ئەڤرۆ:
ب مەرەما بجھئینانا رێککەفتناما د ناڤبەرا بەغدا و ھەولێرێ دا، شاندەکێ فراکسیۆنێن کوردستانی ل پەرلەمانێ عێراقێ بۆ دەمێ چەند رۆژانە دەست ب سەرەدانا پارت و کەسایەتیێن سیاسی و حوکمەتا عێراقێ کرین و بڕیارە لێک تێنەگەھشتنا بەری نوکەی ھەی ل دۆر ھنارتنا پترۆلا ھەرێمێ و پرسا بودجێ ھەرێمێ بھێتە چارەکرن.
تارق گەردی، جێگرێ سەرۆکێ فڕاکسیۆنا پارتی ل پەرلەمانێ عێراقێ بۆ ئەڤرۆ گۆت” شاندەک ژ سەرۆکێن پێنج فراکسیۆنێن کوردستانی یێ پێکھاتی و سەرەدانا عەمار حەکیم، سەرۆکێ جڤاتا بلندا ئیسلامی کریە، کو ٣١ ئەندامێن پەرلەمانی ھەنە و سەرەدانا سەرۆک کۆمارێ عێراقێ کریە، ھەتا ژ نێزیکڤە ئاماژێ ب ھەلویستێ حوکمەتا ھەرێما کوردستانێ و فراکسیۆنێن کوردستانی بکەن ل دۆر پێگیریکرن ب رێککەفتنێ، ھەروەسا بڕیارە سەرەدانا موقتەدا سەدر و حەیدەر عەبادی سەرۆک وەزیرێن عێراقێ بکەن و ئەڤێ پەیامێ بگەھینن”.
گەردی گۆت ژی” د سەرەدانا سەرۆکێن فراکسیۆنێن کوردستانی ھاتیە دیارکرن کو نە ھنارتنا رێژا پترۆلی یا رێککەفتن ل سەر ھاتیە کرن ئەگەرێن تەکنیکی بووینە و حوکمەتا ھەرێمێ کار دکەت رێژا پترۆلا پێدڤی بھێتە ھنارتن بۆ و بڕیارە رۆژا دوشەمبیا بھێت، حەیدەر عەبادی سەرۆک وەزیر بھێتە پەرلەمانی و رۆھنکرنێ بدەت ل دۆر نەھنارتنا بودجە و موچێ ھەرێمێ”.
ل دۆر ئێک دەنگیا کوردان ل بەغدا، دیارکر” د کومبوونا د ناڤبەرا نێچیرڤان بارزانی و نوونەرێن کورد ل بەغدا تەکەزی ل سەر ئێکرێزی و ئێک دەنگیا نوونەرێن کورد ل بەغدا ھاتیەکرن، ھەر د کۆمبوونێ دا پێشنیاز ھاتیەکرن، ھەڤپەیمانیەکا کوردستانی ل پەرلەمانێ عێراقێ بھێتە پێکئینان و بڕیارە ل ھەفتیا داھاتی فراکسیۆنێن کوردستانی کوم ببن و بابەت دێ ھێتە ئێکلاکرن”.
مە ژ ناڤبری پرسی کو ھندەک بوچوون یێن ھەین کو پشتی ژناڤبرنا داعشێ، دێ ئاریشە و شەر د ناڤبەرا حەشد شەعبی و پێشمەرگەی دا پەیدابن، د بەرسڤێ دا گوت” چو ئاریشە پەیدا نابن، ئەم ل بن فەرمانا حوکمەتا عیراقێ کاردکەین و ھەردەمێ حوکمەت داخوازا دانانا چەکی ژ مە بکەت پشتی ژناڤبرنا داعشێ، دێ پێگیر بین و مە چو ئاریشە نابیت و ئەم نە دژی پێشمەرگەی نە و مە چو دوژمنکاری ژی ل گەل پێشمەرگەی نینە”.
سوباھی عەبادی دێ ل دۆر نەھنارتنا بودجە و مووچێ ھەرێمێ ئاخڤیت
نيشاندان