گران بۆ پێشمەرگەی رەوانە ناکەت، ھەلگورد حکمەت گۆت: (ھەکە ئەمریکا بخوازیت چەکی بۆ ھەرێما کوردستانێ رەوانە بکەت، بەغدا نەشێت رێگریێ ل ئەمریکا بکەت، لێ ل دووڤ دستووری ئەم پارچەکین ژ عیراقێ و عیراق ژی ممارسا ڤی حەقێ خو دکەت کو پێدڤیە ھنارتنا چەکی بۆ ھەرێما کوردستانێ ب رێکا وێ بیت و ئەمریکا ژی رێزێ ل سەروەریا عیراقێ دگریت).
ھەر ل دور ڤی بابەتی، سێر ریچارد ئوتاوەی، بەرپرسێ کومیتا کاروبارێن دەرڤە یا پەرلەمانێ بریتانیا پرسیار دەربارەی ھاریکاریێن زێدەتر یێن بریتانیا بۆ ھێزێن پێشمەرگەی ژ سەرۆک وەزیرێن بریتانیا کر، د بەرسڤێ دا دەڤید کامیرون گۆت: (بریتانیا ٤٠ جورێن چەکێ قورس بۆ پێشمەرگەی ھنارتینە و ل گەل چەند شارەزایەکان بۆ راھێنانان ل سەر بکارئینانا وی چەکی).
کامیرون گۆتژی: (ئەو ھاریکاریێن ئەم بۆ ھەرێما کوردستانێ دابین دکەین، دڤێت برێکا حکوومەتا بەغدا بن کو ئەو ژی پرۆسەیێ گەلەک خاف و ئالۆز دکەت).