ئەڤرۆ نیوز:

بەرپرسەکێ وەزارەتا پێشمەرگەی پرۆژەکێ نوو یێ ئەمریکا بۆ رێکخستنا سیستەمێ گەھاندنێ بۆ ھێزێن پێشمەرگەی ئاشکرا کر کو ب ڤێ چەندێ دێ سیستەمێ پەیوەندیکرنێ بۆ پێشمەرگەی ھێتە رێکخستن.

فەریق جەبار یاوەر، ئەمیندارێ گشتی یێ وەزارەتا پێشمەرگەی دیار کر کو ئەمریکا ب رێیا پرۆژەکێ نوو سیستەمێ گەھاندنێ بۆ ھێزێن پێشمەرگەی دابین دکەت کو ب رێیا پەیوەندیکرنێ دناڤبەرا ھەموو یەکێن سەر ب وەزارەتا پێشمەرگەی ڤە دێ ب شێوەیێ بێ تێل بیت.

ناڤھاتی ئاماژە دا وێ چەندێ کو بەری نوکە ژ ئەگەرێ نەبوونا سیستەمەکێ پێشکەفتی یێ ئێکگرتی، چەندین جۆرێن ھێلێن پەیوەندیان د ناڤبەرا یەکەیان و وەزارەتێ دا بۆ پەیوەندیکرنێ دھاتنە ب کارئینان، بەلێ ب تمامبوونا ڤی پرۆژەی سیستەمێ پەیوەندیکرنێ د ناڤبەرا یەکەیان و وەزارەتێ دا دێ بیتە ئێک سیستەم و بۆ باسنیوز گۆت: “کارکرن د ڤی پرۆژەی دا یا بەردەوامە، سەرەرایی ڕاگرتنا مەشق و راھێنانێن ئەمریکا بۆ ھێزێن پێشمەرگەی ب شێوەکێ دەمکی”.

ئەڤرۆ نیوز، عەلی حاجی:

پەرلەمانتارەکێ کوردستانێ بۆ ئەڤرۆ نیوز دیار کر ب پشکەکا مووچێ خوە یێ ھەیڤانە وی ھژمارەکا دەرمانان بۆ نەخوشخانا زاخۆ دابین کرینە و د بەرنامێ وی دایە ھەیڤانە پشکەکا مووچێ خوە بو کارێن ب ڤی رەنگی تەرخان بکەت.

ھیڤیدار ئەحمەد، ئەندامێ پەرلەمانێ کوردستانێ ل سەر لیستا پارتی دیموکراتی کوردستان دیار کر کو پشتی وی پەیوەندی ب نەخۆشخانا زاخۆ کری د نوکە دا پێدڤی ب چو دەرمانەکێ ھەیە بۆ وەلاتیان داکو بۆ وان ب پشکەکا مووچێ خوە دابین بکەت، ل دووڤ خوازا نەخۆشخانا زاخۆ ئەو رابوو ب دابینکرنا رێکخستنا دلی بۆ وان کەسێن کو خوینا وان چر دبیت و گۆت: “پرانیا کەسێن توش بوویی ژیێ وان د سەر ٤٥ سالیێ دایە، ئەو دەرمانێن ھاتینە دابینکرن ١٠٠ ملیگرامن کو نەخۆشخانا زاخۆ ئەڤ چەندە ژ من داخواز کربوو”.

ناڤھاتی ئاماژە دا وێ چەندێ کو ھزار دانە ژ وان دەرمانان وی دابینکرن و ھەر کەسەک دشێت ب وان دەرمانان بۆ دەمێ ھەیڤەکێ ب کاربینیت و گۆت: “د بەرنامێ من دایە ھەیڤانە ئەز پشکەکا پارێ خوە ژ مووچێ پەرلەمانێ کوردستانێ بۆ کارێن ب ڤی رەنگی تەرخان بکەم”.

ئەڤرۆ نیوز:

بەرپرسێ راگەھاندنا بۆردێ کاروبارێن مرۆڤی ل پارێزگەھا دھۆکێ راگەھاند کو ژ سەرجەمێ ٧٤٠ ھزار ئاوارە و پەنابەرێن ل پارێزگەھا دھۆکێ دژین ب تنێ ٢٤٠ ھزار ڤەگەڕیاینە ڤە و ھێشتا ٥٠٠ ھزار ئاوارە و پەنابەر ل پارێزگەھا دھۆکێ دژین.

سالم سەعید، بەرپرسێ راگەھاندنا بۆردێ کارۆبارێن مرۆڤی ل پارێزگەھا دھۆکێ بۆ (باسنیوز) دیار کر، پشتی رزگارکرنا مووسل و ژناڤبرنا رێکخراوا تیرۆری یا داعش، پتریا رێکخراوێن نێڤدەولەتی پشتەڤانیێن ئاوارە و پەنابەرێن ل پارێزگەھا دھۆکێ دژین ڕاگرتینە و بەر ب پارێزگەھا نەینەوا چووینە، بەلێ ئەڤ چەندە ھەر نەبوویە ئەگەر کو ئاوارە و پەنابەر ڤەگەڕنە سەر مال و ملکێن خوە و ھەتا نھا ب تنێ ٢٤٠ ھزار ڤەگەڕیاینە ڤە و ھێشتا ٥٠٠ ھزار ئاوارە و پەنابەر ل پارێزگەھا دھۆکێ ماینە.

