ئەڤرۆ نیوز:
ل شه‌ڤا بورى هێزێن پۆلیسێن ل ناڤا باژیرێ هەولێرێ ل تاخێ عەدالە روو ب روو تۆمەتباره‌كێ بووینه و تێدا وى تۆمه‌تبارى ته‌قه ل پۆلیسان كریه و د ئه‌نجامدا پۆلیسه‌ك هاتیه كوشتن و رێڤه‌به‌رێ پۆلیسێن ناڤا باژێرى و سێ یێن دیتر هاتینه بریندار کرن.
رێڤەبەریا پۆلیسێن دارستانێ و ژینگەها هەرێمێ به‌لاڤكریه، ل شەڤا بورى ل تاخێ عەدالە یێ باژێرێ هەولێرێ ل ده‌مێ وان بزاڤ كرین تۆمه‌تباره‌كێ بگرن، روو ب رووبوون دروستبوویە و د ئەنجامدا ئەفسەره‌كێ پۆلیسان ب ناڤێ عزەدین، کو رێڤەبەرێ پۆلیسێن ناڤا باژێریه هاتیه بریندار کرن و پۆلیسەک ژى هاتیه کوشتن، نوكه بریندار ل ژێر چاڤدێریا نۆشداران دانه.
هه‌روه‌سا ئه‌و تۆمەتباره لدویف مادێ 405 ژ قانوونا سزادانا ئیراقی، بڕگا 38 تۆمەتباربوویە و فەرمانا دەستگیرکرنێ هەبوویە، بەلێ خوه رادەستی هێزێن ئەمنی نەکریە.
لدویف زانیارییان، ئه‌و تۆمەتبارە پێشتر ئەفسەرێ هێزێن ئەمنی بوویە و پشتى وێ روودانێ ره‌ڤیه.
ئەڤرۆ نیوز:
ئه‌ڤرۆ سپێدێ 2/11/2020 ل نه‌خۆشخانا لالاڤ یا تایبه‌ت ب نه‌خوشێن كۆرۆنایێ و ب ئاماده‌بونا د. عه‌لى ته‌ته‌ر پارێزگارێ دهۆكێ و ده‌ڤه‌ردارێ سێمێلێ و رێڤه‌به‌رێ گشتى یێ ساخله‌میا پارێزگه‌ها دهۆكێ تاقیگه‌هه‌كا نوو بو پشكنینا كۆرۆنایێ هاته ڤه‌كرن.
پارێزگارێ دهۆكێ دكونگره‌كێ رۆژنامه‌ڤانیدا دیاركركو ئه‌ڤرۆ تاقیگه‌هه‌كا دى بۆ پشكنینا كۆرۆنایێ هاته ڤه‌كرن كو ئێكه‌تیا ئورۆپى ب هه‌ڤكارى دگه‌ل رێكخراوا ئایسپۆ ئه‌ڤ تاقیگه‌ها ل نه‌خۆشخانا لالاڤ یا كۆرۆنایێ دروستكرینه و ئه‌ڤه ده‌مه‌كێ درێژ رێكخراوا ئایسپۆ و ئیكه‌تیا ئوروپا هه‌ڤكاریا پارێزگه‌ها دهۆكێ دكه‌ن بۆ بهێزكرنا كه‌رتێ ساخله‌میێ وسوپاسیا وان لایه‌نان كر.
هه‌روه‌سا دیاركر كو نه‌خوشیا كورونایێ ل هه‌موو جیهانێ یا زێده‌بیت ئه‌م نه‌چارین دگه‌ل كۆرۆنایێ بژێن لێ پێدڤیه رێنمایان بجه بینین وخۆ باشتر ب پارێزین و مه هه‌موو ده‌ڤه‌ردار و رێڤه‌به‌رێن ناوچه‌داریا ئاگه‌هداركرینه تیمێن دوڤچوونێ كارابكه‌ن و چاڤدێریێ ل سه‌ر هه‌موو جهان بكه‌ن وپێرابون دگه‌ل سه‌رپێچكاران بهێنه وه‌رگرتن.
ل دوماهیێ گۆت: پێدڤیه هه‌موو كه‌س ل جهێن كاركرنێ ماسكا بكاربینن وسه‌ره‌دان و كومبوون و خرڤه‌بوون و تێكهه‌لین جڤاكى بهێنه كێمكرن و خه‌لكێ مه ل ماڵان ژى پێگیریێ ب رێنمایێن خو پاراستنێ بكه‌ن.
