ئازاد محەمەد: حوكمەتا هەرێمێ گرنگیەكا باش ب وەرزشێ دایە
ئەڤرۆ
د داخویانیەكێ دا ئەندامێ ئێكەتیا تەپا پێی یا كوردستانێ بۆ رۆژناما ئەڤرۆ دیاركر ئەو گەشبینن بەرنامێ وان یێ سالانە ب رێكخستنا چالاكیێن وەرزشی ب سەركەفتیانە بیت و حوكمەتا هەرێمێ گرنگیەكا باش بوو دایە.
زێدەتر ئازاد محەمەد گۆت: ئێكەتیا تەپا پێی یا هەرێمێ رژدە ل سەر برێڤەبرنا هەموو چالاكیێن خوە یێن سەر ئاستێ پلا نایاب، ئێك و دو بۆ پێشكەفتی و لاوان و ئەڤ رژدەیە ژی ژبەر ئەوێ پشتەڤانیا بەردەوام یا مەعنەوی و مادی ژلایێ حوكمەتا هەرێمێ و كابینا نەهێ ب سەرۆكاتیا مەسرۆر بارزانی كو بوویە ئەگەر چالاكیێن مە بشێوەكی گەلەك باش بهێنە رێكخستن و دشیان دایە پێشكەفتنا وەرزشا كوردستانێ زێدەتر هەبیت.
ژلایەكێ دووڤە ناڤهاتی دیاركر د نوكە دا ئەو مژویلی دەستپێكرنا ڤاڤارتێن دەربازبوونێ بۆ خولا پلا دو نە، 19 یانەیێن دناڤ هەڤڕكیێن ڤاڤارتنان و هاتینە بەلاڤكرن ل سەر سێ كۆمان ئەوژی، دهۆك، هەولێر و سلێمانی، هەركۆمەك دو یانە دەربازنە خولا پلا دو، ڤاڤارتن دێ ل دەستپێكا حەفتیا بهێت هێنە ئەنجامدان ئەوا دێ ل دووڤ شێوازێ خول ئێك قۆناغ برێڤەچن.
ل دۆر یانەیێن پارێزگەهێ ئازاد محەمەد گۆت: شەش یانە د ڤاڤارتێن دەربازبوونێ دا پشكداربن ئەوژی تەناهی، شێلادزێ، شنگال، بجێل، پۆلیتەكنیك و لاوێن شنگال، پشتی ب دووماهی هاتنا هەڤڕكیان دو یانەیێن رێزا ئێكێ و دویێ ئێكسەر دەربازبنە خولا پلا دو كو دێ دگەل چار یانەیێن دی یێن پارێزگەهێ پشكداربن و پێكهاتینە بەردەرەش، باتیفا، دینارتە و شێخان، دنێزكترین دەمدا دێ ژڤانێ خولێ ژی دیاركەین.