ناڤھاتی ئاماژە دا وێ چەندێ کو ل پارێزگەھا دھۆکێ ٢٧ کەمپێن ئاوارە و پەنابەران ھەنە، ھەتا نھا ب تنێ پێنج کەمپ ڤالابووینە و خەلکێ وان ڤەگەڕیاینە ڤە.

ئەڤرۆ نیوز، قائید میرۆ:

ئەزموونێن نیشتیمانی سوبەھی رۆژا ٢٦/٥/٢٠١٩ دێ ل سەرانسەری ھەرێما کوردستانێ ھێنە ئەنجامدان و رێڤەبەرێ ئەزموونان ژی ل وەزارەتا پەروەردێ ئاشکرا کر کو گوھۆڕین ب سەر شێوازێ ئەزموونانێن ئەڤ سالە دا ھاتیەکرن و ھەموو رێوجھێن ئەمنی ژی وان بەرھەڤکرینە بۆ ھەر ئەگەرەکێ دھێتە پێش ئەزموونان و گۆت: “وەلاتیان پشتڕاست دکەین ب چو شێوەیەکی پرسیار ناھێنە ئاشکراکرن”.

ھەردی مەعرۆف، رێڤەبەرێ ئەزموونان ل وەزارەتا پەروەردێ بۆ رۆژناما ئەڤرۆ دیار کر کو ھەموو بەرھەڤی ھاتینەکرن بۆ ب رێڤەچوونا پڕۆسا ئەزموونێن نیشتیمانی یێن پۆلێن نەھی بنەڕەتی و دوازدێ ئامادەیی، کو تێدا ١١٨ ھزار و ٣٨٣ قوتابیێن پۆلا نەھی بنەڕەتی و ١١٢ ھزار و ٥٨٥ قوتابیێن ١٢ی ئامادەیی و سێ ھزار و ٣٦٤ قوتابیێن پیشەیێ تێدا سوبەھی دێ پشکداریێ د ئەزموونێن گشتی دا کەن، کو سەرجەمێ وان قوتابیان دگەھیتە ٢٣٤ ھزار و ٣٣٢ قوتابیان و گۆت: “ھەموو بەرھەڤی بۆ ب رێڤەچوونا ئەزموونان ھاتینەکرن ھەر ژ دابینکرنا کارەبێ بگرە ھەتا دگەھیتە پێدڤیێن ئەزموونان، ئەڤ ھژمارا قوتابیان ب سەر چار ھزار و ١٠١ ھۆلێن ئەزموونان ھاتینە بەلاڤکرن”.

رێڤەبەرێ ئەزموونان ئاماژە دا وێ چەندێ کو چەندین گوھۆڕین ھاتینەکرن و رێڤەچوونا ئەزموونان ئەڤ سالە جودایە ژ سالێن بۆری، چونکی پەنجەمۆرا قوتابی دێ کەڤیتە سەر فورما سۆمو و دیزاینێ لاپەڕێ سۆمو گوھۆڕین ب سەردا ھاتینە، کو جھێ بەرسڤدانا قوتابیان ھاتیە بەرفرەھترکرن و گۆت: ” ل سالا بۆری گرۆپێن پرسیاران ب تنێ ژ سێ گروپان پێکھاتبوو، بەلێ ئەڤ سالە گرۆپێن پرسیاران بووینە ٢٦ گرۆپ و رێگرە ل ھەر دزینەکا پرسیاران ژ لایێ قوتابیان ڤە”.

ل دۆر قوپیایێ و کڕین و فرۆتنا پرسیارێن ١٢ی ئامادەیی ھەردی مەعرۆف گۆت”ب چو شێوەیەکی پرسیارێن پۆلا ١٢ی ئامادەیی کڕین و فرۆتن پێنەھاتیەکرن، ئەڤا ل دەزگەھێن راگەھاندنێ و سۆشیال میدیایێ دھێتە بەلاڤکرن دەستەک ل پشت ھەیە ب مەرەما بازرگانیێ، ئەم قوتابیان پشتڕاست دکەین ب چو شێوەیەکی پرسیار ناھێنە ئاشکراکرن، ھەکە ل سالێن بەرێ ئاریشەیەک ھەبیت ل بەلاڤکرنا فۆڕمێن پرسیاران بۆ سەرانسەری ھەرێما کوردستانێ ئەڤە رێگری ھاتیەکرن و دووبارە نەبیت و ھەموو رێوجھێن ئەمنی ھاتینە بەرھەڤکرن”.