ئەڤرۆ نيوز، ئێقبال و نه‌وزاد:
ئەڤرۆ ل رێکەفتی 29ى گۆلانا 2019ێ ل دەمژمێر 09:15 خولەکێ دانێ سپێدێ فروکێن شەرکەرێن سوپایێ تورکیا ب به‌ھانەیا ھەبوونا بنگەھێن چەکدارێن پارتا کرێکارێن کوردستانێ (پ . ک . ک) چیایێ کورەژاری ل ھنداڤی باژێرێ شێلادزێ یا سەر ب قەزا ئامێدیێ ڤە بوردۆمان دکەن و ترس و لەرزەکا مەزن ل دەف وەلاتیان پەیدا بوویە ژ بەر کو دەنگەکێ زوورێ ب ھێز ژ وێ بومبەبارنکرنێ دھێت و بوویە ئەگەرێ شکاندنا پەنجەرێن خانیێن وەلاتیان.
ئەڤرۆ نیوز:
پشتی بوو ماوێ چار سالان وەکو یاریزان ستێرا ئیسپانی و یانا بەرشەلۆنا یا بەری نوکە چاڤی ھێرنادێز یاری ل یانا سەد یا قەتەری کری و شیای ل گەل وێ یانێ چەندین دەستکەفتیان ب دەستخوڤە بینت و ل دووماھیا ڤی وەرزی ئەوی یاریزانێ ناڤبری ب فەرمی بریار دای دەست ژ یاریا تەپا پێ بەردەت کارگێریا یانا سەد بوو پتر مفا وەرگرتن ژ شیانێن ئەوی و شارەزایا وی یا تەپا پێ وەکو راھێنەرێ نوو یێ یانێ بوو وەرزێ بھێت دەست نیشانکر .
ھەژی گوتنێ یە چاڤی ھێرنادێز ل سالا ٢٠١٥ ژ یانا بەرشەلۆنا ھاتبوو ڤەگوھاستن بۆ یانا سەد یا قەتەری و ھەتا وەرزێ ئەڤ سالە ئەو یاریزان ل گەل وێ یانا قەتەری یێ بەردەوام بوو کو وی یاریزانی شارەزایەکا مەزن د ژیانا تەپا پێ یا جیھانی دا ھەیە ل سالا ١٩٩٨ ھەتا ٢٠١٥ ل گەل یانا بەرشەلۆنا بوو کو ئێک ژ بەرنیاسترین یاریزانێن یانا بەرشەلۆنا دھێتە ھژمارتن و چەندین ناسناڤێن مەزن یێن ئورۆپی و نافخوی ب دەستخوڤە ئیناینە ھەردیسان ل سالا ٢٠٠٠ ھەتا ٢٠١٤ ل گەل ھەلبژارتیێ ئیسپانیا ١٣٥ یاریێن نیڤدەولی کرینە و شیابوو ل گەل ھەلبژارتیێ ئیسپانیا دو جاران قارەمانیا ئورۆپا ب دەستخوڤە بینت ئەوژی ٢٠٠٨ و ٢٠١٢ و موندیالا جیھانی یا ٢٠١٠ ھەردیسان موندیالا لاوان ل گەل ھەلبژارتیێ لاوێن ئیسپانیا ١٩٩٩ و مەدالیا زێری یا ئولومپیاتێن سالا ٢٠٠٠ و ل گەل یانا بەرشەلۆنا ٢٥ ناسناڤ ب دەستخوڤە بربوون کو ھەشت ناسناڤێن لالیگا و سێ ناسناڤێن کاسا شاھێ ئیسپانیا و شەش ناسناڤێن کاسا سوپەرا ئیسپانیا ، چار ناسناڤێن چامپیونیز لیگا ئورۆپا و دو سوپەرێن ئورۆپا و دو قارەمانیێن موندیالا جیھانی.
