پەیامێن لایەنگر و كوشتنا نوویاتییێ
دلدار محەمەد
هەكو ئەم زاڕۆك شەڕێن زارۆَكان دناڤبەرا كولانان دا دهاتنەكرن ڤێجا ئەو كولانا تۆ لێ ل سەر ڕاستیێ با یان نە تۆ پشتەڤانێ كولانا خۆ بووی ، بوچی؟، نزا !
ڕێ بدەنە من ببێژم نزا چونكی د سەركەفتنێن وان شەڕان دا مە چ بەرژەوەندی نەبوون، من دڤێت ببێژم سەركەفتنێ و شكەستنێ چ دەستكەفت نەبوون هەما ژ پاكی و دلسافیا زاڕۆكاتیێ پێڤە چ دی نەبوو، لەوما وێ رەفتارا شاش (یا زاڕۆكینیێ) جهێ خۆ ل دەف مە نەكر و دگەل ڕۆژێن ژیێ مە ئەو ژی فری و چ مەترسی ل سەر مێشكی نەهێلان، بەلێ نهۆ و پشتی بۆرینا چەند سالان مرۆڤ چەند د ئێشیت هەكو مرۆڤ دبینیت لایەنگرێن ب مەرەم و مەرەمێن سڤكەرا سەنگێ هەنە، ئەڤە وەكو زاڕۆكاتیێ سەرێ مرۆڤی نا شكێنیت، بەلكو دلێ مرۆڤی ژ بەردەوامییێ د پرتكینیت و ساڕ دكەت.
بۆ نموونە هەكو تۆ دبینی قەلەمەكی بۆ چەند چنیكێن نانی هندەك پەیڤێن نڤیسین (نان بەرامبەر خۆ ژ دەست دانێ ) ئەڤە نە بتنێ بۆ خودان قەلەمان دروستە، بەلكو بۆ هونەرمەند و حەتا بۆ مامۆستایێن ئاینی ژی دروستە هەكو تۆ پەیاما خۆ گۆری بەریكێن خۆ دكەی وی دەمی چام دبیتە چامەكا مەزن و بێ چارەسەر، بەلێ كارەسات هێشتا مەزنترە هەكو تە چ پەیام نەبیت هەما كوكا پەیاما تە نان و بەریك بن !
مرۆڤێن خودان پەیام و نامە بۆ حەتا پشتی مرنا بایولۆجی ژی زیندی دمینن، بەلێ هەكو نامەیا وان بەرژەوەندی بن، دێ بهۆژن هەتا ڕۆژەكێ د چ بیردانكان دا نەمینن، ئەڤە ژی مرنا بەری گۆرستانێ یە، پەیامدار د بلندگۆیا بەرژەوەندێن تەنگ دا مرنا خۆ رادگەهینن و گرنگە بهێتە زانین قەلەم بێ هەلویست لەڤەنەكێ بێ بەرهەمە داركەكێ شكەستی یە كەس چ مفای ژێ نابینیت، تشتێن بێ ڕامان ژی یێ نەبووی بیت باشترە .
