ئـەختەبۆتـێ گـەندەلیێ ل ئیراقـێ
عزەت یوسف
رەنج مەزاختن ژ بۆ توخیب دانانا گەندەلیێ، دڤێت ژ سەرێن بلند بهێتە دەستپێكرن، كەسەك ژێ نەهێتە ڤەدەركرن، بلا هەر ناڤ و ناڤدارەك و پلە و پۆست هەبیت.. ب هەبوونا گەندلیێ دەستهەلات دكەڤن و وەلات وێران دبن و هەستێ خەلكی بریندار دبیت.
سەرهاتیەكا وێرەكانا ل وەلاتێ ئیتالیا ل سەر نەهێلانا گەندەلیێ روودایە.. دادوەرەك ب ناڤێ (ئەنتونیو دی پیترۆ) هەبوو، كو دژی گەندەلیێ شەڕەكێ بێ یەمان راگەهاند بوو. دادوەری د دەما ڤەكۆلینا خۆ ل سەر ئێك ژ دوسیەیێن ئالۆزێن گەندەلیێ دا، دیار كر كو كەیس یا پەیوەستی هندەك سەرێن مەزنێن سیاسەتمەدارایە. ئەو یێ رژدبوو كو ژ بۆ ڤەكۆلینێ كویر و دویر بچیت و بگەهیتە خالا دوماهیێ. ئەوی هەشت پێ/ئەختەبۆتەك كەشفكر كو هەر پێیەكێ وێ قولاچكەكا ئیتالیا ڤەگرت بوو و كەسانێن ل هەمی ئاست و پلەیان تێدا دەستهەل و پشكدار بوون؛ ژ وەزیر و رێڤەبەر و والی، سەرپەرشت، پۆلیس، پارێزەر، سڤیل و لەشكەر، دیپلۆمات و كارساز و هەڤژین و كوڕ و كچێن وان.. دی پیترۆی بڕیارەك دا بۆ ئەوی دەمی (خۆكوژی) بوو. رابۆ ب دەستەسەركرنا هەمی كەسێن دەست تێدا ل هەمی پلە و پۆستەیان، 5000 كەس گرتن، دناڤ وان دا پتر ژ 1000 زەلامێن دەولەتێ و سیاسەتمەدار بوون، ژ وانە وەزیرێن دەولەتێ، پاشی سەرۆكێن وەزیران كو شیا برەڤیتە تونس و ل وێرێ ما هەتا مری. دی پیترۆی باش دزانی كو یێ شەڕێ وەلاتەكێ تەڤایی ب هەمی رامانا خۆڤە دكەت، لستەكا دیتر ژی ژ دۆژمنكارێن خۆ زێدەكرن ئەو ژی چەتەیێن مافیا یێن مەتڕسیدار بوون، هەتا ل داویێ گەهشتیە رێكخراوێن ماسۆنی ژی. خەلكێ ئیتالیا ل سەرانسەرێ وەلاتی ژ بۆ پشتەڤانیا دی پیترۆی دەركەتن و خۆنیشاندان و خۆشیا خۆ دەربڕین و وەك قارەمانێ نیشتمانی ل قەلەم دان، ناڤی وی بۆ سرودا سەردەڤی و هەتا پشتەڤانێن تەپا پێ ژی ل یاریگەهان ب دەنگێ بلند هتاف ددان: (تە ئەم كرینە خۆدان خەون). دادوەر بۆ ئەفسانەیەكێ زیندی. ڤەكۆلەر تێنەگەهشتن كا ئەو چەوا وێریا ئەڤی كاری بكەت. داویێ دەمێ ژێ پرسین كا چەوا وی ئەڤ كارێ (شێتانە) و حنێربەندی ئەنجام دا، بەرسڤدا كو بڕیارا خۆ دابوو و فیداكرنا گیانێ خۆ ل رەخەكی دانا بوو، چارەنڤێسێ وەلاتی لنك وی سەرپشك و سەر ژ هەر تشتەكێ دی ستاند بوو، ب هزرا كو گەندەلی دەولەتێ دناڤخۆ دا وێران دكەت، لەوا دڤێت د ناڤخۆ دا بهێتە هەلوەشاندن ژی. دی پیترۆ ب سەدەما هەلوەشاندنا سستەمەكێ چل سالی كەتە د دیرۆكا ئیتالیا دا و بۆ سەدەمێ هەلوەشاندنا پارتێن دیرۆكی، ل سەر دەستێ وی ئێكەمین كۆمارا ئیتالیا یا كو پشتی شەڕێ جیهانا دوێ پەیدا بووی نەما و دەستپێكا كۆمارا دوێ هەتا راگەهاندن.