ئەڤرۆ نیوز، رێوار مزیری:
بەرپرسا پشکا راگەهاندنێ ل رێڤەبەریا گشتی یا رەوشەنبیری و هونەری ل دهۆکێ بۆ ئەڤرۆ نیوز دیار کر کو رێڤەبەریا گشتی یا رەوشەنبیری و هونەری ل دهۆکێ ب هەمەهەنگی دگەل رێڤەبەریا ئەوقافێ ل پارێزگەها دهۆکێ دێ شەڤا قەدرێ (ليلة القدر) ل رێکەفتی 31/5/2019 ل دەمژمێر 10:30 شەڤێ ل پارکا نەورۆز ل دهۆکێ ب چەندین چالاکیان ساخ کەن.
ئاواز نهێلی، بەرپرسا پشکا راگەهاندنێ ل رێڤەبەریا گشتی یا رەوشەنبیری و هونەری ل دهۆکێ دیار کر کو شەڤا قەدرێ دێ ب پشکداریا چەندین مامۆستایێن ئایینی یێن پارێزگەها دهۆکێ هێتە ساخکرن و گۆت: “چەندین تیپێن ئایینی ژی ب گۆتنا مەدیحان دێ د ڤێ شەڤا پیرۆز دا پشکدار بن”.
ئەڤرۆ نیوز:
یانا دالکورد نوونەرا کوردا دخۆلا پلا ئێک یا سوید دا شیا سەرکەفتنەکا گرنگ توماربکەت پشتی شیا سەرکەفتنێ ل سەر یانا ئورگریتە توماربکەت ب سێ گولان بەرامبەر دو گولان ژ چارچوڤێ یاریێن گەرا دەھێ ژ خۆلێ.
یانا ئورگریتە دەستپێکێ نیڤا ئێکێ ب پێشکەفتنا خوە ب دووماھیی ئینابوو ب دو گولان کو ل دەقیقەیێن ٣٨ و ٤٥ و ل نیڤا دوێ یانا دالکورد ب ھێز ھاتە دناڤ یاریێ دا ئەو بوو ل دەقیقا ٤٩ یانا دالکورد ب رێیا یاریزانێ خوە سیسکو گولا ئێکێ تومارکر و ل دەقیقا ٥٦ یاریزانێ دالکورد یێ مەقدونی سابوڤیج گولا دوێ و وەکھەڤیێ تومارکر و ل دووماھیی دەقیقە ژ یاریێ ھەمان یاریزان شیا گولا سێ و سەرکەفتنێ بوو یانا خوە دالکورد توماربکەت و تیما خوە بەر ب سەرکەفتنەکا گرنگ بر کو ژ رێزبەندیا ١٢ دخولێ دا بەر ب رێزبەندیا ھەشتێ د لیستا خولێ دا بر.
ئەڤرۆ نیوز:
راھێنەرێ ئەلمانی و یانا لیڤەرپول یا ئنگلیزی یورگن کلوپ د کونگرێ رۆژنامەڤانی دا بەری دەستپێکرنا یاریا دووماھیا قارەمانیا چامپیونیز لیگ ب سێ رۆژان بەحس ل سەر رەوشا یانێ کر و دووماھیی بەرھەڤیێن وێ یانێ کر.
دەستپێکێ ناڤبری دیارکر بوو یاریا دووماھیا قارەمانیێ ستێرا بەرازیلی دێ یێ بەرھەڤبیت بوو وێ یاریێ پشتی ب تمامی ژ ھنگافتنێ قورتال بووی و نوکە راھێنانان ل گەل یانێ دکەت و بۆ یاریا بەرامبەر توتنھام یێ بەرھەڤبیت بتنێ یاریزانەکێ ئەوان نەشێت پشکداریێ ل گەل ئەوان بکەت ئەوژی نابی کایتا ھەتا نوکە ئەو یاریزان ژ ھنگافتنێ دووماھیی نەھاتیە.
