خولا ستێرێن ئیراقێ ب دیدارێن ئاگرین و كلاسیكۆیا كوردستانێ ڤەگەڕیا
قەیس وەیس:
چاڤەڕێ دهێتە كرن ئەڤرۆ هەتا شەمبییا بهێت نەهـ یاریێن مایی ژ هەڤڕكییێن گەڕا نەهێ یا خولا ستێرێن ئیراقێ یا فوتبۆلێ ل یاریگەهێن جودا بهێنە كرن، یانەیێن كوردستانی د ناڤبەرا یاریێن ئاگرین و كلاسیكویی و چاڤ ل سەركەفتنانە.
دهۆك ب جەكێ پشتەڤانێن خوە بەرهەڤە
بڕیارە ئەڤرۆ ل دەژمێر شەشێ ئێڤاری و پێشبینییا ئامادەبوونا جەماوەرەكێ ئێكجار زوور تیما یانەیا دهۆك د ناڤ ئەرد و جەماوەرێ خوە دا دێ مێڤاندارییا یانەیا زەورا یا بەغدایی كەت كو دهێتە هژمارتن ئێك ژ یاریێن ب هێز و گۆپیتكا یاریێن ڤێ حەفتیێ و تایبەتمەندییا خوە دناڤ جەماوەرێ هەردو یانەیان دا هەیە، ئەلهۆیێن چیا د ڕێزبەندیا هەشتێ دهێت ب كۆمكرنا نەهـ خالان ژ شەش وەكهەڤییان و ئێك سەركەفتن و ئێك وەكهەڤی، 11 گۆل ل سەر هاتینە تۆماركرن و هەمان گۆل ژی ل سەر هاتینە تۆماركرن، د بەرانبەردا زەورا خودانا ڕێزا دویێ یە ب18 خالا، پێنج سەركەفتن، سێ وەكهەڤی و هیچ خوسارەتیەك نینە.
ڕاهێنەر ب ئۆمێدە
د پرێسكونفرانس دا یێ ئیرانی یەحیا گولمحەمەد ڕاهێنەرێ تیما یانەیا دهۆكێ ب ئۆمێدە د یارییا ئەڤرۆ دا سێ خالان بدەستڤە بینن و گۆت: هەرچەندە یارییەكا ب سانەهی نابیت، د دەمێ بۆری مە كار ل سەر كێماسی و شاشیێن یاریێن بۆری كربوون، ب ئۆمێدین باشترین شێوە و بهێز ڤەگەڕینە دناڤ خولێ دا و سەركەفتنێ تۆماربكەین، جەماوەرێ مە ژ هەژی كەیفخوەشیێ یە، هەموو یاریزان بەرهەڤن.
دیدارێن پێشتر ئاگرین بووینە
لدووڤ ئامارێن پێشتر یێن سەرجەمێ 20 یاریێن دناڤبەرا وان دا هاتینە كرن، دیدارێن ئاگرین بووینە، دهۆكێ شەش سەركەفتن ئیناینە و زەورایێ هەشت سەركەفتن د بەرانبەر دا شەش وەكهەڤی هاتینە، دووماهی دیدارێن هەردو یانەیان ل وەرزێ بۆری وەكهەڤی هاتینە.
كلاسیكویەكا كوردستانی ل زاخۆیە
تیما یانەیا زاخۆ دێ ل ئەینییا بهێت دناڤ ئەرد و جەماوەرێ خوە دا یانەیا نەورۆز یا باژێرێ سلێمانیێ ل دەمژمێر شەشی ئێڤاری مێڤان كەت كو دهێتە هژمارتن یارییەك ژ كلاسیكویا كوردستانی و بهێز، كوڕێن خابووری ئەوێن باشترین پێكهاتی هەی و ئاستەكێ خراب د یاریێن بۆری دا نیشان دایی ل ڕێزا 11ێ دهێت ب كۆمكرنا نەهـ خالان ژ دو سەركەفتن، سێ وەكهەڤی و سێ خوسارەتی، یاریزانێن وێ حەفت گۆل تۆماركرینە لێ 11 گۆل ل سەر هاتینە تۆماركرن، ژلایێ خوەڤە ڕەوشا یانەیا نەورۆز باشترە ئەوا ل ڕێزا چارێ دهێت ب كۆمكرنا 15 خالان ژ چار سەركەفتن، سێ وەكهەڤی و خوسارەتیەك هەیە.
دیدارێن پێشتر هەڤسەنگن
لدووڤ ئامارێن 10 یاریێن بۆری یێن دناڤبەرا هەردو یانەیان دا هەڤسەنگی پەیدا بوویە، د چار یاریان دا تیما زاخۆ سەركەفتن ئینایە، هەروەسان نەورۆزێ ژی چار سەركەفتن ئیناینە، د دو یارییان دا وەكهەڤ بووینە، ل وەرزێ 2025-2026 زاخۆ مەزنترین سەركەفتن ئینابوو ب چار گۆلان بێ بەرانبەر.