د. نزار عسمه‌ت رێڤه‌به‌رێ گشتى یێ ساخله‌میا پارێزگه‌ها دهۆكێ گوت: كوژمێ هاتیه ته‌رخانكرن ل ڤى پرۆژه‌ى دگه‌هته نیزیكێ (200) هزار یورویا كو ئێكه‌تیا ئوروپى پشته‌ڤانی ل پرۆژه‌ى كریه و به‌رى نۆكه ژى چه‌ندین پرۆژه ل پارێزگه‌ها دهۆكێ ئه‌نجامداینه وداخاز ژوه‌لاتیان كر كو پتر پێگیریێ ب رێنمایێن ساخله‌میێ بكه‌ن چونكو ئه‌ڤرۆكه ل دهۆكێ نه‌خۆشیا كۆرۆنایێ گه‌له‌ك به‌لاڤبوویه ورۆژانه حاله‌تێن تووشبوونێ و گیان ژ ده‌ستدانێ یێن دهێنه تۆماركرن.
ئەڤرۆ نیوز ، زنار تۆڤی:
پەیڤدارێ رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەک بریندار بوو.
موقەدمێ مافپەروەر ئازاد تاها، زێدەتر گۆت: ل سپێدەهیا ئەڤرۆ دوشەمبی، 2020/11/2 ل دەمژمێر 4:50 سپێدێ ل سەر رێیا سەرەکی یا سێمیل_ زاخۆ و ل نێزیکێ باستکێ، ترۆمبێلەکا بارهەلگر ژ جۆرێ مارسیدس رەنگێ سپی، ل ژێر کۆنترۆلا شۆفێری دەرکەفتیە و خوە ل کلبستوونێ جادێ دایە وەرگەریایە، د وێ روودانێ دا کەسەك بریندار بوویە و زیانێن مادی ژی ب وێ ترۆمبێلێ کەفتینە.
ئەڤرۆ نیوز:
ل ڤێ جیهانێ رۆژانە تشتێن سەیر دهێنە دیتن و گوهلێبوون، د نووترین ڤەکۆلین دا دیار بوویە کو زەلامێن کەچەل پتر تووشی کۆرۆنایێ دبن.
مالپەرێ نیۆز نەهـ یێ ئوستۆرالی بەلاڤکریە: لدووڤ ڤەکۆلینێن نوو، کەسێن کەچەل پتر تووشی کۆرۆنایێ دبن، ئەو ژی ژبەر فاکتەرەکێ گرێدای هۆرمۆنێ تیستۆستیرۆنە.
هەروەسا دیار کریە ژی: ل ئسپانیا ڤەکۆلینان دیار کریە، پرانیا زەلامێن تووشی کۆرۆنایێ بووین، کەسێن کەچەل بوون، ژ بەرکو زەلامێن کەچەل رێژەکا زێدە ژ هۆرمۆنێ دیهێدرۆتستیرۆنی د لەشی دا هەیە کو بەرپرسیارە ژ کەچەلبوونێ و ئەو چەندە یا هاریکارە بۆ ڤایرۆسێ کۆرۆنایێ ب ساناهی بچیتە دناڤا خانێن لەشی دا.
ئەڤرۆ نیوز، قائید میرۆ:
پشتی رێککەفتنا دناڤبەرا ھەردو حوکمەتێن ھەرێما کوردستانێ و یا فیدڕال بۆ ئاسایی کرنا رەوشا شنگالێ دەڤەرێن دیژی دخوازن رەوشا وان بھێتە ئاسایی کرن و رێڤەبەرێ ناحیا زومار ئاشکراکر، خەلکێ زومار و دەڤەرێن سەر ب تەلەعفەر دخوازن پێشمەرگە ڤەگەڕیت دەڤەرێ و گۆتژی، بابەتێ کەمپا عەمەل ھاتیە راگرتن و رازینابن ئاوارەیێن داعش ل زومار بھێنە ئاکنجی کرن.
ئەحمەد گەرگەری، رێڤەبەرێ ناحیا زومار بۆ دھۆک نیۆز دیارکر” مە وەکی ئیدارەیا زومار و ھەموو خەلک و ئیدارەیا قەزا تەلەعفەر دژایەتیا خۆ بۆ ڤەکرنا کەمپا عەمەل یا نێزیکی زومار نیشادایە، یاکو بەری نوکە بڕیاربو ئاوارەیێن داعش یێن کەمپا ھۆلێ ڤەگەڕینن عێراقێ و ل زومار بھێنە ئاکنجیکرن، ھەتا ئەم دگەل پارێزگارێ مووسل کۆمبوویە و نافبری ژی ھەمان بۆچوون ھەیە و ب چو شێوەیەکی رازینابین ئەو ئاوارەیێن داعش بھێنە ڤەگەڕاندن بۆ دەڤەرێ، چونکە دێ ئەگەرێ تێکدانا رەوشا دەڤەرا زومار و ھەموو دەڤەرێن دەوروبەر، لەوڕا ھەرکەسەکێ ئەڤێ داخوازێ بکەت و بەری نوکەژی کربیت ئەم بفەرمی رەتدکەین و قەبوولناکەین، چونکە بڕیارا وەزارەتا کۆچ و کۆچبەرێن عێراقێ ئەڤە ھەموو کەمپێن ئاوارەیان بھێنە گرتن نەک کەمپێن نوو بھێنە ڤەکرن، بەلکو ئاوارە دێ ھەموو ھێنە ڤەگەڕاندن بۆ دەڤەرێن وان و ئیدی کەمپ نامینن.
