ئەڤرۆ نیوز:
مالپەرێ ت٢٤ یێ تورکیا د راپۆرتەکێ دا دیار کریە کو شاندەکێ تورکیا ل سەر فەرمانا رەجەب تەیب ئەردۆگانێ سەرۆک کۆمارێ تورکیا و ب ناڤبژیڤانا روسیا سەرەدانا شامێ کرینە و ل گەل بەرپرسێن حوکمەتا سووریێ دەست ب هەڤدیتنان کرینە.
ئەو یەک پشتی هندێ هات کو بەری چەند رۆژان سەرۆک کۆمارێ تورکیا راگەهاند کو ئەو بەرهەڤن هەموو ئاریشێن هەی ب رێیا دانوستاندنان چارەسەر بکەن.
ئەڤرۆ نیوز:
دەزگەهێن راگەهاندنا ئەمریکا دیار دکەن کو پشتی سعوودیێ هەر یەک ژ وەلاتێن مسر و کوێت ژی داخوازا چەکێن گران و پێشکەفتی ژ ئەمریکا کرینە و ئەمریکا دێ ب گۆژمێ پتر ژ ٤ ملیار دۆلاران چەکی ددەتە وان وەلاتان.
دەزگەهێن راگەهاندنا عەرەبی ژی دیار دکەن کو وەلاتێ کوێت داخوازا کڕینا هەشت کۆپتەرێن مودێرن ژ ئەمریکا کریە و ئەمریکا ژی رازیبوونا خوە دیار کریە.
ئەڤرۆ نیوز:
بەرپرسەکێ رژێما سووریێ بۆ ئاژانسا سپوتینگ یا روسی دیار کریە کو دوهی کۆمبوونەک د ناڤبەرا وان و هێزێن سووریا دیموکرات دا ب ناڤبژیڤانیا شاندەکێ روسی هاتیە کرن و د کۆمبوونێ دا رێککەفتن هاتیە کرن کو هێزێن سووریا دیموکرات باژێرکێ عەین عیسا یێ سەر ب پارێزگەها رەققە رادەستی رژێما سووریێ بکەن.
هەتا نها ب فەرمی هێزێن سووریا دیموکرات ئەو یەک پشتراست نەکرینە لێ چاڤدێرێن سیاسی ژی دیار دکەن کو روسیا فشارێن خوە ل سەر هێزێن سووریا دیموکرات زێدەتر لێ کرینە دا عەین عیسا رادەست بکەت، چونکو هەکە تورکیا هێرشی عەین عیسا و دەڤەرێن دی بکەت چو هێزەک نەشێت رێگریێ ل تورکیا بکەت.
ئەڤرۆ نیوز:
کۆمەلگەھا دەروازەیێ نیڤدەولەتی یێ ئیبراھیم خەلیل ئاگەهداریەکێ بەلاڤ دکەت ئەڤە ژی دەڤێ ڤێ یە:
ئاگەھدارییا خەلکێ هەرێما کوردستانێ و عیراقێ دکەین هەر کەسەکێ بخوازیت سەرەدانا وەلاتێ تورکیا بکەت، پێدڤیه راپورتا پشکنینا کورونایێ (PCR) نێگەتیڤ دگەلدا ھەبیت و ٧٢ دەمژمێر زێدەتر بسەر دەرچوونا مێژوویا راپورتێڤە دەرباز نەببن. ژبەر کو ل دیف رێنماییێن نوو یێن ولاتێ ناڤبری بێی هەبونا راپورتا پشکنینا کورونایێ رێکێ نادەن گەشتیار سەردانا ولاتێ وان بکەن، ئەڤ بریارا وان دێ ل رێککەفتی٣٠\١٢\٢٠٢٠ێ ھێتە جێ ب جێ کرن.
ئەڤرۆ نیوز:
پەیڤدارێ پۆلیسێن پارێزگەها دهۆکێ راگەهاند کو ئەڤسالە رێژا تاوانان ل پارێزگەها دهۆکێ ب رەنگەکێ بەرچاڤ کێم بووینە و ٩١% ژ وان کەیس و سکالایێن کو ل سنورێ پارێزگەها دهۆکێ هاتینە تۆمار کرن ژی ب دووماهی هاتینە.
موقەدەم هێمن سلێمان ئەو یەک ژی دیار کر کو ل سالا ٢٠٢٠ ل سنورێ پارێزگەها دهۆکێ ٣٠ حالەتێن کوشتنێ هەبووینە کو ژ وان ٢٥ زەلام بووینە، هەروەسا ٢٦ حالەتێن خوەکوشتنا زەلامان هەبووینە و ١٥ حالەتێن خوەکوشتنا ژنان ژی هاتینە تۆمارکرن.
ناڤهاتی ئەو یەک ژی دیار کر کو ل سالا ٢٠٢٠ دا ١٠٨ کەیسێن قۆمارکرنێ هاتینە تۆمارکرن و گۆت: (سەبارەت ب بازرگانیکرن و بکارئینانا ماددێن هۆشبەر ژی ٤٧ کەس هاتینە دەستەسەرکرن).
هێمن سلێمان ئەو یەک ژی نەڤەشارت کو ل گۆر سالا ٢٠١٩ ب رەنگەکێ بەرچاڤ رێژا تاوانان ل سنورێ پارێزگەها دهۆکێ ل سالا ٢٠٢٠ کێم بووینە.
ئەڤرۆ نیوز:
پەیڤدارێ رێڤەبەریا هاتنوچوونا دهۆکێ راگەهاند کو ئەڤرۆ د ئەنجاما روودانەکا هاتنوچوونێ دا ل سەر رێیا بەردەرەش ٩ کەس بریندار بوون.