تەلال ب هیڤییە
د كونگرەیێ رۆژنامەڤانی دا یێ قەتەری تەلال ئەلبلۆشی ڕاهێنەرێ یانەیا زاخۆ ب هیڤییە دوبارە گرنژی بێخنە ل سەر دێمێ پشتەڤانێن زاخۆ و گۆت: مە قووناغەكا بەرهەڤیان دەربازكرییە پشتی ڕاوەستیانا خولێ بۆ هندێ ب هویری ل سەر هەموو لایەنێن تەكتیكی و هونەری ب ڕاوەستیین، هندەك هوكار هەبوون پێشتر ئەنجام داباش نەبوون ب هیڤی نە بۆ یارییا ئەڤرۆ لدووڤ پلانێن مە بگەهینە سێ خالان، هەرچەندە یانەیا نەورۆز ئێك ژ تیمێن بهێزە و ڕێزبەندییا وێ بەلگەیە.
هەولێر بۆ پێشەنگیێ
ژلایێ خوەڤە بڕیارە ئەڤرۆ تیما یانەیا هەولێر ل یاریگەها میسان ببیتە مێڤانا یانەیا نەفت میسان ل دەمژمێر 6:45 مەغرەب د یارییەكا دهێتە پێشبینیكری دا تاقیكرنەكا دی بۆ هەولێرییان و چاڤ ل پێشەنگیێ بیت، كوڕێن كەلهە و منارە ل ڕێزا سێیێ دهێت ب كۆمكرنا 17 خالان ژ پێنج سەركەفتن، دو وەكهەڤی و خوسارەتیەكێ، ژلایێ خوەڤە نەفت میسان ل ڕێزا 18ێ دهێت ب كۆمكرنا حەفت خالان، ئەڤ یاریە بۆ هەولێرییا دەلیڤەیە بۆ ڕێزبەندیەكا باشتر.
نوونەرا كەركووكێ ل بەسرایە
ژلایەكێ دووڤە یانەیا غاز ئەلشیمال یا كەركووكا كوردستانێ دێ ل شەمبییا بهێت دەمژمێر شەشی مەغرەب ل یاریگەها ئەلفەیحا بیتە مێڤانا یانەیا مینا یا بەسرایی، تیما كوردستانی هەشت خال كۆمكرینە ل ڕێزا 13ێ دهێت ژ سەركەفتنەكێ و پێنج وەكهەڤیان و دو خوسارەتی هەنە، یانەیا بەسرایی نەهـ خال كۆمكرینە ل ڕێزا 10ێ دهێت.
شرۆڤەكارەكی وەرزشی بووچوونا خوە هەبوو
د داخویانیەكێ دا عەباس عەتییە شرۆڤەكارێ وەرزشی و ڕاهێنەرێ بەرنیاس ل ئیراقێ گۆت: یاریێن ئەڤرۆ و سوبەهی بۆ هەموو یانەیان دێ بزەحمەت بن هەروەكو ژ نوو دێ دەست ب وەرزێ نوو یێ خولێ هێتە كرن، ژبەركو ئەڤە زێدەتری دو حەفتییە خول ڕاوەستیابوو ژبەر كۆپا كەنداڤی، لێ گەلەك یا گرنگ بوو بۆ پرانییا یانەیێن پشكدار ژبۆ پێداچوون ل سەر خالێن لاوازی و چارەسەركرنا هەر شاشیەكا تەكتیكی و هونەری دناڤ یاریگەهێ دا، تیمێن زاخۆ و دهۆك ئاستێ وان یێ جێگیر نەبوو دڤێت مفا ژ بهێنڤەدانێ وەرگرت بیت، ژلایەكێ دووڤە هەولێر و نەورۆز ئەنجامێن باش هەبووینە دڤێت ئاستێ خوە ڕاگرت بیت و باشتر بەرهەڤبن، بدیتنا من ئەركێ یانەیێن كوردستانی د ڤێ حەفتیێ دا ب سانەهی نابیت.
ژ یاریێن دی یێن ئەڤرۆ
تەلەبە- شورتە، یاریگەها ئەلمەدینە، ل دەمژمێر 8:30 شەڤ.
یاریێن سوبەهی ئەینی
نەفت- دیالا، یاریگەها شەرار حەیدەر، ل دەمژمێر 7:45 شەڤ.
ئەلغراف- ئەلجولان، یاریگەها ناسریە، ل دەمژمێر 8:30 شەڤ.
یاریێن شەمبیێ 10-10-2026
كارەبا- كەربەلا، یاریگەها زەورا، ل دەمژمێر 7:45 شەڤ.
ئەلگەرمە- ئەلكەرخ، یاریگەها رومادی، ل دەمژمێر 8:30 شەڤ.
ڕێزبەندییا خولێ بەری دەستپێكرنا یاریێن گەڕا نەهێ.
1- ئەلگەرمە 20 خال.
2- زەورا 18 خال.
3- هەولێر 17 خال.
4- نەورۆز 15 خال.
5- شورتە 15 خال.
6- نەفت 15 خال.
7- ئەلجولان 10 خال.
8- دهۆك نەهـ خال.
9- دیالا نەهـ خال.
10- مینا نەهـ خال.
11- زاخۆ نەهـ خال.
12- جەوییە هەشت خال.
13- غاز ئەلشیمال هەشت خال.
14- مووسل هەشت خال.
15- ئەلكەرخ حەفت خال.
16- كارەبا حەفت خال.
17- تەلەبە حەفت خال.
18- نەفت میسان حەفت خال.
19- ئەلغراف پێنج خال.
20- كەربەلا پێنج خال.