ناڤبری ئاماژە ب وێ چەندێ ژی کر ئەوان بوو یاریا دووماھیێ ب شێوەکێ گەلەک باش خوە بەرھەڤکریە و دبیتە سالا دوێ ل دیڤ ئێک ئەو د گەھنە یاریا دووماھیا قارەمانیێ نوکە شارەزایەکا باشتر بوو یاریزانێن ئەوان پەیدابوویە و ل دووماھیا سالا بوری چەند شاشیێن تاکە کەسی ئەوان ناسناڤ ژ دەستدا ھەردیسان ل دەستپێکا یاریێ ئەوان ستێرا خوە محەمەد سەلاح ژ دەستدا بوو لێ بوو دووماھیا ئەڤ سالە شارەزایەکا باشتر بوو پەیدابوویە و یێ ب ئومێدە دێ شێن ناسناڤێ قارەمانیێ ب دەستخوڤە ئینن .
چاڤەرێ دھێتەکرن ل ١-٦-٢٠١٩ یاریا دووماھیا قارەمانیا چامپیونیز لیگ دناڤبەرا لیڤەرپول و توتنھام ل یاریگەھا نوو یا ئەتلەتیکو مەدرید واندا میتروپولیتانو بھێتەکرن
ئەڤرۆ نیوز ٬ عەلی حاجی :
حەکیم یوسڤ زێدەتری ۲۰ سالە ل هەیڤا رەمەزانێ ل کولانێن زاخۆ شعرێن ئایینی دبێژیت و وه‌لاتی ژی هاریکاریێ دگەل دا دکەن .
ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ سێشه‌مبى 28/5/2019 پێشوازى ل نه‌زمى حزورى، كونسۆلێ فلستینێ ل هه‌رێما كوردستانێ كر.
د دیداره‌كێ دا كونسولێ فلستینێ سلاڤێن مه‌حموود عه‌باس سه‌رۆكێ فلستینێ گه‌هاندنه سه‌رۆك بارزانى وپێزانین بۆ رۆلێ سه‌رۆك بارزانى د سه‌قامگیریا كوردستانێ وعیراقێ وده‌ڤه‌رێ وهه‌روه‌سا پێشڤه‌برنا كه‌لتوورێ پێكڤه‌ژیانێ د ناڤبه‌را پێكهاتێن نه‌ته‌وى وئایینى دا هه‌بوو.
هه‌ر د وێ كۆمبوونێ دا دووپاتى ل په‌یوه‌ندیێن دیرۆكى د ناڤبه‌را گه‌لێ كوردستانێ وگه‌لێ فلستینێ وره‌وایه‌تیا دۆزا هه‌ردو گه‌لان هاته كرن.
ئه‌ڤرۆ نیوز ، نه‌وزاد هلۆرى:
جوره كێزه‌كا ره‌ش ل سنوورێ ده‌ڤه‌را ئامێدیێ ب گشتى په‌یدابویه، پشكه‌ك ژ وه‌لاتیان بێزاریا خوه لێ دبینن چونكى دچیته دناڤ مال و خوارن و ڤه‌خوارنان دا.
سه‌گڤان عومه‌ر، وه‌لاتیه‌كێ شێلادزێ یه دیاركر كو جوره كێزه‌كا ره‌ش ل ده‌ڤه‌را وان په‌یدابویه و بۆ ئه‌ڤرۆ نیوز گۆت: (ئه‌ڤ كێزا ره‌ش دچیته دناڤ خوارن و ڤه‌خوارن و ئاڤێن تانك و ناڤا باخچه و سه‌ر نڤینك و جلوبه‌رگ و هه‌ر تشتى دا، دشێت بفریت و پیان ژى دچیت، ئه‌ڤ كێزه گه‌له‌ك بێزاریا خه‌لكى دكه‌ت ب تایبه‌تى ب شه‌ڤ ده‌ما مرۆڤ نڤستى و دهێته دناڤ به‌تانى و سه‌ر سه‌روچاڤێن مرۆڤى).
زێده‌تر گۆت: (بو ناڤبرنا وى هنده‌ك ژ خه‌لكێ ده‌ڤه‌رێ مالێن خوه د ره‌شینن و هنده‌ك ژى دكوژن، به‌لێ ژبه‌ركو یا زوره و دووباره دهێنه‌ڤه ژناڤبرنا وان ژى یا ب زه‌حمه‌ته).
