ئەڤرۆ:

جێگرێ سەرۆکێ لیژنا ڤەکۆلینێ د کەفتنا مووسلێ دا بۆ ئەڤرۆ راگەھاند، ھەتا نوکە ھژمارەکا مەزن یا بەلگەنامێن گرنگ گەھشتینە دەستی لیژنا مە و ل دووماھیێ ڤەکۆلین دێ ل گەل نوری مالکێ ھێتە کرن و ل ڤێ ھەڤتیی ڤەکۆلین ل گەل ٨ ئەفسەرێن پلە بلند دێ ھێتە کرن و چو فشار نە یێن ناڤخوەیی نە ژی یێن دەرکێ ل سەر لیژنا ڤەکۆلینێ نێنە و ئەم رازی نابین چو فشار ژی ل سەر مە بھێنە کرن.
شاخەوان عەبدوللا جێگرێ سەرۆکێ لیژنا ڤەکۆلینێ د کەفتنا باژێرێ مووسلێ د دەستێ تیرۆرستێن داعشێ دا و بریاردەرێ لیژنا ئاسایشێ و بەرگریێ ل جڤاتا نوونەرێن عیراقێ بۆ ئەڤرۆ گوت” بەرنامەک یێ ھاتیە دارێتن بۆ ڤێ ھەڤتیێ کو ڤەکۆلین ل گەل ھەشت ئەفسەرێن پلە بلند بھێتە کرن ژوانا ژی رێڤەبەرێ پۆلیسان و وەزیرێ بەرگریا عیراقێ و پارێزگارێ نەینەوا و ٦٠ رۆژ ھاتبوونە دانان بۆ ب دووماھی ئینانا کارێ ڤەکۆلینێ ل گەل بەرپرس و پلەدارێن پارێزگەھا نەینەوا و دبیت دڤی دەمی دا ڤەکۆلین ب دووماھی نەھێت، چونکو د کارێ ڤەکۆلینێ دا گەلەک دیکیومێنت یێن ب دەست مە کەفتین کو تێدا نڤیسارێن ھەوالگیری ھەنە و دیاردکەن کو نوری مالکی فەرمان یا دای داعش بھێنە دناڤ مووسلێ دا”.
شاخەوانی گوت ژی” ئەو بەرپرسێن ڤەکۆلین دگەلدا ھاتیە کرن روو ب روو د ئاخڤن و بەلگەنامان ل گەل خوە دئینن بۆ ھندی خوە ژ ئەگەرێن کەفتنا مووسلێ قورتال بکەن و ئەم رازی نابین لایەنەکێ سیاسی، یان یێ دەرەکی فشارێ ل مە بکەت و ل دەمەکێ نێزیک ئەنجامێن ڤەکۆلینێ دێ ئاشکرابن کا چاوا مووسل کەفتیە ددەستێن تێرۆرستێن داعشێ دا”.
ناڤبری دیارکر کو وەزیری بەرگریا عیراقێ یێ بەرێ دێ ل جڤاتا نوونەران بەرھەڤ بیت و ڤەکۆلین دێ دگەلدا ھێتە کرن و ئەو دێ گەلەک تشتێن گرنگ رۆھن و ئاشکرا کەت، لێ ل دووڤ ئەنجامێن دەستپَیکی یێن ڤەکۆلینێ، پەیوەندیێن د ناڤبەرا بەغدا و مووسلێ دا ئەگەر بووینە مووسل بکەڤیتە د دەستێن داعشێ دا و دەستھەلاتا تاکرەوی یا مالکی ژی ئەگەرەکێ کەفتنا مووسلێ بوو”.

شاخەوان عەبدوللا ئاشکرا کر ژی”دەمێ ڤەکۆلین دھێتە کرن ئەو بەرپرس یان پلەدار ھندەک تشتان دبێژیت کو بەری نوکە ئەو تشت نەھاتیە گۆتن، بۆ نموونە کەسەک دەمێ ڤەکۆلین دگەلدا دھێتە کرن، گەلەک بەلگەنامێن گرنگ ل گەل خوە دئینیت و بەردەوام ئەم بەلگەنامان خرڤەدکەین و ل دووماھیێ ژی دێ ڤەکۆلینێ ل گەل مالکی ژی کەین”.

ئەڤرۆ:

ئەندامەکا سەرکرداتیا پارتی دیموکراتی کوردستان راگەھاند، دڤێت کورد خوە ل گەل بەغدا بێ منەت نەکەن و ھەتا بودجە دروست بیت ژی و دیسان کورد سەربەخوەییا خوە ژی وەربگرن، چونکە کوردان نە ب تنێ بیاڤێ ئابووری بەلکو ژ گەلەک لایەنان ڤە ل گەل عیراقێ دگرێداینە.
چنار سەعەد عەبدوللا ئەنداما سەرکرداتیا پارتی دیموکراتی کوردستانی بۆ ئەڤرۆ گوت” ھەبوونا رێککەفتنا ھەولێرێ و بەغدا چێترە ژ نەبوونا وێ ، لێ وەک پێدڤی نەھاتیە بجھئینان و دڤێت ب رەشبینی نەسەحکەینێ، چونکە بزاڤ یێن ھەین بۆ بجھئینانێ و ھەرێما کوردستانێ پتر یا پابەندە ب رێککەفتنێ”.
چنارێ زێدەتر گوت”نەشێین چ گرەنتیا بدەین کو قەیرانا نوکە دوبارە نەبیتەڤە، ب تنێ ھەکە ئارمانجا ھەر دو ئالیان چارەکرنا قەیرانان بیت، ئەڤە ئنیەتە کو قەیران ھێدی ھێدی بەر ب چارەسەریێ بچن”.
خۆیاکر ژی”نابیت چو جاران خوە ل گەل عیراقێ بێ منەت نەکەین و ھەتا ھەرێما کوردستانێ بشێت بودجا خوە ژی دابین بکەت، چونکە ھەرێما کوردستانێ پشکەکە ژ عیراقێ و ھەتا سوباھی سەربەخوەییا خوە ژی وەربگرین، دێ بینە جیرانەک ل گەل عیراقێ و بێ منەتی نابیت و دیسا دڤێت پەیوەندی ھەبن، بەرۆڤاژی دێ کێشە ھێنە دروستکرن”.