عزەت یوسف
سپیندارا مە یا درێژ و ب خەمل و هلدای، رەوشا جینیكێ و ئاڤیێ و هەمی گۆندی، سپیندار یا كاملانی خەملا خۆ بوو، ژ نشكەكێڤە رەنگ و رەوش و خەملا وێ تێكچوو، باڤزەر بوو و بەر بەرە بەلگێن وێ وەریان.. مێوەكا شەبەنگی تاك و شاكێن خۆ تێئالاند بوون و خۆ پێڤە هلاویست بوو، كەپرەكا چلی مازكی ژی ل بن بوو، سەرەكانییەكا ئاڤا زەلال و سازگار ل نێزیك بوو.
كرمێ وێ/كرمێ دارێ لێدا، هناڤێن وێ خلۆلە كرن و دارا وێ پێتی بوو.. هڕ و بایەك رابۆ، سپیندارا مە ژ بنی قڕاند و كرە جەندەك، سپیندار قڕیا و مێو ژی بۆ قوربانی و د گەل دا كەت و ژ رەهوریشالان هاتەدەر، ب سەر كەپرا ئەم د بنڤە دحەویان دا هات و ئەو ژی هڕیا و ب سەرێك دا هات.
هەی كرمێ دارێ، كرمێ ناڤخۆیی، كرمێ جەرگ و هناڤا تۆ چ بەلا سەرێ خۆیی!
جار ب جار، یا ژ دەرڤكی دهێتە دیتن یا جوانە، لێ دناڤدا تشتەك هەیە هێدی هێدی بناغەی دخۆت، دار ب با و بارانێ ناكەڤیت هەكە دناڤدا كرمی نەخوار بیت.
هەكە كرمێ دارێ ژ دارێ نەبیت، مرنا دارێ نینە، هەكە كرمێ ناڤخۆیی ژی ژ ناخێ مرۆڤی و چڤاكێ و تابوورێ پێنجێ نەبیت كەتن نابیت.
كرمی هەردەم دەنگ نینە، ب بێدەنگی دخۆت، ب هێمنی ژناڤ دبەت هەتا ئەم هەمی تنێ قڕیانا دارێ دبینین.
كەفتن و مرۆڤی و وەلاتان ژی ب هەمان ئاوایی روو ددەت، كەفتن ژ دەرڤە دیار دبیت، لێ دناڤدا دەست پێدكەت.
گەلەك سەربۆرێن مێژوویی هەنە، دئیننە بیرا مە، كو كەقتنا گەلەك شارستانییان نە ژ ئەنجامێ هێزێن دەرڤەیە، لێ ژ سەدەمێ بێ دادی لاوازییا سەرەدەرەرییا ناڤخۆیی ب خۆیە كو ب ئاوایەكێ ساخلەم رەفتارێ ناكەت.
كرمێ دارێ و تابۆرێ پێنجێ و چیچكا ویتانی، ئاگرێ دەهمەنێ و ژەنگا ئاسنی و.. هەمی پێكڤە ئاڤێ ل ئاشێ نەمانێ دكەن و گۆرگێن دەولەتا خۆنە.