زوبێر حه‌سه‌ن، ئه‌ندازیاره‌كێ چاندنێ یه ل ده‌ڤه‌رێ بۆ ئه‌ڤرۆ نیوز گۆت: (ئه‌ڤ جورێ كێزا ره‌ش دهێته بناڤكرن ب قالوجه و ئێكه ژ وان كێزێن وه‌رزێ بهارێ په‌یدا دبیت، به‌لێ ل ده‌ستپێكا وه‌رزێ گه‌رمێ مه‌زن دبیت و دشێت بهێت و بچیت و بفریت ژى، به‌لێ تا ناڤه‌راستا هاڤینێ دمینیت و پاشان دمریت، ئه‌وێن كو دمینن ژى قه‌ستا جهێن هوین ل نێزیك ئاڤان دكه‌ن، نوكه كو دناڤ مالان دا هه‌یه بزاڤى َدكه‌ت جهه‌كێ هوین بخوه په‌یدا بكه‌ت).
زێده‌تر گۆت: (هه‌ر چه‌نده ئه‌ڤێ جورێ كێزێ چ زیان نینن و دبیت مفا هه‌بن، به‌لێ ل گه‌ل ڤێ یه‌كێ ژى زیان هه‌نه ب تایبه‌تى ئه‌گه‌ر بكه‌ڤیته دناڤ خوارن و ڤه‌خوارنێ دا، ئه‌ڤ كێزه گه‌له‌ك حه‌ش حه‌شه‌راتێن دى دكه‌ت ب تایبه‌تى دوپشك و كولى و به‌لاتینك و مێش و چه‌ند حه‌شه‌راتێن دن یێن زیاندار ئه‌وێن كو دناڤ مالان و چاندنێ ژى دا په‌یدا دبن، هه‌كه ئه‌ڤ كێزه دناڤ سرۆشتى دا بیت و دناڤ چاندنێ دا بیت پێدڤیه نه‌هێته كوشتن و ژناڤبرن، به‌لێ هه‌كه هاته دناڤ مالاندا پێدڤیه بهێته ژناڤبرن، چونكى زیان بو ساخله‌میا مرۆڤى هه‌یه ئه‌گه‌ر هات و بچیته دناڤ خوارنێ و ڤه‌خوارنێ، پاشى ئه‌و خوارن و ڤه‌خوارن بهێته خوارن).
ئه‌ڤرۆ نیوز:
ب هه‌لكه‌فتا هه‌لبژارتنا وى بۆ پۆستێ سه‌رۆكێ هه‌رێما كوردستانێ، نێچیرڤان بارزانى په‌یامه‌ك به‌لاڤكر وسوپاسیا په‌رله‌مانێ كوردستانێ كر ووه‌لاتیێن هه‌رێما كوردستانێ ژى پشت راستكرن كو سه‌رۆكاتیا هه‌رێمێ دێ بیته بنگه‌هێ ئێكرێزیێ.
نێچیرڤان بارزانى د په‌یاما خوه دا راگه‌هاند” من سوپاسى وپێزانینه‌كا زۆر بۆ په‌رله‌مانێ كوردستانێ یا هه‌ى كو ئه‌ڤرۆ ب نوونه‌راتیا گه‌لێ كوردستانێ باوه‌رى دایه من، هه‌موو كوردستانیان پشت راست دكه‌م كو سه‌رۆكاتیا هه‌رێمێ دێ بنگه‌هێ ئێكرێزیێ وكۆمكرنا هه‌موو هێز ولایه‌نێن سیاسى یێن كوردستانى وپێكهاتێن ئیتنى وئاینان بیت ب جوداهیا بیر وبۆچوونێن خوه‌ڤه، ژبۆ پێكڤه‌ژیانه‌كا ئاشتیانه وئارامیا گه‌لێ كوردستانێ”.