ئازاد تاها ئەو یەک ژی دیار کر کو روودان د ناڤبەرا ترۆمبێلەکا کیا سیراتۆ و بێ ئێم دەبلیو دا ل سەر رێیا قەزا بەردەرەش ل نێزیک بەنزینخانا گوندێ ئیسماوە دا روو دایە کو د ئەنجام دا نەه کەس بریندار بووینە و چو کەسەکێ ژی جانێ خوە ژ دەست نەدایە.
ئەڤرۆ نیوز، عەلی حاجی :
د داخویانیەکێ دا سەروکێ یانا زاخۆ بۆ ئەڤرۆ نیوز دیار کر زێدەتری ژ تیما تەپا پێ یانا زاخۆ ئەوا پشکدار د خولا نایابا کوردستانێ یا تەپا پێ دا وان پارە ل تیما خوە یا باسکت بولێ مەزاختینە و تەحەدایێ دکەم ژی کو هەتا نوکە ژبلی دەستەکا کارگێریا یانا زاخۆ چو کەسەکێ دیتر پارە ل یانێ خەرج کربن.
زێدەتر حەمید سەلمان گۆت: (ژبەرکو مە دخواست تیما مە یا باستبولێ پشکداریێ د وەرزێ نوو یێ خولا نایابا باسکتبولا عێراقێ دا بکەت یا ژ دەستێ من هاتی مە یێ کری و هەر بۆ زانین ژی بۆ تیما تەپا پێ یا یانا زاخۆ ئەوا پشکدار د خولا نایابا کوردستانێ دا مە ٢٠ ملیون دینار بۆ خەرج کرینە و بۆ تیما باسکتبولا زاخۆ هەتا نوکە ژلایەکێ ڤە مە ٢٤ ملیون دینار و هەر دیسان ژی دو هزار دولارێن ئەمریکی هەر ژ ئینانا یاریزانێ پیشەکار و موچە و پشکداریا تیما مە یا باسکتبولێ خەرج کرینە کو زێدەباری وێ هەمیێ ژی ژمارەیا شاندێ تیما باسکتبولێ ژ یا شاندێ تیما تەپا پێ کێمترە، هەر دیسان کارگێریا یانێ هەتا جل و بەرگ و پێدڤیێن هەمی تیمان ژی دابین کرینە و ب ستویێ خوە ڤە گرتبوون).
ناڤبری ئەو چەندە ژی گۆت: (بێ هیچ جیاوازیەک مە پشتەڤانی ل هەمی تیمێن خوە کریە و ئەم دودل ژی نینن د پشتەڤانیکرنا تیمێن خوە دا، ئەز تەحەدایێ ژی دکەم کو ژبلی دەستەکا کارگێریا یانا زاخۆ ئێک کەسێ دیتر پشتەڤانی ل تیمێن مە کربیت و چو پشتەڤانیەک ماددی بیت یان ژی مەعنەوی بیت).
ئەڤرۆ نیوز، بارزان مزووری:
میر جەهوەر عەلی بەگ وەکیلێ میرێ ئێزدیان بۆ ئەڤرۆ نیوز گۆت: (ئەڤرۆ رێککەفتی 27/12/2020 کچەکا رزگاربوویێن دەستێ رێکخراوا تیرۆرستی یا داعشێ بناڤێ” رافیدا نایف عیسا”خەلکا گۆندێ کوچویە ب رێکا دەروازەیا سێمالکا دێ ڤەگەریتە دناڤ کەس و کارێن خوە و ژلایێ شاندەکێ میرۆ جڤاتا رۆحانیا ئێزدیان ڤە دهێتە پێشوازی کرن دیسان بۆ ناف مالباتا وان دهێتە ڤەگۆهاستن).
ناڤهاتی خویاکر رافیدا ئەڤە زێدەتری شەش سالانە ژ لایێ رێکخراوا تیرۆرستی یا داعشێ ڤە هاتبوو رەڤاندن ل قەزا شەنگال).
وەکیلێ میرێ ئێزدیان دیار ژی پشتی ڤەدگەریتە بۆ ناڤ مالباتا خوە دهێتە ڤەگۆهاستن بۆ پەرستگەها لالش ب ئاڤا زم زم دهێتە مورکرن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ١٢٨ کەسێن دی ل هەرێما کوردستانێ تووشی کۆرۆنایێ بووینە و هەروەسا چار نەخوشێن کۆرۆنایێ ژی مرینە.
وەزارەتا ساخلەمیێ ئەو یەک ژی دیار کریە کو ٣٢٧ نەخوشێن کۆرۆنایێ ژی ل هەرێمێ ب تەمامی چارەسەر بووینە.
ل پارێزگەها دهۆکێ ژی ٨٦ کەسێن دی تووشی کۆرۆنایێ بووینە، دو نەخوشێن کۆرۆنایێ ژی مرینە و هەروەسا ١٨٦ نەخوشێن کۆرۆنایێ ژی ب تەمامی چارەسەر بووینە.
ئەڤرۆ نیوز:
فەرماندارەکێ هێزێن سووریا دیموکرات راگەهاند کو شەڤا بۆری هێزێن چەکدارێن سەر ب تورکیا هێرشی چەندین گوندێن باژێرکێ عەین عیسا یێ رۆژئاڤایێ کوردستانێ کرینە و هێزێن وان ژی ب دژواری بەرسڤا وان داینە و هەتا نها ژی شەر ب دژواری بەردەوام دکەت.
هەمان فەرمانداری ئەو یەک ژی دیار کریە کو تورکیا دڤێت ب رێیا گرۆپێن چەکدار عەین عیسا و هندەک جهێن دی یێن ستراتیژی کۆنترۆل بکەت و هێزێن وان ژی ب هەمان شیانێن خوە بەرسڤا هێرشێن وان گرۆپێن چەکدار ددەن.
نيشاندان