ئەڤرۆ:

سەرۆکێ مسرێ راگەھاند کو ئەو د شەرێ ل دژی تیرۆرێ دا ل گەل سووریێ، عیراق و لیبیایێ د ناڤ ھەماھەنگیێ دانە و سەرنج راکێشاند سەر رۆلێ ھێزێن پێشمەرگەیێن کوردستانێ د لاواز کرنا داعشێ ل عیراقێ دا و گۆت: (مە ل سەر داخوازا گەلێ لیبیا ب فرۆکێن شەری بنگەھێن تیرۆرستان ل ترابلوس و سیرتێ بۆمبەباران کریە و ھەکە ژ حوکمەتا عیراقێ و ھەرێما کوردستانێ ژی داخوازەک وەسا بھێت ئەم بەرھەڤین ھەڤکاریا وان ژی بکەین).
پشتی کۆمبوونا دەستەیا ئێمناھیێ، عەبدولفەتاح سیسی سەرۆکێ مسرێ د پرێس کۆنفرانسەکی دا راگەھاند کو ئەو دێ ب ھەموو ھێزا خوە ڤە شەرێ تیرۆرستێن داعش و قاعیدە ل ھەر جھەکی بکەن و گۆت: (بۆ ژناڤبرنا تیرۆرستان دڤێت ھەموو دەولەت و د ھەر واری دا د ناڤ ھەڤپەیمانیەکا ب ھێز دا بن، ھەکە نا تیرۆرستێن درندە ل دووڤ دەرفەتان دگەرن و دخوازن ھەموو رۆژھەلاتا ناڤین و ئەفریقیا ئالۆز بکەن و دەستھەلاتەکا بەرفرەە بۆ خوە دروست بکەن و ئەڤە ژی بۆ ھەموو جیھانێ مەترسیێ دروست دکەت).
سەرۆکێ مسرێ ھەروەسا دیار ژی کر کو ل عیراق و سووریێ رۆلێ ھێزێن کوردی د شکەستنا تیرۆرستێن داعشێ دا گەلەک گرنگە و دڤێت ھەموو ھێزێن رۆژھەلاتا ناڤین ژ دل و ب ھەموو ئیمکانێن خوە ڤە بۆ ژناڤبرنا تیرۆرێ پێکڤە کار بکەن و گۆت: (ب راستی ھەرێما کوردستانا عیراقێ د راوەستاندنا ھێزێن تیرۆرست دا تێکۆشینەکا گەلەک مەزن مەشاند و بەرخوەدانا وانا جھێ رێزگرتنێیە).
د بەردەوامیا ئاخڤتنا خوە دا ژی ناڤھاتی گۆت: (ئەم ل گەل وەلاتێن لیبیا و عیراقێ د ناڤ ھەماھەنگیەکا باش داینە و مە ل سەر داخوازا گەل و نوونەرێن رەوا یێن گەلێ لیبیا بنگەھێن تیرۆرستان ل باژێرێن ترابلوس و سیرتێ بۆمبەباران کر و ئەم دێ بەردەوام بین د ھەڤکاریا حوکمەتا لیبیا دا و ب ھەمان رەنگی ئەم د ناڤ ھەڤپەیمانیا نێڤدەولەتی دا ژی ل دژی تیرۆرستان جھێ خوە دگرین و ھەکە داخوازەکا وەسا ژ حوکمەتا عیراقێ بھێت ئەم ئامادەینە ھەڤکاریا وان بکەین).
عەبدولفەتاح سیسی سەرۆکێ مسرێ د پشکەکا دی یا ئاخڤتنا خوە دا ژی راگەھاند تورکیا ئێکە ژ وان وەلاتان کو ھەری زێدە ھەڤکاریا تیرۆرستێن داعش و ئەلنوسرە یا سەر ب قاعیدە دکەت و دڤێت نەتەوێن ھەڤگرتی و جڤاتا ئێمناھیێ بریارێ ل سەر وان وەلاتان وەربگرن ئەوێن کو ھەڤکاریا تیرۆرستان دکەن و گۆت: (ھەکە ھندەک ئالی یان حوکمەت پەترۆلێ ژ تیرۆرستان نەکرن و د وارێن سەربازی و ئابووری دا ھاریکاریا وان نەکەن رێکخستنێن تیرۆرست نەشێن خوە ل سەر پییان رابگرن و دڤێت بەری تێکۆشینەکا بەرفرەە یا سەربازی جڤاتا ئێمناھیێ و نەتەوێن ھەڤگرتی ل سەر ڤان خالان راوەستیت و دەمێ ھەڤکاریا بۆ تیرۆرستان بھێتە برین وێ دەمێ ژناڤبرنا رێکخستنێن تیرۆرست ژی ئاسانتر دبیت).