گۆت ژى” ئارامى وئاشتیا جڤاكى ودابینكرنا مافێن تاك وكومه‌لگه‌هێ، دێ ئارمانجا مه یا سه‌ره‌كى بیت ب گرتنه‌به‌را رێیا دیالۆكێ د چاره‌سه‌ركرنا هه‌موو كێشێن د ناڤبه‌را هه‌رێمێ وحوكمه‌تا فیدرال دا د چارچۆڤێ دستوورى دا، هه‌روه‌سا پاراستنا په‌یوه‌ندیا دۆستانه یا ب هێز ل گه‌ل وه‌لاتێن جیران وده‌ڤه‌رێ وبه‌رده‌وامیدان ب هێزكرنا پێگه وسه‌نگا هه‌رێما كوردستانێ ل سه‌ر ئاستێ هه‌رێمایه‌تى ونێڤده‌وله‌تى”.
نێچیرڤان بارزانى، سه‌رۆكێ هه‌لبژارتى یێ هه‌رێما كوردستانێ ل دووماهیا په‌یاما خوه ئاماژه ب وێ چه‌ندێ كر كو هه‌رێما كوردستانێ مولكێ هه‌موو كوردستانیانه، ب هه‌موو جوداهیێن خوه‌ڤه، سه‌رۆكاتیا هه‌رێمێ ژى دێ سه‌كۆیێ ئیراده وخواست ومافێن وان بیت بێ جوداهى”.
ئەڤرۆ نیوز، بارزان مزووری:
قایمقامێ قەزا شێخان ئاشکرا کر، رێیا شێخان بۆ ئەترووش و گوندێن دەوروبەر ب درێژاھیا ٣٥ کیلۆمەتران ژ لایێ کۆمپانیا (ئێچ کەی ئێن)ڤە ب کۆژمێ ٨٠٠ ملیۆن دیناران دھێتە ب جھئینان.
سەردار یەحیا عەبدولعەزیز، قایمقامێ قەزا شێخان بۆ ئەڤرۆ نیوز گۆت: “پشتی چەندین گازندێن وەلاتیێن دەڤەرا ئەترووش ب نڤیسارێن فەرمی گەھشتینە مە کو رێیا سەرەکیا شێخان بۆ ئەترووش و گوندێن دەوروبەر پێدڤی ب نووژەنکرنێ یە، مە ب رێیا نڤیسارەکا فەرمی داخواز ژ پارێزگارێ دھۆک کر، ژ لایێ خوەڤە وی ژی پەیوەندی ب وەزیرێ سامانێن سروشتی کر و د نھا دا بڕیار ھاتیە دان کو ئەڤ رێیە ب درێژاھیا زێدەتری ٣٥ کیلۆمەتران و ب کوژمێ ٨٠٠ ملیۆن دیناران ژ لایێ کۆمپانیا (ئێچ کەی ئێن) یا بەرھەمئینانا پترۆلێ ل دەڤەرێ بھێتە نووژەنکرن و ئەو ب شێوەکێ راستەوخۆ سەرپەرشتیا پرۆژەی دکەن”.
ناڤھاتی خویا ژی کر، رێیا سەرەکیا قەزا شێخان بۆ ناحیا ئەترووش ھەتا دگەھیتە گوندێ نسرا و ربەتکێ ھەتا دگەھیتە سنوورێ قەزا ئامیدیێ ل ناحیا چەمانکێ دێ ھێتاە قێرکرن و گۆت: “د نھا دا پرۆژە کەفتیە د قووناغێن کاری دا و کۆمپانی ب خوە دێ ب کارێ نووژەنکرنا وێ رابیت، ھەر ژ دوڕیانا خەنس بۆ ئەترووش، دیسا ژ دوڕیانا گەلیێ رمان ھەتا دگەھیتە ناڤ سەنتەرێ ناحیا ئەترووش و بۆ گوندێن نسرا و ربەتکێ ھەتا دگەھیتە سەر سنوورێ قەزا ئامیدیێ دێ ھێتە نووژەنکرن”.
نيشاندان