لدۆر ئاسایی کرنا رەوشا زومار ئەحمەد گەرگەری ئاماژەکر” ھەتا نوکە چو بڕیارێن فەرمیی پۆ ئاسایی کرنا دەڤەرا زومار نینە، بەلێ ئەم دخوازین رەوشا دەڤەرا زومارژی مینا دەڤەرا شنگالێ بھێتە ئاسایی و ئالۆزیێن بەری نوکەی ھەی نەمینن، بتایبەتی ئەم دخوازین ھێزێن پێشمەرگەی ڤەگەڕن بۆ زومار و دگەل سوپایێ عێراقێ دەڤەرێ بپارێزن ل ئەڤان مەترسیێن ھەی لسەر دەڤەرێ، خەلکێ زومار و رەبیعە و عیازیە ب کورد و عەرەبڤە ھەمان داخوازا ھەیە بۆ ڤەگەڕاندنا ھێزێن پێشمەرگە و ئاسایی کرنا رەوشا دەڤەرێن وان، ژبەرکو خەلکێ وان دەڤەران ئەزموون ھەیە دگەل ھێزێن پێشمەرگەی پشتڕاستن لڤێ چەندێ ھەگەر پێشمەرگە ل دەڤەرێ ھەبیت تیرۆرست نەشێن مەترسیێ پەیدا بکەن و ژیانا وان دێ یا پاراستی بیت، ئەڤە داخوازا ئیدارە و خەلکیە ل دەڤەرێ، بەلێ ئەم ئاگەھدارنینە چو پێنگاڤ ھاتینە ھاڤێتن یانە بۆ تەناکرنا رەوشا دەڤەرێ وەکی رێکەفتن بۆ شنگالێ ھاتیە کرن.
ئەڤرۆ نیوز، قائید میرۆ:
ئەڤسالە ئینانا تڕۆمبێلان ژدەرڤە بشێوەیەکێ بەرچاف کێمکریە و بەرپرسەکێ ھاتن وچوونێ ژی دبێژیت، چو سالەکێ وەک ئەڤسالە نەبوویە تڕۆمبێل بڤێ ھژمارا کێم بھێنە کوردستانێ و دوھی وەرە ئینانا تڕۆمبێلێن مودیل ٢٠١٨ ھاتیە راگرتن.
عەمید ئەسعەد کەریم، پەیڤدارێ ھاتن وچوونا ھەرێما کوردستانێ بۆ دھۆک نیۆز دیارکر” ئەڤسالە کێمترین ھژمارا تڕۆمبێلان ھاتیە ناڤا ھەرێما کوردستانێ و ل رێڤەبەرایەتیێن ھاتن وچوونێ ژی رێژا تۆمارکرنا تڕۆمبێلان بشێوەیەکی بەرچاف کێمکریە و شێم بێژم ل ئەڤان چەند سالێن بۆری چو سالەکێ وەک ئەڤسالە ھندەک ھژمارا کێم یا ئینانا تڕۆمبێلان نەھاتیە تۆمارکرن، بێگومان ئەگەرێ کێمبوونا تڕۆمبێلان بۆ کەرەنتینێ و قەدەغەیا ھاتن وچوونێ ڤەدگەڕیت، کو ئەڤسالە سەرانسەری جیھانێ ڤەگرت بھەرێما کوردستانێ ڤە.
عەمید ئەسعەد کەریم ئاشکراکر” ل دوھی وەرە ئینانا تڕۆمبێلێن مودیل ٢٠١٨ ھاتیە راگرتن و رێک دھێتەدان مودیل ٢٠٢١ بھێنە ناڤا ھەرێما کوردستانێ بۆ تڕۆمبێلێن ژ دوبەی دھێنە ھەرێما کوردستانێ مەرجێن تایبەت بۆ ھاتینە دەرکرن ژوانا ئیرباک یێ دروست بیت و چو کێماسیێن سەرەکی تێدا ھەبن، ھەر تڕۆمبێلەکا ئەمریکی مەرجێن سەلامەتیێ تێدا نەبن رێک ناھێتەدان بھێتە ناڤا ھەرێما کوردستانێ.