ل ئیراقێ كو نقۆمی گەندەلكاری بوویە.. لێ ل شوینا هەشت پێ، یا چل پێ یە، هەر پێیەك ژی ل كوژیەكا جودا و تژی پارە و سامانە. هەوەكا دەستەسەركرنا چەند كەسێن بەرگۆمانێن گەندەلكار هاتیە ئەنجامدان، ئەڤە دێ چەند بەردەوام بیت نەیا دیارە، لێ كاریگەریا خۆ یا مەزنا سایكۆلۆژی هەیە و هەناسەدانەكا تەنا دایە پڕانیا خەلكی.. هەمی كەساتی و ئالی ژی پشتەڤانی و دلخۆشییا خۆ ب ڤێ هەوا سەرۆك وەزیرێن ئیراقێ گرتیەبەر دەربڕینە كو دبێژیت پارێزەربەندی بۆ كەسێ گەندەل نینە و ب شەڤ و رۆژ دێ ل دویڤ گەڕیێم و ئیراق دێ ژ بەرپەڕەكێ نوی دەستپێكەت. یا ژ هەمیێ سەیرتر هەرچەندە ل ئیراقێ دڤێت سەیراتی نەبیت، گەلەك ژ كەسێن هاتینە دەستەسەر كرن، د هەمی دیدار و هەلكەفتنان دا داخازا شۆرەشەكێ دژی گەندەلیێ كربوون، و هەبووینە كو خۆ ب پاكترین كەس و حەلالخۆری نیشان داینە. تێدا هەبوون خۆ ب خەمخۆر و دلسۆز و جامێر دنیاسین و هەتا سەر هەستی دژی هنارتنا مووچەی بۆ گەلێ كوردستانێ ژی بوون و دكرنە هەوار كو نابیت هیچ بڕە پارەك بهێتە رەوانەكرن، لێ هەر ئەوان بخۆ خۆ ل پشت پەردەیا گەندەلكاریێ پلیپتكانێ ب مال و سامانێ دەولەتێ دكرن. گۆتنەكا نڤیسەرەكا ئەفگانی ئینا بیرا من كو دبێژیت: (سۆزانیەكێ گۆت: گەر ئەز مرم ل سەر كێلیا گوڕێ من بنڤێسن سوزانیەك/لەشفرۆشەك بوو، ب فرۆتنا لەشێ خۆ، ب سەدان پویچەمرۆڤێن ب ناڤ جامێر نیاسین!!). مە ژی كانزایێ راستێ ئەڤان تۆخمە مرۆڤان نیاسین كو چەند د ژەنگینە! راستی نابیت جهێ گەندەلكاران ل سەرێ دیوانێ هەبیت، دڤێت دناڤا زیندان و گرتیخانا دا بیت. دڤێت شەڕێ مان و نەمانێ دژی گەندەلیێ یێ بەردەوام بیت، لێ كی دێ یێ سەركەفتی بیت نە یا دیارە.
هەروەسا ژ ئالیەكێ دی، نە كێم بوون یێن ب خرابی و ژەهراتی بەحسی هەرێما كوردستانێ دكرن و ب بەژن و بالا ئیراقێ دخۆڕین، دگۆتن كوردستان گەندەلخانەیە و ئیراق گۆلخانەیە، لێ ئەڤە ئەو ئیراقە بلا ب چاڤێن شەش ل سەر شەشێ باش تەماشە بكەن!
