ئازاد محەمەد: سلێمان رەمەزان راهێنەرێ كوردستانێ یە و دبیت ژڤانێ كونیفایێ بهێتە گوهۆڕین
د داخویانیەكێ دا ئەندامێ فیدراسیۆنا فوتبۆلا كوردستانێ دیار كر ل حەفتییا بهێت بابەتێ نە پشكدارییا دو هەلبژارتیێن هەرێمان و ژڤانێ قارەمانییا كونیفایێ بهێتە ئێكلاكرن و سلێمان رەمەزان ب فەرمی بوویە راهێنەرێ هەلبژارتیێ كوردستانێ.
زێدەتر ئازاد ئەحمەد بۆ رۆژنامەیا ئەڤرۆ گۆت: قارەمانیا كونیفایێ ئەوا دهێتە چاڤەڕێ كرن ل 26ێ خزیرانێ هەتا شەشێ تیرمەها بهێت یاریگەهێن كوردستانێ مێڤاندارییا وێ بكەت و بڕیارە 14 هەلبژارتیێن هەرێمێن جیهانێ پشكداریێ بكەن ئەوێن هاتینە بەلاڤكرن ل سەر چار كۆمان، لەوما بەرهەڤیێن كارگێری ب دانانا لژنەیان و یێن هونەری و تەكنیكی بەردەوامن ئەڤچەندە ژی ل سەر راسپارد و پشتەڤانییا مەسرۆر بارزانی سەرۆكێ حوكمەتا هەرێما كوردستانێ كو بەرهەڤییا خوە دیاركرییە و پشتەڤانیا ئێكسەر ژی بۆ مێڤانداریا قارەمانیێ كریە، ئەڤچەندە بوو ئەگەرێ سەرەكی قارەمانی ل كوردستانێ بهێتە ئەنجامدان و مەرەما سەرەكی ژی ناساندنا هەرێما كوردستانێ ب كەلەتۆر و دیرۆكا كوردستانێ بۆ هەمی هەرێمێن جیهانێ یێن پشكدار بهێتە دیاركرن و دیسان مە ژی حەز و ڤیانا وەرزشێ یا هەی.
ژلایەكێ دیڤە ناڤهاتی گۆت: ب فەرمی سلێمان رەمەزان هاتیە دەستنیشانكرن وەكو راهێنەرێ هەلبژارتیێ كوردستانێ بۆ قارەمانیێ ب رازیبوونا پرانییا ئەندامێن فیدراسیۆنێ، ل نێزیك دا دێ كۆمبوون دگەل هێتە ئەنجامدان ژبۆ دانان بەرنامە و پلان و ەرگرتنا بۆچوونان و دەستنیشانكرنا وی هات ژبەركو خودان سەربۆرە و شارەزایە و خودان باوەرنامەیا پرۆ ئەی یا نێڤدەولەتیە دێ گەلەك مفایی ژێ وەرگرین هەروەسان پێنج جاران ژی بوویە راهێنەرێ كوردستانێ و دو ناسناڤێن كونیفایێ ب دەستڤە ئیناینە.
ئازاد محەمەد ئەوچەندە ژی دیار كر پشتی دو هەلبژارتیێن دناڤ لیستا پشكداران ڕەدكری بهێنە كوردستانێ ب بوهانا كاودانێن سیاسی یێن دناڤبەرا ئیران و ئیسرائیلێ دا، مە وەكو فیدراسیۆنا كوردستانێ هەمی بەلینە و گەشبینی داینە ئەوان هەلبژارتیان كو كوردستان هەردەم یا ئارامە، لەوما ئەم چاڤەڕێ بەرسڤا واینە برێیا فیدراسیۆنا كونیفایێ ژبۆ ئێكلاكرنا بابەتێن كارگێری و ژڤانێ دووماهیێ.
بۆ زانین سلێمان رەمەزان كوڕێ باژێرێ دهۆكێ بۆ جارا ئێكێ ل سالا 2008ێ وەكو راهێنەرێ هەلبژارتیێ كوردستانێ شیابوو رێزا سێیێ د قارەمانییا كونیفایێ ل سوید بینن، دیڤدا ل كونیفا 2012ێ ئەوا ل هەولێرێ هاتیە كرن ناسناڤێ قارەمانیێ بدەستڤە بینن، ل كونیفا 2014 ژی ناسناڤێ دویێ بۆ كوردستانێ بدەستڤە بینن، دیسان وەكو راهێنەرێ كوردستانێ پشكداری قارەمانیا نەكبە ل2015ێ یا فلستینێ بن و رێزا سێیێ ب دەستڤە ئینابوو.
