ئەڤرۆ:
ژبۆ ئاگەھداربوون ل رەوشا کەرکووکێ و ھاتنا داعش و (حەشد ئەلشەعبی) بۆ دەڤەرێ، رۆژا سێشەمبی سەرۆک بارزانی و شاندەکێ ھەرێما کوردستانێ سەرەدانا کەرکووکێ کرن و ل گەل بەرپرسێن ئیداری و عەسکری کۆمبوو.
ژێدەرەکێ بلندێ سەربازی ئەویەک پشتڕاستکریە، دوھی فەرمانێن سەرۆک بارزانی بۆ پاراستنا کەرکووکێ کەفتنە بیاڤێ بجھئینانێ دا و ھێزێن ئەمنی و پێشمەرگە دەست ب دانانا چەپەران ل جھێن پێدڤی کرن، ب تایبەتی جھێن گومان ل سەر ھەی کو (حەشد ئەلشەعبی) تێدا بھێنە ناڤا کەرکووکێ و فەرمانا لەشکری پێ یە ھەر ھێزەک بکەڤیتە ناڤا کەرکووکێ ب توندی بەرسڤا وان بدەن، پەرلەمانتارەکێ کەرکووکێ ژی دبێژیت، رێگری دێ ل ھەر ھێزەکێ ھێتەکرن ھەکە خوە لەشکرێ عێراقێ ژی بیت.
شاخەوان عەبدوڵا، ئەندامێ کورد ل لیژنەیا ئاسایش و بەرگریێ ل پەرلەمانێ عێراقێ ژ فراکسیۆنا پارتی دیموکراتی کوردستان ل دۆر سەرەدانا سەرۆک بارزانی بۆ کەرکووکێ بۆ ئەڤرۆ گۆت” ھاتنا سەرۆک بارزانی بۆ باژێڕێ کەرکووکێ د جھێ خوەدابوو و د دەمەکێ گونجای دابوویە، ژبەر وان ھێرشێن رۆژێن بۆری و بەرگریا پێشمەرگەی ل ڤی باژێڕی وەساکر سەرۆک بارزانی سەرەدانا دەڤەرێ بکەت و ژ نێزیکڤە ئاگەھداری روودانێن کەرکووکێ ببیت، کومبوون ل گەل فەرماندە و بەرپرسێن دەڤەرێ ھاتیەکرن و نەخشێ نوو بۆ کەرکووکێ ھاتیە دانان، ئەڤ سەرەدانە پەیامەکا رۆھن و ئاشکرا بوو بۆ نەیارێن کوردان، ھەتا بزانن کەرکووک بۆمە ھێلا سورە و سەرۆکی تەکەزی ل سەر ڤێ چەندێ کر و راگەھاند دڤێت بڕیارێن سیاسی و ئیداری ئەڤی باژێڕی ب ئاگەھداریا ھەرێما کوردستانێ بن”.

شاخەوانی گۆت ژی” بڕیاربوو تیپەکا نوو یا لەشکرێ عیراقێ بۆ کەرکووکێ بھێتە پێکئینان، بەلێ سەرۆک بارزانی ئەڤ چەندە رەت کر ب تیپا دوازدە ژی کو بەری نوکە ل کەرکووکێ بوو کو نابیت ڤەگەڕێن ڤی باژێڕی، یا ژ ھەموویێ گرنگتر بارزانی ل گەل نوونەرێن عەرەب و تورکومانان ب زمانەکی ئاخڤت، کو بۆ جارا ئێکێ یە سەرۆک ب ڤی شێوەی باخڤیت ب ئاشکرا ژی گۆتیە عەرەب و تورکومانان، یان دڤێت ل گەل داعش بن، یان ژی دڤێت شەڕێ داعش بکەن و ل گەل مەبن، ئەڤە ژی پەیامەکا رۆھنە بۆ ڤان کەسێن ھەڤکاریا داعشێ دکەن، یان ب شێوەکی ھەڤسۆزن ل گەل تیرۆرستان و کورد ب چو شێوەکی عەرەبێن ھەڤکاریا داعش کرین خوەش نابن و دێ گورزێن پێشمەرگەی ژ وانا ژی گرن”.
ناڤبری پتر دیارکر” خەلکێ قەزا حەویجە و ناحیێن ریاز و رەشاد یێن ژلایێ تیرۆرستێن داعشێ ڤە ھاتینە کۆنتڕۆلکرن، ئەڤە بۆ دەە سالانە ئاریشان بۆمە پەیدا دکەن و بەری دەھە سالان کورد ھاتینە دەرکرن ژ قەزا حەویجە، نوکە ژی خەلکێ وان دەڤەران ل گەل داعشن و دەست بۆ پێشمەرگەیێن ب دیل ھاتینەگرتن لێداینە، بەلێ بلا باش بزانن کورد ل وان خوەشنابن و ھەکە خوین ل پێشمەرگەیەکێ دیل بھێت، نەشێن گەنجێن کەرکووکێ یێن کورد رابگرن و دێ تولا خوە ڤەکەن، ھەتا سەرۆکی ژی ئەو چەندە پشتڕاستکریە، کو ئەو خەلکێ دەست بۆ گرتنا پێشمەرگەیان لێدای، دێ باجا خوە دەن و ژ گورزێن پێشمەرگەی دەرناچن، پێدڤی بوو عەرەبێن حەویجە رۆلەکێ ئەرێنی ھەبایە ھەمبەر پێشمەرگەی، ئەز ب ئاشەکرا دبێژم کورد دێ تولا خوە ڤەکەن و ژوان عەرەبێن داعش و یێن ھەڤکاریا وان ژی کری خۆشنابن”.