ئەڤرۆ نیوز:
ده‌زگه‌هێ خێرخوازیێ بارزانی راگه‌هاند، بریاره خانی بۆ وان ئاواره‌یێن شنگالێ یێن خانیێن وان خراب بووین و د زڤرنه شنگالێ بهێنە ئاڤاكرن كو پترییا خانیان ل دوگرێ و قوبله‌تێ نه.
پیر ده‌یان، به‌رپرسێ ئۆفیسا شنگال یا ده‌زگه‌هێ خێرخوازیێ بارزانی بۆ ئەڤرۆ نیوز راگه‌هاند، ئه‌و مالباتێن ئاواره‌یێن شنگالێ یێن خانیێن وان خراب بووین و هاتین په‌قاندن و پشتی كو دزڤرن سه‌ر جهـ و مالێن خوه، دوباره دێ خانیێن وان هێن ئاڤاكرن، د قۆناغا ئێكێ ژی دا پێنجی تا سه‌د خانی دێ هێن ئاڤاكرن.
پیر ده‌یان دیار ژی كر، چاڤه‌رێ وێ یه‌كێ دكه‌ن رێككه‌فتنا د ناڤبه‌را هه‌ولێر و به‌غدا دا بكه‌ڤته د وارێ بجهئینانێ دا، داكو ئۆفیسا خوه ڤه‌گوهێزن شنگالێ و هه‌روه‌ها دێ راپۆرته‌كێ دگه‌ل ئیدارا قه‌زا شنگالێ دروستكه‌ن ل دۆر خانیێن هاتین خراب كرن، پترییا خانیێن خرابكری ژی ل دووگرێ و قوبله‌تێ نه.
ل گۆر زانیاریێن ده‌زگه‌هێ خێرخوازیێ بارزانی، تا نها شه‌ش هزار و دوسه‌د خێزانێن ئاواره ڤه‌گه‌ریاینه شنگالێ، هه‌ر خێزانه‌كا ڤه‌دگه‌رت ژی ل سحێلا هاریكارییان پێشكێش دكه‌ن.
ئەڤرۆ نیوز:
كوتله‌یا به‌ره‌یێ عیراقی راگه‌هاند، ئه‌و بزاڤان بۆ دوورخستنا محه‌مه‌د حه‌لبووسی، سه‌رۆكێ جڤاتا نوونه‌رێن ئیراقێ دكه‌ت.
محه‌مه‌د خالدی، په‌یڤدارێ كوتله‌یا به‌ره‌یێ عیراقی ب میدیایێن وه‌لاتێ خوه راگه‌هاندییه: وان بڕیار دایه كار ژ بۆ دوورخستنا محه‌مه‌د حه‌لبووسی، سه‌رۆكێ جڤاتا نوونه‌ران ژ پۆستێ وی بكه‌ن و گه‌هشتینه قۆناغه‌كا پێشكه‌فتی .
هه‌روه‌ها ره‌شنڤیسه‌ك ئاماده‌كرینه و بۆ كوتله‌یێن دی یێن جڤاتا نوونه‌ران كو تێدا كارێن نه‌یاسایی یێن حه‌لبووسی دیاركرینه.
به‌ره‌یێ عیراقی ل داویا هەیڤا بوری ب كۆمبوونا سیهـ و پێنچ په‌رله‌مانتاران هاتە پێكئینان و ئوسامه نجێفی، جێگرێ سه‌رۆك كۆمارێ پێشتر یێن عیراقێ ب سه‌رۆكێ كوتلێ هاتییه دانان.
ئەڤرۆ نیوز، زنار تۆڤی:
نوونەرێ خودانێن مووەلیدان ل پارێزگەها دهۆکێ بۆ ئەڤرۆ نیوز دیار کر: بهایێ ئەمپێرەکێ کارەبا مووەلیدان ل دهۆکێ بۆ هەیڤا ١٠ سێ هزار و ٧٥٠ دینارن.
هەکار هرۆری نوونەرێ خودانێن مووەلیدان د لژنا سەرپەرشتیکرنا مووەلیدان ل دهۆکێ ئەو ژی گۆت: ئەڤرۆ ئێکشەمبی، لژنا مووەلیدان بریاردا بۆ هەر ئەمپێرەکێ کارەبا مووەلیدێن ئەهلی بۆ هەیڤا ١٠ سێ هزار و ٧٥٠ دیناران ژ وەلاتیان وەربگرن.
ناڤهاتی دیار کر ژی: د هەیڤا ١٠ دا وان 74 دمژمێران کارەب دایە وەلاتیان، لدووڤ دانا کارەبا مووەلیدەی ئەف بهایه هاتیە دیار کرن.
نيشاندان