ئیرانێ رێککەفتن نەڤێت و دەمی بۆ بەرژەوەندیا خوە بکار دئینیت
محەمەد مەسعودی چاڤدێرێ سیاسی یێ خەلکێ ئیرانێ کو ل ئەمریکا دژیت دیار کر، رەوشا نها ل دەڤەرێ گەلەک ئالۆزە و د هەمان دەمی دا ئیرانێ نەڤێت چو رێککەفتنەکێ بکەت کو ببیتە ئەگەر پێگەهێ وێ لاواز بیت، چونکی پشتی رێککەفتنا لوبنانێ و ئسرائیلێ رەوشەکا دی هاتیە پێش و ئیران هەست ب ڤێ یەکێ دکەت کو ئەمریکا فێل لێ کریە و دخوازیت ب رێیا رێککەفتنەکێ پتر ئیرانێ تەنگاڤ بکەت و ژ بەر ڤێ یەکێ ژی بەرپرسێن ئیرانێ د رەوشا نها دا ناخوازن چو رێککەفتنەکێ ل گەل ئەمریکا ئیمزا بکەن، یا راست نها بەرپرسێن ئیرانێ دەمێ بۆ بەرژەوەندیێن خوە بکار دئینن.
ناڤهاتی ئەو یەک ژی دیار کر، ترامپ ژ هەلوەستێ بەرپرسێن ئیرانێ گەلەک توورە یە و ژ بەر ڤێ یەکێ ژی د چەند رۆژێن بۆری دا ئەمریکا جارەکا دی ئێرشی ئیرانێ کر و ئیرانێ ژی بەرسڤا ئێرشێن ئەمریکا دا.
قارەمان ئەحمەدی چاڤدێرێ سیاسی ژی دیار کر، بەردەوامیا شەڕی و ئالۆزیان د بەرژوەندیا ئیرانێ دایە و ئیرانێ دڤێت ڤێ پەیامێ بدەتە جیهانێ و ب تایبەتی ژی وەلاتێن رۆژهەلاتا ناڤین کو ئەو یا بهێزە و دشێت شەڕێ وەلاتێ هەری بهێز ل جیهانێ بکەت، د هەمان دەمی دا ئیرانێ دڤێت رێککەفتنەکا وەسا بکەت کو پارەیەک زێدە بگەهیتە دەستێ وێ، چونکی نها ئیران د قەیرانەکا گەلەک مەزن دایە و هەکە چەند ملیار دۆلار ژ پارەیێن ئیرانێ یێن ل قەتەرێ بۆ بهێنە ڤەگەراندن دێ ئیران وێ یەکێ وەکو خالەکا بهێز بۆ خوە حساب کەت و ل هەمبەر دا ترامپ ژی نەڤێت جارێ چو پارەیێن بلۆکەکری یێ ئیرانێ بۆ وی وەلاتی بهێنە هنارتن.
هژمارەک زێدە ژ چاڤدێرێن سیاسی ژی وەسا دبینن کو، دناڤ ئیرانێ دا هێزەکا توندرەو هەیە و وان نەڤێت جارێ چو رێککەفتن ل گەل ئەمریکا بهێنە کرن، چونکی هەر رێککەفتنەک د رەوشا نها دا ل گەل ئەمریکا بهێتە کرن دێ بیتە ئەگەر پێگەهێ وێ گرۆپا توندرەو ل ئیرانێ لاواز بیت، ژ بەر ڤێ یەکێ ژی نها ناکۆکیێن گەلەک مەزن د ناڤبەرا بەرپرسێن ئیرانێ دا هەنە و گەلەک ژ وان وەسا دبینن دڤێت شەڕێ ل گەل ئەمریکا و ئسرائیلێ ب توندی بەردەوام نابیت.
ئەو یەک د دەمەکێ دایە کو بەری چەند رۆژان هژمارەک ژ ئەندامێن پەرلەمانێ ئیرانێ ژی دیار کرن، هەر رێککەفتنەک نها بهێتە کرن دێ زیانا خوە یا مەزن بۆ ئیرانێ هەبیت و دڤێت ئیران ب توندی ئێرشی بنگەهێن ئەمریکا ل رۆژهەلاتا ناڤین بکەت.