ل ئالیێ دی وەزیرێ پاراستنا مسرێ ژی ل سەر رەوشا داوی یا مسرێ و رۆژھەلاتا ناڤین راوەستیا و ل سەر کوشتنا ٢١ وەلاتیێن قبتی یێن مسری ژی وەزیرێ پاراستنێ راگەھاند کو ئارمانجا تیرۆرستان ئەو بوو کو وەلاتیێن موسولمان و یێن کریستیان ل دژی ھەڤدو بدەتە شەرکرن و گۆت: (گەلێ مسرێ ب سەدان سالە ب ھەموو تاخ و چینێن خوە ڤە پێکڤە دژین و چو فەرق و جوداھی د ناڤبەرا موسولمان و کریستیانێن وەلاتێ مە دا نینە و ئەم ناھێلین چو ھێز براتی و پێکڤەژیانا مە خراب بکەت).
ل سەر پرسیارا رۆژنامەڤانەکێ سەبارەت ب پەیوەندیێن مسرێ ل گەل ھەرێما کوردستانا عیراقێ ژی وەزیرێ پاراستنا مسرێ راگەھاند کو پەیوەندیێن وان ل گەل حوکمەتا کوردستانێ د ئاستەکی باش دایە و گۆت: (ئەم رێزەکا مەزن بۆ وێرەکی و قارەمانیا گەلێ کورد دگرین و د شەرێ ل دژی داعشێ دا ژی گەلێ کورد ب سەرکردایەتیا بەرێز بارزانی شیا دربەکا گەلەک مەزن ل تیرۆرستان بدەت و ئەز باوەر دکەم د ھەر واری دا رۆژ ب رۆژێ دێ پەیوەندیێن مە ل گەل ھەرێما کوردستانێ پێشڤە بچن و باشتر ببن).

ئەڤرۆ:
ئەندامەکێ مەکتەبا سیاسی یا ئێکەتی نشتیمانی کوردستان دیار دکەت ھەر ھێزەکا بشێت داعشێ بشکێنیت ئاسایی یە و ھەر جھەکێ بڤێت ئەرکێ خوە لێ بجھبینیت ژی ھەتا کەرکووک و شنگال ژی بن.
سەعدی ئەحمەد پیرە ئەندامێ مەکتەبا سیاسی یا ئێکەتی نشتیمانی کوردستان دیارکر کو ئاسایی یە (حەشد ئەلشەعبی) بھێتە کەرکوکێ و بۆ ئەڤرۆ گوت” ژۆرەکا ئۆپەراسیۆنان یا د ناڤبەرا ھەرێما کوردستانێ و بەغدا دا ھەی و ھەکە رێکبکەڤن کو (حەشد ئەلشەعبی) بھێتە کەرکووکێ کارەکێ ئاسایی یە”.
سەعدی پیرە ئاماژە ب وێ چەندێ ژی کر ھەکە (حەشد ئەلشەعبی) ھێزەکا فەرمیە، چو مەترسی نینە و گوت” ھەکە (حەشد ئەلشەعبی) یان ھەر ھێزەکا دیتر ل عیراقێ ھەبیت و رێ پێ ھاتبیتە دان ژلایێ حوکمەتا عیراقێ ڤە ئاسایی یە ھەر دەڤەرەکا ھەبیت بچنێ کو رێککەفتنێ بکەن ل گەل ھەرێمێ”.
ل دۆر داخۆیانیێن سەرکردەیێن شیعی یێن ڤێ دووماھیێ ل دۆر کەرکووکێ، ئەندامێ مەکتەبا سیاسی یا ئێکەتیا نشتیمانێ کوردستان گوت” ھەکە بەرپرس جھێ بریارێ بیت و ئەوان جۆرە داخۆیانیان بدەت دبێژم، بەرپرس یێ مەزن بیت ئاخڤتنێن ھوسا کێم ناکەت”.
سەعدی ئەحمەد پیرەی ل سەر رەوشا کوردستانێ ل گەل داعشێ دیارکر کو نیزیکە داعش نەمینیت و گوت” داعش رۆژ بۆ رۆژێ یا بەر ب نەمانێ ڤە دچیت، لێ ئەڤە وێ چەندێ نا گەھینیت کو مە ئاریشە نامینن”.